ស្រា - La Reine Media

ណាសាបន្ទាន់សម័យសុសវែរសម្រាប់យានអវកាស Voyager ពីចម្ងាយ 19 ពាន់លានគីឡូម៉ែត្រ

ប្រហែល 46 ឆ្នាំ បន្ទាប់ពីយាន Voyager 1 និង 2 របស់ណាសា ចាប់ផ្ដើមដំណើរស្រាវជ្រាវអវកាស សុសវែរដែលមានវ័យចំណាស់លើយានទាំងនេះក៏បន្តត្រូវបានបន្ទាន់សម័យពីចម្ងាយ។

ក្រុមវិស្វករបន្ទាន់សម័យ និងជួសជុលសុសវែរក្នុងបំណងគ្រប់គ្រងទិន្នន័យខុសឆ្គងដែលយាន Voyager 1 បានចាប់ផ្ដើមបញ្ជូនមកតាំងពីឆ្នាំមុន។ ការបន្ទាន់សម័យមួយចំនួនទៀតគឺធ្វើឡើងក្នុងគោលដៅទប់ស្កាត់វត្ថុធាតុកខ្វក់ដែលប្រមូលផ្ដុំនៅលើម៉ាស៊ីនរុញច្រានរបស់យាន។ ការបន្ទាន់សម័យខាងលើនឹងជួយឱ្យយានអវកាសរក្សាទំនាក់ទំនងជាមួយផែនដីបានយូរបំផុតតាមដែលអាចធ្វើទៅបាន។ នេះបើតាម Space ចុះផ្សាយកាលពីថ្ងៃទី 23 តុលា 2023។

កាលពីខែឧសភា 2022 ណាសាចាប់ផ្ដើមទទួលទិន្នន័យគ្មានតម្លៃពីប្រព័ន្ធបញ្ជា និងបង្វែរទិស (AACS) នៅលើយាន Voyager 1 ដែលមានតួនាទីជួយរក្សាអង់តែងរបស់យាននេះតម្រង់មកចំផែនដី។ លទ្ធផលនៃការត្រួតពិនិត្យបង្ហាញថា ហាដវែររបស់ AACS នៅតែដំណើរការល្អ ប៉ុន្តែដោយសារបញ្ហាដែលមិនទាន់ដឹងច្បាស់ AACS បញ្ជូនទិន្នន័យរបស់វាទៅតាមកុំព្យូទ័រមួយដែលមិនប្រើប្រាស់នៅលើយាន បណ្ដាលឱ្យទិន្នន័យប្រែជាមានភាពមិនត្រឹមត្រូវ។

យ៉ាងណាក៏ដោយ ការជួសជុលកំហុសឆ្គងត្រូវបានរំពឹងថាអាចដោះស្រាយដើមហេតុនៃបញ្ហា បន្ទាប់ពីការបញ្ជូនទិន្នន័យទៅកាន់យាន Voyager 1 ដើម្បីធ្វើការបន្ទាន់សម័យក្នុងរយៈពេលជាង 20 ម៉ោង ត្រូវបានបញ្ចប់។

យានអវកាស Voyager 1 និង 2 របស់ណាសា ដែលត្រូវបានបាញ់បង្ហោះមុនក្រោយគ្នា 16 ថ្ងៃ ក្នុងឆ្នាំ 1977 ដើមឡើយត្រូវបានរចនាឡើងដើម្បីអាចបំពេញបេសកកម្មបាន 5 ឆ្នាំតែប៉ុណ្ណោះ។ យានទាំងនេះអាចបង្វែរទិសរបស់អង់តែនដោយស្វ័យប្រវត្ត តាមរយៈការបញ្ឆេះម៉ាស៊ីនរុញច្រាន។ ក៏ប៉ុន្តែ ការបញ្ឆេះម៉ាស៊ីនរាល់លើកគឺសុទ្ធតែបន្សល់វត្ថុធាតុមួយស្រទាប់នៅលើបំពង់បញ្ចូលឥន្ធនៈ។ ក្រុមវិស្វករបារម្ភថា បំពង់នេះអាចនឹងត្រូវស្ទះឆាប់ៗនេះ ដូច្នេះ ក្នុងខែកញ្ញា និងតុលា 2023 ពួកគេចាប់ផ្ដើមទុកឱ្យយានវិលច្រើនជាងមុន ដើម្បីកាត់បន្ថយការបញ្ឆេះម៉ាស៊ីន។ បើសិនជោគជ័យ ការកែប្រែនេះនឹងជួយឱ្យយានបន្តដំណើរការបានយ៉ាងហោច 5 ឆ្នាំទៀត៕

October 24, 2023

អង់គ្លេសពិសោធការផលិតខ្លាញ់សិប្បនិម្មិតបណ្ដុះពីកោសិកាជ្រូក

សាច់សិប្បនិម្មិត មកដល់ពេលនេះនឹងត្រូវតែមានទាំងសាច់ ទាំងខ្លាញ់ លាយឡំគ្នា ដើម្បីឱ្យមានឱជារសជាងមុន។ នេះគឺជាគោលដៅនៃការពិសោធដែលកំពុងត្រូវបានក្រុមហ៊ុនបច្ចេកវិទ្យាជីវសាស្ត្រមួយនៅប្រទេសអង់គ្លេស ផ្ដោតការយកចិត្តទុកដាក់អនុវត្ត។

បន្ទប់ពិសោធន៍ Hoxton Farms កំពុងផ្ដោតការយកចិត្តទុកដាក់លើការផលិតខ្លាញ់សិប្បនិម្មិតដែលមានរចនាសម្ព័ន្ធ និងសមាសធាតុដូចទៅនឹងខ្លាញ់សត្វ។

កន្លងមកនេះ សាច់សិប្បនិម្មិតដែលត្រូវបានផលិតឡើងក្នុងបន្ទប់ពិសោធន៍ មានដូចជាសាច់មាន់ និងសាច់គោជាដើម គឺសុទ្ធតែជាសាច់សុទ្ធ។ ចំណែកលើកនេះ បន្ទប់ពិសោធន៍ Hoxton Farms កំពុងបណ្ដុះកោសិកាខ្លាញ់ពីសត្វជ្រូក។

ក្រុមអ្នកស្រាវជ្រាវក៏កំពុងរកវិធីដើម្បីបញ្ចុះតម្លៃរបស់ផលិតផលសាច់សិប្បនិម្មិតផងដែរ។ នំប៉័ងហែមបឺរហ្គើរកៀបសាច់គោសិប្បនិម្មិតដំបូងគេលើពិភពលោកកាលពីដប់ឆ្នាំមុន មានតម្លៃប្រហែល 330 ដុល្លារអាម៉េរិក។ ក៏ប៉ុន្តែ បច្ចុប្បន្ននំប៉័ងសាំងវិចសាច់មាន់សិប្បនិម្មិតដែលកំពុងត្រូវបានដាក់លក់នៅប្រទេសសិង្ហបុរី មានតម្លៃប្រហែលតែ 13 ដុល្លារប៉ុណ្ណោះ៕

October 23, 2023

ពិភពលោករកចំណូលបន្ថែមបាន 250 ពាន់លានដុល្លារ បើសិនក្រុមមហាសេដ្ឋីត្រូវបានយកពន្ធអប្បបរមា

គម្រោងស្រាវជ្រាវ EU Tax Observatory បានរកឃើញថា ប្រទេសនានានឹងមានប្រាក់ចំណូលបន្ថែមរាប់រយពាន់លានដុល្លារជារៀងរាល់ឆ្នាំ បើសិនយកពន្ធអប្បបរមា 2% នៅទូទាំងសកលលោកចំពោះក្រុមមហាសេដ្ឋី។

នៅក្នុងលទ្ធផលនៃការសិក្សាស្រាវជ្រាវដែលបានចុះផ្សាយនាថ្ងៃទី 23 តុលា 2023 EU Tax Observatory យល់ថា ដោយគ្រាន់តែយកពន្ធ 2% ចំពោះទ្រព្យសម្បត្តិជិត 13 ទ្រីលាន (13,000,000,000,000) ដុល្លារអាម៉េរិក របស់មហាសេដ្ឋី 2,700 នាក់នៅទូទាំងផែនដី ពិភពលោកនឹងមានប្រាក់ចំណូលបន្ថែម 250 ពាន់លានដុល្លារជារៀងរាល់ឆ្នាំ។ បច្ចុប្បន្ន ជាក់ស្ដែង អត្រាពន្ធលើប្រាក់ចំណូលបុគ្គលរបស់ក្រុមមហាសេដ្ឋី គឺទាបជាងឆ្ងាយ បើធៀបនឹងក្រុមដទៃ ដោយសារតែពួកគេអាចទុកដាក់ទ្រព្យទៅក្នុងបណ្ដាក្រុមហ៊ុនដែលមានតែឈ្មោះ ដើម្បីគេចពន្ធ។

ស្ថាប័នខាងលើបានរកឃើញថា ប្រាក់ចំណូលពីការបង់ពន្ធធៀបនឹងប្រាក់ចំណូលរបស់មហាសេដ្ឋីអាម៉េរិក គឺប្រហែលតែ 0.5% ប៉ុណ្ណោះ។ នៅបណ្ដាប្រទេសដូចបារាំងជាដើម អត្រានេះគឺប្រហែល 0%។

EU Tax Observatory ឱ្យដឹងថា ការប្រឹងប្រែងដើម្បីយកពន្ធលើទ្រព្យរបស់ក្រុមអ្នកមានជាងគេនៅទូទាំងសកលលោកនឹងត្រូវចំណាយពេលច្រើនឆ្នាំទៀត។ ក៏ប៉ុន្តែ ពួកគេនៅតែមានក្ដីសង្ឃឹម បើទោះមានការលំបាកក្នុងការកំណត់តម្លៃមូលធនរបស់ក្រុមហ៊ុនឯកជន៕

October 23, 2023

ឥណ្ឌាធ្វើតេស្តយានអវកាសដឹកមនុស្សជាលើកដំបូង

កាលពីថ្ងៃទី 21 តុលា ឥណ្ឌាបានសាកល្បងបាញ់បង្ហោះដោយជោគជ័យជាលើកដំបូងចំពោះយានអវកាស Gaganyaan ដែលអភិវឌ្ឍឡើងដើម្បីដឹកអ្នកអវកាសបីរូប។

ការបាញ់បង្ហោះសាកល្បងកាលពីម្សិលមិញ ធ្វើឡើងក្នុងបំណងវាយតម្លៃប្រព័ន្ធរំដោះគ្រោះបន្ទាន់របស់ម៉ូឌុលដឹកមនុស្ស។ ម៉ូឌុលនេះបានផ្ដាច់ខ្លួនពីម៉ាស៊ីនរុញច្រាន និងចុះចតថ្នមៗនៅលើសមុទ្រ ក្រោយពីត្រូវបានបាញ់បង្ហោះប្រហែល 10 នាទី។

តាមផែនការ អង្គការស្រាវជ្រាវអវកាសឥណ្ឌា (ISRO) នឹងធ្វើតេស្តធំៗប្រមាណម្ភៃដងទៀត មុននឹងអនុញ្ញាតឱ្យយាន Gaganyaan នាំយកអវកាសចរបីរូប ឡើងទៅកាន់គន្លងតារាវិថីផែនដីនៅឆ្នាំ 2025។

October 22, 2023

ថៃកំពុងពិនិត្យគម្រោងវិនិយោគតម្លៃ 27 ពាន់លានដុល្លារ ដើម្បីជំរុញកំណើនសេដ្ឋកិច្ច

ប្រទេសថៃកំពុងតែវាយតម្លៃលើគម្រោងប្រកបដោយមហិច្ឆតាក្នុងការស្ថាបនាផ្លូវគោក និងផ្លូវដែក តភ្ជាប់រវាងសមុទ្រ Andaman និងឈូងសមុទ្រថៃ។

យោងតាម Reuters នាយករដ្ឋមន្ត្រីថៃឱ្យដឹងថា ប្រទេសនេះកំពុងវាយតម្លៃលើគម្រោងដ៏ធំមួយនៅភាគខាងត្បូងប្រទេស រួមមានបណ្ដាខ្ទង់វិនិយោគដែលមានតម្លៃមួយទ្រីលានបាត (27.44 ពាន់លានដុល្លារអាម៉េរិក) ដើម្បីជំរុញកំណើនសេដ្ឋកិច្ច និងពាណិជ្ជកម្មទូទាំងសកលលោក។

ការស្រាវជ្រាវមួយរបស់រាជរដ្ឋាភិបាលថៃ បានឱ្យដឹងថា ការដេញថ្លៃ និងការស្ថាបនានឹងចាប់ផ្ដើមពីឆ្នាំ 2025 អាចបង្កើតការងារបានប្រហែល 280,000 កន្លែង នៅខេត្ត Ranong និង Chumpon។

នាយកដ្ឋានផែនការថៃ បានគណនាឃើញថា គម្រោងខាងលើនេះអាចជំរុញកំណើនសេដ្ឋកិច្ចថៃឡើងដល់ 5.5% ជារៀងរាល់ឆ្នាំ។

សេដ្ឋកិច្ចថៃត្រូវបានព្យាករថានឹងមានកំណើន 2.8% ក្នុងឆ្នាំនេះ និង 4.4% ក្នុងឆ្នាំ 2024។

នាយករដ្ឋមន្ត្រីថៃ លោក Srettha Thavisin សង្កត់ធ្ងន់ថា គម្រោងនេះខាងលើនេះនឹងជាការតភ្ជាប់សំខាន់នៅក្នុងការដឹកជញ្ជូនទំនិញរវាងប្រទេសឥណ្ឌា មជ្ឈិមបូព៌ា និងទ្វីបអាហ្វ្រិក។

ដំណាក់កាលដំបូងរបស់គម្រោងនេះគ្រោងនឹងរួចរាល់នៅឆ្នាំ 2030 និងអាចដឹកជញ្ជូនទំនិញតាមកុងតឺន័របាន 10 លាន TEU ហើយអាចសម្រេចបាន 40 លាន TEU នៅឆ្នាំ 2039៕

October 19, 2023

Kia ដាក់គោលដៅលើរថយន្តអគ្គិសនីខ្នាតតូចដើម្បីបង្កើនការលក់

ក្រុមហ៊ុន Kia បានបង្ហាញរថយន្តអគ្គិសនីខ្នាតតូចល្មម និងតូចចំនួនបីម៉ូដែល ក្នុងបំណងលក់ឱ្យបានមួយលានគ្រឿងជារៀងរាល់ឆ្នាំនៅឆ្នាំ 2026 និងឡើងដល់ 1.6 លានគ្រឿងនៅឆ្នាំ 2030។

Kia បានឱ្យដឹងថា ពួកគេកំណត់គោលដៅផ្គត់ផ្គង់រថយន្តអគ្គិសនីច្រើនប្រភេទប្រកបដោយភាពសម្បូរបែប ដែលមានតម្លៃចាប់ពី 30,000 ដល់ 80,000 ដុល្លារអាម៉េរិក ក្នុងនោះក៏រួមទាំងបណ្ដាម៉ូដែលដែលមាននាបច្ចុប្បន្នដូច EV6 និង EV9 ក៏ដូចជាបណ្ដាម៉ូដែលថ្មីដែលមានទំហំតូចជាង នៅក្នុងប្រភេទរថយន្ត compact និង subcompact (C និង B) មានជាអាទិ៍ EV5, EV4 និង EV3។

រថយន្តទាំងនេះនឹងមានតម្លៃចាប់ពី 35,000 ដល់ 50,000 ដុល្លារអាម៉េរិក ដែលនេះត្រូវបាន Kia រំពឹងថា នឹងជួយជំរុញការលក់ និងពង្រីកវិសាលភាពនៃការប្រើប្រាស់រថយន្តអគ្គិសនីនៅទូទាំងពិភពលោក។ រថយន្តអគ្គិសនី EV2 ខ្នាតតូចដែលជិតនឹងបង្ហាញខ្លួននឹងមានតម្លៃទាបជាងតម្លៃខាងលើ។

Kia ក៏បានប្រកាសឱ្យដឹងអំពីយុទ្ធសាស្ត្ររបស់ខ្លួនសម្រាប់រថយន្តអគ្គិសនី ក្នុងនោះក៏មានទាំងការកែលំអផាសុកភាព និងទំនុកចិត្តរបស់អតិថិជនផងដែរ ទន្ទឹមនឹងដំណោះស្រាយលើបញ្ហាហេដ្ឋារចនាសម្ព័ន្ធដែលទាក់ទងនឹងការបញ្ចូលថាមពលសម្រាប់រថយន្តអគ្គិសនី៕

October 17, 2023

រដ្ឋមន្ត្រីការពារជាតិអ៊ីស្រាអែលប្រកាសថានឹង «លុបបំបាត់ក្រុមហាម៉ាស»

រដ្ឋមន្ត្រីក្រសួងការពារជាតិអ៊ីស្រាអែល Gallant ប្រកាសថា កងទ័ពអ៊ីស្រាអែលនឹង «លុបបំបាត់ហាម៉ាសពីផែនដី បន្ទាប់ពីក្រុមនេះបានវាយប្រហារប្រជាពលរដ្ឋនៅលើទឹកដីអ៊ីស្រាអែល។

«ជនជាតិជ្វីហ្វ (Jewish) មិនធ្លាប់ទទួលរងអំពើឃោរឃៅបែបនេះរាប់ចាប់តាំងពីឆ្នាំ 1945» រដ្ឋមន្ត្រីក្រសួងការពារជាតិអ៊ីស្រាអែល Yoav Gallant ថ្លែងលើកញ្ចក់ទូរទស្សន៍កាលពីថ្ងៃទី 11 តុលា ទាក់ទងនឹងការវាយប្រហាររបស់ក្រុមហាម៉ាសប៉ាលេស្ទីនកាលពីថ្ងៃទី 07 តុលា។

លោក Gallant បន្ថែមថា «យើងនឹងលុបបំបាត់ពួកគេពីផ្ទៃផែនដី។ ពួកគេនឹងលែងមានវត្តមាន។ នឹងមិនមានទិដ្ឋភាពកុមារអ៊ីស្រាអែលត្រូវរងការសម្លាប់ ហើយយើងទាំងអស់គ្នានឹងអាចបន្តការងាររបស់ខ្លួន»។

នាយករដ្ឋមន្ត្រី Benjamin Netanyhu ដែលថ្លែងរួមគ្នាជាមួយនឹងលោក Gallant ក៏បង្ហាញបំណង «កម្ទេច» ក្រុមហាម៉ាស ជាលើកដំបូងផងដែរ។ លោក Netanyahum បានប្រដូចក្រុមហាម៉ាសទៅនឹងក្រុមរដ្ឋអ៊ីស្លាម (IS) និងប្រកាសថា នឹង «កិនកម្ទេចពួកនេះ»។

ការប្រយុទ្ធគ្នារវាងកងទ័ពអ៊ីស្រាអែល និងក្រុមហាម៉ាសប៉ាលេស្ទីននៅក្នុងប៉ុន្មានថ្ងៃកន្លងទៅនេះបានសម្លាប់មនុស្សប្រហែល 2,300 នាក់ និងបង្ករបួសដល់មនុស្សជាង 8,000 នាក់៕

October 12, 2023

តំណាងរាស្ត្រអ៊ីស្រាអែលស្នើឱ្យប្រើអាវុធប្រល័យលោកលើហាម៉ាស

លោកស្រី Revital Gotliv ដែលជាតំណាងរាស្ត្រមកពីបក្សកាន់អំណាចនៅប្រទេសអ៊ីស្រាអែល បានអំពាវនាវឱ្យមានការប្រើប្រាស់មីស៊ីលបំពាក់ក្បាលគ្រាប់នុយក្លេអែរឆ្លើយតបនឹងក្រុមហាម៉ាស ដើម្បីស្ដារសន្តិសុខជាតិ។

«ចូរប្រើប្រាស់មីស៊ីល Jericho! គំនិតរបស់ខ្ញុំគឺថា ចូរប្រើប្រាស់អាវុធប្រល័យលោក! សូមព្រះថែរក្សាការពារកម្លាំងរបស់យើង» លោកស្រី Revital Gotliv តំណាងរាស្ត្រមកពីបក្សកាន់អំណាចរបស់នាយករដ្ឋមន្ត្រី Benjamin Netanyahu កាលពីថ្ងៃទី 09 តុលា បានសរសើរលើបណ្ដាញសង្គម X ដូច្នេះ។

Jericho គឺជាមីស៊ីលអន្តរទ្វីប (ICBM) របស់ប្រទេសអ៊ីស្រាអែល ដែលអាចវាយប្រហារលើគ្រប់តំបន់ក្នុងពិភពលោក។ អ៊ីស្រាអែលត្រូវបានគេជឿថា មានក្បាលគ្រាប់នុយក្លេអែរពី 100 ទៅ 200 គ្រាប់ ប៉ុន្តែរដ្ឋាភិបាលប្រទេសនេះមិនបានទទួលស្គាល់ ឬបដិសេធព័ត៌មាននេះ។

លោកស្រី Revital Gotliv បន្តថា «អ៊ីស្រាអែលត្រូវតែប្រើប្រាស់អាវុធគ្រប់ធុនដែលមាននៅក្នុងឃ្លាំងរបស់ខ្លួន»។

មតិរបស់លោកស្រី Revital Gotliv ត្រូវបានលើកឡើងនៅប៉ុន្មានថ្ងៃបន្ទាប់ពីហាម៉ាស ដែលជាក្រុមប្រដាប់អាវុធកំពុងគ្រប់គ្រងតំបន់ហ្គាហ្សា កាលពីថ្ងៃទី 07 តុលា បានបាញ់មីស៊ីលរាប់ពាន់គ្រាប់ និងប្រើប្រាស់កម្លាំងជើងគោក អាកាស និងជើងទឹក វាយប្រហារស្របគ្នាលើទីរួមស្រុក និងតំបន់រស់នៅនានារបស់ប្រទេសអ៊ីស្រាអែល បណ្ដាលឱ្យមនុស្សជាង 1,000 នាក់បាត់បង់ជីវិត។

កងទ័ពអ៊ីស្រាអែលបានឆ្លើយតបដោយការប្រកាសសង្គ្រាម វាយប្រហារតាមអាកាសលើគោលដៅនៅតំបន់ហ្គាហ្សា និងដាក់ពង្រាយកម្លាំងរាប់ពាន់នាក់ឡោមព័ទ្ធតំបន់នេះ។ ក៏ប៉ុន្តែ លោកស្រី Gotliv យល់ថា កងទ័ពអ៊ីស្រាអែលត្រូវតែធ្វើសកម្មភាពឱ្យបានខ្លាំងក្លាជាងនេះ៕

October 11, 2023

តម្លៃប្រេងឆៅ និងមាសរងឥទ្ធិពលធ្ងន់ធ្ងរពីសង្គ្រាមហាម៉ាស – អ៊ីស្រាអែល

សង្គ្រាមរវាងអ៊ីស្រាអែល និងចលនាហាម៉ាស ជាកងកម្លាំងប្រដាប់អាវុធកំពុងកាន់កាប់តំបន់ហ្គាហ្សា ដែលបានផ្ទុះឡើង កំពុងតែជាកត្តាសំខាន់គាំទ្រដល់តម្លៃប្រេងឆៅ និងមាស ព្រោះថា នេះជាទ្រព្យសុវត្ថិភាពសម្រាប់អ្នកវិនិយោគ នៅពេលតម្លៃភាគហ៊ុន មូលបត្របំណុលតែងតែប្រែប្រួលជាអវិជ្ជមានដោយសារឥទ្ធិពលនៃភូមិសាស្ត្រនយោបាយ។

នៅទ្វីបអាស៊ី ក្នុងការជួញដូរនាព្រឹកថ្ងៃទី 09 តុលា 2023 តម្លៃប្រេងឆៅ Brent បានកើន 4.7% ឡើងដល់ 86.65 ដុល្លារអាម៉េរិក/ធុងបារ៉ែល គ្រាដែលតម្លៃប្រេងឆៅ WTI ក៏កើន 4.5% ឡើងដល់ 88.39 ដុល្លារ/ធុង។

ក្រុមអ្នកវិភាគរបស់ធនាគារ ANZ Bank អះអាងថា ហានិភ័យផ្នែកភូមិសាស្ត្រនយោបាយកើនឡើងនៅមជ្ឈិមបូព៌ានឹងគាំទ្រដល់តម្លៃប្រេងឆៅ ដោយវានឹងប្រែប្រួលខ្លាំងជាងនេះក្នុងពេលដ៏ខ្លីខាងមុខ។ ចំណែកធនាគារ CBA របស់អូស្ត្រាលីវិញ យល់ថា កត្តានានាដែលបាន និងកំពុងកើតឡើងនឹងអាចរុញតម្លៃប្រេងឆៅ Brent អនាគត ឡើងលើសពី 100 ដុល្លារ/ធុង ក្នុងរយៈពេលខ្លី។

រីឯមាសវិញ តម្រូវការរបស់ពិភពលោកបានចាប់ផ្ដើមកើនឡើង ធ្វើឱ្យតម្លៃរបស់លោហធាតុនេះកើន 0.8% ឡើងដល់ 1,848 ដុល្លារ/អោន ដែលមួយអោន (ounce) ស្មើនឹង 8.29426 ជី។

ក្រុមអ្នកជំនាញអះអាងថា ហេតុដែលនាំឱ្យតម្លៃមាសកើនឡើងបើទោះមូលបត្របំណុល និងរូបិយប័ណ្ណដុល្លារអាម៉េរិកឡើងថ្លៃ ក៏ព្រោះតែសង្គ្រាមអ៊ីស្រាអែល – ហាម៉ាស (ប៉ាលេស្ទីន) ដែលបានផ្ទុះឡើងកាលពីថ្ងៃទី 07 តុលាកន្លងទៅ។ ការកើនឡើងនៃភាពតានតឹងផ្នែកភូមិសាស្ត្រនយោបាយនឹងជះឥទ្ធិពលដល់សកម្មភាពសេដ្ឋកិច្ចពិភពលោក ដោយសារថា ប្រភពផ្គត់ផ្គង់ទំនិញជាច្រើនត្រូវអាក់ខាន៕

October 9, 2023

អាម៉េរិក រុស្ស៊ី ចិន ខ្វែងគំនិតគ្នារឿងសង្គ្រាមអ៊ីស្រាអែល – ហាម៉ាស

សហរដ្ឋអាម៉េរិក រុស្ស៊ី និងចិន យល់ឃើញផ្ទុយគ្នានៅពេលក្រុមប្រឹក្សាសន្តិសុខកោះប្រជុំបន្ទាន់ ពិភាក្សាអំពីសង្គ្រាមរវាងអ៊ីស្រាអែល និងកងទ័ពហាម៉ាសរបស់ប៉ាលេស្ទីន។

សមាជិកចំនួន 15 របស់ក្រុមប្រឹក្សាសន្តិសុខនៃអង្គការសហប្រជាជាតិ កាលពីថ្ងៃទី 08 តុលា បានបើកកិច្ចប្រជុំបន្ទាន់រយៈពេលប្រហែល 90 នាទី នៅទីស្នាក់ការកណ្ដាលនៃអង្គការសហប្រជាជាតិនៅបុរីនីវយ៉ាក ដើម្បីស្ដាប់បេសកជនសន្តិភាពមជ្ឈិមបូព៌ា រាយការណ៍អំពីស្ថានការណ៍សង្គ្រាមហាម៉ាស – អ៊ីស្រាអែល។

ក្នុងកិច្ចប្រជុំបិទទ្វារ អាម៉េរិកបានអំពាវនាវឱ្យមានការថ្កោលទោសខ្លាំងក្លាទៅលើយុទ្ធនាការវាយប្រហាររបស់ក្រុមហាម៉ាសសំដៅលើអ៊ីស្រាអែលកាលពីថ្ងៃទី 07 តុលា។ «ប្រទេសមួយចំនួនបានថ្កោលទោសហាម៉ាស ប៉ុន្តែមិនមែនទាំងអស់» ឯកអគ្គរដ្ឋទូតរងអាម៉េរិកនៅអង្គការសហប្រជាជាតិ លោក Robert Wood បានប្រាប់ក្រុមអ្នកសារព័ត៌មានបន្ទាប់ពីកិច្ចប្រជុំនោះដូច្នេះ។

«គ្រប់គ្នាអាចស្មានបានថា អ្នកណាខ្លះដែលមិនថ្កោលទោសហាម៉ាស ដោយមិនចាំបាច់បញ្ចេញឈ្មោះ» លោក Wood បន្ថែមដូច្នេះ ដែលហាក់ចង់សំដៅទៅលើរុស្ស៊ី។

ក្រុមអ្នកការទូតឱ្យដឹងថា ក្រុមប្រឹក្សាសន្តិសុខ ទំនងជានឹងមិនចេញសេចក្ដីថ្លែងការណ៍រួមនៅក្រោយកិច្ចប្រជុំបន្ទាន់នេះ។ សេចក្ដីថ្លែងការណ៍រួមត្រូវការមតិយល់ស្របពីសមាជិកទាំង 15 របស់ក្រុមប្រឹក្សាសន្តិសុខ ខណៈដែលឯកអគ្គរដ្ឋទូតរងអាម៉េរិក លោក Wood ឱ្យដឹងថា នេះមិនមែនជាអាទិភាពរបស់អាម៉េរិកនាពេលបច្ចុប្បន្ន។

សហរដ្ឋអាម៉េរិកប្រកាសគាំទ្រអ៊ីស្រាអែល ថ្កោលទោសហាម៉ាស និងអំពាវនាវឱ្យក្រុមប្រឹក្សាសន្តិសុខថ្កោលទោសផងដែរ គ្រាដែលចិន និងរុស្ស៊ី មិនយល់ស្របនឹងការយល់ឃើញរបស់អាម៉េរិក។

កងកម្លាំងប្រដាប់អាវុធហាម៉ាសរបស់ប៉ាលេស្ទីនដែលគ្រប់គ្រងតំបន់ហ្គាហ្សា (Gaza) កាលពីថ្ងៃទី 07 តុលា បានបាញ់ស្រោចរ៉ុក្កែតរាប់ពាន់គ្រាប់ និងវាយសម្រុកព្រមគ្នាតាមផ្លូវគោក ផ្លូវអាកាស ផ្លូវទឹកទៅលើទឹកដីអ៊ីស្រាអែល។

រដ្ឋាភិបាលអ៊ីស្រាអែល ក្នុងថ្ងៃដដែលនោះក៏បានប្រកាសសង្គ្រាម ចេញបញ្ជាឱ្យទ័ពអាកាសបើកការវាយប្រហារដោយយន្តហោះចម្បាំងរាប់សិបគ្រឿងទៅលើគោលដៅនានានៅតំបន់ហ្គាហ្សា។

ភាគីអ៊ីស្រាអែល កាលពីថ្ងៃទី 09 តុលាបានឱ្យដឹងថា ប្រជាជនប្រទេសនេះជាង 700 នាក់បានស្លាប់ រាប់ចាប់តាំងពីហាម៉ាសបើកការវាយប្រហារ។ ចំណែកភាគីគ្រប់គ្រងតំបន់ហ្គាហ្សាវិញ រាយការណ៍ថា មនុស្សយ៉ាងតិច 413 នាក់បានស្លាប់នៅក្នុងតំបន់នេះ៕

October 9, 2023

Tag: ស្រា