វិទ្យាសាស្ត្រ - La Reine Media

យានអវកាស Voyager 1 ជួបបញ្ហា ពេលស្ថិតនៅចម្ងាយ 24 ពាន់លានគីឡូម៉ែត្រពីផែនដី

បច្ចុប្បន្ន ទិន្នន័យតែមួយគត់ដែលយានអវកាស Voyager 1 បញ្ជូនមកកាន់ផែនដី គឺលេខ 1 និងលេខ 0 ហើយក្រុមការងាររបស់ណាសា អាចនឹងត្រូវចំណាយពេលច្រើនសប្ដាហ៍ដើម្បីដោះស្រាយបញ្ហានេះ។

យោងតាមទំព័រ Space ដែលបានចុះផ្សាយកាលពីថ្ងៃទី 12 ធ្នូ យាន Voyager 1 របស់ណាសា បច្ចុប្បន្នមិនអាចបញ្ជូនទិន្នន័យវិទ្យាសាស្ត្រ ឬទិន្នន័យទាក់ទងនឹងប្រព័ន្ធរបស់យាននេះ មកកាន់ផែនដី។ យានដែលមានអាយុ 46 ឆ្នាំមួយគ្រឿងនេះ អាចទទួលបញ្ជា ប៉ុន្តែ បញ្ហាខាងលើទំនងជាកើតចេញពីកុំព្យូទ័ររបស់យាន។

ណាសាឱ្យដឹងថា ប្រព័ន្ធទិន្នន័យហោះហើរ (FDS) របស់ Voyager 1 ដែលមានតួនាទីប្រមូលព័ត៌មាន និងទិន្នន័យបច្ចេកទេសពីឧបករណ៍វិទ្យាសាស្ត្រនៅលើយាន មិនអាចភ្ជាប់ទំនាក់ទំនងដូចមុន ជាមួយនឹងប្រព័ន្ធបញ្ជាពីចម្ងាយនៅលើផែនដី។

ពេលដំណើរការធម្មតា FDS រៀបចំដាក់ព័ត៌មានរបស់យានទៅក្នុងកញ្ចប់ទិន្នន័យ រួចបញ្ជូនមកកាន់ផែនដីតាមរយៈ TMU (telecommunications unit) ។ ថ្មីៗនេះ កញ្ចប់ទិន្នន័យនេះបានជាប់គាំង និងបញ្ជូនតែលេខ 1 និងលេខ 0 ម្ដងហើយម្ដងទៀត។ ក្រុមបច្ចេកទេសរបស់ Voyager គិតថា បញ្ហាកើតចេញពី FDS ប៉ុន្តែ ពួកគេប្រហែលជាត្រូវចំណាយពេលច្រើនសប្ដាហ៍ ទើបរកឃើញដំណោះស្រាយ។

នេះមិនមែនជាបញ្ហាដំបូងដែលយាន Voyager 1 បានជួបប្រទះនាប៉ុន្មានឆ្នាំចុងក្រោយនេះ។ យានអវកាសនេះធ្លាប់ជួបបញ្ហាប្រព័ន្ធបញ្ជា និងកំណត់ទិស (AACS) កាលពីខែឧសភា ឆ្នាំ 2022 និងបញ្ជូនទិន្នន័យដែលគ្មានន័យក្នុងរយៈពេលច្រើនខែ មុននឹងត្រូវបានដោះស្រាយ៕

December 13, 2023

ទំហំពាណិជ្ជកម្មកម្ពុជា – វៀតណាម សម្រេចបានជិត 8 ពាន់លានដុល្លារអាម៉េរិក ក្នុង 11 ខែដំបូងនៃឆ្នាំ 2023

នៅក្នុងជំនួបរវាង ក្រសួងឧស្សាហកម្ម ពាណិជ្ជកម្មវៀតណាម និងក្រសួងពាណិជ្ជកម្ម ក្រសួងឧស្សាហកម្ម វិទ្យាសាស្ត្រ និងនវានុវត្តន៍ (វ.ប.ន) របស់ កម្ពុជា ភាគីទាំងពីរបានឯកភាពនឹងគ្នាថា ក្នុងរយៈពេលកន្លង កិច្ចសហប្រតិបត្តិការក្នុងវិស័យពាណិជ្ជកម្ម ឧស្សាហកម្មទ្វេភាគី រវាង កម្ពុជា និង វៀតណាម មានវឌ្ឍនភាពគួរឱ្យកត់សម្គាល់។

នាថ្ងៃទី 12 ខែធ្នូ ឆ្នាំ 2023 នៅ រដ្ឋធានីហាណូយ ប្រទេសវៀតណាម លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម និងឯកឧត្ដម ហែម វណ្ណឌី រដ្ឋមន្ត្រីក្រសួង វ.ប.ន របស់ កម្ពុជា បានអញ្ជើញចូលជួបពិភាក្សាការងារជាមួយនឹងលោក ង្វៀន ហុងយាន រដ្ឋមន្តីក្រសួងឧស្សាហកម្ម ពាណិជ្ជកម្មវៀតណាម ក្នុងឱកាសនៃដំណើរទស្សនកិច្ចរបស់សម្ដេច ហ៊ុន ម៉ាណែត។

នៅក្នុងជំនួបនេះ សមាសភាគីទាំងពីរបានឯកភាពនឹងគ្នាថា ក្នុងរយៈពេលកន្លង កិច្ចសហប្រតិបត្តិការក្នុងវិស័យពាណិជ្ជកម្ម ឧស្សាហកម្មទ្វេភាគី រវាង កម្ពុជា និង វៀតណាម មានវឌ្ឍនភាពគួរឱ្យកត់សម្គាល់។ ក្រោយពីសម្រេចបាន និងឆ្លងផុតគោលដៅ 5 ពាន់លានដុល្លារអាម៉េរិកកាលពីឆ្នាំ 2019 ទំហំពាណិជ្ជកម្មកម្ពុជា – វៀតណាម ក៏បន្តសម្រេចបាន 9.54 ពាន់លានដុល្លារនៅក្នុងឆ្នាំ 2021 ដោយបានកើន 79.1% បើធៀបនឹងឆ្នាំ 2020។ ឆ្នាំ 2022 ទំហំពាណិជ្ជកម្មនេះបានកើនជិតដល់ 11 ពាន់លានដុល្លារ កើនជិត 11% បើធៀបនឹងឆ្នាំ 2021។ នៅក្នុងឆ្នាំ 2022 ការនាំចេញរបស់កម្ពុជា ទៅកាន់ទីផ្សារវៀតណាម សម្រេចបាន 4.82 ពាន់លានដុល្លារ កើន 2.48% ខណៈដែលការនាំចេញរបស់វៀតណាម មកកាន់កម្ពុជា សម្រេចបាន 5.75 ពាន់លានដុល្លារ កើន 19% បើធៀបនឹងឆ្នាំ 2021។

លោក ង្វៀន ហុងយាន រដ្ឋមន្តីក្រសួងឧស្សាហកម្ម ពាណិជ្ជកម្មវៀតណាម (កណ្ដាល) ក្នុងជំនួបជាមួយ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម និងឯកឧត្ដម ហែម វណ្ណឌី រដ្ឋមន្ត្រីក្រសួង វ.ប.ន របស់ កម្ពុជា

នៅក្នុងរយៈពេល 11 ខែដំបូងនៃឆ្នាំ 2023 ទំហំពាណិជ្ជកម្មរវាងកម្ពុជា – វៀតណាម សម្រេចបានជិត 8 ពាន់លានដុល្លារអាម៉េរិក បើទោះជាមានការថយចុះ បើធៀបនឹង 11 ខែដំបូងនៃឆ្នាំ 2022៕

December 12, 2023

ប្រទេសចំនួន 7 រួមដៃគ្នាបាញ់បង្ហោះយានទៅចុះចតលើផ្ទៃព្រះចន្ទនាពេលឆាប់ៗនេះ

នៅរាត្រីបុណ្យណូអែល ថ្ងៃទី 24 ធ្នូ 2023 យានអវកាសមួយគ្រឿងនឹងត្រូវបានបាញ់បង្ហោះឡើងទៅកាន់ឋានព្រះចន្ទ ដើម្បីបំពេញបេសកកម្មពាណិជ្ជកម្មមួយដែលមិនធ្លាប់មានក្នុងប្រវត្តិសាស្ត្រនាពេលកន្លង។ នេះបើតាម Space.com ដែលបានចុះផ្សាយកាលពីដើមខែនេះ។

យានអវកាសនេះមានឈ្មោះថា យានចុះចតឋានព្រះចន្ទ Peregrine (ឬហៅថា ស្ទាំងទេព របស់ផែនដី) ដែលដាក់ឈ្មោះទៅតាមឈ្មោះសត្វស្ទាំង Peregrine ដែលហោះលឿនជាងគេលើពិភពលោក។

បើសិនគ្រប់យ៉ាងដំណើរការរលូនទៅតាមផែនការ «ស្ទាំងទេព» របស់ផែនដី នឹងចុះចតលើផ្ទៃព្រះចន្ទ ត្រង់តំបន់ដែលមានជ្រលងកម្អែភ្នំភ្លើងបុរាណនៅលើឋានព្រះចន្ទ ដែលត្រូវបានហៅថា Sinus Viscositatis។

បេសកកម្មនេះនឹងត្រូវបានកត់ត្រាក្នុងប្រវត្តិសាស្ត្រ ព្រោះវាជាបេសកកម្មដំបូងដែលបាញ់បង្ហោះទៅតាមគំនិតផ្ដួចផ្ដើម សេវាកម្មដឹកជញ្ជូនបែបពាណិជ្ជកម្មឡើងទៅកាន់ឋានព្រះចន្ទ (CLPS) របស់ទីភ្នាក់ងារអវកាសអាម៉េរិក (NASA)។ នេះក៏ជាលើកដំបូងដែលបច្ចេកវិទ្យារបស់ប្រទេសចំនួន 7 ត្រូវបានបាញ់បង្ហោះរួមគ្នាឡើងទៅកាន់ផ្ទៃព្រះចន្ទ។

ទំនិញចំនួន 20 ចំណែក មកពី 7 ប្រទេស នឹងត្រូវបាន «ស្ទាំងទេព» Peregrine នាំឡើងទៅកាន់ទីឋានរណបរបស់ផែនដី។ ក្នុងនោះ ទំនិញ 5 ចំណែកមកពី សហរដ្ឋអាម៉េរិក។ ក្រៅពីនេះ គឺជាទំនិញរបស់ អង់គ្លេស ម៉ិចស៊ិច អាល្លឺម៉ង់ ហុងគ្រី ជប៉ុន និងប្រទេសសីស្ហែល (Seychelles) នៅទ្វីបអាហ្វ្រិក។

ដោយការប្រើប្រាស់បច្ចេកវិទ្យាទំនើបចុងក្រោយ បេសកកម្មស្រាវជ្រាវឋានព្រះចន្ទរបស់ប្រទេសចំនួន 7 នេះ ត្រូវបានរំពឹងថា នឹងនាំមកនូវព័ត៌មាន/ទិន្នន័យសំខាន់ៗសម្រាប់អ្នកវិទ្យាសាស្ត្រ។

តាមគម្រោង យានចុះចត Peregrine នឹងធ្វើដំណើរតាមរយៈជើងហោះហើរដំបូងរបស់រ៉ុក្កែត Vulcan Centaur ដែលផលិតដោយក្រុមហ៊ុនអាម៉េរិក United Launch Alliance៕

December 11, 2023

រកឃើញ «អំណោយពិសេស» ដែលព្រះអាទិត្យប្រទានដល់មនុស្សលោកលើឋានព្រះចន្ទ

«អំណោយពិសេស» ពីព្រះអាទិត្យលើឋានព្រះចន្ទ បើកកកាយនូវអាថ៌កំបាំងស្ដីពីប្រភពនៃវត្ថុធាតុទ្រទ្រង់ជីវិត និងបើកផ្លូវឱ្យមានក្ដីសង្ឃឹមថ្មីនៅក្នុងការស្រាវជ្រាវទីអវកាស។

ក្រុមអ្នកស្រាវជ្រាវមួយមកពីមន្ទីរពិសោធន៍របស់ទ័ពជើងទឹកអាម៉េរិក (NRL) បានបង្ហើបឱ្យដឹងអំពីការរកឃើញដ៏គួរឱ្យចាប់អារម្មណ៍ ទាក់ទងនឹងសំណាកដី 79221 ដែលយកពីឋានព្រះចន្ទ។

ដោយការប្រើប្រាស់បច្ចេកទេសរបស់កែវពង្រីកអតិសុខុមទស្សន៍អេឡិចត្រុង (មីក្រូទស្សន៍អេឡិចត្រុង) ក្រុមអ្នកវិទ្យាសាស្ត្រខាងលើបានរកឃើញអ៊ីដ្រូសែននៅក្នុងបណ្ដាគ្រាប់រ៉ែ apatite និង merrillite ដែលបានប្រែប្រួលដោយសារអាកាសធាតុពីអវកាស ក្រោមឥទ្ធិពលរបស់ខ្យល់ព្រះអាទិត្យ។ នេះអាចបញ្ជាក់បានថា ដីលើឋានព្រះចន្ទ កំពុងលាក់អ៊ីដ្រូសែន។

អ៊ីដ្រូសែនដែលជាវត្ថុធាតុដ៏មានតម្លៃ បើសិនជាត្រូវបានទាញយកពីព្រះចន្ទ វានឹងដើរតួនាទីយ៉ាងសំខាន់នៅក្នុងការស្រាវជ្រាវទីអវកាស និងបកស្រាយបានអំពីប្រភពដើមរបស់ទឹកលើឋានមួយនេះ៕

December 6, 2023

ជប៉ុនជិតបាញ់បង្ហោះផ្កាយរណបធ្វើពីឈើ ឡើងទៅកាន់ទីអវកាស

ទីភ្នាក់ងារអវកាសអាម៉េរិក (ណាសា) និងទីភ្នាក់ងារអវកាសជប៉ុន (ចាសា) កំពុងរៀបផែនការបាញ់បង្ហោះផ្កាយរណបធ្វើពីឈើដំបូងគេលើពិភពលោក ឡើងទៅកាន់ទីអវកាស។

យោងតាមព័ត៌មានពីណាសា (NASA) របស់អាម៉េរិក និងចាសា (JAXA) របស់ជប៉ុន ផ្កាយរណបប៉ុនពែងកាហ្វេដែលធ្វើពីឈើ Magnolia គ្រោងនឹងត្រូវបានបាញ់បង្ហោះឡើងទៅកាន់គន្លងតារាវិថីផែនដីនៅក្នុងរដូវក្ដៅឆ្នាំ 2024។

ឈើគឺជាវត្ថុធាតុដែលនឹងមិនឆេះ ឬរលួយនៅក្នុងបរិស្ថានសុញ្ញកាសរបស់អវកាស ប៉ុន្តែនឹងត្រូវបានដុតឆេះម៉ត់ជាធូលី នៅពេលវិលត្រលប់ចូលក្នុងបរិយាកាសផែនដី។ ចំណុចពិសេសនេះធ្វើឱ្យឈើក្លាយជាវត្ថុធាតុមានប្រយោជន៍សម្រាប់ផ្កាយរណបនាពេលអនាគត។

ក្រោយពីបានធ្វើការពិសោធដោយជោគជ័យនៅលើស្ថានីយអវកាសអន្តរជាតិ (ISS) កាលពីដើមឆ្នាំ ក្រុមអ្នកវិទ្យាសាស្ត្រជឿថា ផ្កាយរណបធ្វើពីឈើ ពិតជាសមស្របសម្រាប់ការបាញ់បង្ហោះសាកល្បង។ ប្រភេទឈើដែលត្រូវបានអ្នកវិទ្យាសាស្ត្រជ្រើសរើសយកមកផលិតផ្កាយរណប គឺឈើ Magnolia។

បច្ចុប្បន្ន នៅជុំវិញគន្លងតារាវិថីផែនដី មានវត្ថុអវកាសជាង 8,440 តោន រួមទាំងសំរាមអវកាស ដែលមានដូចជា ផ្កាយរណបដែលខូច និងបំណែករ៉ុក្កែតដែលលែងប្រើប្រាស់ជាដើម។ ទាំងនេះបានធ្វើឱ្យពន្លឺពេលរាត្រីកើនខ្ពស់ជាងមុន 10% បង្កការរំខានដល់ការសង្កេតមើលទៅកាន់ទីអវកាស។

ក្រុមអ្នកជំនាញនិយាយថា ផ្កាយរណបដែលធ្វើពីឈើ មានដូចជា LignoSat ជាដើម នឹងបង្កផលប៉ះពាល់តិចជាង បើធៀបនឹងសំរាមអវកាសនាបច្ចុប្បន្ន ព្រមទាំងកាត់បន្ថយការចំណាយបានច្រើនផងដែរ៕

November 25, 2023

វត្ថុអវកាសដែល «ធំជាងគេបង្អស់ក្នុងចក្រវាល» គឺជាអ្វី?

នៅក្នុងចក្រវាលដ៏ធំធេងដែលមនុស្សអាចសង្កេតឃើញ មានវត្ថុអវកាសរាប់មិនអស់ តាំងពីពពកធូលីអវកាស ណេប៊ូឡា រហូតដល់បណ្ដុំកាឡាក់ស៊ី។ ដូច្នេះ តើវត្ថុអវកាសណាមួយដែលធំជាងគេ?

វត្ថុអវកាសធំជាងគេបង្អស់ក្នុងចក្រវាលដែលអ្នកវិទ្យាសាស្ត្របានរកឃើញនាពេលកន្លង នោះគឺ Hercules–Corona Borealis Great Wall។

ដោយមានបណ្ដោយពី 6 ដល់ 18 ពាន់លានឆ្នាំពន្លឺ Hercules–Corona Borealis Great Wall ត្រូវបានគេចាត់ទុកថាជាវត្ថុអវកាសធំជាងគេបង្អស់ក្នុងចក្រវាលដែលអាចសង្កេតឃើញ។ វាគឺជាបណ្ដុំនៃកាឡាក់ស៊ីដែលតភ្ជាប់នឹងគ្នាដោយសារកម្លាំងទំនាញ។

ទំហំរបស់មហាបណ្ដុំកាឡាក់ស៊ីនេះ ធំដល់ថ្នាក់ ពន្លឺត្រូវការពេលវេលាប្រហែល 10 ពាន់លានឆ្នាំ ទើបធ្វើដំណើរផុតប្រវែងបណ្ដោយរបស់វា។

យោងតាម Interesting Engineering មហាបណ្ដុំកាឡាក់ស៊ី Hercules–Corona Borealis Great Wall ត្រូវបានរកឃើញកាលពីឆ្នាំ 2013 នៅពេលបង្កើតផែនទីកាំរស្មីហ្គាមម៉ា ជាពន្លឺដែលមានថាមពលខ្លាំងជាងគេបង្អស់ក្នុងចក្រវាលបច្ចុប្បន្ន។

មហាបណ្ដុំកាឡាក់ស៊ីនេះស្ថិតក្នុងក្រុមតារានិករ Hercules និង Corona Borealis ដែលមានចម្ងាយពីផែនដីប្រហែល 10 ពាន់លានឆ្នាំពន្លឺ៕

November 23, 2023

រកឃើញភពមួយស្រដៀងនឹងផែនដី ប៉ុន្តែមួយឆ្នាំមានតែជាងបីថ្ងៃ

ណាសាបានរកឃើញភពថ្មមួយដែលមានឈ្មោះថា LTT 1445 Ac កំពុងគោចរជុំវិញកូនផ្កាយក្រហមមួយដួង។

ភព LTT 1445 Ac ដែលត្រូវបានរកឃើញដំបូងដោយតេឡេស្កុប TESS របស់ណាសា ស្ថិតនៅក្នុងប្រព័ន្ធផ្កាយបីដ៏ចម្លែកមួយ និងមានចម្ងាយពីផែនដីប្រហែល 22 ឆ្នាំពន្លឺ ដែលមួយឆ្នាំពន្លឺមានចម្ងាយ 9.46 លានលាន/ទ្រីលាន (9,460,000,000,000) គីឡូម៉ែត្រ។

LTT 1445 Ac គោចរជុំវិញកូនផ្កាយក្រហមមួយដួងដែលមានឈ្មោះថា LTT 1445 A តែប៉ុណ្ណោះ ប៉ុន្តែ បើសិនអ្នកស្ថិតនៅលើភពនេះ អ្នកអាចមើលឃើញទាំងផ្កាយ LTT 1445 B និង LTT 1445 C ធ្វើឱ្យទិដ្ឋភាពលើភពនេះ ស្រដៀងទៅនឹងភពប្រឌិតមួយនៅក្នុងខ្សែភាពយន្ត Star Wars។

ក្នុងរបាយការណ៍ស្រាវជ្រាវមួយដែលទើបត្រូវបានប្រកាសលើទស្សនាវដ្ដី Astronomical Journal ក្រុមអ្នកស្រាវជ្រាវដែលដឹកនាំដោយបណ្ឌិត Emili Pass មកពីមជ្ឈមណ្ឌលរូបវិទ្យាតារាសាស្ត្រ Harvard & Smithsonian (សហរដ្ឋអាម៉េរិក) បានរកឃើញប្រការពិសេសមួយ នោះគឺថា LTT 1445 Ac ស្ថិតក្នុងប្រភេទភពដែលមានទំហំប៉ុនផែនដី។

យោងតាមការសង្កេតបន្ថែមដោយតេឡេស្កុប Hubble ក្រុមអ្នកវិទ្យាសាស្ត្រអាម៉េរិកបានគណនាឃើញថា ភពនេះមានម៉ាសធ្ងន់ជាង 1.37 ដង និងកាំធំជាង 1.07 ដង ធៀបនឹងផែនដី។ ដូច្នេះ ភពថ្ម LTT 1445 Ac មានម៉ាស និងទំហំប្រហាក់ប្រហែលនឹងផែនដី។

ប្រការដែលគួរឱ្យស្ដាយគឺថា LTT 1445 Ac ស្ថិតនៅក្បែរផ្កាយមេរបស់វាពេក ធៀបនឹងការចង់បានរបស់មនុស្ស។ បើទោះកូនផ្កាយនេះមានពន្លឺតិច និងត្រជាក់ជាងព្រះអាទិត្យរបស់មនុស្ស ប៉ុន្តែដោយសារវដ្ដនៃគន្លងគោចរត្រឹមតែ 3.12 ថ្ងៃ ផ្ទៃរបស់ភព LTT 1445 Ac មានសីតុណ្ហភាពរហូតដល់ 260 អង្សាសេ ដែលមិនងាយនឹងឱ្យជីវិតដូចលើផែនដី អាចកកើតបាន។

ស្ថានភាពរបស់ភព LTT 1445 Ac អាចជួយឱ្យអ្នកវិទ្យាសាស្ត្រយល់ច្បាស់ជាងមុនអំពីរបៀបដែលភពស្រដៀងនឹងផែនដី អាចកកើត និងរីកចម្រើននៅក្នុងប្រព័ន្ធផ្កាយផ្សេងៗ ដែលនេះក៏នឹងជួយកាត់បន្ថយទំហំនៃ ការស្វែងរកជីវិតនៅក្នុងចក្រវាល៕

November 22, 2023

ក្រុមហ៊ុនហូឡង់រកវិធីបង្កកំណើតទារកដំបូងគេក្នុងទីអវកាស

ក្រុមហ៊ុន Spaceborn United របស់អ្នកជំនួញជនជាតិហូឡង់ Egbert Edelbroek កំពុងសិក្សាស្រាវជ្រាវដើម្បីបង្កកំណើត និងបង្កើតទារកតាមធម្មជាតិ នៅក្នុងបរិស្ថានដែលមានកម្លាំងទំនាញខ្សោយដូចនៅលើភពអង្គារ។

បើទោះជាមានឧបសគ្គច្រើនក្នុងដំណើរឆ្ពោះទៅការសម្រេចគោលដៅខាងលើ ប៉ុន្តែ លោក Edelbroek ជឿថា លោកអាចមើលឃើញទារកដំបូងដែលបង្កកំណើតក្នុងទីអវកាស។ នេះបើតាម AFP ចុះផ្សាយកាលពីថ្ងៃទី 14 វិច្ឆិកា 2023។

«មនុស្សជាតិត្រូវតែជាសត្វលោកដែលរស់នៅក្នុងអន្តរភព។ បើសិនជាចង់រស់នៅដោយឯករាជ្យនៅខាងក្រៅផែនដី យើងត្រូវការដោះស្រាយបញ្ហានៃការបន្តពូជ» លោក Edelbroek សង្កត់ធ្ងន់ដូច្នេះ។

ការបង្កកំណើតក្នុងទីអវកាស មានឧបសគ្គច្រើន។ ឧបសគ្គចម្បងគេគឺកង្វះកម្លាំងទំនាញ ធ្វើឱ្យគូស្នេហ៍ងាយនឹងអណ្តែតឆ្ងាយពីគ្នា ដូច្នេះ Spaceborn United គឺជាក្រុមហ៊ុនដំបូងគេដែលស្វែងរកវិធីបង្កកំណើតនៅទីអវកាស។

យោងតាមលោក Edelbroek ឧបសគ្គមួយទៀត នោះគឺធាតុរាវរបស់រាងកាយនឹងត្រូវបានរុញច្រានឡើងទៅលើ នៅក្នុងបរិស្ថានកម្លាំងទំនាញទាប ដែលផ្ទុយពីនៅលើផែនដី។ ដូច្នេះ ជាដំបូង មនុស្សត្រូវការបង្កើតបរិស្ថានមួយដែលល្អឥតខ្ចោះ។

ក្រុមអ្នកវិទ្យាសាស្ត្រកំពុងស្វែងយល់អំពីវិធីបង្កកំណើតក្នុងបន្ទប់ពិសោធន៍ដែលមានកម្លាំងទំនាញផែនដីទាប ប៉ុន្តែ លោក Edelbroek និយាយថា គម្រោងបាញ់បង្ហោះកោសិកាកណ្ដុរទៅពិសោធក្នុងទីអវកាសនឹងធ្វើឡើងនៅចុងឆ្នាំនេះ។ បន្ទាប់មក ក្នុងរយៈពេលពី 5 ដល់ 6 ឆ្នាំទៀត ក្រុមហ៊ុននេះនឹងពិសោធលើកោសិកាមនុស្ស។

បញ្ហាសីលធម៌គឺជាមូលហេតុដែលធ្វើឱ្យការបង្កកំណើតក្នុងទីអវកាស ទាក់ទាញចំណាប់អារម្មណ៍របស់បណ្ដាក្រុមហ៊ុនឯកជនដូច Spaceborn ជំនួសឱ្យណាសា ដែលរារែកក្នុងការផ្ដល់ថវិកាសម្រាប់ប្រធានបទ «រសើប»។ ក៏ប៉ុន្តែ លោក Edelbroek ជឿថា នឹងមានពេលវេលាគ្រប់គ្រាន់ដើម្បីបង្កើតទារកដំបូងដែលបង្កកំណើតក្នុងអវកាស មុនពេលលោកទទួលមរណភាព៕

November 16, 2023

ភពចំនួនពីរដែលអាចមានអរិយធម៌ជឿនលឿនជាងផែនដីប្រាំពាន់លានឆ្នាំ

ការសិក្សាស្រាវជ្រាវមួយរបស់អង់គ្លេសបានបង្ហាញទីតាំងដែលកំពុងលាក់បាំងភពក្រៅប្រព័ន្ធព្រះអាទិត្យយ៉ាងតិចពីរ ដែលមានទ្វីប «ចាស់» ជាងផែនដីរហូតដល់ប្រាំពាន់លានឆ្នាំ និងអាចមានជីវិតដែលជឿនលឿនជាងមនុស្ស។

ក្រុមអ្នកវិទ្យាសាស្ត្រមកពីសាកលវិទ្យាល័យ Cardiff (អង់គ្លេស) បានឱ្យដឹងថា នៅជុំវិញផ្កាយពីរដួងដែលមានឈ្មោះថា HD 76932 និង HD 201991 អាចមានលាក់បាំងភពយ៉ាងតិចពីរដែលកកើតទ្វីបមុនផែនដីរហូតដល់ចាប់ពី 4 ទៅ 5 ពាន់លានឆ្នាំ។

យោងតាម Live Science ខាងលើនេះគឺជាលទ្ធផលនៃការចម្រាញ់ពីផ្កាយ 29 ដួងដែលត្រូវបានចាត់ទុកថា មានសក្ដានុពលក្នុងការគាំទ្រឱ្យមានការកកើតភពទាំងឡាយដែលអាចទ្រទ្រង់ជីវិត។

ជាងនេះទៀត ក្រុមអ្នកស្រាវជ្រាវនេះក៏ជឿថា ភពដែលវិលជុំវិញផ្កាយ HD 76932 និង HD 201991 ទំនងជាមានជីវមណ្ឌល (Biosphere) ជឿនលឿនជាងផែនដីទៅទៀត។ ប្រការនេះនាំឱ្យមានការរំពឹងថា រយៈពេលពីបួនដល់ប្រាំពាន់លានឆ្នាំ បានអនុញ្ញាតឱ្យភពទាំងនេះមានភាវៈរស់ ឬមានអរិយធម៌ជឿនលឿនជាងអ្វីដែលកំពុងកើតមាននៅលើផែនដី។

ក្រុមស្រាវជ្រាវកំណត់បាន «ដែនដីដែលមានសក្ដានុពល» សម្រាប់ភាវៈរស់នេះ តាមរយៈការរកឃើញអ៊ុយរ៉ាញ៉ូម-239 និងប៉ូតាស្យូមក្នុងបរិមាណច្រើន ដែលមាននៅក្នុងផ្កាយទាំងពីរដួងខាងលើ ក៏ដូចជាអាយុរបស់ផ្កាយដែលត្រូវបានវាស់ស្ទង់ដោយផ្កាយរណប Gaia របស់ទីភ្នាក់ងារអវកាសអឺរ៉ុប (ESA)។

យោងតាមរបាយការណ៍នៅលើ Research Notes of the American Astronomical Society ផ្កាយ HD 76932 និងផ្កាយ HD 201991 មានចម្ងាយពីផែនដីប្រហែល 70 និង 110 ឆ្នាំពន្លឺ (មួយឆ្នាំពន្លឺមានចម្ងាយប្រហែល 9.46 (9,460,000,000,000) ទ្រីលានគីឡូម៉ែត្រ) និងស្ថិតតំបន់ជាយរបស់កាឡាក់ស៊ីមីលគីវ៉េ។ ផែនដីរបស់មនុស្សក៏ស្ថិតនៅក្នុងតំបន់ក្បែរជាយកាឡាក់ស៊ីនេះផងដែរ៕

November 10, 2023

ណាសារកឃើញផ្កាយពីរដួងបុកគ្នាយ៉ាងខ្លាំងក្លារហូតដល់ «បង្កើតបានជាមាស»

ដោយការប្រើប្រាស់តេឡេស្កុបអវកាស James Webb (JWST) ក្រុមអ្នកវិទ្យាសាស្ត្របានរកឃើញករណីផ្ទុះកាំរស្មីហ្គាម៉ា (GRB) ដ៏មហាចែងចាំង។ នេះគឺជាករណីប៉ះទង្គិចគ្នាដ៏ខ្លាំងក្លារវាងផ្កាយណឺត្រុងពីរដួង។

ករណីផ្ទុះក្នុងទីអវកាសដ៏កម្រដែលត្រូវបានហៅថា គីឡូណូវ៉ា (Kilonova) នេះ ខ្លាំងរហូតដល់អាចបង្កើតបានជាមាស ប្លាទីន និងអ៊ុយរ៉ាញ៉ូមក្នុងទីអវកាស។

ការស្លាប់របស់ផ្កាយណឺត្រុងពីរដួង

ករណីផ្ទុះគីឡូណូវ៉ា កើតឡើងនៅពេលផ្កាយណឺត្រុងពីរដួង (ជាផ្កាយខ្នាតយក្សដែលត្រូវបែកធ្លាយ) ស្រូបទាញគ្នា ហើយចុងក្រោយក៏ប៉ះទង្គិចនឹងគ្នា។ ការប៉ះទង្គិចខ្លាំងក្លានេះត្រូវបានហៅថា ការផ្ទុះកាំរស្មីហ្គាម៉ា ដែលបញ្ចេញរលកថាមពលនៃកាំរស្មីអ៊ុលត្រាវីយូឡេ អ៊ីនហ្វ្រារ៉េដ និងកាំរស្មីអ៊ិច។ ករណីផ្ទុះនេះត្រូវបានណាសាដាក់ឈ្មោះឱ្យថា GRB 230307A។

អ្នកវិទ្យាសាស្ត្រប្រើប្រាស់តេឡេស្កុបអវកាស James Webb (JWST) ក្នុងការតាមរកករណីផ្ទុះកាំរស្មីហ្គាម៉ា (GRB) ដ៏មហាចែងចាំងនេះ។

ក្រុមអ្នកវិទ្យាសាស្ត្រខាងលើបានប្រើប្រាស់តេឡេស្កុបអវកាស James Webb ដើម្បីតាមដានការធ្វើដំណើររបស់បណ្ដាផ្កាយណឺត្រុង មុនពេលពួកវាផ្ទុះ។ ពួកវាគឺជាផ្កាយពីរដួងនៅក្នុងប្រព័ន្ធផ្កាយភ្លោះដែលស្ថិតនៅក្នុងកាឡាក់ស៊ីរាងគូទខ្យងមួយ។ ផ្កាយមួយដួងក្នុងចំណោមនេះបានផ្ទុះ បន្សល់ទុកផ្កាយណឺត្រុងមួយដួង ហើយក្រោយមក ការផ្ទុះនេះក៏បានកើតឡើងចំពោះផ្កាយដែលនៅសល់។

អ្នកវិទ្យាសាស្ត្រមានបំណងស្វែងរកបន្ថែមនូវករណីប៉ះទង្គិចនានាដែលបង្កើតបានជាការផ្ទុះកាំរស្មីហ្គាម៉ា ដើម្បីកំណត់មូលហេតុ ក៏ដូចជាឱ្យដឹងច្បាស់ថា តើធាតុនានាមានការពាក់ព័ន្ធទៅនឹងដំណើរការនេះ ឬអត់៕

November 1, 2023

Tag: វិទ្យាសាស្ត្រ