មនុស្ស - La Reine Media

យន្តហោះអវកាស Virgin Galactic បន្តដឹកមនុស្សឡើងទៅក្បែរគន្លងតារាវិថីផែនដី

(សហរដ្ឋអាម៉េរិក) – Virgin Galactic បានទទួលជោគជ័យក្នុងការដឹកមនុស្សឡើងទៅកាន់ទីអវកាសក្បែរគន្លងតារាវិថីផែនដីលើកទីប្រាំ មុនពេលចាប់ផ្ដើមធ្វើសកម្មភាពជំនួញនៅខែក្រោយ។

បេសកកម្មកាលពីថ្ងៃទី 25 ឧសភា ដែលមានឈ្មោះថា Unity 25 គឺជាជើងហោះហើរដំបូងរបស់ក្រុមហ៊ុន Virgin Galactic ទៅកាន់ទីអវកាសក្បែរគន្លងគោចរផែនដី គិតចាប់ពីខែកក្កដា 2021 ក្រោយពីក្រុមហ៊ុននេះបានដឹកមហាសេដ្ឋី Richard Branson សហស្ថាបនិករបស់ Virgin Group ដែលជាក្រុមហ៊ុនមេរបស់ Virgin Galactic និងអតិថិជនជាច្រើនរូបផ្សេងទៀត ឡើងទៅទីអវកាស។

Virgin Galactic ប្រើប្រាស់ប្រព័ន្ធបាញ់បង្ហោះក្នុងអាកាសដើម្បីដឹកមនុស្ស និងឧបករណ៍ស្រាវជ្រាវឡើងទៅកាន់ទីអវកាសក្បែរកន្លងតារាវិថិផែនដី។ បច្ចុប្បន្ន ប្រព័ន្ធនេះរួមមានយានចំនួនពីរគ្រឿងគឺយានអវកាសដែលអាចដឹកមនុស្សបាន 8 នាក់ ឈ្មោះ VSS Unity និងយន្តហោះដឹកជញ្ជូន VMS Eve។ Unity ត្រូវបាន Eve នាំឡើងពីព្រលានយន្តហោះ។ ពេល Eve ហោះដល់កម្ពស់ 15,000 ម៉ែត្រ វានឹងទម្លាក់ Unity ដើម្បីឱ្យយាននេះបញ្ឆេះម៉ាស៊ីនរ៉ុក្កែត ហើយបន្តហោះឡើងទៅលំហក្បែរគន្លងគោចរផែនដី។

អតិថិជនដែលហោះក្នុងយាន Unity នឹងបានបណ្ដែតខ្លួនក្នុងស្ថានភាពគ្មានទម្ងន់ច្រើននាទី និងគយគន់ផែនដីពីអវកាស មុនពេលហោះចុះចតលើព្រលានយន្តហោះ។ Unity បានធ្វើការហោះហើរបែបនេះចំនួនប្រាំលើកមកហើយ។ បេសកកម្មថ្មីបំផុតត្រូវបានចាប់ផ្ដើមនៅម៉ោង 23 និង 15 នាទី ថ្ងៃទី 24 ឧសភា (ពេលវេលានៅកម្ពុជា) ពេល Eve ហោះឡើងពីអវកាសយានដ្ឋាន Spaceport America នៅ New Mexico។ Unity ត្រូវបានភ្ជាប់ទៅនឹងគ្រោងឆ្អឹងនៅចន្លោះដងខ្លួនទាំងពីររបស់យន្តហោះដឹកជញ្ជូន Eve។

មនុស្សទាំង 8 នាក់ដែលចូលរួមក្នុងជើងហោះហើរថ្មីបំផុតនេះគឺសុទ្ធតែជាបុគ្គលិករបស់ Virgin Galactic ក្នុងនោះក៏មានប្រធានផ្នែកបណ្ដុះបណ្ដាលអ្នកអវកាស លោកស្រី Beth Moses ផងដែរ។

យោងតាមតំណាងរបស់ Virgin Galactic បន្ទាប់ពីផ្ដាច់ខ្លួន យាន Unity ហោះក្នុងល្បឿនអតិបរមា 3,630 គីឡូម៉ែត្រ/ម៉ោង និងឡើងដល់កម្ពស់ 87.2 គីឡូម៉ែត្រ។ ណាសាឱ្យដឹងថា កម្ពស់នេះអាចចាត់ទុកដូចបានហោះដល់ទីអវកាស។ ក៏ប៉ុន្តែលំហអវកាសចាប់ផ្ដើមពីកម្ពស់ 100 គីឡូម៉ែត្រ។

យាន Unity ត្រលប់មកកាន់ផែនដីនៅម៉ោង 00 និង 37 នាទី ថ្ងៃទី 26 ឧសភា 2023 នៅ Spaceport America។ ចំណែកយន្តហោះ Eve ក៏បានចុះចតដល់ដីប៉ុន្មាននាទីមុននោះ ហើយបេសកកម្ម Unity 25 ក៏បានបញ្ចប់៕

May 26, 2023

ជនសង្ស័យសម្លាប់មនុស្សជាង 2,000 នាក់ត្រូវបានចាប់ខ្លួនក្រោយរត់គេចច្រើនឆ្នាំ

ជនសង្ស័យ Fulgence Kayishema ដែលត្រូវប៉ូលិសស្វែងរកព្រោះតែបានសម្លាប់មនុស្សជាង 2,000 នាក់នៅក្នុងយុទ្ធនាការប្រល័យពូជសាសន៍នៅ រវ៉ាន់ដា ឆ្នាំ 1994 ត្រូវបានចាប់ខ្លួន។

Fulgence kayishema អតីតមន្ត្រីប៉ូលិសអាយុជាង 60 កាលពីថ្ងៃទី 24 ឧសភា 2023 ត្រូវបានចាប់ខ្លួននៅក្នុងចំការទំពាំងបាយជូរនៅទីរួមស្រុកមួយក្នុងតំបន់ផលិតស្រាទំពាំងបាយជូរដែលមានចម្ងាយពីរដ្ឋធានី Cape Town របស់អាហ្វ្រិកខាងត្បូង ជិត 50 គីឡូម៉ែត្រទៅទិសខាងកើត។

ជនសង្ស័យនេះត្រូវបានចាប់ខ្លួនក្នុងយុទ្ធនាការមួយដែលមានកិច្ចសហការរវាងអាជ្ញាធរអាហ្វ្រិកខាងត្បូង និងអង្គការសហប្រជាជាតិ។ យោងតាមប៉ូលិសអាហ្វ្រិកខាងត្បូង Kayishema បានសារភាពថាខ្លួនឈ្មោះ Donatien Nibashumba និងមិនព្រមទទួលស្គាល់ឈ្មោះពិត។ ក៏ប៉ុន្តែ រហូតដល់ព្រលប់ថ្ងៃដដែល ជននេះនិយាយថា «ខ្ញុំបានរង់ចាំការចាប់ខ្លួននេះជាយូរមកហើយ»។

Kayishema ត្រូវបានសមត្ថកិច្ចប្រកាសចាប់ខ្លួនកាលពីឆ្នាំ 2001។ សមត្ថកិច្ចបានឱ្យដឹងថា ជននេះបានប្រើប្រាស់ឈ្មោះ និងលិខិតស្នាមក្លែងក្លាយជាច្រើនដើម្បីចៀសវាងការចាប់ខ្លួនក្នុងអំឡុងពេលរត់គេច និងលាក់ខ្លួន។ សហរដ្ឋអាម៉េរិកបានប្រកាសផ្ដល់រង្វាន់ 5 លានដុល្លារសម្រាប់អ្នកទាំងឡាយណាដែលបានផ្ដល់ព័ត៌មានឈានទៅដល់ការចាប់បាន Kayishema។

កាលពីឆ្នាំ 1994 ជនជាតិ Tutsi និង Hutu ជាង 800,000 នាក់បានស្លាប់នៅក្នុងអំពើប្រល័យពូជសាស្ត្រនៅប្រទេសរវ៉ាន់ដា ដែលធ្វើឡើងក្នុងរយៈពេលបីខែ។ តុលាការបានចោទប្រកាន់ Kayishema ថា បានចូលរួមដោយផ្ទាល់ក្នុងការរៀប និងអនុវត្តគម្រោងសម្លាប់មនុស្សជាង 2,000 នាក់នៅវិហារកាតូលិក Nyange កាលពីថ្ងៃទី 15 មេសា 1994 នៅពេលអំពើសម្លាប់រង្គាលទើបតែចាប់ផ្ដើម។

ដីកាតុលាការបានឱ្យដឹងថា Kayishema ដែលពេលនោះគឺជាមន្ត្រីស៊ើងអង្កេត បានទិញសាំងដើម្បីដុតវិហារដែលមានជនភៀសខ្លួនជាច្រើននៅខាងក្នុង។ ជននេះ និងបក្ខពួកក៏ត្រូវបានចោទប្រកាន់ថា បានប្រើប្រាស់គ្រឿងចក្រដើម្បីកម្ទេចវិហារបន្ទាប់ពីមានករណីអគ្គិភ័យ។

នៅពេលយុទ្ធនាការប្រល័យពូជសាសន៍ដែលបានបញ្ចប់កាលពីខែកក្កដា ឆ្នាំ 1994 Kayishema ក៏រត់ចូលសាធារណរដ្ឋកុងហ្កោ ជាមួយនឹងប្រពន្ធកូន និងបងថ្លៃ។ បន្ទាប់ពីបានរត់ទៅកាន់ប្រទេសជាច្រើននៅទ្វីបអាហ្វ្រិក ជននេះក៏បានទៅកាន់ប្រទេសអាហ្វ្រិកខាងត្បូងនៅឆ្នាំ 1999 និងប្រើប្រាស់ឈ្មោះក្លែងក្លាយដើម្បីសុំសិទ្ធិជ្រកកោននៅ Cape Town។

Fulgence kayishema ពេលត្រូវបានចាប់ខ្លួន ។ រូបភាពពី Gistmania

ចាប់តាំងពីបានទៅដល់អាហ្វ្រិកខាងត្បូង ជនសង្ស័យបានពឹងអាស្រ័យលើបណ្ដាញជំនួយមួយដែលរួមមានទាំងក្រុមអតីតសមាជិកកងទ័ពរវ៉ាន់ដា ជាក្រុមមនុស្សដែលបានស្វែងរកវិធីលាក់បាំងសកម្មភាព និងកន្លែងស្នាក់នៅរបស់ Kayishema។

Kayishema គ្រោងនឹងត្រូវបានកាត់ទោសនៅក្នុងតុលាការមួយនៅ Cape Town នៅថ្ងៃទី 26 ឧសភានេះ មុនពេលអាចត្រូវបាននាំខ្លួនទៅកាន់ប្រទេសរវ៉ាន់ដា។

«Kayishema បានរត់គេចខ្លួនជាង 20 ឆ្នាំ។ ការចាប់ខ្លួននេះបានធានាថា ចុងក្រោយជននេះក៏ត្រូវទទួលទោសសមស្របសម្រាប់អំពើឧក្រិដ្ឋរបស់ខ្លួន» Serge Brammertz ប្រធានរដ្ឋអាជ្ញានៃយន្តការដោះស្រាយរឿងក្ដីនៅសេសសល់របស់តុលាការអន្តរជាតិ (IRMCT) នៃអង្គការសហប្រជាជាតិ ថ្លែងដូច្នេះ និងបន្ថែមថា «អំពើប្រល័យពូជសាសន៍គឺជាទោសធ្ងន់ធ្ងរបំផុតចំពោះមនុស្សជាតិ»៕

May 26, 2023

បន្ទប់ពិសោធន៍ភពអង្គារ/ព្រះចន្ទ ជម្រៅជាងមួយគីឡូម៉ែត្រក្រោមដី

(អង់គ្លេស) – ផ្លូវរូងជ្រៅក្រោមដីនៅតំបន់ Yorkshire ខាងជើង ផ្ដល់ឱកាសដ៏ពិសេសដើម្បីស្រាវជ្រាវអំពីរបៀបដែលមនុស្សអាចរស់នៅ និងធ្វើសកម្មភាពនៅលើឋានព្រះចន្ទ និងភពព្រះអង្គារ។

ក្រុមអ្នកស្រាវជ្រាវនៅសាកលវិទ្យាល័យ Birmingham អនុវត្តកម្រោង Bio-SPHERE នៅក្នុងមូលដ្ឋានស្រាវជ្រាវជម្រៅ 1.1 គីឡូម៉ែត្រ ដែលស្ថិតក្នុងរូងក្រោមដីជ្រៅបំផុតមួយនៅប្រទេសអង់គ្លេស។ នេះបើតាម Phys.org ចុះផ្សាយកាលពីថ្ងៃទី 23 ឧសភា 2023។

គម្រោងនេះត្រូវបានធ្វើឡើងក្នុងបំណងស្វែងយល់អំពីវិទ្យាសាស្ត្រ និងវេជ្ជសាស្ត្រដែលអាចនឹងប្រព្រឹត្តទៅដោយរបៀបណានៅក្នុងបរិស្ថានពោរពេញដោយការលំបាកនៅលើឋានព្រះចន្ទ និងភពអង្គារ។ នេះគឺជាមូលដ្ឋានដំបូងក្នុងចំណោមមូលដ្ឋានពិសោធន៍ថ្មីដែលស្រាវជ្រាវរកវិធីជួយឱ្យមនុស្សធ្វើការ និងរស់នៅដោយមានសុខភាពល្អក្នុងបេសកកម្មអវកាសយូរអង្វែងរបស់មនុស្ស នៅលើភពដទៃ។

ក្រុមស្រាវជ្រាវខាងលើបានសហការជាមួយបន្ទប់ពិសោធន៍ក្រោមដី Boulby របស់ក្រុមប្រឹក្សាមូលដ្ឋានវិទ្យាសាស្ត្រ និងបច្ចេកវិទ្យា ដោយមានការជួយគាំទ្ររបស់ក្រុមហ៊ុនរុករករ៉ែ Boulby, ICL-UK។

គម្រោង Bio-SPHERE ប្រើប្រាស់បណ្ដាញផ្លូវរូងក្រោមដីទំហំ 3,000 ម៉ែត្រការ៉េ នៅក្បែរបន្ទប់ពិសោធន៍ Boulby ឆ្លងកាត់សិលាកម្ទេចកំណក្រោមដីអាយុកាល 205 លានឆ្នាំ៕

May 25, 2023

មនុស្សទី 600 ដែលហោះហើរក្នុងគន្លងតារាវិថីជុំវិញផែនដី

(សហរដ្ឋអាម៉េរិក) – ស្ត្រីអវកាសចរដំបូងរបស់គណៈកម្មការអវកាសអារ៉ាប៊ីសាអូឌីត បានក្លាយជាមនុស្សទី 600 ដែលហោះជុំវិញផែនដីនៅក្នុងយានអវកាស Dragon របស់ SpaceX នៅម៉ោង 4:37 ថ្ងៃទី 22 ឧសភា ឆ្នាំ 2023 (ពេលវេលានៅកម្ពុជា)។

ការបាញ់បង្ហោះយានអវកាសកាលពីថ្ងៃទី 22 ឧសភា គឺជាការចាប់ផ្ដើមសម្រាប់ Ax-2 (Axiom-2) ដែលជាបេសកកម្មហោះហើរឯកជនលើកទីពីររបស់ក្រុមហ៊ុន Axiom Space ឡើងទៅកាន់ស្ថានីយអវកាសអន្តរជាតិ (ISS)។ បេសកកម្មដំបូង គឺ Ax-1 ត្រូវបានធ្វើឡើងកាលពីខែមេសា ឆ្នាំ 2022។

Ax-2 រួមមានអ្នកអវកាសបួននាក់ ក្នុងនោះក៏មានអ្នកស្រាវជ្រាវផ្នែកវេជ្ជសាស្ត្រ លោកស្រី Rayyanah Barnawi ផងដែរ។ Barnawi ដែលជាអ្នកអវកាសដំបូងរបស់គណៈកម្មការអវកាសអារ៉ាប៊ីសាអូឌីត បានក្លាយជាមនុស្សទី 600 ដែលហោះក្នុងគន្លងគោចរជុំវិញផែនដី។

ប៉ុន្តែ បើសិនគិតទាំងមនុស្សដែលបានឡើងផុតខ្សែបន្ទាត់ Karman ដែលជាព្រំដែនអវកាសកម្ពស់ 100 គីឡូម៉ែត្រពីផែនដី ទៅតាមអនុសញ្ញារបស់ក្រុមអ្នកជំនាញអន្តរជាតិច្រើនរូប គេត្រូវតែរាប់មនុស្ស 32 នាក់ទៀតដែលបានហោះហើរលើយានអវកាស New Shepard របស់ Blue Origin។ ជើងហោះហើរទាំងនេះបានឡើងជិតដល់គន្លងតារាវិថីផែនដី និងត្រលប់វិញ ដោយមិនបានហោះជុំវិញផែនដី។

តាមផែនការ Axiom-2 នឹងត្រលប់មកកាន់ផែនដីនៅដើមខែមិថុនា 2023 ដោយចុះចតលើមហាសមុទ្រអាត្លង់ទិក។

ថ្វីបើការហោះហើរមានរយៈពេលតែ12 ថ្ងៃ ប៉ុន្តែ Axiom-2 មានគម្រោងស្រាវជ្រាវជាច្រើន ក្នុងនោះមានដូចជា បាតុភូតបរិយាកាសកម្រជួប ការពិសោធឈុតសម្លៀកបំពាក់អវកាស ក៏ដូចជាការពិសោធពាក់ព័ន្ធនឹងសុខភាព។ល។

May 24, 2023

ផែនដីអាចនឹងត្រូវម៉ាស៊ីនត្រជាក់ «ដុតកម្ដៅ» នៅអនាគត

បើសិនជាម៉ាស៊ីនត្រជាក់នៅតែប្រើប្រាស់បច្ចេកវិទ្យាបញ្ចុះកម្ដៅដូចបច្ចុប្បន្ន ពេលដែលតម្រូវការប្រើប្រាស់កាន់តែកើនឡើង គ្រានោះផែនដីអាចនឹងត្រូវឆ្អិនដូចបាយមិនខាន។

ទីភ្នាក់ងារថាមពលអន្តរជាតិ (IEA) បានព្យាករថា ពិភពលោកឆ្នាំ 2023 មានម៉ាស៊ីនត្រជាក់ជាងពីរពាន់លានគ្រឿង, ឆ្នាំ 2030 នឹងមានបីពាន់លានគ្រឿង និងឆ្នាំ 2040 នឹងមានជាងបួនពាន់លានគ្រឿង។ ការប្រើប្រាស់ម៉ាស៊ីនត្រជាក់ត្រូវបានវាយតម្លៃថា ជួយលើកកម្ពស់សុខភាព និងបង្កើនសមត្ថភាព និងប្រសិទ្ធភាពការងារ។ ក៏ប៉ុន្តែ តម្រូវការប្រើប្រាស់ថាមពលដើម្បីដំណើរការម៉ាស៊ីនត្រជាក់ រួមនឹងវត្ថុធាតុធ្វើឱ្យត្រជាក់នៅក្នុងបច្ចេកវិទ្យារបស់ម៉ាស៊ីនត្រជាក់បច្ចុប្បន្ន ក៏បង្កផលវិបាកច្រើនដល់អាកាសធាតុ។

Abhas Jha អ្នកជំនាញរបស់ធនាគារពិភពលោកផ្នែកបម្រែបម្រួលអាកាសធាតុនៅសិង្ហបុរី បានអះអាងថា «បើសិនជាស្ដង់ដាស្ដីពីប្រសិទ្ធភាពមិនត្រូវបានកែលំអ ផែនដីនឹងត្រូវក្ដៅដល់ឆ្អិន ទៅតាមន័យធៀប»។

យោងតាម Bloomberg តំបន់ក្រីក្រធំៗមួយចំនួនលើពិភពលោកក៏ជាកន្លែងដែលមានអាកាសធាតុក្ដៅបំផុត។ ប៉ុន្តែ នៅក្នុងតំបន់ទាំងនេះ ប្រាក់ចំណូលរបស់ប្រជាជនកំពុងតែមានការកើនឡើង ហើយម៉ាស៊ីនត្រជាក់ក៏ក្លាយជាទំនិញដែលមនុស្សរាប់សិបលាននាក់អាចទិញបាន។

នេះក៏ជាមូលហេតុនៅពីក្រោយការលក់ដាច់ខ្លាំងរបស់ម៉ាស៊ីនត្រជាក់នាពេលកន្លង និងអនាគត។ បណ្ដាប្រទេសមានដូចជា ចិន និងឥណ្ឌាជាដើម ត្រូវបានព្យាករថា គឺជាទីផ្សារធំបំផុតរបស់ឧបករណ៍អេឡិចត្រូនិចមួយនេះនៅក្នុងអំឡុងច្រើនឆ្នាំខាងមុខ។

នៅក្នុងម៉ាស៊ីនត្រជាក់បច្ចុប្បន្ន hydrofluorocarbons (HFC) គឺមួយក្នុងចំណោមវត្ថុធាតុធ្វើឱ្យត្រជាក់ដែលកំពុងពេញនិយម ប៉ុន្តែធាតុដែលអាចធ្វើឱ្យផែនដីឡើងកម្ដៅខ្ពស់ជាង 1,000 ដង បើធៀបនឹង carbon dioxide។ អ្នកស្រាវជ្រាវបានគណនាឃើញថា បើសិនមិនកាត់បន្ថយការពឹងផ្អែកលើ HFC នោះនឹងនាំទៅរកការឡើងកម្ដៅបន្ថែមកន្លះអង្សាសេនៅចុងសតវត្សរ៍នេះ ហើយប្រការនេះនឹងធ្វើឱ្យបញ្ហាអាកាសធាតុអាក្រក់ៗកើតឡើងញឹកញាប់ជាងបច្ចុប្បន្ន ក្នុងនោះមានដូចជា ខ្យល់ព្យុះ គ្រោះរាំងស្ងួត និងរលកកម្ដៅជាដើម។

ដើម្បីជំនួស HFC វិស័យឧស្សាហកម្មម៉ាស៊ីនត្រជាក់ត្រូវការវត្ថុធាតុបញ្ចុះកម្ដៅមួយផ្សេងទៀតដែលមិនសូវបង្កផលវិបាកដល់បរិស្ថាន។ បច្ចុប្បន្ន ក្រុមហ៊ុន Chemours និង Honeywell កំពុងផលិតវត្ថុធាតុបញ្ចុះកម្ដៅបៃតងនេះ។ ក្រៅពីបណ្ដាក្រុមហ៊ុនខាងលើ ក្រុមហ៊ុន Daikin និង Mitsubishi ក៏កំពុងអភិវឌ្ឍផលិតផលបែបនេះ។ សង្ឃឹមថា អនាគត ផែនដីនឹងមិនឡើងកម្ដៅខ្លាំងដោយសារតែសារធាតុ HFC៕

May 24, 2023

ប្រធានរបស់បញ្ញាសិប្បនិម្មិត ChatGPT ថា «មនុស្សនឹងចាញ់ AI ស្ទើរគ្រប់វិស័យក្នុងដប់ឆ្នាំទៀត»

អគ្គនាយកប្រតិបត្តិ Sam Altman និងប្រធាន Greg Brockman របស់ក្រុមហ៊ុន OpenAI វាយតម្លៃថា បញ្ញាសិប្បនិម្មិត (AI) អាចឡើងដល់កម្រិតជាអ្នកជំនាញនៅ «ស្ទើរគ្រប់វិស័យ» រយៈពេលដប់ឆ្នាំខាងមុខ។

«ជាមួយនឹងទិដ្ឋភាពដូចយើងបានឃើញបច្ចុប្បន្ន អាចស្រមៃឃើញថា ក្នុងរង្វង់ដប់ឆ្នាំខាងមុខ ប្រព័ន្ធ AI នឹងយកឈ្នះលើចំណេះជំនាញរបស់អ្នកជំនាញនៅក្នុងវិស័យស្ទើរតែទាំងអស់ និងអនុវត្តសកម្មភាពប្រកបដោយប្រសិទ្ធភាពដូចទៅនឹងក្រុមហ៊ុនធំបំផុតមួយនាបច្ចុប្បន្ន» ក្រុមមេដឹកនាំរបស់ OpenAI ដែលរួមមាន Sam Altman, Greg Brockman និងប្រធានផ្នែកវិទ្យាសាស្ត្រ Ilya Sutskever ចាប់ផ្ដើមអត្ថបទរួមដូច្នេះនៅលើគេហទំព័ររបស់ក្រុមហ៊ុន។

OpenAI សង្កត់ធ្ងន់ថា រូបមន្តកំពូល AI អាចបង្កហានិភ័យដល់មនុស្សជាតិក្នុងមួយទសវត្សរ៍ទៀត។ ដូច្នេះ ត្រូវការបន្ថយហានិភ័យពី AI ប៉ុន្តែមិនត្រូវកាត់បន្ថយសមត្ថភាព តែត្រូវមានការសហការ និងការប្រព្រឹត្តជាពិសេសចំពោះ AI។

អត្ថបទបានលើកឡើងថា «កំពូលបញ្ញាសិប្បនិម្មិតនឹងខ្លាំងជាងបច្ចេកវិទ្យាផ្សេងៗដែលមនុស្សលោកធ្លាប់បានប្រឈម។ ចុងក្រោយ យើងនឹងត្រូវការអង្គការមួយដើម្បីគ្រប់គ្រងកំពូល AI ដូចទៅនឹងទីភ្នាក់ងារថាមពលអាតូមិកអន្តរជាតិនៅក្នុងវិស័យថាមពលបរមាណូ។ ទោះជាការប្រឹងប្រែងក្នុងការអភិវឌ្ឍ AI ណាក៏ដោយ ក៏ត្រូវការគោរពតាមអង្គការអន្តរជាតិដែលមានសមត្ថកិច្ច»។

Sam Altman ធ្លាប់បានព្រមានច្រើនដងទាក់ទងនឹងបញ្ញាសិប្បនិម្មិត។ បច្ចេកវិទ្យានេះគឺជាការរីកចម្រើនមួយ ប៉ុន្តែវាអាចក្លាយជាគ្រោះភ័យ បើសិនធ្លាក់ទៅលើដៃជនទុច្ចរិត ឬ «អាចដើរខុសផ្លូវ ដែលបង្កើតឱ្យមានកំហុស និងបង្កគ្រោះថ្នាក់ធំដល់ពិភពលោក បើមិនបានកែតម្រូវឱ្យបានសមស្រប»។

នៅក្នុងសវនាការនៅសភាអាម៉េរិកកាលពីថ្ងៃទី 16 ឧសភា 2023 លោក Sam Altman បាននិយាយថា ចង់សហការជាមួយរដ្ឋាភិបាលដើម្បីទប់ស្កាត់បញ្ហាអាក្រក់ដែលអាចកើតឡើងដោយសារ AI ក្នុងនោះក៏អាចបង្កើតស្ថាប័នមួយដើម្បីគ្រប់គ្រងបច្ចេកវិទ្យានេះ។

លោក Sam Altman មិនមែនជាបុគ្គលសំខាន់តែម្នាក់ដែលបារម្ភអំពីឥទ្ធិពលរបស់បញ្ញាសិប្បនិម្មិតនោះទេ ប៉ុន្តែ CEO របស់ Google លោក Sundar Pichai, អតីតអ្នកជំនាញខាង AI របស់ Google លោក Geoffrey Hinton ឬ លោក Elon Musk និងលោក Bill Gates ក៏មានការបារម្ភអំពីបញ្ហានេះផងដែរ៕

May 24, 2023

មនុស្សជាងពីរពាន់លាននាក់នឹងរស់នៅក្នុងកម្ដៅដ៏គ្រោះថ្នាក់របស់ផែនដី ចាប់ពីឆ្នាំ 2100

កម្ដៅផ្ទៃផែនដីកំពុងស្ថិតក្នុងកំណើន 2.7 អង្សាសេ ធៀបនឹងដំណាក់កាលដំបូងនៃវិស័យឧស្សាហកម្ម នៅឆ្នាំ 2100 ដែលប្រការនេះនឹងរុញច្រានមនុស្សជាងពីរពាន់លាននាក់ (ប្រហែល 22% នៃប្រជាជនសរុបក្នុងពិភពលោក) ឱ្យចេញពីតំបន់អាកាសធាតុស្រួលរស់នៅ។

យោងតាមលទ្ធផលនៃការសិក្សាស្រាវជ្រាវថ្មីដែលត្រូវបានចុះផ្សាយលើទស្សនាវដ្ដី Nature Sustainability ក្រុមអ្នកវិទ្យាសាស្ត្របានឱ្យដឹងថា បណ្ដាប្រទេសមានប្រជាជនច្រើនជាងគេដែលត្រូវប្រឈមនឹងកម្ដៅដ៏គ្រោះថ្នាក់ គឺ ឥណ្ឌា (600 លាននាក់), នីហ្សេរីយ៉ា (300 លាននាក់), ឥណ្ឌូណេស៊ី (100 លាននាក់), ហ្វ៊ីលីពីន និងប៉ាគីស្ថាន (80 លាននាក់ដូច្នេះ)។ នេះបើតាម AFP ចុះផ្សាយកាលពីថ្ងៃទី 22 ឧសភា 2023។

ការកាត់បន្ថយការកើនឡើងកម្ដៅទូទាំងពិភពលោកនៅក្នុងកម្រិត 1.5 អង្សាសេ ទៅតាមគោលដៅរបស់កិច្ចព្រមព្រៀងទីក្រុងប៉ារីសឆ្នាំ 2015 នឹងជួយបន្ថយចំនួនមនុស្សដែលជួបគ្រោះថ្នាក់ដោយសារកម្ដៅព្រះអាទិត្យ ចុះមកនៅ 500 លាននាក់ ដែលស្មើនឹង 5% នៃចំនួនប្រជាជនសរុបប្រមាណ 9.5 ពាន់លាននាក់របស់ពិភពលោក នៅក្នុងរយៈពេលពី 6 ទៅ 7 ទសវត្សរ៍ខាងមុខ។

មកដល់បច្ចុប្បន្ន ការឡើងកម្ដៅក្រោម 1.2 អង្សាសេ ក៏បានបង្កើនកម្រិត ឬពេលវេលារបស់រដូវរលកកម្ដៅ គ្រោះរាំងស្ងួត និងករណីឆេះព្រៃ។ 8 ឆ្នាំកន្លង គឺជាពេលវេលាដែលផែនដីរងកម្ដៅខ្ពស់បំផុតដែលមនុស្សធ្លាប់បានកត់ត្រា។

កម្ដៅដែលបង្កគ្រោះថ្នាក់ទៅតាមការសិក្សាស្រាវជ្រាវថ្មីនេះ នោះគឺនៅពេលសីតុណ្ហភាពមធ្យមប្រចាំឆ្នាំ (MAT) ឡើងដល់ 29 អង្សាសេ។

យោងតាមធនាគារពិភពលោក ប្រទេសឥណ្ឌាបំភាយឧស្ម័ន CO2 (ឧស្ម័នដែលធ្វើឱ្យបរិយាកាសផែនដីឡើងកម្ដៅ) ជាមធ្យមប្រហែលពីរតោន/ម្នាក់/ឆ្នាំ, នីហ្សេរីយ៉ាបំភាយប្រហែលកន្លះតោន ខណៈដែលសហភាពអឺរ៉ុបជិត 7 តោន និងសហរដ្ឋអាម៉េរិក 15 តោន។

ក្រុមអ្នកស្រាវជ្រាវខាងលើក៏ព្រមានថា លទ្ធភាពដែលសីតុណ្ហភាពផ្ទៃផែនដីកើនបន្ថែមលើសពី 2.7 អង្សាសេ គឺអាចកើតឡើង។ បើសិនជាសកម្មភាពបំភាយឧស្ម័នផ្ទះកញ្ចក់អាចនាំឱ្យ «ធ្លុះធ្លាយ» ឃ្លាំងធម្មជាតិផ្ទុកកាបូន មានជាអាទិ៍ ស្រទាប់ Permafrost (ស្រទាប់ដីស្ថិតនៅត្រង់ ឬក្រោមតំបន់ទឹកកដែលកករយៈពេលចាប់ពីពីរឆ្នាំឡើងទៅ) ឬធ្វើឱ្យបរិយាកាសផែនដីក្ដៅជាងការរំពឹងទុក នោះសីតុណ្ហភាពពិភពលោកអាចកើនបន្ថែមជិត 4 អង្សាសេ បើធៀបនឹងកម្ដៅនៅពាក់កណ្ដាលសតវត្សរ៍ទី 19៕

May 23, 2023

អនាគតបេក្ខភាពប្រធាន FAT របស់ថៃ៖ «បើថៃមិនបានចូលរួម World Cup ខ្ញុំនឹងលាលែងពីតំណែង»

អតីតកីឡាករឆ្នើម Piyapong Pew On ធ្វើឱ្យមានការចាប់អារម្មណ៍បន្ទាប់ពីបានប្រកាសឈរឈ្មោះជាបេក្ខភាពសម្រាប់តំណែងប្រធានសហព័ន្ធកីឡាបាល់ទាត់របស់ប្រទេសថៃ។

យោងតាមប្រព័ន្ធផ្សព្វផ្សាយថៃ បើទោះជាការបោះឆ្នោតជ្រើសរើសប្រធានសហព័ន្ធបាល់ទាត់ថៃ (FAT) ត្រូវធ្វើឡើងនៅខែមេសា ឆ្នាំ 2024 ប៉ុន្តែស្ថានការណ៍ប្រែប្រួលនៅមុនការបោះឆ្នោតនេះ កំពុងតែឡើង «កម្ដៅ»។ Piyapong Pew On ដែលជាអតីតកីឡាករឆ្នើមរបស់បាល់ទាត់ថៃ នឹងក្លាយជាបេក្ខភាពសម្រាប់តំណែងនេះ។

ចែករំលែកអំពីការសម្រេចចិត្តខាងលើ លោក Piyapong Pew On បានបង្កការចាប់អារម្មណ៍ខ្លាំងនៅពេលប្រកាសថា នឹងលាលែងពីតំណែង បើសិនមិនអាចជួយឱ្យបាល់ទាត់ថៃបានចូលរួមប្រកួតនៅ World Cup។

«… ខ្ញុំបានត្រៀមខ្លួនរួចហើយសម្រាប់ការកាន់តំណែងប្រធាន FAT។ បើសិនសមាជិក សមាជិកាគាំទ្រ ខ្ញុំសន្យាចំពោះគ្រប់គ្នាថា នឹងបំពេញកាតព្វកិច្ចក្នុងរង្វង់បួនឆ្នាំ។ បើសិនក្រុមជម្រើសជាតិថៃមិនបានចូលរួម World Cup ខ្ញុំនឹងលាលែងពីតំណែង ហើយធ្វើកិច្ចការក្នុងវិស័យបាល់ទាត់ជាមួយនឹងតួនាទីផ្សេង» អតីតកីឡាករឆ្នើមរបស់ប្រទេសថៃ លោក Piyapong Pew On អះអាងដូច្នេះ។

លោក Piyapong Pew On បញ្ជាក់ថា លោកមិនប្រជែងដើម្បីមុខតំណែង ប៉ុន្តែលោកមានភាពម៉ឺងម៉ាត់ដោយរំពឹងថានឹងអភិវឌ្ឍ និងបង្កើតវប្បធម៌បាល់ទាត់ថៃទៅតាមស្មារតី «ភាពត្រឹមត្រូវ ភាពស្មោះត្រង់ តម្លាភាព និងមានការផ្ទៀងផ្ទាត់»។

លោក Piyapong Pew On ក៏ជាអ្នកដែលបានរិះគន់ទៅលើក្រុមគ្រូបង្វឹករបស់ក្រុមបាល់ទាត់ U22 ថៃ នៅក្នុងករណីវាយតប់គ្នាក្នុងការប្រកួតវគ្គផ្ដាច់ព្រ័ត្រនៅស៊ីហ្គេមលើកទី 32 រវាង U22 ថៃ និង U22 ឥណ្ឌូណេស៊ី កាលពីថ្ងៃ 16 ខែឧសភា 2023។

«ករណីហិង្សាកើតឡើងក្នុងវគ្គផ្ដាច់ព្រ័ត្ររវាង U22 ថៃ និង U22 ឥណ្ឌូណេស៊ី។ នោះគឺជារឿងដែលកីឡាករថៃត្រូវរៀនសូត្រ ពិសេសគឺការគ្រប់គ្រងកំហឹង។ ប៉ុន្តែ នោះគឺជាបញ្ហាដែលមិនគួរកើតឡើង និងមិនអាចលើកលែងទោស នៅពេលក្រុមគ្រូបង្វឹកទាំងមូលសម្រុកចូលបង្កហេតុជាមួយឥណ្ឌូណេស៊ី។ ពួកគេគួរណាស់តែរារាំងកីឡាករក្មេងៗ តែបែរជាធ្វើឱ្យមានកំហុសដោយខ្លួនឯងទៅវិញ» លោក Piyapong Pew On ថ្លែងដូច្នេះ។

លោក Piyapong Pew On បន្ថែមថា «ទោះជាយ៉ាងណាក៏ដោយ គេត្រូវតែផ្លាស់ប្ដូរគ្រូបង្វឹក ថៃត្រូវការមនុស្សហ្មត់ចត់ជាងដើម្បីដឹកនាំក្រុមកីឡាករក្មេង មិនដូច្នេះទេ យើងនឹងត្រូវបានបំផ្លាញដូចនៅក្នុងការប្រកួតផ្ដាច់ព្រ័ត្រនៅស៊ីហ្គេមលើកនេះ»។

លោក Piyapong Pew On អាចនឹងត្រូវប្រកួតប្រជែងដណ្ដើមតំណែងប្រធានសហព័ន្ធបាល់ទាត់ថៃ ជាមួយនឹងអតីតប្រធាន FAT លោក Worawee Makudi អាយុ 72 ឆ្នាំ។ កន្លងមក លោក Worawee Makudi ក៏បានបញ្ជាក់ថា នឹងឈរឈ្មោះជាបេក្ខភាពសម្រាប់តំណែងនេះជាថ្មី បើទោះផ្ទុយពីការកំណត់ដែលហាមបេក្ខភាពដែលមានអាយុលើសពី 70 ឆ្នាំ។ ប្រធាន FAT បច្ចុប្បន្នដែលត្រូវចប់អាណត្តិនៅខែកុម្ភៈ ឆ្នាំ 2024 គឺលោក Somyot Poompanmoung៕

May 23, 2023

SpaceX ធ្វើតេស្តបច្ចេកវិទ្យាខែលការពារប្រព័ន្ធទម្រយាន Starship

(សហរដ្ឋអាម៉េរិក) – SpaceX កំពុងពិសោធបច្ចេកវិទ្យាដែលជួយពង្រឹងផ្ទៃខាងក្រោមនៃប្រព័ន្ធទម្រដើម្បីអាចទ្រាំទ្រកម្លាំងដ៏ខ្លាំងរបស់ម៉ាស៊ីនរុញច្រានរ៉ុក្កែត Starship នៅពេលបាញ់បង្ហោះម្ដងៗ។

ប្រព័ន្ធទម្រនៅមូលដ្ឋាន Starbase របស់ SpaceX ក្នុងតំបន់ Texas ខាងត្បូង បានរងការខូចខាតធ្ងន់ធ្ងរក្នុងការបាញ់បង្ហោះសាកល្បងដំបូងរបស់យាន Starship ដែលជារ៉ុក្កែតកម្លាំងខ្លាំងបំផុត កាលពីថ្ងៃទី 20 មេសា 2023។ កម្លាំងដ៏ខ្លាំងរបស់ម៉ាស៊ីន Raptor ចំនួន 33 គ្រឿងនៅជាន់ក្រោមបង្អស់របស់ Starship បានទម្លុះជារណ្ដៅនៅខាងក្រោមជើងរបស់ប្រព័ន្ធទម្រ ធ្វើឱ្យផ្ទាំងបេតុងត្រូវបែកបាក់ និងប៉ើងចេញឆ្ងាយពីកន្លែងដើម។ មួយថ្ងៃក្រោយការបាញ់បង្ហោះសាកល្បងខាងលើ SpaceX ក៏បានឱ្យដឹងថា ពួកគេកំពុងរកវិធីបង្កើតខែលទប់ទល់នឹងបញ្ហានេះ។

ការប្រឹងប្រែងរកវិធីទប់ទល់ក៏បានចាប់ផ្ដើមតាំងពីបីខែមុន។ ប្រព័ន្ធខែលនេះមិនទាន់បានត្រៀមខ្លួនរួចរាល់នៅឡើយសម្រាប់ការបាញ់បង្ហោះកាលពីថ្ងៃទី 20 មេសា ប៉ុន្តែ SpaceX នៅតែសម្រេចចិត្តធ្វើតេស្ត ព្រោះយល់ថា ស្រទាប់បេតុងខាងក្រោមប្រព័ន្ធជើងទម្រ Starship អាចទ្រាំទ្រការបាញ់បង្ហោះបានពីរលើក។ ក៏ប៉ុន្តែ បញ្ហានៅតែកើតឡើង ដូច្នេះ SpaceX ក៏បង្កើនសកម្មភាពដើម្បីបង្ហើយកិច្ចការបង្កើតខែលការពារដែលធ្វើពីដែកថែប។

ថ្មីៗនេះ SpaceX បានពិសោធកម្លាំងរបស់ខែលទប់ទល់កំណែដំបូង ដោយការប្រើប្រាស់កម្លាំងរបស់ម៉ាស៊ីន Raptor មួយគ្រឿង។ នៅក្នុងវីដេអូ 20 វិនាទី ដែល SpaceX បានចែករំលែកកាលពីថ្ងៃទី 19 ឧសភា គេឃើញថា នៅពេលចំហាយទឹកបានរសាត់អស់ នៅខាងចុងវីដេអូ ខែលនេះហាក់នៅរក្សាបានទម្រង់ដើម។

SpaceX កំពុងតែអភិវឌ្ឍយាន Starship ដើម្បីដឹកអ្នកអវកាសឡើងទៅកាន់ឋានព្រះចន្ទ និងភពអង្គារ។ ណាសាក៏ជ្រើសរើស Starship ធ្វើជាស្ថានីយចុះចតដំបូងដែលនាំមនុស្សទៅជាន់ដីរបស់ឋានព្រះចន្ទនៅក្នុងកម្មវិធី Artemis។

ការធ្វើតេស្តបច្ចេកវិទ្យាខែលការពារប្រព័ន្ធទម្រយាន Starship

បច្ចុប្បន្ន SpaceX កំពុងដុតដៃដុតជើងនៅក្នុងការផលិតយាន Starship ជាច្រើនគ្រឿងនៅឯមូលដ្ឋាន Starbase ហើយគ្រោងនឹងបាញ់បង្ហោះកំណែបន្ទាប់នៅប្រហែលពីរខែទៀត បើសិនប្រព័ន្ធខែលដែកការពារផ្ទៃជើងទម្របានត្រៀមខ្លួនរួចរាល់ និងបន្ទាប់ពីទទួលបានការអនុញ្ញាតពីរដ្ឋបាលអាកាសចរណ៍អាម៉េរិក៕

May 23, 2023

អាចម៍ផ្កាយធ្លាក់ និងផ្ទុះឆេះភ្លឺពេញផ្ទៃមេឃនៅអូស្ត្រាលី

កាលពីយប់ថ្ងៃទី 20 ឧសភា ផ្ទៃមេឃនៅពេលរាត្រីក្នុងរដ្ឋ Queensland ភាគខាងជើងប្រទេសអូស្ត្រាលី បែរជាភ្លឺចាំងភ្នែក នៅពេលអាចម៍ផ្កាយមួយដុំហោះកាត់បរិយាកាស ធ្លាក់ទៅលើផែនដី បង្កជាសំឡេងផ្ទុះដ៏ខ្លាំង។

រូបភាពដែលថតបានដោយកាមេរ៉ាតាំងពីទីក្រុង Cairns នៅតំបន់ឆ្នេរសមុទ្រភាគខាងកើត រហូតដល់ Normanton នៅឈូងសមុទ្រ Carpentaria បង្ហាញថា ដុំភ្លើងមួយដុំធំ ធ្លាក់ក្នុងល្បឿនយ៉ាងលឿនចុះមកកាន់ផែនដី ហើយមានពន្លឺមួយខ្សែពណ៌បៃតង ពណ៌ខៀវ និងលឿងលេចចេញតាមពីក្រោយ។

ហេតុការណ៍នេះកើតឡើងនៅវេលាម៉ោង 09:22 យប់ ថ្ងៃទី 20 ឧសភា ឆ្នាំ 2023 (ពេលវេលាក្នុងស្រុក)។ ប្រជាជននៅទីរួមស្រុក Croydon ដែលមានចម្ងាយពី Cairns ប្រហែល 500 គីឡូម៉ែត្រទៅទិសខាងលិច ក៏បានឮសំឡេងផ្ទុះ។

អាចម៍ផ្កាយខាងលើនេះប្រហែលជាមានទំហំពី 0.5 ដល់ 1 ម៉ែត្រ តូចជាងអាចម៍ផ្កាយទំហំមធ្យម និងផ្លាស់ទីក្នុងល្បឿន 150,000 គីឡូម៉ែត្រ/ម៉ោង។ នេះបើតាមបណ្ឌិត Brad Tucker មកពីសាកលវិទ្យាល័យជាតិអូស្ត្រាលី។

អាចម៍ផ្កាយធ្លាក់ និងផ្ទុះឆេះនៅ Queensland ប្រទេសអូស្ត្រាលី

យោងតាមបណ្ឌិត Tucker អាចម៍ផ្កាយនេះនឹងមិនបង្កឱ្យមានរណ្ដៅ ដោយសារតែវាត្រូវបែកជាបំណែកមុនពេលធ្លាក់ដល់ដី ប៉ុន្តែវាក៏អាចនៅសល់បំណែកខ្លះត្រង់កន្លែងធ្លាក់។

កាលពីឆ្នាំ 2013 អាចម៍ផ្កាយមួយដុំទំហំ 20 ម៉ែត្រ បានផ្ទុះនៅខាងលើទីក្រុង Chelyabinsk របស់រុស្ស៊ី។ ការផ្ទុះនេះមានកម្លាំងប្រហាក់ប្រហែលនឹងការផ្ទុះ 500 គីឡូតោន (100,000 តោន) របស់រំសេវ TNT។ ការផ្ទុះនេះបានធ្វើឱ្យមនុស្សជាច្រើនត្រូវប៉ើង និងបំបែកបង្អួចកញ្ចក់របស់អគាររាប់ពាន់ខ្នង ខណៈដែលរោងចក្រមួយក៏ត្រូវបាក់រលំ។ យោងតាមទំព័រ Guardian អាចម៍ផ្កាយ Chelyabinsk ភ្លឺជាងព្រះអាទិត្យ 30 ដង ធ្វើឱ្យប្រជាជននៅឆ្ងាយពីទីនោះជិត 30 គីឡូម៉ែត្រ ក៏ត្រូវរលាកស្បែក និងភ្នែក៕

May 22, 2023

Tag: មនុស្ស