ថ្ម - La Reine Media

យន្តហោះបុគ្គលមានរាងដូចស៊ុត អាចហោះក្នុងល្បឿនមួយរយគីឡូម៉ែត្រ/ម៉ោង

Airscooter ដែលត្រូវបានរចនាឡើងដើម្បីជំនួសកូនរថយន្ត អាចហោះហើរក្នុងល្បឿន 100 គីឡូម៉ែត្រក្នុងមួយម៉ោង ដោយហោះឡើង និងចុះចតត្រង់ដូចឧទ្ធម្ភាគចក្រ។

អ្នកស្រាវជ្រាវជនជាតិបារាំង Franky Zapata បានបង្ហាញយន្តហោះលក្ខណៈបុគ្គលថ្មីមួយប្រភេទ មានកាប៊ីនសម្រាប់អ្នកបើកបរដែលមានរូបរាងដូចស៊ុត និងអាចហោះក្នុងកម្ពស់ 2,900 ម៉ែត្រ។ យោងតាម Mail ដែលបានចុះផ្សាយកាលពីថ្ងៃទី 21 សីហា 2023 យន្តហោះ Airscooter អាចជួយឱ្យការធ្វើដំណើរប្រហែលពីរម៉ោងតាមរថយន្តនៅក្នុងពេលចរាចរណ៍ចង្អៀត ចុះមកនៅត្រឹម 10 នាទី។

ក្រុមហ៊ុន Zapata ឱ្យដឹងថា យានជំនិះថ្មីនេះកំពុងស្ថិតក្នុងដំណាក់កាលអភិវឌ្ឍ។ Airscooter គឺជាយន្តជំនិះដែលហោះឡើង និងចុះចត់ត្រង់ដូចឧទ្ធម្ភាគចក្រ (VTOL)។ នេះគឺជាយន្តហោះកូនកាត់ (ហាយព្រីដ) ប្រើប្រាស់អគ្គិសនី និងប្រេងឥន្ធនៈ ដើម្បីផ្ដល់ថាមពលដល់រ៉ូទ័រ 6 គ្រឿងដែលបំពាក់ពីខាងលើកាប៊ីន។ Airscooter អាចហោះហើររយៈពេលពីរម៉ោងបន្តបន្តបន្ទាប់ យូរជាងយាន VTOL ដទៃ។

Airscooter មានទម្ងន់ 115 គីឡូក្រាម។ គ្រប់គ្នាអាចបើកបរយន្តហោះនេះបាន បន្ទាប់ពីឆ្លងកាត់ការហ្វឹកហាត់រយៈពេលខ្លី។ បើទោះជាផលិតឡើងក្នុងបំណងជំនួសកូនរថយន្ត ប៉ុន្តែ Airscooter នឹងមិនត្រូវបានដាក់លក់ក្នុងទីផ្សារនោះទេ។ ជំនួសមកវិញ អ្នកប្រើប្រាស់នឹងត្រូវបង់ប្រាក់មួយចំនួនសម្រាប់ការបើកបរ 40 នាទីដោយផ្ទាល់ដៃ និងគយគន់ទេសភាពតាមបង្អួច។

ចាប់ពីដើមឆ្នាំក្រោយ Zapata នឹងបើកមជ្ឈមណ្ឌលហោះហើរនៅសហរដ្ឋអាម៉េរិក ដើម្បីផ្ដល់សេវាកម្មហោះហើរកម្សាន្តដល់អតិថិជន។ មជ្ឈមណ្ឌលដំបូងនឹងមាននៅក្នុងទីក្រុង Lake Havasu រដ្ឋ Arizona៕

August 23, 2023

ព្រៃបុរាណក្នុងរណ្ដៅធម្មជាតិខ្នាតយក្សជម្រៅរាប់រយម៉ែត្រនៅប្រទេសចិន

ព្រៃបុរាណដ៏ធំមួយត្រូវបានរកឃើញក្នុងរណ្ដៅជម្រៅជិត 200 ម៉ែត្រ ស្ថិតក្នុងឧស្យានភូមិសាស្ត្រសកល Leye Fengshan របស់ប្រទេសចិន។

ទំព័រ Mail កាលពីថ្ងៃទី 21 សីហា 2023 បានរាយការណ៍ថា អ្នកស្រាវជ្រាវមួយក្រុមបានប្រទះឃើញព្រៃបុរាណមួយក្នុងឧទ្យាន Leye Fengshan កាលពីខែឧសភា 2022។ ឧស្យានភូមិសាស្ត្រសកល Leye Fengshan (Leye Fengshan Global Geopark) ជាទីដែលមានរណ្ដៅធម្មជាតិបុរាណខាងលើ ស្ថិតក្នុងតំបន់ស្វយ័តជនជាតិ Zhuang Guangxi នៅភាគអាគ្នេយ៍ប្រទេសចិន។

ការរកឃើញខាងលើនេះ ធ្វើឱ្យចំនួនរណ្ដៅធម្មជាតិខ្នាតយក្សរបស់តំបន់ ឧទ្យាន Leye Fengshan កើនឡើងដល់ 30។

Zhang Yuanhai ដែលជាវិស្វករនៅវិទ្យាស្ថានភូគព្ភសាស្ត្រថ្មកំបោរនៃនាយកដ្ឋានស្រាវជ្រាវភូមិសាស្ត្រចិន ឱ្យដឹងថា តំបន់ព្រៃក្នុងរណ្ដៅធម្មជាតិដែលទើបត្រូវបានរកឃើញនេះ ត្រូវបានការពារទាំងស្រុង និងមានរូងភ្នំចំនួនបីនៅត្រង់ជញ្ជាំងរណ្ដៅ។ រណ្ដៅធម្មជាតិនេះមានបណ្ដោយប្រវែង 306 ម៉ែត្រ, ទទឹង 150 ម៉ែត្រ និងជម្រៅ 192 ម៉ែត្រ។ រណ្ដៅនេះមានចំណុះឡើងដល់ជាង 5 លានម៉ែត្រគុប ស្ថិតក្នុងក្រុមរណ្ដៅធម្មជាតិខ្នាតយក្ស។

សមាជិកក្រុមស្រាវជ្រាវខាងលើឱ្យដឹងថា រុក្ខជាតិដុះដេរដាសខាងក្នុងរណ្ដៅ និងដើមឈើបុរាណដុះនៅបាតរណ្ដៅមានកម្ពស់ដល់ជិត 40 ម៉ែត្រ។ ដើម្បីស្រាវជ្រាវ ក្រុមអ្នកវិទ្យាសាស្ត្រត្រូវចុះទៅកាន់ជម្រៅជាង 100 ម៉ែត្រ និងដើរច្រើនម៉ោងមុននឹងទៅដល់មាត់រណ្ដៅ។

ទម្រង់រូបរាងរបស់មាត់រណ្ដៅបានផ្ដល់ភាពងាយស្រួលសម្រាប់ពន្លឺព្រះអាទិត្យចាំងចូលទៅខាងក្នុង ជួយឱ្យរុក្ខជាតិលូតលាស់បានល្អ

ឧទ្យានភូមិសាស្ត្រកើតឡើងពីថ្មកំបោរ ក្នុងនោះ រណ្ដៅកើតឡើងដោយសារស្រទាប់ថ្មខាងលើត្រូវទឹកក្រោមដីបំផ្លាញ។ ទម្រង់រូបរាងរបស់មាត់រណ្ដៅបានផ្ដល់ភាពងាយស្រួលសម្រាប់ពន្លឺព្រះអាទិត្យចាំងចូលទៅខាងក្នុង ហើយតំបន់ព្រៃក្នុងរណ្ដៅនេះអាចរីកចម្រើនបន្តទៀត៕

August 23, 2023

មូលហេតុដែលនាំឱ្យយានអវកាសរុស្ស៊ី Luna-25 ធ្លាក់បុកផ្ទៃព្រះចន្ទ

ហេតុការណ៍ធ្លាក់យានអវកាសព្រះចន្ទ Luna-25 ទំនងជាកើតឡើងដោយសារបញ្ហាម៉ាស៊ីន។ នេះបើតាម Yury Borisov ប្រធានអង្គការអវកាសរុស្ស៊ី Roscosmos ឱ្យដឹងកាលពីថ្ងៃទី 21 សីហា។

នៅលើទូរទស្សន៍ Russia-24 លោក Borisov និយាយថា យានអវកាស Luna-25 ប្ដូរទិស និងបញ្ឆេះម៉ាស៊ីនដើម្បីឆ្ពោះចូលគន្លងគោចរជុំវិញព្រះចន្ទ មុននឹងចុះចត។ ក៏ប៉ុន្តែ ម៉ាស៊ីនមិនបានឈប់ដូចការគ្រោងទុក។ តាមការកំណត់ ម៉ាស៊ីនត្រូវតែដំណើរការ 84 វិនាទី ប៉ុន្តែវាដំណើរការរហូតដល់ 127 វិនាទី។ នេះគឺជាមូលហេតុចម្បងដែលបណ្ដាលឱ្យយានធ្លាក់បុកផ្ទៃព្រះចន្ទ។

Roscosmos បានដាច់ទំនាក់ទំនងជាមួយយាន Luna-25 កាលពីថ្ងៃទី 19 សីហា។ មួយថ្ងៃក្រោយមក ពួកគេក៏បានប្រកាសថា បេសកកម្មព្រះចន្ទរបស់ Luna-25 បានបរាជ័យ។ Roscosmos បង្ហើបឱ្យដឹងថា Luna-25 បានព្យាយាមប្រើប្រាស់ម៉ាស៊ីនរុញច្រានដើម្បីកែតម្រូវគន្លងគោចរ មុនពេលដាច់ទំនាក់ទំនង។

យានអវកាសខាងលើហោះឆ្ពោះទៅកាន់ប៉ូលខាងត្បូងរបស់ព្រះចន្ទ ហើយគ្រោងនឹងចុះចតនៅទីនោះក្នុងថ្ងៃទី 21 សីហា 2023 ប៉ុន្តែបានបរាជ័យ។

ទំព័រ TASS រាយការណ៍ថា រុស្ស៊ីកំពុងតែរៀបផែនការសម្រាប់បេសកកម្ម Luna មួយផ្សេងទៀត រួមមាន Luna-26 និង Luna-27។ Luna-25 ត្រូវបានគេរំពឹងថាជាជំហានសំខាន់ថ្មីបំផុតក្នុងវិស័យអវកាសរបស់រុស្ស៊ី។ ប្រទេសនេះមិនធ្លាប់បានបញ្ជូនយានអវកាសណាមួយទៅចុះចតលើឋានព្រះចន្ទ រាប់ចាប់ពីក្រោយសម័យសូវៀត។ បេសកកម្ម Luna ចុងក្រោយគឺ Luna-24 ដែលបានចុះចតលើឋានព្រះចន្ទនៅថ្ងៃទី 18 សីហា 1976៕

August 22, 2023

ភពមួយក្នុងប្រព័ន្ធព្រះអាទិត្យទើបតែបាត់បង់អស់ពពក៖ មូលហេតុគួរឱ្យភ្ញាក់ផ្អើល!

យោងតាមបណ្ដារូបថតថ្មីបំផុតពីណាសា ភពមួយដែលមានពណ៌ខៀវដ៏ស្រស់ស្អាត និងស្ថិតក្នុងប្រព័ន្ធព្រះអាទិត្យ ទើបតែ បានបាត់បង់ពពក។

ក្រុមអ្នកជំនាញប្រចាំសាកលវិទ្យាល័យ California នៅសហរដ្ឋអាម៉េរិក បានពិនិត្យទិន្នន័យដែលតេឡេស្កុបរបស់ណាសាថតភពណិបទូនពីឆ្នាំ 1994 ដល់ឆ្នាំ 2022 និងបានរកឃើញប្រការដ៏ចម្លែក៖ ពីឆ្នាំ 2019 នៅជុំវិញតំបន់រយៈទទឹងមធ្យម ភាពបិទបាំងរបស់ពពកក្រាស់ចាប់ផ្ដើមព្រិលបន្តិចម្ដងៗ។ មកដល់បច្ចុប្បន្ន ភពពណ៌ខៀវនេះបានប្រែប្រួលឱ្យយើងឃើញយ៉ាងច្បាស់ ដោយសារតែពពករបស់វាបានបាត់បង់ទាំងស្រុង។

បន្ទាប់ពីសម្រេចចិត្តស្វែងយល់ស៊ីជម្រៅ ក្រុមអ្នកវិទ្យាសាស្ត្រក៏បានរកឃើញមូលហេតុដ៏គួរឱ្យភ្ញាក់ផ្អើល នោះគឺ ព្រះអាទិត្យ និងវដ្ដ 11 ឆ្នាំរបស់វា។

យោងតាមទំព័រ Space លទ្ធផលនៃការសិក្សាស្រាវជ្រាវខាងលើបង្ហាញថា មិនត្រឹមតែបណ្ដាភពក្បែរនោះទេ ព្រះអាទិត្យក៏មានថាមពលគ្រប់គ្រាន់ដើម្បីជះឥទ្ធិពលដល់ភពដែលនៅឆ្ងាយៗដូចណិបទូនផងដែរ។

វដ្ដ 11 ឆ្នាំរបស់ព្រះអាទិត្យរួមមានដំណាក់កាលធ្វើសកម្មភាពកម្រិតទាប និងដំណាក់កាលធ្វើសកម្មភាពខ្លាំងក្លាដូចបច្ចុប្បន្ន។ ដំណាក់កាលធ្វើសកម្មភាពខ្លាំងក្លានេះកំពុងតែធ្វើឱ្យតំបន់អវកាសដែលរងឥទ្ធិពលពីផែនដី (ម៉ាញេតូស្វៀរ (magnetosphere)) ត្រូវរងគ្រាប់ផ្ទុកថាមពលកម្រិតខ្ពស់ បង្កឱ្យមានព្យុះដែនទំនាញ។

សម្រាប់ភពណិបទូន អ្វីដែលបង្កផលប៉ះពាល់ធំបំផុត គឺអំឡុងពេលផ្លាស់ប្ដូរពីដំណាក់កាលមួយទៅដំណាក់កាលមួយនៅក្នុងវដ្ដ 11 ឆ្នាំរបស់ព្រះអាទិត្យ ដោយបង្កើតវិទ្យុសកម្មភាពអ៊ុលត្រាវីយូឡេខ្ពស់ជាងធម្មតា។ វិទ្យុសកម្មនេះសាយភាយពាសពេញប្រព័ន្ធព្រះអាទិត្យ ប៉ះពាល់ដល់បណ្ដាភពដែលមានបរិយាកាសពិសេស ដែលភពណិបទូនក៏ស្ថិតក្នុងចំណោមនោះ។

ប្រតិកម្មរស្មីសំយោគក្នុងដំណាក់កាលវិទ្យុសកម្មអ៊ុលត្រាវីយូឡេកម្រិតខ្ពស់ បានបង្កើតស្រទាប់ពពកយ៉ាងក្រាស់ ដែលណាសាធ្លាប់បានឃើញនៅលើភពណិបទូន។ ក្រោយមក ស្រទាប់ពពកក្រាស់នេះក៏ស្ដើងបន្តិចម្ដងៗទៅតាមពេលវេលា និងរង់ចាំដំណាក់កាលមួយទៀតក្នុងវដ្ដ 11 ឆ្នាំរបស់ព្រះអាទិត្យ ដើម្បីឡើងក្រាស់ជាថ្មី។

បច្ចុប្បន្ន ព្រះអាទិត្យកំពុងឆ្ពោះទៅជិតដល់ដំណាក់កាលធ្វើសកម្មភាពខ្លាំងក្លាក្នុងវដ្ដ 11 ឆ្នាំ។ ពេលវាឡើងដល់ចំណុចកំពូល ប្រហែលឆ្នាំ 2025 ឬឆាប់ជាងនេះ ព្រះអាទិត្យនឹងផ្លាស់ប្ដូរប៉ូលម៉ាញេទិច និងងាកមកដំណាក់កាល «ស្លូត»។ ពេលនោះ ព្យុះដែនទំនាញ ឬព្យុះម៉ាញេទិចនឹងកាត់បន្ថយផលប៉ះពាល់មកលើផែនដី គ្រាដែលភពណិបទូនក៏នឹងមានពពកក្រាស់សាជាថ្មី៕

August 19, 2023

«រោងចក្រ» មួយរបស់ចក្រវាល ផលិតលោហធាតុធ្ងន់ស្មើផែនដីមួយពាន់ដង

ករណីផ្ទុះមួយដែលមានចម្ងាយពីផែនដី 3 ពាន់លានឆ្នាំពន្លឺ បង្កើតចេញលោហធាតុគ្រប់ប្រភេទដែលមានទម្ងន់សរុបលើសពីភព ព្រះចន្ទ និងអាចម៍ផ្កាយក្នុងប្រព័ន្ធព្រះអាទិត្យបូកបញ្ចូលគ្នាទៅទៀត។

ឆ្នាំ 2021 ស្ថានីយសង្កេតតារា Neil Gehrels បានរកឃើញករណីច្របាច់បញ្ចូលគ្នារវាងវត្ថុអវកាសក្រាស់ៗចំនួនពីរដែលហៅថា kilonova និងត្រូវបានដាក់ឈ្មោះឱ្យថា GRB 211211A។ នេះគឺជាឧទាហរណ៍ជិតបំផុតស្ដីពីព្រឹត្តិការណ៍តារាសាស្ត្រកម្រចួបនេះដែលមនុស្សមិនបានរកឃើញជាមួយនឹងរលកទំនាញ។ GRB 211211A ប្លែកពីគេ ដោយសារតែពន្លឺហ្គាម៉ា (GRB) ដែលវាបញ្ចេញ អូសបន្លាយពេលមួយនាទី។ កន្លងមក ថេរវេលាដូចគ្នានេះតែងតែអមជាមួយនឹង GRB ពីហេតុការណ៍ផ្ទុះផ្កាយនានាដែលហៅថាស៊ូពើណូវ៉ា ជំនួសឱ្យការច្របាច់បញ្ចូលគ្នារវាងផ្កាយនឺត្រុង។

ទំព័រ IFL Science រាយការណ៍កាលពីថ្ងៃទី 15 សីហាថា លទ្ធផលនៃការស្រាវជ្រាវចំនួនបួនត្រូវបានប្រកាសដំណាលគ្នាលើទស្សនាវដ្ដី Nature បរិយាយអំពីការរកឃើញខាងលើ និងដំណើរការដែលអាចបង្កើតបានជាព្រឹត្តិការណ៍បែបនេះ។ ក៏ប៉ុន្តែ អ្វីដែលគួរឱ្យចាប់អារម្មណ៍ជាងគេនៃហេតុការណ៍នេះ អាចជាបរិមាណវត្ថុធាតុធ្ងន់ៗដែលត្រូវបានបង្កើតឡើងពីការផ្ទុះដ៏អស្ចារ្យ ក្នុងនោះមានទាំងលោហធាតុកម្រ មានដូចជា មាស និងប្លាទីនជាដើម។

រូបភាពដែលបង្កើតឡើងត្រាប់តាមរស្មីហ្គាម៉ាដែលជះចេញពី GRB 211211A

ជាធម្មតា ផ្កាយមួយដួងតែងច្របាច់អ៊ីដ្រូសែនបញ្ចូលគ្នាឱ្យក្លាយជាអេល្យូម រួចក៏ប្រែក្លាយអេល្យូមទៅជាសារធាតុដទៃៗនៅក្នុងវដ្ដរបស់វា។ ពេលស្លាប់ទៅ ផ្កាយដែលមានម៉ាសតូចទាបនឹងបង្កើតសារធាតុថ្មីៗ ប៉ុន្តែវត្ថុធាតុភាគច្រើនទាមទារឱ្យមានវិធីកកើតដ៏ខ្លាំងក្លា។ សារធាតុដូចអាលុយមីញ៉ោម និងប៉ូតាស្យូមកកើតពីហេតុការណ៍ផ្ទុះផ្កាយមួយដួងដោយឡែកពីគ្នា (ស៊ូពើណូវ៉ា) ប៉ុន្តែ ក្រុមអ្នកវិទ្យាសាស្ត្រសង្ស័យថា មានប្រភពសារធាតុធ្ងន់ៗដទៃ ដោយសារថា ចំនួនករណីផ្ទុះស៊ូពើណូវ៉ាដែលពួកគេបានប្រទះ មិនសមស្របនឹងកម្រិតសម្បូរបែបរបស់សារធាតុធ្ងន់ៗ។

នៅពេលផ្កាយនឺត្រុងពីរដួងប៉ះទង្គិចគ្នា និងត្រូវបានច្របាច់បញ្ចូលគ្នា ថាមពលដែលពួកវាបញ្ចេញកកើតទៅជាលោហធាតុធ្ងន់ជាងឆ្ងាយបើធៀបនឹងហេតុការណ៍ផ្ទុះស៊ូពើណូវ៉ា។ បើទោះជាគីឡូណូវ៉ា កម្រកើតមាន បើធៀបនឹងស៊ូពើណូវ៉ា តែពួកវាបង្កើតសារធាតុធ្ងន់ៗច្រើនជាង និងកាន់កាប់លោហធាតុធ្ងន់ៗភាគច្រើនដែលមាននៅក្នុងចក្រវាល។ ឧទាហរណ៍៖ ព្រះអាទិត្យមានម៉ាសធ្ងន់ជាងផែនដី 330,000 ដង ខណៈ 99.5% នៃសម្បកផែនដីមានផ្ទុកសារធាតុមិនធ្ងន់ជាងដែក។ ប្រការនេះបញ្ចាក់ថា «រោងចក្រផលិតមាសក្នុងចក្រវាល» មានទំហំធំខ្លាំងណាស់។

រូបភាពបរិយាយអំពីការច្របាច់បញ្ចូលគ្នារវាងផ្កាយក្រិនពណ៌ស (ឆ្វេង) និងផ្កាយនឺត្រុង (កណ្ដាលថាសវត្ថុធាតុ)

ដើម្បីឱ្យដឹងថា ព្រឹត្តិការណ៍ដូច GRB 211211A រួមចំណែកអ្វីខ្លះក្នុងការកកើតសារធាតុធ្ងន់ៗក្នុងចក្រវាល ក្រុមអ្នកវិទ្យាសាស្ត្រត្រូវការដឹងអំពីចំនួនរបស់ពួកវា។ ក្រុមអ្នកវិទ្យាសាស្ត្រកំពុងស្វែងរកអ្វីដែលបានបង្កើត GRB 211211A។ បច្ចុប្បន្ន សម្មតិកម្មមួយត្រូវបានលើកឡើង នោះគឺការច្របាច់បញ្ចូលគ្នារវាងផ្កាយនីត្រុង និងកូនផ្កាយក្រិនពណ៌ស បង្កើតឱ្យមាន GRB 211211A មិនមែនការបុកបញ្ចូលគ្នារវាងផ្កាយនីត្រុងពីរដួងនោះទេ៕

August 17, 2023

Elon Musk ទទួលស្គាល់ថា លេងសើចរឿងបបួល Zuckerberg ប្រកួតលើសង្វៀន

មហាសេដ្ឋី Elon Musk ឱ្យដឹងថា ដំបូងឡើយខ្លួនគ្រាន់តែនិយាយលេងសើចនៅពេលបបួលប្រកួត ប៉ុន្តែក្រោយមកក៏បានស្នើទីតាំងប្រកួត ប៉ុន្តែ Mark Zuckerberg តែងតែបដិសេធ។

«សង្ខេបការបបួលប្រកួត៖ ខ្ញុំនិយាយលេងសើចអំពីការបបួលប្រកួតប្រដាល់ជាមួយ Zuckerberg នៅលើ X។ ក្រោយមក គាត់និយាយថា «ផ្ញើទីតាំងឱ្យខ្ញុំ»។ អ៊ីតាលីបានត្រៀមរួចរាល់ហើយសម្រាប់ទីលានប្រកួត Colosseum។ Zuckerberg ក៏បានបដិសេធ។ ខ្ញុំស្នើថា ទៅកាន់ផ្ទះគាត់ ដើម្បីសុវត្ថិភាព។ រឿងអាក្រក់គឺថា គាត់បែរជាកំពុងនៅកន្លែងផ្សេង។ តើមានកន្លែងណាដែលគាត់អាចប្រកួតជាមួយខ្ញុំ ឬអត់?» លោក Eon Musk បានបង្ហោះសារលើបណ្ដាញសង្គមកាលពីព្រឹកថ្ងៃទី 16 សីហាដូច្នេះ។

ក៏ប៉ុន្តែ មហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក Elon Musk មិនបានបញ្ជាក់ថា បច្ចុប្បន្នលោកពិតជាចង់ឱ្យមានការប្រកួត ឬអត់នោះទេ។

ប្រតិកម្មរបស់លោក Elon Musk ត្រូវបានលើកឡើងបន្ទាប់ពីមហាសេដ្ឋី Zuckerberg ដែលជាម្ចាស់ Facebook ចោទថា លោក Elon Musk មិនមានភាពម៉ឺងម៉ាត់នឹងការប្រកួតលើសង្វៀន។

ថ្មីៗនេះ Elon Musk និង Mark Zuckerberg បន្តចោទប្រកាន់គ្នានៅលើបណ្ដាញសង្គម X និង Threads ទាក់ទងនឹងរឿងប្រកួតប្រដាល់លើសង្វៀន ប៉ុន្តែក្រុមអ្នកតាមដានយល់ថា ការប្រយុទ្ធគ្នានេះពិតជាពិបាកកើតឡើង។

August 16, 2023

ទឹកជំនន់វាយប្រហារប្រទេសឥណ្ឌា ធ្វើឱ្យមនុស្ស 49 នាក់បាត់បង់ជីវិត

ភ្លៀងធំដែលបង្កជាទឹកជំនន់ និងបំណាក់ដី បានបំផ្លាញផ្ទះសំបែង បណ្ដាលឱ្យមនុស្សយ៉ាងតិច 41 នាក់បាត់បង់ជីវិតនៅភាគខាងជើង ខណៈ 9 នាក់ផ្សេងទៀតបានស្លាប់ដោយសារបាក់ស្រុតវិហារ។

រូបភាពពីបណ្ដាញសង្គមបង្ហាញថា ជំនន់ទឹកភ្លៀងហូរចុះពីភ្នំ កួចយកផ្ទាំងថ្មធំៗ និងបំផ្លាញផ្ទះ សំណង់នានានៅក្នុងរដ្ឋ Himachal Pradesh នៅភាគខាងជើងប្រទេសឥណ្ឌា។

បន្ទាប់ពីគ្រោះទឹកជំនន់ និងបំណាក់ដីកើតឡើង សាកសពមនុស្ស 49 នាក់ត្រូវបានរកឃើញ គ្រាដែលអាជ្ញាធរក្នុងតំបន់កំពុងប្រឹងប្រែងដោះស្រាយបញ្ហា។ ក្នុងចំណោមអ្នកស្លាប់សរុប មានយ៉ាងតិច 9 នាក់បានស្លាប់នៅពេលទឹកជំនន់ហូរកាត់ ធ្វើឱ្យវិហារមួយនៅ Shimla ត្រូវបាក់រលំ។

មនុស្ស 5 នាក់ត្រូវបានសង្គ្រោះនៅក្នុងហេតុការណ៍បាក់រលំវិហារខាងលើ ប៉ុន្តែនៅមានមនុស្សពី 20 ទៅ 25 នាក់ទៀតកំពុងជាប់ក្នុងគំនរបាក់បែក ស្របពេលដែលសមត្ថកិច្ចកំពុងញាប់ដៃញាប់ជើងជួយសង្គ្រោះ។

អ្នកវិទ្យាសាស្ត្របានឱ្យដឹងថា ការប្រែប្រួលអាកាសធាតុកំពុងតែធ្វើឱ្យរដូវភ្លៀងនៅប្រទេសឥណ្ឌាប្រែជាវឹកវរ និងខុសធម្មតា បង្កឱ្យមានផលប៉ះពាល់ធ្ងន់ធ្ងរជាងមុន៕

August 15, 2023

មន្ទីរពេទ្យមួយនៅវៀតណាមវះកាត់ខួរក្បាលដោយប្រើរ៉ូបូត AI៖ អ្នកជំងឺច្រៀងក្នុងពេលវះកាត់

អ្នកជំងឺវ័យ 58 ឆ្នាំម្នាក់ត្រូវដាច់សរសៃឈាមខួរក្បាលជាង 24 ម៉ោង និងមានអាការៈភ្លេចភ្លាំងស្មារតី មិនអាចកម្រើកបាន ដូច្នេះ បើសិនវះកាត់តាមធម្មតា នឹងមានហានិភ័យកើតជំងឺស្លាប់អវយវៈណាមួយ ប៉ុន្តែបើវះកាត់យកកំណកឈាមក្នុងខួរក្បាលដោយមិនចាក់ថ្នាំសន្លប់ និងប្រើប្រាស់បច្ចេកវិទ្យារ៉ូបូត AI (បញ្ញាសិប្បនិម្មិត) អ្នកជំងឺអាច «ច្រៀង» ជាមួយក្រុមវេជ្ជបណ្ឌិតបានក្នុងគ្រាកំពុងវះកាត់។

កាលពីថ្ងៃទី 10 សីហា អ្នកជំងឺខាងលើ (នៅក្រុងព្រៃនគរ) ត្រូវបានគ្រួសារនាំមកកាន់មន្ទីរពេទ្យពហុព្យាបាលតាមអាញ់ទីក្រុងហូជីមិញ (Tam Anh Hospital) ក្នុងស្ថានភាពរង្វេងរង្វាន់ ដៃជើងកម្រើនស្ទើរមិនបាន។ លទ្ធផលនៃការថត MRI 3 Tesla បញ្ជាក់ថា អ្នកជំងឺនេះមានដុំឈាមកកក្នុងខួរក្បាលទំហំ 4 សង់ទីម៉ែត្រ។ បើមិនវះកាត់បន្ទាន់ អ្នកជំងឺត្រូវប្រឈមនឹងបញ្ហាស្លាប់មួយចំហៀងខ្លួន ពិបាកក្នុងការនិយាយ ស្រវាំងភ្នែក ឬអាចបាត់បង់ជីវិត។

ក្រុមវេជ្ជបណ្ឌិតបានជ្រើសយកវិធីវះកាត់ខួរក្បាលបែបថ្មី ដែលអនុញ្ញាតឱ្យអ្នកជំងឺនៅដឹងខ្លួន ដោយចាក់តែថ្នាំស្ពឹក និងប្រើប្រាស់រ៉ូបូត AI Modus V Synaptive រួមនឹងប្រព័ន្ធកំណត់ទិស Neuro-Navigation AI ជំនាន់ថ្មីបំផុត។

ការវះកាត់បែបថ្មីនេះនឹងជួយឱ្យអ្នកជំងឺគេចផុតពីគ្រោះថ្នាក់បានលឿន ការវាយតម្លៃលើប្រសិទ្ធភាពនៃការវះកាត់មានភាពរលូន ដោយសារតែអ្នកជំងឺអាចកម្រើក និងឆ្លើយឆ្លងជាមួយក្រុមវេជ្ជបណ្ឌិត។ ក៏ប៉ុន្តែ វិធីវះកាត់ថ្មីនេះមានភាពស្មុគស្មាញច្រើន និងគ្រោះថ្នាក់ជាង ធៀបនឹងការវះកាត់ដោយចាក់ថ្នាំសន្លប់។ ក៏ប៉ុន្តែ បើចាក់ថ្នាំសន្លប់ វេជ្ជបណ្ឌិតនឹងមិនអាចវាយតម្លៃផ្ទាល់ដោយការសួរអ្នកជំងឺក្នុងពេលវះកាត់។

ក្នុងពេលវះកាត់ វេជ្ជបណ្ឌិតវៀតណាម និយាយជាមួយអ្នកជំងឺថា «ខ្ញុំកំពុងយកកំណកឈាមចេញពីខួរក្បាល លោកមានអារម្មណ៍ស្រួលខ្លួនជាងមុនទេ?»។ អ្នកជំងឺឆ្លើយថា «ធូរស្រាលជាងមុនឆ្ងាយណាស់ អរគុណគ្រូពេទ្យ»។

ក្រុមវេជ្ជបណ្ឌិតសួរនាំ និងស្នើឱ្យអ្នកជំងឺលើកដៃជើងជាបន្តបន្ទាប់ ដើម្បីប្រាកដថា សរសៃប្រសាទនានាត្រូវបានការពារក្នុងកម្រិតខ្ពស់បំផុត។

ដោយសារការត្រេកអរខ្លាំងបន្ទាប់ពីកំណកឈាមត្រូវបានយកចេញពីខួរក្បាល និងមានអារម្មណ៍ធូរស្រាល ទាំងវេជ្ជបណ្ឌិត ទាំងអ្នកជំងឺ នាំគ្នាច្រៀងរអ៊ូៗ គ្រាដែលក្រុមជំនួយការបន្តដាក់ភ្ជាប់លលាដ៍ក្បាល និងដេរស្បែកក្បាល។

ក្រោយរយៈពេលជាង 30 នាទីនៃការវះកាត់ ក្រុមវេជ្ជបណ្ឌិតដ៏នាំគ្នាហ៊ោក្នុងភាពត្រេកអរ នៅពេលប្រធានក្រុមវេជ្ជបណ្ឌិតប្រកាសថា «ការវះកាត់បានទទួលជោគជ័យ អបអរសាទរលោកហៃ និងអរគុណគ្រប់គ្នា»។

30 នាទីបន្ទាប់មកទៀត អ្នកជំងឺក៏បានជួបសាច់ញាតិ និងហៅទូរស័ព្ទទៅកាន់អ្នកផ្ទះ។ កន្លះថ្ងៃក្រោយមក លទ្ធផលនៃការថត CT 768 បង្ហាញថា លែងមានកំណកឈាមក្នុងខួរក្បាល ហើយអ្នកជំងឺក៏មានសភាពដូចធម្មតាទាំងស្រុង៕

ប្រព័ន្ធរ៉ូបូត AI Modus V Synaptive ដែលមានតែមួយគត់នៅប្រទេសវៀតណាម

August 15, 2023

របកគំហើញថ្មី! ភពចំនួន 7 ដូចផែនដី ទំនងជាកំពុងមានផ្ទុកភាវៈរស់

ផ្កាយ TRAPPIST-1 បានក្លាយជាទីជជែកវែកញែកតាំងពីយូរមកហើយ នៅពេលក្រុមអ្នកវិទ្យាសាស្ត្រព្រួយបារម្ភអំពីកត្តាមួយចំនួនពីផ្កាយមេ និងកត្តាផ្ទៃក្នុងរបស់បណ្ដាភពនេះ អាចរារាំងលទ្ធភាពកកើតជីវិត។

ក៏ប៉ុន្តែ លទ្ធផលនៃការសិក្សាស្រាវជ្រាវដែលទើបត្រូវបានប្រកាសលើទស្សនាវដ្ដីវិទ្យាសាស្ត្រ Nature ដែលនាំមុខដោយតារាវិទូ Frank Selsis មកពីសាកលវិទ្យាល័យ Bordeaux (បារាំង) បាននាំមកនូវដំណឹងល្អដ៏ធំមួយ។

TRAPPIST-1 គឺជាផ្កាយក្រិនពណ៌ក្រហមមួយដួង មានទំហំតូចខ្លាំង និងត្រជាក់ជាងព្រះអាទិត្យឆ្ងាយណាស់ ហើយមានចម្ងាយពីផែនដីត្រឹមតែ 40 ឆ្នាំពន្លឺប៉ុណ្ណោះ។

ភពទាំង 7 របស់ផ្កាយ TRAPPIST-1 មានទំហំ និងរូបរាងខុសៗគ្នា និងសុទ្ធតែមានចំណុចពិសេសមួយចំនួនដែលដូចទៅនឹងផែនដី ដែលអាចគាំទ្រដល់ភាវៈរស់។

អ្វីដែលធ្វើឱ្យអ្នកវិទ្យាសាស្ត្រចាប់អារម្មណ៍ជាងគេគឺ ភពទាំង 7 នេះសុទ្ធតែមានលទ្ធភាពខ្ពស់ អាចផ្ទុកទឹករាវនៅលើផ្ទៃ ឬនៅក្រោមដី។ ក៏ប៉ុន្តែ មានឧបសគ្គមួយចំនួនត្រូវបានលើកឡើងនាពេលកន្លង។ ភាពចម្លែករបស់ «ភពមហាសមុទ្ឬ» មួយចំនួនក្នុងចំណោមនោះ បានធ្វើឱ្យក្រុមអ្នកវិទ្យាសាស្ត្រព្រួយបារម្ភ។ ពួកគេយល់ថា ការដែលពួកវាមានទឹកច្រើនពេកធៀបនឹងផែនដី នឹងបង្កផលវិបាកដល់ភាវៈរស់។

ក្ដីបារម្ភធំបំផុតនៅតែជាផ្កាយមេ TRAPPIST-1។ ផ្កាយក្រិនក្រហមនេះត្រជាក់មែនពិត ប៉ុន្តែដោយសារតែវាមានវិទ្យុសកម្មដ៏ខ្លាំងក្លា ដូច្នេះទឹកក្នុងបរិយាកាសប្រាកដជាត្រូវហួតទៅក្នុងទីអវកាស ហើយពួកវានឹងក្លាយជា «ភពសុក្រ» របស់ផ្កាយ TRAPPIST-1 ជំនួសឱ្យផែនដី។

ទោះយ៉ាងណាក៏ដោយ បណ្ឌិត Selsis ឱ្យដឹងថា ពន្លឺផ្កាយក្រិនក្រហមដូច TRAPPIST-1 ត្រូវថយចុះទៅតាមពេលវេលា ដែលនេះមានន័យថា អនាគតរបស់ពួកវានៅតែអាចមានទឹក។

រូបមន្តដែលលោក Frank Selsis និងសហការីបានអភិវឌ្ឍ បង្ហាញថា TRAPPIST-1 ដំបូងឡើយគឺពិតជាបានដុតកម្ដៅភពទាំង 7 របស់វា ប៉ុន្តែដោយសារតែជាផ្កាយក្រិនក្រហម ដូច្នេះវានឹងមិនមានកម្ដៅច្រើនគ្រប់គ្រាន់ដើម្បីដុតរំលាយសម្បកខាងលើ និងស្រទាប់បន្ទាប់របស់បណ្ដាភពម៉ាក់ម៉ានេះ។

ប្រការនេះមានន័យថា មានទឹកជាច្រើននៅតែស្ថិតក្នុងថ្ម ពោលគឺថា ការដែលបណ្ដាភពនេះលិចទឹក គឺនាំមកនូវផលប្រយោជន៍ច្រើនផងដែរ។ ក្នុងពេលដែលផ្កាយមេចុះត្រជាក់ បណ្ដាមហាសមុទ្រទឹករាវក៏ទំនងជាបានកើតឡើង ហើយមកដល់បច្ចុប្បន្ន អាចមានភាវៈរស់ប្រកបដោយភាពសម្បូរបែប។

យោងតាមទំព័រ Space ការរកឃើញខាងលើ មិនត្រឹមតែជួយឱ្យអ្នកវិទ្យាសាស្ត្រមានក្ដីសង្ឃឹមច្រើនជាងមុននោះទេ តែក៏បង្កើនឱកាសច្រើនដើម្បីអាចបញ្ចាក់បានថា មនុស្សជាតិមិនមែននៅឯកាក្នុងកាឡាក់ស៊ីមីលគីវ៉េ ឬចក្រវាលទាំងមូលឡើយ ព្រោះថា ផ្កាយដូច TRAPPIST-1 គឺជាផ្កាយដែលមានច្រើនជាងគេនៅក្នុងកាឡាក់ស៊ីរបស់ផែនដី៕

August 14, 2023

ក្រុមមហាអំណាចអវកាស និង «អ្នកលេងជើងថ្មី» ក្នុងដំណើរទៅកាន់ឋានព្រះចន្ទ

ការបាញ់បង្ហោះយានអវកាសចុះចតលើឋានព្រះចន្ទរបស់រុស្ស៊ី កាលពីថ្ងៃទី 11 សីហា គឺជាការប្រឹងប្រែងថ្មីក្នុងការប្រកួតប្រជែងឡើងទៅកាន់ឋានព្រះចន្ទ ដែលនៅទីនេះមានទាំង «អ្នកលេងជើងចាស់» និង «អ្នកលេងជើងថ្មី»។

ប្រទេសចិន

ប្រទេសដែលមានសេដ្ឋកិច្ចធំជាងគេលំដាប់ទីពីរក្នុងពិភពលោក បាន និងកំពុងវិនិយោគរាប់ពាន់លានដុល្លារទៅក្នុងកម្មវិធីអវកាស ដោយមានគោលដៅតាមឱ្យទាន់សហរដ្ឋអាម៉េរិក និងរុស្ស៊ី។ ឆ្នាំ 2003 ប្រទេសចិនបានក្លាយជាប្រទេសទីបីដែលនាំមនុស្សឡើងទៅកាន់គន្លងតារាវិថី។ ឆ្នាំ 2022 ស្ថានីយអវកាសធានហ្កុង (Tiangong) ត្រូវបានដំឡើងជារៀងអក្សរ T រួចរាល់។

ចិនក៏បាននាំយកបណ្ដារ៉ូបូតស្វ័យប្រវត្តឡើងទៅកាន់ភពអង្គារ និងព្រះចន្ទដោយជោគជ័យ។ ប្រទេសនេះក៏មានគម្រោងនាំមនុស្សឡើងទៅជាន់ដីឋានព្រះចន្ទក្នុងឆ្នាំ 2030 និងសងសង់មូលដ្ឋាននៅទីនោះផងដែរ។

សហរដ្ឋអាម៉េរិក

តាមផែនការក្នុងកម្មវិធី Artemis ណាសាគ្រោងនឹងបំពេញបេសកកម្មជាច្រើនសម្រាប់ការឡើងទៅកាន់ឋានព្រះចន្ទជាថ្មីនៅឆ្នាំ 2025 ហើយរស់នៅយូរអង្វែងនៅទីនោះ ដើម្បីអភិវឌ្ឍបច្ចេកវិទ្យាសម្រាប់ដំណើរឆ្ពោះទៅកាន់ភពអង្គារ។

ដើមសប្ដាហ៍នេះ ណាសាឱ្យដឹងថា Artemis 3 អាចនឹងមិននាំមនុស្សចុះចតលើឋានព្រះចន្ទ ប៉ុន្តែប្រការនេះគឺអាស្រ័យលើកត្តាសំខាន់មួយចំនួន មានដូចជា ប្រព័ន្ធចុះចតរបស់ SpaceX ជាដើម។

ប្រទេសរុស្ស៊ី

ការបាញ់បង្ហោះ Luna-25 របស់រុស្ស៊ីកាលពីថ្ងៃទី 11 សីហា 2023 គឺជាលើកដំបូងដែលប្រទេសនេះដាក់គោលដៅលើឋានព្រះចន្ទ រាប់ចាប់ពីឆ្នាំ 1976 នៅពេលបេសកកម្ម Luna-24 បាននាំយកសំណាកដីព្រះចន្ទមកកាន់ផែនដីដោយជោគជ័យ។ Luna-25 គឺជាបេសកកម្មដំបូងនៃផែនការព្រះចន្ទថ្មីរបស់ទីក្រុងមូស្គូ។

ក្រុម «អ្នកលេងជើងថ្មី»

ការរីកចម្រើនរបស់បច្ចេកវិទ្យាបាន និងកំពុងជួយកាត់បន្ថយការចំណាយសម្រាប់បណ្ដាបេសកកម្មអវកាស ដែលបើកផ្លូវឱ្យក្រុមប្រទេសថ្មីចូលរួមប្រកួតប្រជែង។ យានអវកាសរបស់ឥណ្ឌា Chandrayaan-3 បានចូលដល់គន្លងតារាវិធីព្រះចន្ទកាលពីដើមខែសីហានេះ ដើម្បីត្រៀមសម្រាប់ការចុះចតនៅចុងខែ។

ក៏ប៉ុន្តែ ការឡើងទៅជាន់ដីឋានព្រះចន្ទ មិនមែនជារឿងងាយស្រួលឡើយ។ អង្គការមិនស្វែងរកកម្រៃ SpaceIL របស់ប្រទេសអ៊ីស្រាអែល បានបាញ់បង្ហោះយានចុះចតលើឋានព្រះចន្ទ Beresheet កាលពីឆ្នាំ 2009 ប៉ុន្តែបានបរាជ័យ។ កាលពីខែមេសាឆ្នាំ 2023 ក្រុមហ៊ុនជប៉ុន ISpace ក៏បានបន្តទទួលបរាជ័យក្នុងការប្រកួតប្រជែងនាំស្ថានីយអវកាសទៅចុះចតលើឋានព្រះចន្ទ។

ក្រុមហ៊ុនពីររបស់អាម៉េរិក គឺ Astrobotic និង Intuitive Machines ក៏នឹងធ្វើការបាញ់បង្ហោះយានទៅចុះចតលើឋានព្រះចន្ទនៅចុងឆ្នាំនេះ៕

August 12, 2023

Tag: ថ្ម