ជើង - La Reine Media

សំបុត្រចូលមើល Messi ទាត់ឱ្យក្លឹប Inter Miami ក្នុងការប្រកួតដំបូង កំពុងឡើងថ្លៃខ្ពស់ខ្លាំង

(សហរដ្ឋអាម៉េរិក) – សំបុត្រចូលទស្សនា Lionel Messi ទាត់ក្នុងការប្រកួតដំបូងនៅ Inter Miami ដែលនឹងត្រូវប៉ះក្រុម Cruz Azul ក្នុងក្របខណ្ឌ Leagues Cup នៅថ្ងៃទី 21 កក្កដាខាងមុខ បានឡើងថ្លៃលើសពី 100,000 ដុល្លារអាម៉េរិក។

កាលពីចុងសប្ដាហ៍កន្លង គេហទំព័ររបស់ក្លឹបបាល់ទាត់ Inter Miami បានបញ្ជាក់ថា Messi រួមនឹងកីឡាករថ្មី Sergio Busquets អាចទាត់នៅក្នុងការប្រកួតជាមួយនឹងក្រុម Cruz Azul ក្នុងក្របខណ្ឌ Leagues Cup នៅលើទីលាន DRV PNK ក្នុងថ្ងៃទី 21 កក្កដា 2023។ Leagues Cup គឺជាពានរង្វាន់ប្រចាំឆ្នាំ ដែលត្រូវបានបង្កើតឡើងកាលពីឆ្នាំ 2019 និងមានការចូលរួមពីបណ្ដាក្លឹបមកពីពានរង្វាន់បាល់ទាត់អាជីពអាម៉េរិក (MLS) និង Liga MX របស់ម៉ិចស៊ិច នៅអាម៉េរិកខាងជើង។

យោងតាម Goal សំបុត្រចូលទស្សនាការប្រកួតនៅក្នុងកីឡដ្ឋាន DRV PNK កាន់តែពិបាករកទិញ ហើយតម្លៃក៏កើនឡើងខ្ពស់ខ្លាំងក្នុងប៉ុន្មានថ្ងៃចុងក្រោយនេះ។ Vivid Seats ដែលជាគេហទំព័រជំនាញខាងទិញ-លក់សំបុត្រចូលមើលបាល់ទាត់ បច្ចុប្បន្នកំពុងដាក់លក់សំបុត្រចូលទស្សនា Messi ទាត់ក្នុងការប្រកួតដំបូងនៅ Inter Miami ក្នុងតម្លៃ 110,000 ដុល្លារអាម៉េរិក/សំបុត្រ។

តម្លៃមធ្យមសម្រាប់សំបុត្រចូលមើលការប្រកួតរវាង Inter Miami និង Cruz Azul គឺ 487 ដុល្លារ ពោលគឺខ្ពស់ជាងទ្វេដង បើធៀបនឹងសំបុត្រចូលមើលការប្រកួតមិត្តភាពរវាង Inter Miami និងម្ចាស់ជើងឯក La Liga Barca កាលពីរដូវក្ដៅឆ្នាំមុន។

តម្រូវការសំបុត្រចូលមើល Messi ទាត់ក្នុងប្រកួតដំបូងនៅពានរង្វាន់បាល់ទាត់អាជីពអាម៉េរិក (MLS) ដែល Inter Miami ត្រូវប៉ះនឹងក្រុម Charlotte FC ក្នុងថ្ងៃទី 21 សីហា ក៏កើនឡើងខ្ពស់ផងដែរ និងត្រូវបានដាក់លក់ក្នុងតម្លៃប្រហែល 288 ដុល្លារ/សំបុត្រ។ តួលេខនេះអាចនឹងកើនឡើងខ្ពស់ជាងនេះនាពេលខាងមុខ បើសិន Messi បង្ហាញថ្វីជើងបានល្អនៅ Leagues Cup។

មិនត្រឹមតែសំបុត្រនោះទេ សូម្បីតែអាវរបស់ Messi ក៏ត្រូវបានអ្នកគាំទ្រតាមរកទិញច្រើនផងដែរ។ ដោយសារតែមិនទាន់ត្រូវបានដាក់លក់លើគេហទំព័ររបស់ Inter Miami ដូច្នេះអ្នកគាំទ្រមានតែរកទិញអាវលេខ 10 របស់ Messi នៅឯហាងក្នុងកីឡដ្ឋាន DRV PNK ដែលដាក់លក់ក្នុងតម្លៃ 199 ដុល្លារអាម៉េរិក/អាវ។

ទំព័រ Goal បានឱ្យដឹងថា តម្លៃសំបុត្រចូលមើលការប្រកួតរបស់ក្រុមបាល់ទាត់ Inter Miami បានកើនឡើងជិត 900% ចាប់តាំងពីក្លឹបនេះបានបញ្ជាក់ថា ចុះហត្ថលេខាជាមួយនឹង Messi កាលពីថ្ងៃទី 07 មិថុនា 2023។ នៅក្លឹបថ្មីនេះ កំពូលតារាបាល់ទាត់អាហ្សង់ទីន នឹងទទួលបានប្រាក់បៀវត្សរ៍ពី 50 លាន ដល់ 60 លានដុល្លារ/ឆ្នាំ។ តម្លៃសរុបនៃកិច្ចព្រមព្រៀងរបស់ Messi ក្នុងរយៈពេលពីរឆ្នាំកន្លះ នឹងចាប់ពី 125 លាន ដល់ 150 លានដុល្លារ។

Messi ក៏នឹងទទួលបានប្រាក់ខ្លះពីបណ្ដាគណនីថ្មីដែលចុះឈ្មោះមើល MLS នៅលើ Apple TV ក៏ដូចជាប្រាក់ចំណេញមួយផ្នែករបស់ក្រុមហ៊ុន Adidas នៅសហរដ្ឋអាម៉េរិកផងដែរ។

កាលពីព្រលប់ថ្ងៃទី 16 កក្កដា Messi ត្រូវបាន Inter Miami បង្កើតព្រឹត្តិការណ៍បង្ហាញខ្លួនមួយដែលមានឈ្មោះថា «The Unveil» នៅក្នុងកីឡដ្ឋាន DRV PNK។ នៅទីនេះ ម្ចាស់បាល់មាស 7 គ្រាប់ បានថ្លែងអំណរគុណអ្នកគាំទ្រ មិត្តរួមក្រុមថ្មី និងគណៈគ្រប់គ្រងក្លឹប Inter Miami ចំពោះការទទួលស្វាគមន៍ដ៏អស្ចារ្យនេះ ព្រមទាំងបានសម្ដែងអំពីមហិច្ឆតាចង់យកឈ្នះ ដើម្បីជួយឱ្យក្លឹបនេះរីកចម្រើនបន្តទៀត៕

July 18, 2023

Messi លេចមុខជាផ្លូវការក្នុងព្រឹត្តិការណ៍បង្ហាញខ្លួនរបស់ក្លឹប Inter Miami

(សហរដ្ឋអាម៉េរិក) – បើទោះជាមានភ្លៀងធំនាំឱ្យព្រឹត្តិការណ៍បង្ហាញវត្តមានជាផ្លូវការត្រូវបានពន្យារពេល ប៉ុន្តែអ្នកគាំទ្រនៅតែមកចូលរួមពេញទីលានដើម្បីទស្សនាទិដ្ឋភាព Lionel Messi បង្ហាញខ្លួននៅក្លឹបបាល់ទាត់ Inter Miami។

ក្លឹប Inter Miami ប្រារព្ធព្រឹត្តិការណ៍បង្ហាញវត្តមាន Messi កាលពីវេលាម៉ោង 18 ថ្ងៃទី 16 កក្កដា (ម៉ោងនៅភាគខាងត្បូងរបស់សហរដ្ឋអាម៉េរិក) នៅក្នុងកីឡដ្ឋាន DRV PNK។ មុនពេលព្រឹត្តិការណ៍ត្រូវបានធ្វើឡើង ភ្លៀងមួយមេធំបានបង្អុរចុះ បណ្ដាលឱ្យមានការកកស្ទះចរាចរណ៍។

ខ្លោងទ្វារទទួលសំបុត្រក៏ត្រូវបានបិទដើម្បីចៀសវាងបញ្ហា។ ដូច្នេះ ទស្សនិកជនស្ទើរតែទាំងអស់បានជាប់នៅខាងក្រៅកីឡាដ្ឋាន។ ក៏ប៉ុន្តែ ទោះជាភ្លៀងខ្លាំងយ៉ាងណាក៏មិនអាចកាត់បន្ថយភាពសប្បាយរីករាយរបស់អ្នកគាំទ្រ។ យោងតាម Daily Mail ជនជាតិអាហ្សង់ទីនប្រហែល 100,000 នាក់កំពុងរស់នៅក្នុងតំបន់ Miami។

ម៉ោងប្រហែលជិត 19 Messi នាំភរិយា Antonella និងកូនៗមកកាន់កីឡដ្ឋាន។ M10 កាន់ដៃកូនប្រុសច្បងអាយុ 10 ឆ្នាំ នៅក្នុងការការពាររបស់បុគ្គលិកសន្តិសុខ។ Mateo អាយុ 7 និង Ciro អាយុ 5 ឆ្នាំ ដើរពីក្រោយជាមួយម្ដាយ។

នៅក្នុងកីឡដ្ឋាន DRV PNK ដែលមាន 18,000 កៅអី ពុំនៅសល់កន្លែងឈរនោះទេ។ គណៈកម្មការរៀបចំត្រូវដំឡើងកន្លែងទស្សនាបន្ថែមដើម្បីឆ្លើយតបនឹងតម្រូវការរបស់អ្នកគាំទ្រ។

Messi បង្ហាញខ្លួននៅក្នុងសំឡេងហ៊ោរបស់អ្នកគាំទ្រ។ គាត់លើកដៃរាគោរពអ្នកគាំទ្រ និងឈានជើងដើរទៅកាន់កន្លែងដែលក្រុមម្ចាស់ក្លឹបកំពុងឈររង់ចាំ។ ប្រធានក្រុមជម្រើសជាតិអាហ្សង់ទីន ងាកមើលទៅកាន់ទស្សនិកជនជាញឹកញាប់ ហាក់ពេញចិត្តនឹងការគាំទ្រដ៏អស្ចារ្យនេះជាខ្លាំង។

Messi ចុះកិច្ចព្រមព្រៀងពីរឆ្នាំកន្លះជាមួយនឹងក្លឹបអាម៉េរិក Inter Miami។ កំពូលតារាបាល់ទាត់វ័យ 36 ឆ្នាំរូបនេះ អាចនឹងបានទាត់លើទីលានម្ចាស់ផ្ទះក្នុងការប្រកួតដំបូងរបស់ខ្លួន យ៉ាងឆាប់ត្រឹមថ្ងៃទី 21 កក្កដាខាងមុខ ដោយត្រូវប៉ះក្រុម Cruz Azul ក្នុងក្របខណ្ឌ Leagues Cup។ តាមគម្រោង នៅថ្ងៃទី 17 កក្កដា 2023 នេះ ក្លឹប Inter Miami នឹងធ្វើសន្និសីទសារព័ត៌មានមួយសម្រាប់ Messi៕

July 17, 2023

យានអវកាសបីគ្រឿងរបស់អាម៉េរិកដែលនឹងត្រូវដឹកមនុស្សឡើងទៅកាន់ឋានព្រះចន្ទ

ក្រុមហ៊ុនការពារជាតិសហរដ្ឋអាម៉េរិក Lockheed Martin កាលពីថ្ងៃទី 14 កក្កដា បានបង្ហាញរូបថតយានអវកាស Orion 3 គ្រឿងដែលនឹងត្រូវប្រើប្រាស់ក្នុងបេសកកម្មឋានព្រះចន្ទ Artemis II, III និង IV។

«អនាគតរបស់យាន Orion ទំនងជាល្អខ្លាំងណាស់។ ម៉ូឌុលទាំងឡាយដែលនឹងដឹកមនុស្សក្នុងបេសកកម្ម Artemis II, Artemis III និង Artemis IV កំពុងឆ្លងកាត់ដំណាក់កាលផលិតខុសៗគ្នានៅក្នុងមជ្ឈមណ្ឌលអវកាស Kennedy របស់អង្គការណាសា ដើម្បីត្រៀមសម្រាប់ការនាំអវកាសចរត្រលប់ទៅកាន់ឋានព្រះចន្ទ» Lockheed Martin សរសេរនៅលើ Twitter កាលពីថ្ងៃទី 14 កក្កដាដូច្នេះ អមនឹងរូបថតរបស់យានអវកាស Orion។ យានទាំងនេះកំពុងត្រូវបានអភិវឌ្ឍក្រោមការគ្រប់គ្រងរបស់ Lockheed Martin។

ក្នុងបេសកកម្ម Artemis II យានអវកាស Orion គ្រោងនឹងត្រូវបានបាញ់បង្ហោះនៅថ្ងៃទី 11 កុម្ភៈ ឆ្នាំ 2024 នាំយកអ្នកអវកាស 4 នាក់ទៅជាមួយ រួមមាន 3 នាក់មកពីណាសារបស់សហរដ្ឋអាម៉េរិក និងម្នាក់មកពីអង្គការអវកាសកាណាដា។ ចំណែកក្រុមអវកាសចរដែលនឹងចូលរួមក្នុងបេសកកម្ម Artemis III និង Artemis IV មិនទាន់ត្រូវបានបង្ហើបឱ្យដឹងនៅឡើយ។ តាមផែនការ Artemis II នឹងត្រូវបានបាញ់បង្ហោះក្នុងឆ្នាំ 2025 ឬ 2026 អាស្រ័យទៅលើយាន Starship របស់ SpaceX។ Artemis IV គ្រោងនឹងបាញ់បង្ហោះនៅចុងទសវត្សរ៍នេះ។

នៅក្នុងរូបថតខាងលើ ពុំមានយានអវកាស Orion របស់ Artemis I ជាយានដែលបានបំពេញបេសកកម្មឡើងទៅកាន់គន្លងតារាវិថីព្រះចន្ទកាលពីចុងឆ្នាំមុន។ ក្នុងរូបថតនេះក៏មិនមានយាន Orion ដែលត្រូវបានផលិតដំបូង និងជាយានដែលបានហោះជុំវិញផែនដីកាលពីឆ្នាំ 2014 នៅក្នុងជើងហោះហើរសាកល្បង។

ណាសាបានចុះកិច្ចព្រមព្រៀងជាមួយនឹងប្រទេសចំនួន 26 ដើម្បីបង្កើតគោលការណ៍សម្រាប់ការធ្វើដំណើរទៅកាន់ឋានព្រះចន្ទប្រកបដោយសន្តិភាព។ អង្គការអវកាសអឺរ៉ុប និងកាណាដាសុទ្ធតែបានសន្យាផ្គត់ផ្គង់ផ្នែករឹងសម្រាប់ Artemis និង Gateway ជាស្ថានីយអវកាសហោះជុំវិញឋានព្រះចន្ទដែលគ្រោងនឹងត្រូវបាញ់បង្ហោះក្នុងទសវត្សរ៍នេះ៕

July 17, 2023

អាជ្ញាធរចិនប្រហារជីវិតគ្រូបង្រៀនម្នាក់ដែលបានបំពុលសិស្ស 25 នាក់

អាជ្ញាធរចិនប្រហារជីវិត Wang Yun ជាគ្រូបង្រៀនថ្នាក់មតេ្តយ្យដែលបានដាក់ថ្នាំបំពុលសិស្សចំនួន 25 នាក់កាលពីឆ្នាំ 2019 បណ្ដាលឱ្យកុមារម្នាក់បាត់បង់ជីវិត។

Wang Yun អាយុ 40 ត្រូវបានកាត់ទោសពីបទបំពុលសិស្សរបស់ខ្លួនដោយការដាក់សូដ្យូមនីត្រាតទៅក្នុងអាហាររបស់សិស្ស។ ដំបូងឡើយ Wang Yun ត្រូវបានកាត់ទោសឱ្យជាប់ពន្ធនាគារ 9 ខែ ពីបទមានចេតនាបង្កឱ្យខូចសុខភាពរបស់សិស្ស។ ក៏ប៉ុន្តែ ក្រោយមក កាលពីខែកញ្ញាឆ្នាំ 2020 សាលក្រមតុលាការក៏បានកែប្រែ នាំឱ្យអ្នកគ្រូរូបនេះត្រូវទទួលទោសប្រហារជីវិត។

យោងតាមសេចក្ដីប្រកាសកាលពីថ្ងៃទី 14 កក្កដា 2023 Wang Yun ត្រូវបានប្រហារជីវិតកាលពីថ្ងៃទី 13 កក្កដា 2023 នៅក្នុងទីក្រុង Jiaozuo នៃខេត្ត Henan។ សមត្ថកិច្ចចិនមិនបានបង្ហើបឱ្យដឹងអំពីរបៀបនៃការប្រហារជីវិតនោះទេ នៅក្នុងករណីនេះ។

Wang Yun បានដាក់សូដ្យូមនីត្រាតទៅក្នុងបបរសម្រាប់សិស្សកាលពីថ្ងៃទី 27 មីនា 2019 នៅឯសាលាមត្តេយ្យដែលខ្លួនកំពុងបង្រៀន បន្ទាប់ពីបានប្រកែកគ្នាជាមួយនឹងមិត្តរួមការងារអំពីវិធីគ្រប់គ្រងសិស្ស។ យោងតាមទំព័រ Poison Control ការហូបចាំសូដ្យូមនីត្រាតអាចនាំឱ្យមានបញ្ហាខ្វះអុកស៊ីសែន ថប់ដង្ហើម កន្ត្រាក់ដៃជើង ចង្វាក់បេះដូងមិនប្រក្រតី បាត់បង់ស្មារតី និងអាចបាត់បង់ជីវិត។

ទង្វើរបស់ Wang Yun បាននាំឱ្យសិស្ស 25 នាក់ពុលអាហារ ប៉ុន្តែស្ទើរតែទាំងអស់បានជាសះស្បើយក្រោយការព្យាបាល។ ក៏ប៉ុន្តែ ក្នុងចំណោមនោះមានសិស្សម្នាក់បានស្លាប់ក្នុងឆ្នាំ 2020 បន្ទាប់ពីការព្យាបាលជំងឺខ្សោយគ្រឿងក្នុងដោយសារតែថ្នាំពុលអស់មួយរយៈពេល។

ករណីបំពុលសិស្សខាងលើនេះមិនមែនជាលើកដំបូងឡើយដែល Wang Yun ប្រើប្រាស់សូដ្យូមនីត្រាត។ កន្លងមក ជនដៃដល់នេះក៏ធ្លាប់ដាក់សារធាតុនេះដើម្បីបំពុលប្ដីខ្លួនឯង បណ្ដាលឱ្យមានអាការពុលកម្រិតស្រាលផងដែរ៕

សិស្ស 25 នាក់របស់ Wang Yun បានក្អួតចង្អោរ និងសន្លប់ក្នុងថ្នាក់រៀន បន្ទាប់ពីបានហូបអាហារដែលមានថ្នាំពុលកាលពីខែមីនា 2019

July 15, 2023

តំណាងរាស្ត្របក្សប្រឆាំង និងបក្សកាន់អំណាច វាយតប់គ្នាពេលប្រជុំក្នុងសភានៅកូសូវ៉ូ

តំណាងរាស្ត្រនៅកូសូវ៉ូ សាចទឹកទៅលើមេដឹកនាំស្ថាប័នអនុវត្តច្បាប់ នាំឱ្យមានហេតុការណ៍វាយតប់គ្នានៅក្នុងសភា ក្នុងកិច្ចប្រជុំស្ដីពីសំឡេងជជែកគ្នាដែលកំពុងមានភាពចម្រូងចម្រាស។

វីដេអូដែលថតបាននៅក្នុងកិច្ចប្រជុំសភាកូសូវ៉ូ កាលពីថ្ងៃទី 13 កក្កដា បង្ហាញថា តំណាងរាស្ត្រមួយរូបរបស់បក្សប្រឆាំង កាន់ដបទឹកសុទ្ធ និងជះទឹកទៅលើលោក Albin Kurti ដែលជាប្រធានស្ថាប័នអនុវត្តច្បាប់ និងអនុប្រធាន។

សកម្មភាពនេះ ភ្លាមៗនោះក៏បានធ្វើឱ្យមានអំពើហិង្សា នៅពេលក្រុមតំណាងរាស្ត្របក្សប្រឆាំង និងបក្សកាន់អំណាចសម្រុកទៅកាន់វេទិកា រុញច្រាន និងវាយតប់គ្នា។ អំពើហិង្សានេះបានបន្តរហូតដល់ក្រុមប៉ូលិស និងក្រុមអង្គរក្សរបស់លោក Kurti ចូលមកធ្វើអន្តរាគមន៍។

ហេតុការណ៍ខាងលើបានកើតឡើងនៅពេលដែលក្រុមតំណាងរាស្ត្រកូសូវ៉ូ បើកកិច្ចប្រជុំស្ដីពីសំឡេងដែលត្រូវបានសារព័ត៌មានចុះផ្សាយកាលពីពេលថ្មីៗនេះ ទាក់ទិននឹងការជជែកគ្នាកាលពីខែមិថុនា 2022 រវាងលោកស្រី Mimoza Kusari-Lila ប្រធានបក្សកាន់អំណាច Alternativa និងតំណាងរាស្ត្រជនជាតិសែប៊ី Slavko Simic។

ក្នុងសំឡេងដែលថតបានខាងលើ លោកស្រី Kursari-Lila ឱ្យដឹងថា ធ្លាប់បានជជែកជាមួយ Milan Radojcic ដែលជាមន្ត្រីជនជាតិសែប៊ីមួយរូបត្រូវបានសហរដ្ឋអាម៉េរិកដាក់ទណ្ឌកម្មព្រោះតែប្រព្រឹត្តអំពើពុករលួយ និងបទល្មើសដែលមានអង្គការចាត់តាំង។ Radojcic ក៏ត្រូវបានអាជ្ញាធរកូសូវ៉ូតាមចាប់ខ្លួនផងដែរ។

កូសូវ៉ូគឺជាតំបន់ផ្ដាច់ខ្លួនដែលស្ថិតនៅភាគនិរតីនៃប្រទេសសែប៊ី និងមានផ្ទៃក្រឡាប្រហែល 10,800 គីឡូម៉ែត្រការ៉េ។ តំបន់នេះមានប្រជាជនចំនួន 1.8 លាននាក់ ដែលភាគច្រើនគឺជាជនជាតិអាល់បានី។ កូសូវ៉ូបានប្រកាសឯករាជ្យកាលពីឆ្នាំ 2008 ប៉ុន្តែសែប៊ីមិនទទួលស្គាល់។

ជនជាតិសែប៊ីប្រហែល 120,000 នាក់ដែលរស់នៅក្នុងតំបន់ភាគខាងជើងកូសូវ៉ូ មិនទទួលស្គាល់អាជ្ញាធរនៅ Pristina ដោយពួកគេនៅតែស្មោះស្ម័គ្រផ្នែកនយោបាយជាមួយនឹងសែប៊ី។ ភាគច្រើននៃបណ្ដាប្រទេសលោកខាងលិច បានទទួលស្គាល់ឯករាជ្យរបស់កូសូវ៉ូ ប៉ុន្តែតំបន់នេះមិនទាន់ទទួលបានកៅអីនៅអង្គការសហប្រជាជាតិ ដោយសារតែមានការជំទាស់ពីរុស្ស៊ី និងចិន។

July 14, 2023

ក្រុមបាល់ទាត់នារីវៀតណាម ចាញ់ក្រុមអេស្ប៉ាញ 0-9

នៅក្នុងការប្រកួតមិត្តភាពចុងក្រោយនៅមុន World Cup នារី 2023 ដែលធ្វើឡើងនាព្រឹកថ្ងៃទី 14 កក្កដា ក្រុមបាល់ទាត់ជម្រើសជាតិផ្នែកនារីរបស់វៀតណាម បានចាញ់ក្រុមនារីអេស្ប៉ាញរហូតដល់ 0-9។

ក្រុមអេស្ប៉ាញនាំមុខ 2-0 នៅក្នុងតង់ទីមួយនៃការប្រកួតមិត្តភាពចុងក្រោយនៅមុន World Cup នារី 2023។ ចូលដល់តង់ទីពីរ ក្រុមតំណាងរបស់អឺរ៉ុបមួយនេះក៏រកបាន 7 គ្រាប់បន្ថែមទៀត ធ្វើឱ្យវៀតណាមត្រូវចាញ់ 0-9។

ការប្រកួតខាងលើត្រូវបានធ្វើឡើងលើទីលាន Mc Lennan Park ក្នុងទីក្រុង Auckland នៅវេលាម៉ោង 12 និង 30 នាទី ថ្ងៃទី 14 កក្កដា ម៉ោងនៅនូវែលសេឡង់ ត្រូវនឹងម៉ោង 07 និង 30 នាទីនៅកម្ពុជា។ មុនពេលប៉ះនឹងអេស្ប៉ាញ ក្រុមវៀតណាមបានចាញ់អាល្លឺម៉ង់ 1-2 និងចាញ់នូវែលសេឡង់ 0-2។

ក្រោយពីការប្រកួតខាងលើ ក្រុមវៀតណាមនៅសល់ពេលជាងមួយសប្ដាហ៍ដើម្បីត្រៀមខ្លួនសម្រាប់ការប្រកួតបើកឆាកជាមួយក្រុមសហរដ្ឋអាម៉េរិក ដែលជាម្ចាស់ជើងឯក World Cup នៅថ្ងៃទី 23 កក្កដា 2023 លើទីលាន Eden Park៕

July 14, 2023

អ្នកដំណើរលើយន្តហោះចិន ប៉ើងដល់ពិតាន ពេលហោះឆ្លងកាត់តំបន់ខ្យល់កន្ត្រាក់

អ្នកដំណើរម្នាក់ និងអ្នកបម្រើលើយន្តហោះម្នាក់របស់ក្រុមហ៊ុនអាកាសចរណ៍ Air China ត្រូវប៉ើងឡើងដល់ពិតានយន្តហោះ នៅពេលយន្តហោះនេះកំពុងឆ្លងកាត់តំបន់ខ្យល់កន្ត្រាក់លើអាកាស។

ជើងហោះហើរ CA1524 របស់ក្រុមហ៊ុន Air China ហោះឆ្លងកាត់តំបន់ខ្យល់កន្ត្រាក់ ពេលកំពុងធ្វើដំណើរពីសៀងហៃទៅកាន់ប៉េកាំង កាលពីថ្ងៃទី 10 កក្កដា 2023។ អ្នកដំណើរម្នាក់និយាយថា នៅមុនហេតុការណ៍រលាក់យន្តហោះលើកដំបូង ភ្ញៀវមួយចំនួនបានក្រោកឡើងទៅបន្ទប់ទឹក។

«នៅពេលប្រធានក្រុមហោះហើរប្រកាសឱ្យអ្នកដំណើរដាក់ខ្សែក្រវាត់សុវត្ថិភាព ទើបពួកគេត្រលប់មកកន្លែងអង្គុយ។ ក្រោយរយៈពេលជាង 10 វិនាទី យន្តហោះក៏ស្រាប់តែរលាក់មួយប្រាវ» អ្នកដំណើរម្នាក់រៀបរាប់កាលពីថ្ងៃទី 11 កក្កដា។

ប្រហែលជាង 10 វិនាទីក្រោយ ហេតុការណ៍ដូចខាងលើក៏បានកើតឡើងជាថ្មី និងខ្លាំងជាងមុន។ គ្រប់គ្នាស្រែកឡើង។ របស់របរត្រូវធ្លាក់ទៅលើបាតយន្តហោះ។ អ្នកខ្លះក៏ធ្លាក់ទាំងទូរស័ព្ទ។

ស្ត្រីម្នាក់អាយុប្រហែល 40 ឆ្នាំ បានប៉ើងដល់ពិតាន ធ្វើឱ្យរបួសត្រង់ក្បាល និងជើង។ អ្នកបម្រើលើយន្តហោះម្នាក់ដែលការពារភ្ញៀវ ក៏ត្រូវប៉ើងទៅលើ បង្កឱ្យមានរបួសផងដែរ។

ក្រុមហ៊ុនអាកាសចរណ៍ចិន Air China បានបញ្ជាក់ថា យន្តហោះបានជួបប្រទះនឹងបាតុភូតខ្យល់កន្ត្រាក់ ហើយថា ក្រុមហោះហើរបានដោះស្រាយបញ្ហាទៅតាមគោលការណ៍សុវត្ថិភាព៕

July 13, 2023

Elon Musk បើកក្រុមហ៊ុនបច្ចេកវិទ្យា AI ថ្មី ដើម្បីទប់ទល់នឹង ChatGPT

xAI គឺជាក្រុមហ៊ុនថ្មីមួយដែលត្រូវបានមហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក Elon Musk បង្កើតឡើងក្នុងបំណងផ្ដោតទៅលើការស្វែងយល់ឱ្យបានច្បាស់អំពីចក្រវាល និងអភិវឌ្ឍដំណោះស្រាយសម្រាប់ជំនួស ChatGPT។

យោងតាមប្រកាសនៅលើគេហទំព័រ xAI កាលពីថ្ងៃទី 12 កក្កដា ក្រុមហ៊ុនថ្មីដែលដឹកនាំដោយលោក Elon Musk មានប្រធានចំនួន 12 រូប ជាអ្នកជំនាញលំដាប់កំពូលក្នុងវិស័យបញ្ញាសិប្បនិម្មិត (Artificial intelligence AI) ដែលធ្លាប់ធ្វើការឱ្យបណ្ដាក្រុមហ៊ុនធំៗ មានជាអាទិ៍ ក្រុមហ៊ុន Google, Microsoft និង Tesla ជាដើម។

លោក Elon Musk និយាយថា «បើសិនប្រឹងប្រែងស្វែងយល់អំពីលក្ខណសម្បត្តិរបស់ចក្រវាល នេះពិតជាប្រកាសល្អបំផុតដែលខ្ញុំអាចគិតឃើញពីគំនិតស្ដីពីសុវត្ថិភាពសម្រាប់ AI។ ក្រុមហ៊ុននឹងគាំទ្រចំពោះការយល់ឃើញដែលថា មនុស្សជាតិអស្ចារ្យជាងឆ្ងាយ ធៀបនឹងពពួកមិនមែនមនុស្ស»។

តំណាងរបស់ xAI ឱ្យដឹងថា ក្រុមហ៊ុននេះកំពុងញាប់ដៃញាប់ជើងក្នុងការជ្រើសរើសវិស្វករ និងអ្នកស្រាវជ្រាវដែលមានបទពិសោធន៍។

គិតមកដល់បច្ចុប្បន្ន លោក Elon Musk កំពុងជាស្ថាបនិក ជាម្ចាស់ ឬជានាយកប្រតិបត្តិរបស់ក្រុមហ៊ុនផលិតរថយន្តអគ្គិសនី Tesla, បណ្ដាញសង្គម Twitter, ទីភ្នាក់ងារអវកាស SpaceX, ក្រុមហ៊ុនសាងសង់ផ្លូវក្រោមដី និងហេដ្ឋារចនាសម្ព័ន្ធ រួមនឹងក្រុមហ៊ុនបច្ចេកវិទ្យាប្រព័ន្ធប្រសាទ Neuralink៕

July 13, 2023

ទំនៀមទម្លាប់ចម្លែក៖ កូនក្រមុំត្រូវយំមួយម៉ោង/ថ្ងៃ ពេញមួយខែ មុនពេលរៀបការ

កូនក្រមុំជនជាតិ Tujia នៅប្រទេសចិន ត្រូវយំយ៉ាងតិចមួយម៉ោងរៀងរាល់ថ្ងៃ ពេញមួយខែ ដើម្បីជាការបួងសួងសូមសេចក្ដីសុខ និងសុភមង្គលក្នុងគ្រួសារនៅថ្ងៃអនាគត។

ជាធម្មតា ថ្ងៃរៀបការតែងតែផ្សារភ្ជាប់ជាមួយនឹងភាពសប្បាយរីករាយ សំណើចក្អាកក្អាយ និងពេញដោយសុភមង្គល នៅពេលកូនកំលោះ កូនក្រមុំចាប់ផ្ដើមឈានជើងចូលក្នុងជីវិតគូ។ ក៏ប៉ុន្តែ សម្រាប់កូនក្រមុំជនជាតិ Tujia នៅក្នុងខេត្ត Sichuan ប្រទេសចិនវិញ ពួកគេត្រូវយំយ៉ាងតិចមួយម៉ោង/ថ្ងៃ នៅក្នុងរយៈពេលមួយខែពេញ មុនពេលត្រូវទៅរស់នៅក្នុងគ្រួសារខាងស្វាមី។

ទំនៀមទម្លាប់យំពេលរៀបការនេះ មានតាំងពីបុរាណ នៅក្នុងតំបន់ជាច្រើននៅភាគនិរតីរបស់ខេត្ត Sichuan ហើយមានការពេញនិយមខ្លាំងរហូតដល់សម័យរាជវង្ស Qing (1644 – 1911)។ បើទោះបច្ចុប្បន្នលែងមានការពេញនិយមដូចមុន ប៉ុន្តែទំនៀមទម្លាប់នេះនៅតែត្រូវបានប្រជាជនក្នុងតំបន់ជាច្រើនចាត់ទុកថាជាទំនៀមប្រពៃណីចាំបាច់នៅក្នុងពិធីរៀបមង្គលការកូនប្រុសស្រី។

ប្រជាជន Tujia ដែលមានវ័យចំណាស់បានរៀបរាប់ប្រាប់ថា កូនក្រមុំណាក៏ត្រូវតែយំនៅក្នុងពិធីរៀបការ។ បើសិនមិនយំ នឹងត្រូវអ្នកភូមិមើលងាយ និងចាត់ទុកការរៀបការនោះជារឿងអស់សំណើច។ ជាក់ស្ដែងមានករណីជាច្រើនដែលកូនក្រមុំត្រូវបានម្ដាយវាយព្រោះតែមិនយំក្នុងថ្ងៃរៀបការ។ តាមរយៈសំឡេងយំ ជនជាតិ Tujia នឹងអាចវាយតម្លៃបានទៅលើភាពថ្លៃថ្នូរ ភាពជាស្ត្រី និងភាពឆ្លាតវៃរបស់កូនក្រមុំ។

ទំនៀមទម្លាប់ខាងលើនេះត្រូវបានគេហៅថា «Zuo Tang (អង្គុយក្នុងរោងការ ឬរោងជំនុំ)»។ នេះបើតាម សារព័ត៌មានចិន China Daily។

តាមជំនឿបុរាណ កូនក្រមុំជនជាតិ Tujia នៅប្រទេសចិន មិនត្រឹមតែត្រូវយំយ៉ាងតិចមួយម៉ោងរៀងរាល់ថ្ងៃ ពេញមួយខែនោះទេ តែក៏ត្រូវជេរ «មេអណ្ដើក» ថែមទៀតផង ដោយសង្ឃឹមថា នឹងទទួលបានសុភមង្គលក្នុងគ្រួសារនៅថ្ងៃអនាគត។

July 12, 2023

សកម្មភាពប្រចាំថ្ងៃរបស់ម្ចាស់ Facebook

ក្រៅពីពេលវេលាសម្រាប់ធ្វើការ CEO របស់ Meta លោក Mark Zuckerberg មានកាលវិភាគសម្រាប់ការហូបចុក និងហាត់ប្រាណប្រកបដោយភាពតឹងរឹង។

នៅលើបណ្ដាញសង្គមថ្មីដែលមានឈ្មោះថា Threads ម្ចាស់ Facebook បង្ហើបឱ្យដឹងអំពីវិធីសាស្ត្រដែលជួយឱ្យលោកតែងតែពោរពេញដោយថាមពល និងអារម្មណ៍ស្រស់ថ្លា ដើម្បីដោះស្រាយបញ្ហាការងារយ៉ាងច្រើន។

«ខ្ញុំក្រោកឡើង ហាត់ក្បាច់គុន MMA ដើម្បីជួយឱ្យខួរក្បាលបានស្រស់ស្រាយ។ បង្កើតនូវអ្វីៗជាច្រើនសម្រាប់មនុស្សប្រើប្រាស់។ ហូបអាហារច្រើន ភាគច្រើនគឺប្រូតេអ៊ីន កាត់បន្ថយជាតិស្ករ និងផឹកស្រាតិចតួចបំផុត។ មួយថ្ងៃ ខ្ញុំដេកពី 7 ទៅ 8 ម៉ោង» លោក Zuckerberg សរសេរដូច្នេះ។

ម្ចាស់ Facebook ឱ្យដឹងថា លោកតែងតែធ្វើកិច្ចការខាងលើជារៀងរាល់ថ្ងៃ។ នៅពេលត្រូវបានអ្នកគុននិយមជនជាតិអាម៉េរិកាំងដ៏ល្បីឈ្មោះ Mike Davis សួរអំពីកាហ្វេ លោក Zuckerberg ឆ្លើយថា «មិនផឹកសូម្បីតែបន្តិច!»។

ដើមឡើយ លោក Zuckerberg តែងតែរត់ហាត់ប្រាណ បន្ទាប់បានក្រោកពីដំណេក។ ប៉ុន្តែក្រោយមក លោកក៏បានងាកមកហាត់ក្បាច់គុន MMA វិញ ព្រោះថា ពេលរត់ គាត់តែងតែគិត។ «អ្នកមិនអាចគិតដល់អ្វីទាំងអស់នៅពេលហាត់ MMA។ ឱ្យតែបាត់បង់ការផ្ដោតអារម្មណ៍បន្តិច អ្នកនឹងត្រូវបញ្ចប់ដោយការដេកដី» លោក Zuckerberg បញ្ជាក់ដូច្នេះ។

ជារៀងរាល់ឆ្នាំ CEO របស់ Meta នឹងចូលរួមបង្ហាញកម្លាំងក្នុងព្រឹត្តិការណ៍ The Murphy Challenge។ នេះគឺជាលំហាត់ប្រាណប្រើប្រាស់កម្លាំងខ្ពស់ដែលបង្កើតឡើងដោយមន្ត្រីក្នុងអង្គភាពពិសេសរបស់ទ័ពជើងទឹកអាម៉េរិក។

ក្រោយពីទទួលយកការបបួលប្រកួតរបស់មហាសេដ្ឋី Elon Musk នាយកប្រតិបត្តិរបស់ Meta មិនបានបង្ហោះសារណាមួយស្ដីពីការប្រកួតនៅលើសង្វៀន។ ប៉ុន្តែ Iska Saric អ្នកនាំពាក្យរបស់ Meta និយាយថា Zuckerberg ពិតជាម៉ឺងម៉ាត់ខ្លាំងណាស់។

កាលពីថ្ងៃទី 21 មិថុនា ចាប់ផ្ដើមពីរឿងរ៉ាវសរសេរលេងនៅលើ Twitter មហាសេដ្ឋី Elon Musk បានបបួលមហាសេដ្ឋី Mark Zuckerberg ណាត់ទីតាំងវាយគ្នានៅលើសង្វៀនក្នុងទ្រុងដែកនៅ Las Vegas ហើយម្ចាស់ Facebook ក៏យល់ព្រម។

អ្នកគាំទ្រកំពុងតែទន្ទឹងរង់ចាំ និងនាំគ្នាភ្នាល់ ដោយមានការចែកជាក្រុម «Team Musk» និង «Team Zuck»។ Dana White ប្រធាន UFC (Ultimate Fighting Championship) ព្យាករថា គូប្រកួត Musk – Zuckerberg អាចក្លាយជាការប្រកួតក្បាច់គុនមួយទល់នឹងមួយធំបំផុតក្នុងប្រវត្តិសាស្ត្រ និងបំបែករាល់កំណត់ត្រាស្ដីពីការលក់សំបុត្រចូលទស្សនា។ លោកនិយាយថា គ្រប់គ្នានឹងត្រូវចំណាយប្រហែល 100 ដុល្លារ សម្រាប់ការទស្សនាមួយលើកនៅតាមទូរទស្សន៍៕

July 12, 2023

Tag: ជើង