ក្លិបបាល់ទាត់ Rayong FC នៅលីកកំពូលថៃ បានសម្រេចចែកផ្លូវគ្នាជាមួយកីឡាករចាំទី Outthilath Nammakhoth សញ្ជាតិឡាវហើយ ក្រោយពីអ្នកចាំទីសញ្ជាតិឡាវនេះ បានបង្កកំហុសជាច្រើនដងលើទីលានសម្រាប់ការបង្ហាញវត្តមានជាលើកដំបូងនៅលីកកំពូលរបស់ថៃ។
ដោយសារតែរដូវកាលដោះដូរកីឡាករនៅលីកកំពូលថៃត្រូវបានបិទ ដូច្នេះក្លិបដែលមានមូលដ្ឋាននៅខេត្តRayong នៅតែផ្តល់ឳកាសឱ្យកីឡាករវ័យ 23ឆ្នាំរូបនេះនៅហ្វឹកហាត់ជាមួយក្លិបជាធម្មតា និងផ្តល់ប្រាក់ខែរហូតដល់ចប់ជើងទី1 នៃលីកកំពូលថៃទើបបើកផ្លូវឱ្យចាកចេញ។
ងាកមកសាច់រឿងខាងណេះវិញ នៅក្រោយការបរាជ័យ 3-0 ទល់នឹង Muangthong United ក្នុងទឹកដីខ្លួនឯងកាលពីថ្ងៃពុធកន្លងទៅនេះ អតីតអ្នកចាំទីរបស់ក្លិបជើងឯកឡាវ Lao Toyota FC រូបនេះត្រូវបានអ្នកគាំទ្របាល់ទាត់ថៃមួយចំនួនធំ រិះគន់យ៉ាងខ្លាំងរហូតដល់គេហទំព័រកីឡាមួយចំនួនក្នុងស្រុកថៃសន្និដ្ឋានថា អាចមកពីកីឡាកររូបនេះបាត់បង់ម្ចាស់ការខ្លួនឯង និងភ័យខ្លាំងពេក បានជាបង្កកំហុសម្តងហើយម្តងទៀតបែបនេះ៕
