មនុស្សច្រើនជាង 12នាក់ត្រូវបានឃាត់ខ្លួន ក្រោយពីអ្នកគាំទ្ររបស់ក្រុមជាគូប្រជែងមួយ បានព្រួតវាយអ្នកគាំទ្រកីឡាបាល់ទាត់ម្នាក់រហូតដល់ស្លាប់ ដោយប្រើដំបងដែក និងឈើ។ នេះបើយោងទៅតាមការបញ្ជាក់របស់ប៉ូលិសកាលពីថ្ងៃចន្ទ។
ឧប្បត្តិហេតុដែលមានមនុស្សស្លាប់មួយនេះ បានកើតឡើងកាលពីថ្ងៃអាទិត្យ នៅមុនពេលការប្រកួតមួយរវាងក្លិបម្ចាស់ផ្ទះ Persib Bandung និងPersija Jakarta ដែលជាគូប្រជែងដ៏ស្វិតស្វាញ ក្នុងក្របខ័ណ្ឌលីកកំពូលរបស់ឥណ្ឌូនេស៊ី។
លោក HaringgaSirla វ័យ 23ឆ្នាំ អ្នកគាំទ្ររបស់ក្លិប Persija Jakarta បានស្លាប់ ក្រោយពីក្រុមគាំទ្ររបស់ក្លិប Bandung បានវាយរូបគេនៅក្រៅកីឡដ្ឋាន ក្នុងទីក្រុង Bandung ចម្ងាយ 150គីឡូម៉ែត្រពីទីក្រុងហ្សាការតា។ មនុស្សចំនួន 16នាក់ ត្រូវបានឃាត់ខ្លួនភ្លាមៗទាក់ទងនឹងការវាយប្រហារនោះ។ នេះបើយោងទៅតាមការបញ្ជាក់របស់ប៉ូលិស។ វាជាការស្លាប់ជាលើកទី7របស់អ្នកគាំទ្រម្នាក់ទាក់ទងនឹងការប្រកួត1រវាងក្លិបទាំង2 ចាប់តាំងពីឆ្នាំ2012។
នេះបើយោងតាមអ្នកវិភាគកីឡាបាល់ទាត់លោក AkmalMarhali។ សហព័ន្ធកីឡាបាល់ទាត់ឥណ្ឌូនេស៊ី បានសម្តែងនូវការ «ចូលរួមរំលែកទុក្ខយ៉ាងខ្លាំង» របស់ខ្លួន។ ពួកគេបានឱ្យដឹងក្នុងសេចក្តីថ្លែងការណ៍មួយថា៖ «យើងសង្ឃឹមថា ប្រភេទនៃឧប្បត្តិហេតុនេះ នឹងមិនកើតឡើងម្តងទៀតក្នុងកីឡាបាល់ទាត់ឥណ្ឌូនេស៊ីឡើយ»។ លោក Sirla គឺជាអ្នកគាំទ្រកីឡាបាល់ទាត់ឥណ្ឌូនេស៊ីទី70 ដែលបានស្លាប់ ដោយសារតែអំពើហិង្សាទាក់ទងនឹងការប្រកួតបាល់ទាត់ ចាប់តាំងពីឆ្នាំ1994៕
ប្រភពពី៖ Channel News Asia
