ក្លិប Barcelona បានបំពេញការចុះហត្ថលេខាជាមួយនឹងខ្សែបម្រើ Arturo Vidal របស់ក្លិប Bayern Munich រួចរាល់ហើយ ដោយខ្សែបម្រើវ័យ 31ឆ្នាំរូបនេះត្រូវបានគេជឿជាក់ថា បានយល់ព្រមលើលក្ខខណ្ឌផ្ទាល់ខ្លួនរួចជាមុនស្រេចហើយជាមួយនឹងក្លិប Barcelona ហើយប្រភពជាច្រើនក្នុងប្រទេសអ៊ីតាលី បានបញ្ជាក់ថា ការព្រមព្រៀងគ្នាជាមួយនឹងក្លិប Bayern ក៏ត្រូវបានបំពេញរួចជាស្រេចហើយដែរ។ វាត្រូវបានគេជឿជាក់ថា តារាឆ្នើមអន្តរជាតិស៊ីលីរូបនេះនឹងផ្ទេរទៅកាន់កីឡដ្ឋាន Nou Camp សម្រាប់តម្លៃខ្លួនប្រមាណជា 27លានផោន (ស្មើនឹង 35លានដុល្លារអាមេរិក)។
អ្នកយកព័ត៌មានល្បីរបស់ប្រទេសអ៊ីតាលីលោក Fabrizio Romano បានបង្ហោះនៅលើបណ្តាញសង្គម Twitter ថា «ការព្រមព្រៀងគ្នា ត្រូវបានឈានដល់រួចជាស្រេចសម្រាប់កីឡាកររូបនេះ ក្នុងការចូលរួមជាមួយនឹងក្លិប Barcelona ហើយការផ្ទេរនេះត្រូវបានបំពេញជាផ្លូវការហើយ»។
ខ្សែបម្រើអន្តរជាតិស៊ីលីរូបនេះក៏មានជាប់ទាក់ទងនឹងការប្រុងផ្ទេរទៅកាន់ក្លិប Manchester United និង Chelsea កាលពីពេលមុននោះដែរ ដោយត្រូវបានគេជឿជាក់ថា រូបគេត្រូវបានដាក់លក់ដោយក្លិបយក្សរបស់អាល្លឺម៉ង់មួយនេះ។ Vidal បានរីករាយនឹងអាជីពប្រកបដោយភាពជោគជ័យមួយ ចាប់តាំងពីចាកចេញពីក្លិប Colo-Colo នៅប្រទេសរបស់គេ កាលពីរយៈពេល 11ឆ្នាំមុន។ កីឡាករវ័យ 31ឆ្នាំរូបនេះបានឈ្នះពានរាល់រដូវកាលទាំង 7លើកចុងក្រោយរបស់គេ នៅឯក្លិប Juventus និង Bayern ។
Barcelona បានចំណាយប្រាក់ច្រើនជាង 100លានផោនរួចស្រេចទៅហើយនៅរដូវក្តៅនេះ ទៅលើការផ្ទេរនានាសម្រាប់ខ្សែការពារអន្តរជាតិបារាំង Clement Lenglet និងកីឡាករប្រេស៊ីល 2នាក់ទៀតគឺ Arthur និង Malcom ហើយពួកគេក៏កំពុងតែស្ថិតក្នុងការចរចាជាមួយនឹងក្លិប Paris Saint-Germain ផងដែរជុំវិញការផ្ទេរសម្រាប់ខ្សែបម្រើ Adrien Rabiot៕
ប្រភពពី៖ The Sun
