ក្លិប Everton បានចុះហត្ថលេខាជាមួយខ្សែការពារ Lucas Digne ដែលមកពីក្លិបជើងឯករបស់អេស្ប៉ាញ Barcelona លើកុងត្រារយៈពេល 5ឆ្នាំ ជាមួយនឹងតម្លៃខ្លួន 18លានផោន (ស្មើនឹង23.6លានដុល្លារអាមេរិក)។ នេះបើយោងតាមការប្រកាសឱ្យដឹងរបស់ក្លិបក្នុងក្របខ័ណ្ឌ Premier League មួយនេះ កាលពីថ្ងៃពុធ។
ខ្សែការពារអន្តរជាតិបារាំងវ័យ 25ឆ្នាំរូបនេះនឹងចូលរួមជាមួយក្លិប Everton ក្រោយពីបានចំណាយពេល2រដូវកាលនៅក្នុងក្លិប Barcelona ដោយរូបគេបានបង្ហាញខ្លួន 46លើក ក្នុងគ្រប់យុទ្ធនាការទាំងអស់ ខណៈដែលរូបគេក៏បានឈ្នះពាន La Liga ជាមួយ Barca កាលពីរដូវកាលមុន និងពាន Spanish Cup ផងដែរ។
Digne បានប្រាប់គេហទំព័ររបស់ក្លិប Everton ថា៖ «ខ្ញុំចង់បង្ហាញពីបច្ចេកទេសលេងកីឡាបាល់ទាត់ដ៏ល្អបំផុតរបស់ខ្ញុំនៅទីនេះ និងរកឱ្យឃើញក្របខ័ណ្ឌលីកដ៏ខ្លាំងបំផុតមួយក្នុងពិភពលោក។ គ្រប់គ្នាស្រឡាញ់ក្របខ័ណ្ឌ Premier League។ ខ្ញុំពេញចិត្តណាស់ដែលខ្ញុំបានមកទីនេះ»។
ខ្សែការពាររូបនេះបានបន្ថែមទៀតថា៖ «ខ្ញុំមិនមានខ្លាចអ្វីឡើយ ខ្ញុំពិតជារំភើបណាស់។ សម្រាប់ខ្ញុំ វាគឺជាការប្រជែងថ្មីមួយក្នុងការបានមកនៅក្នុងប្រទេសមួយ ក្នុងក្របខ័ណ្ឌលីកមួយ ប្រជាជន និងក្លិបដ៏អស្ចារ្យមួយដូចជា Everton នេះ។ វាពិតជាអស្ចារ្យណាស់»។
Digne បានអវត្តមានពីក្រុមឈ្នះពាន World Cup របស់បារាំងនៅឆ្នាំនេះ តែកាលពីពេលមុនគេបានលេងឱ្យក្លិបបារាំង Paris St Germain ដោយបានឈ្នះពានក្របខ័ណ្ឌ Ligue1 2លើក ហើយក៏បានចំណាយពេលលេងក្នុងនាមជាកីឡាករកម្ចីនៅឯក្លិប AS Roma របស់អ៊ីតាលី ផងដែរ៕
ប្រភពពី៖ Channel News Asia
