ខែមិថុនាខាងមុខនេះ ជម្រើសជាតិកម្ពុជា នឹងប៉ះឥណ្ឌូនេស៊ីដើម្បីកម្ដៅសាច់ដុំត្រៀម AFC Asian Cup 2019

នេះជាជំនួបប្រកួតមិត្តភាពអន្តរជាតិដ៍អស្ចារ្យមួយទៀត សម្រាប់ជម្រើសជាតិកម្ពុជានាថ្ងៃទី១៣ ខែមិថុនា ឆ្នាំ២០១៧ខាងមុខនេះ ដើម្បីកម្ដៅសាច់ដុំមុនបើកទ្វារទទួលក្រុមជម្រើសជាតិអាហ្វហ្គានីស្ថាន នៃវគ្គជម្រុះពូលC ក្នុងពានរង្វាន់ AFC Asian Cup UAE 2019 នៅពហុកីឡដ្ឋានជាតិអូឡាំពិកម្ពុជា ។

ទន្ទឹមនឹងការប្រកាសជូនដំណឹងស្ដីពីការប្រកួតមិត្តភាពខាងលើ គេមិនទាន់ឃើញលោក Leonardo Vitorino គ្រូបង្វឹកថ្មីរបស់ក្រុមគោព្រៃកម្ពុជា បង្ហាញបញ្ជីឈ្មោះក្រុមជម្រើសជាតិថ្មី ដើម្បីប្រមូលផ្ដុំនោះទេ ព្រោះលោកធ្លាប់បានអះអាងថា នឹងមានការផ្លាស់ប្ដូរកីឡាករមួយចំនួន ក្រោយវិលត្រឡប់មកពីប្រកួតជាមួយក្រុមជម្រើសជាតិហ្ស៊កដានី ក្នុងជំនួបបើកឆាកពូលC នៃពានប្រចាំទ្វីបអាស៊ីខាងលើ ដោយចាញ់ក្នុងលទ្ធផល ៧-០ កាលពីចុងខែមីនាកន្លងទៅ ៕