ក្រុមបាល់ទាត់ជម្រើសជាតិវៀតណាម ចូលដល់ការប្រកួតជើងទីពីរនៃវគ្គពាក់កណ្ដាលផ្ដាច់ព្រ័ត្រជាមួយ ឥណ្ឌូណេស៊ី នៅ AFF Cup 2022 ក្នុងស្ថានភាព «ត្រូវតែឈ្នះ» បើសិនចង់មានមុខនៅវគ្គផ្ដាច់ព្រ័ត្រ។
នៅក្នុងការប្រកួតជើងទីពីរដែលនឹងត្រូវប៉ះជាមួយក្រុមវៀតណាម នៅព្រលប់ថ្ងៃទី 09 មករា 2023 នេះ ឥណ្ឌូណេស៊ី ត្រូវការតែ «លទ្ធផលស្មើដោយមានគ្រាប់បាល់ស៊ុតបញ្ចូលទី» ប៉ុណ្ណោះ គឺនឹងបានឡើងទៅវគ្គផ្ដាច់ព្រ័ត្រ ខណៈដែលវៀតណាម ក៏រំពឹងថា នឹងមានប្រៀបជាង ដោយសារតែបានធ្វើជាម្ចាស់ផ្ទះ។ ដូច្នេះ ការប្រកួតនៅព្រលប់នេះប្រាកដជាគួរឱ្យចាប់អារម្មណ៍។
មុនការប្រកួតនេះមកដល់ មានមតិជាច្រើននិយាយថា វៀតណាម នឹងរកបានមួយគ្រាប់មុនឥណ្ឌូណេស៊ី ព្រោះថាមានតែវិធីវាយលុករកគ្រាប់បាល់បានមុននេះទេ ទើបជួយឱ្យវៀតណាមអាចមានប្រៀបជាងក្នុងការយកឈ្នះលើគូប្រកួត។ នៅពេលត្រូវបាននាំមុខ 0-1 ឥណ្ឌូណេស៊ីប្រាកដជាត្រូវបង្កើនការរុលទៅខាងលើដើម្បីរកគ្រាប់បាល់ស្មើ ធ្វើឱ្យវៀតណាម មានឱកាសវាយបកបន្ថែមទៀត ដែលនេះគឺជាក្បាច់ដែលគេជឿថា នឹងត្រូវបានគ្រូបង្វឹកជនជាតិកូរ៉េខាងត្បូង Park Hang Seo របស់ក្រុមវៀតណាម ប្រើប្រាស់នៅព្រលប់នេះ។
ក្នុងរយៈពេល 16 ឆ្នាំមកនេះ ក្រុមជម្រើសជាតិវៀតណាម ពុំធ្លាប់បានយកឈ្នះលើ ឥណ្ឌូណេស៊ី ម្ដងណាឡើយនៅ AFF Cup។ ប៉ុន្តែ បើសិនជាចង់ឡើងទៅវគ្គផ្ដាច់ព្រ័ត្រ វៀតណាម ត្រូវតែយកឈ្នះលើឥណ្ឌូណេស៊ី ជាដាច់ខាត។ នេះក៏ជាឱកាសចុងក្រោយដែលគ្រូបង្វឹក Park Hang Seo ចង់ដណ្ដើមបានជោគជ័យបំផុត ក្រោយពីបានឆ្លងផុតរបត់នានានៅពេលដណ្ដើមបានមេដាយមាសនៅ SEA Games ដោយយកឈ្នះថៃជាលើកដំបូងក្រោយរយៈពេល 10 ឆ្នាំ នៅក្នុងការប្រកួតផ្លូវការមួយ។
នៅវេលាម៉ោង 19 និង 30 នាទីព្រលប់ថ្ងៃទី 09 មករា 2023 នេះ ឥណ្ឌូណេស៊ី នឹងប្រកួតជាមួយវៀតណាម ក្នុងជើងទីពីរនៃវគ្គពាក់កណ្ដាលផ្ដាច់ព្រ័ត្រ ដែលនឹងធ្វើឡើងនៅលើទឹកដីវៀតណាម។ នេះគឺជាការប្រកួតចុងក្រោយរបស់ក្រុមទាំងពីរ ដើម្បីដណ្ដើមសំបុត្រឡើងទៅវគ្គផ្ដាច់ព្រ័ត្រ AFF Cup 2022៕
