ក្រុមបាល់ទាត់ជម្រើសជាតិអាហ្សង់ទីន ត្រូវតែដណ្តើមជ័យជម្នះឲ្យបានជាដាច់ខាត នៅពេលដែលធ្វើដំណើរទៅជួបក្រុមបាល់ទាត់ជម្រើសជាតិអេក្វាទ័រ ក្នុងការប្រកួតជម្រុះជុំចុងក្រោយនៃតំបន់អាមេរិកខាងត្បូងរបស់ពួកគេនៅរាត្រីថ្ងៃអង្គារនេះ (ត្រូវនឹងព្រឹកថ្ងៃពុធ នៅកម្ពុជា) ខណៈដែលយុទ្ធនាការ World Cup ឆ្នាំ2018ខាងមុខនេះ កំពុងតែប្រឈមមុខនឹងការអវត្តមានតារាឆ្នើមបំផុតរបស់ពិភពលោកគឺ Lionel Messi។
ក្រុមជម្រើសជាតិអាហ្សង់ទីន ទទួលបានត្រឹមលទ្ធផលស្មើ ០-០ នៅពេលប្រកួតជាមួយនឹងក្រុមជម្រើសជាតិប៉េរូ កាលពីថ្ងៃព្រហស្បតិ៍ ដែលមិនត្រឹមតែធ្វើឱ្យធ្លាក់ចេញពីចំណាត់ថ្នាក់កំពូលទាំង4ដែលត្រូវឈ្នះសិទ្ធិជាស្វ័យប្រវត្តិនៅកាន់ប្រទេសរុស្ស៊ី នៅឆ្នាំក្រោយប៉ុណ្ណោះទេ ប៉ុន្តែក៏បានធ្លាក់ចេញពីចំណាត់ថ្នាក់លេខ5 ដែលជាកៅអីសម្រាប់លេងវគ្គ Playoff ជាមួយនឹងក្រុមជម្រើសជាតិនូវែសេឡង់ ទៀតផង។ ជាមួយនឹងការស្ថិតក្នុងចំណាត់ថ្នាក់លេខ6 បច្ចុប្បន្នក្រុមជម្រើសជាតិអាហ្សង់ទីន ត្រូវតែឈ្នះជាដាច់ខាតក្នុងការប្រកួតចុងក្រោយរបស់ពួកគេលើទឹកដីក្រុមជម្រើសជាតិអេក្វាទ័រ នៅថ្ងៃអង្គារនេះ។
រយៈពេល 2ឆ្នាំមុន ក្រោយពីក្រុមជម្រើសជាតិអាហ្សង់ទីន បានចាប់ផ្តើមយុទ្ធនាការជម្រុះរបស់ពួកគេជាមួយនឹងការបរាជ័យ 2-០ លើទឹកដីខ្លួនឯង ក្រោមស្នាដៃក្រុមជម្រើសជាតិអេក្វាទ័រ ក្រុមរបស់លោក Jorge Sampaoli នឹងត្រូវធ្វើដំណើរទៅកាន់ទីក្រុង Quito ដើម្បីជួបជាមួយនឹងអេក្វាទ័រនេះម្តងទៀតជាមួយនឹងក្តីសង្ឃឹមដ៏ទាបបំផុត។ ប៉ុន្តែ ស្របពេលដែលក្រុមឈរលេខ3 ស៊ីលី (26ពិន្ទុ) និងក្រុមឈរលេខ7 ប៉ារ៉ាហ្គាយ (24ពិន្ទុ) កំពុងតែដេញតាមពីក្រោយគ្នាត្រឹមតែ2ពិន្ទុនោះ ការប្រែប្រួលផ្សេងៗអាចនឹងត្រូវកើតឡើង។
ទោះបីជាយ៉ាងណា ក្រុមជម្រើសជាតិអាហ្សង់ទីន អាចនឹងលួងចិត្តអ្នកគាំទ្ររបស់ខ្លួនបាន ប្រសិនបើពួកគេដណ្តើមបាន3ពិន្ទុដ៏សំខាន់នេះ។ ប៉ុន្តែ ការដណ្តើមជ័យជម្នះនៅលើទឹកដីដែលមានសម្ពាធខ្យល់ទាបនៃទីក្រុង Quito និងដែលមានកម្ពស់ខ្ពស់ជាងកម្រិតទឹកសមុទ្រចំនួន2,850ម៉ែត្រនេះ ប្រហែលមិនមែនជារឿងងាយស្រួលឡើយ។ ការប្រកួតនេះនឹងចាប់ផ្តើមនៅម៉ោង6:3០ព្រឹកថ្ងៃពុធ៕
ប្រភពពី៖ Sport24
