តំបន់ការពារដ៏រឹងមាំរបស់ក្រុម Manchester City នឹងត្រូវអវត្តមានតារាឆ្នើមម្នាក់គឺ Benjamin Mendy ដោយសារតែបញ្ហារបួស ខណៈដែលពួកគេនឹងត្រូវប្រឈមមុខនឹងការប្រកួតដ៏ស្វិតស្វាញបំផុតមួយ នៅពេលដែលក្រុមកំពុងនាំមុខនៅលើកំពូលតារាងក្នុងក្របខ័ណ្ឌ Premier League មួយនេះ ត្រូវធ្វើដំណើរទៅជួបក្រុមម្ចាស់ជើងឯក Chelsea នៅថ្ងៃសៅរ៍នេះ។
ខ្សែការពារកណ្តាលអន្តរជាតិបារាំងវ័យ23ឆ្នាំរូបនេះ កំពុងតែស្ថិតក្នុងទម្រង់លេងយ៉ាងល្អសម្រាប់ក្រុម Man City ចាប់តាំងពីផ្ទេរមកពីក្លិប Monaco ក្នុងតម្លៃខ្លួន50លានផោន (ស្មើនឹង67លានដុល្លារអាមេរិក) នៅមុនពេលបើករដូវកាល។ ប៉ុន្តែ កាលពីថ្ងៃព្រហស្បតិ៍ Man City បានប្រកាសថា Mendy នឹងត្រូវទទួលការវះកាត់ក្នុងទីក្រុង Barcelona នៅថ្ងៃសុក្រនេះ ក្រោយពីរូបគេបានរងរបួសត្រង់សរសៃពួរនៅលើជង្គង់ខាងស្តាំរបស់គេ អំឡុងពេលក្រុមខ្លួនទទួលជ័យជម្នះ លើក្រុម Crystal Palace កាលពីចុងសប្តាហ៍មុន។
Mendy បានសរសេរនៅលើបណ្តាញសង្គម Twitter របស់ខ្លួនថា៖ «ពិតជាព័ត៌មានអាក្រក់មែន ខ្ញុំនឹងត្រូវសម្រាកព្យាបាលរបួសក្នុងរយៈពេលប្រមាណជា2ខែ ហើយខ្ញុំនឹងត្រូវវិលចូលប្រកួតវិញទាំងពិការភាពខ្លាំងក្លាក្នុងពេលឆាប់ៗនេះ»។ លោក Pep Guardiola អ្នកចាត់ការទូទៅរបស់ក្រុម Man City កំពុងតែស្ថិតក្រោមសម្ពាធក្នុងការដណ្តើមឲ្យបានលទ្ធផលល្អ ក្រោយពីបានចំណាយប្រាក់ដ៏ច្រើនសន្ធឹកសន្ធាប់ច្រើនជាង130លានផោនដើម្បីទិញចូលខ្សែការពារ3នាក់ ក្នុងគោលបំណងប្រជែងយកពានទៅកាន់កីឡដ្ឋាន Etihad។
នៅមុនពេលរយៈពេលនៃការអវត្តមានរបស់ Mendy ត្រូវបានប្រកាសឡើយកាលពីថ្ងៃព្រហស្បតិ៍ គ្រូបង្វឹកសញ្ជាតិអេស្ប៉ាញរូបនេះ បានឲ្យដឹងថា៖ «យើងមាន Danilo, (Fabian) Delph និង (Oleks) Zinchenko ដែលអាចលេងនៅតំបន់នោះបាន ហេតុនេះ យើងនឹងរង់ចាំមើលថា តើយើងនឹងត្រូវប្រើប្រាស់ពួកគេ ឬយ៉ាងណា»។
ទាំងក្រុម Man City និង Chelsea សុទ្ធសឹងឈានទៅកាន់ការប្រកួតនេះទាំងការជឿជាក់ដូចគ្នា ក្រោយពីពួកគេបានផ្តួលក្រុម Shakhtar Donetsk និង Atletico Madrid ក្នុងលទ្ធផល 2-០ និង 2-1 ក្នុងការប្រកួតក្របខ័ណ្ឌ Champions League កាលពីពាក់កណ្តាលសប្តាហ៍នេះ រៀងៗខ្លួន។ ការប្រកួតនេះនឹងចាប់ផ្តើមនៅម៉ោង11:3០យប់៕
ប្រភពពី៖ Sports.yahoo
