ខេត្តមណ្ឌលគិរី ជាតំបន់ដែលមានសក្តានុពលខ្លាំងផ្នែកអេកូទេសចរណ៍ និងកសិកម្ម ព្រោះតំបន់នេះសំបូរទៅដោយសម្រស់ធម្មជាតិ និងដីមានជីរជាតិអំណោយផលល្អសម្រាប់ការអភិវឌ្ឍកសិកម្ម។ ហេតុនេះជារៀងរាល់ឆ្នាំ តែងតែមានភ្ញៀវជាតិ និងអន្តរជាតិជាច្រើនបាននាំគ្នាទៅកម្សាន្តនៅតំបន់នោះ។
ឆ្លើយតបនឹងតម្រូវការនៃការធ្វើដំណើររបស់ភ្ញៀវជាតិ និងអន្តរជាតិ ខេត្តមណ្ឌលគិរីបានអភិវឌ្ឍហេដ្ឋាចរនាសម្ព័ន្ធជាបន្តបន្ទាប់ ដោយក្នុងនោះក៏មានគម្រោងអាកាសយានដ្ឋានផងដែរសម្រាប់ភ្ជាប់ការធ្វើដំណើរឱ្យកាន់តែឆាប់រហ័ស និងសំបូរបែប។
ឯកឧត្តម ស្វាយ សំអ៊ាង អភិបាលខេត្តមណ្ឌលគិរី បានបញ្ជាក់ថា រដ្ឋបាលខេត្តបានត្រៀនដីចំនួន 600ហិកតាសម្រាប់ផ្តល់ជូនរាជរដ្ឋាភិបាលក្នុងការសាងសង់ព្រលានយន្តហោះ។ ទីតាំងគម្រោងអាកាសយានដ្ឋានថ្មីនេះ មានចម្ងាយប្រមាណ 20គីឡូម៉ែត្រពីទីរូមខេត្ត។ ឯកឧត្តមបានបញ្ជាក់ផងដែរ ការជ្រើសរើសទីតាំងថ្មីនេះ ដោយសារតែដីព្រលានយន្តហោះចាស់មានត្រឹមតែ 19ហិកតាប៉ុណ្ណោះ មិនគ្រប់សម្រាប់អភិវឌ្ឍជាព្រលានយន្តហោះតាមតម្រូវការជាក់ស្តែងនាពេលបច្ចុប្បន្ននោះទេ៕
