(ភ្នំពេញ)-ប្រមុខរដ្ឋាភិបាលកម្ពុជា ស្នើឱ្យរដ្ឋមន្ត្រីក្រសួងទេសចរណ៍ ពិនិត្យលទ្ធភាពរៀបចំគោលការណ៍បដិការជាមួយ ប្រទេសថៃ ក្នុងបំណងអនុញ្ញាតឱ្យអ្នកដំណើរចេញ-ចូល ប្រទេសទាំងពីរ ដោយមិនបាច់ធ្វើចត្តាឡីស័ក។
ប្រសាសន៍របស់ប្រមុខរដ្ឋាភិបាលកម្ពុជា ខាងលើ ដែលត្រូវបានធ្វើឡើងនៅក្នុងកិច្ចប្រជុំពេញអង្គគណៈរដ្ឋមន្ត្រី នាព្រឹកថ្ងៃទី 22 តុលា ឆ្នាំ 2021 ដើម្បីឆ្លើយតបទៅនឹង រដ្ឋាភិបាលថៃ ដែលអនុញ្ញាតឱ្យ ពលរដ្ឋកម្ពុជា ចេញ-ចូលប្រទេសនេះដោយមិនចាំបាច់ធ្វើចត្តាឡីស័ក និងដើម្បីអាចស្រូបទាញភ្ញៀវទេសចរណ៍ពី ប្រទេសថៃ មក កម្ពុជា។
ដើម្បីស្ដារសេដ្ឋកិច្ចរបស់ កម្ពុជា ឡើងវិញ ក្រៅពី ប្រទេសថៃ សម្ដេច ហ៊ុន សែន ក៏បានស្នើឱ្យអនុវត្តគោលការណ៍បដិការឆ្លើយតបនេះ សម្រាប់ប្រទេសដទៃទៀតដែលមានអត្រានៃការចាក់វ៉ាក់សាំងខ្ពស់ផងដែរ។
នៅក្នុងកិច្ចប្រជុំពេញអង្គនាព្រឹកនេះ ប្រមុខរដ្ឋាភិបាលកម្ពុជា ក៏បានឱ្យដឹងថា អាជីវកម្ម សាលារៀន និងកន្លែងកម្សាន្តជាដើម នឹងអាចត្រូវបានអនុញ្ញាតឱ្យបើកដំណើរការឡើងវិញចាប់ពីខែវិច្ឆិកាខាងមុខ។
