ផ្លែឈើមួយដែលត្រូវចិត្តទាំងជនជាតិខ្មែរយើង និងបរទេស តម្លៃមិនថ្លៃ និងថែមទាំងងាយស្រួលរកទិញបំផុតទៀតផងនោះ ប្រហែលជាគេចមិនផុតពី ផ្លែស្វាយ ដែលអាចឆ្ងាញ់បានទាំងបែបនៅខ្ចី ស្រគាល និងទុំនោះឡើយ ហើយថែមទាំងពូជស្វាយនីមួយៗនៅមានរសជាតិឆ្ងាញ់ខុសប្លែកពីគ្នាទៀតផង។
ប្រយោជន៍របស់ ផ្លែស្វាយខ្ចី ស្រគាល
ស្វាយខ្ចី និងស្រគាលមានទាំងរសជាតិផ្អែមម្សៅ និងជូរ ដោយហេតុនេះឯងទើបធ្វើឱ្យផ្លែស្វាយពោរពេញទៅដោយវីតាមីន C មានសារធាតុប្រឆាំងអនុមូលឥស្សរៈ ជួយឱ្យសាច់ស្បែកស្រស់ថ្លាភ្លឺរលោង ក្រចាស់ ជួយការពាររោគគ្រុនផ្តាសាយ បំបាត់ការចេញឈាមតាមជើងធ្មេញ និងបំបាត់អាការក្តៅក្នុង និងស្រេកទឹក។
ប្រយោជន៍របស់ផ្លែស្វាយទុំ
ផ្លែស្វាយទុំ នឹងមានពណ៌លឿង ទើបពេញទៅដោយវីតាមីន A និងបេតាឃែរ៉ូធីន ដែលជួយបំប៉នខ្សែភ្នែក ការពារការស្រវាំងភ្នែក មើលឃើញមិនច្បាស់នៅពេលយប់ និងនៅមានឬទ្ធិជាថ្នាំបន្ទន់លាមក មានកាកសរសៃអាហារដែលជួយក្នុងការបន្ទោបង់ទៀតផង។
ចំណុចគួរប្រយ័ត្នក្នុងការបរិភោគផ្លែស្វាយ
មនុស្សជាច្រើនអាចមានបញ្ហាឆ្អល់ពោះ ធ្ងន់ពោះនៅពេលបរិភោគស្វាយខ្ចីច្រើនជ្រុលពេក ទើបគួរញ៉ាំមួយចំហៀងផ្លែដែលធំ ឬមួយផ្លែតូចក្រោយពេលបាយ មិនគួរញ៉ាំច្រើនជ្រុលពេកទេ ព្រោះអាចធ្វើឱ្យឆ្អល់ពោះ មានអារម្មណ៍លំបាកដូចអាហារមិនរំលាយ។
សម្រាប់ផ្លែស្វាយទុំ ជាផ្លែឈើដែលមានជាតិស្ករខ្ពស់ អ្នកជំងឺទឹកនោមផ្អែមគួរចៀសវាង ព្រោះជាផ្លែឈើដែលផ្តល់កម្លាំងថាមពលខ្ពស់ រឹតតែញ៉ាំធ្វើជាបង្អែម ជាមួយបាយដំណើបផងនោះ រឹតតែខ្លាំងទៅទៀត។ សម្រាប់មនុស្សប្រក្រតីដែលគ្មានជំងឺប្រចាំកាយអ្វី អាចញ៉ាំស្វាយទុំបាន 3/4 នៃផ្លៃក្រោយពេលបាយ៕
