បុគ្គលិកជនជាតិជប៉ុនម្នាក់ដែលមានតួនាទីមើលថែទាំជនជាតិជប៉ុនដែលភៀសខ្លួនចេញពីការឆ្លងរាលដាលរបស់មេរោគវីរុសកូរ៉ូណាពីទីក្រុងវូហាន បានលោតពីលើអគារធ្វើអត្តឃាតបញ្ចប់ជីវិតខ្លួនឯងនៅក្នុងមជ្ឈមណ្ឌលបង្ខាំងជំងឺ នៅក្នុងខេត្តសៃតាម៉ាក់ ប្រទេសជប៉ុន។
កាលពីថ្ងៃសៅរ៍ ទី1 ខែកុម្ភៈ បុគ្គលិកវ័យ 37ឆ្នាំម្នាក់ ត្រូវបានប្រទះឃើញថា បានស្លាប់បាត់បង់ជីវិត ដោយសារការលោតចុះមកពីលើបន្ទប់ស្នាក់នៅក្នុងបរិវេណស្ថាប័នសុខាភិបាលជាតិសាធារណៈ ក្នុងខេត្តសៃតាម៉ាក់ ជិតទីក្រុងតូក្យូ ជាទីកន្លែងមួយដែលក្រុមជនជាតិជប៉ុនដែលត្រឡប់មកពីទីក្រុងវូហាន ប្រទេសចិនត្រូវបានរដ្ឋបាលជប៉ុនប្រមូលដាក់ឱ្យនៅមួយកន្លែងដើម្បីរង់ចាំតាមដានអាការជំងឺរលាកសួតប្រភេទថ្មី រយៈពេល 14ថ្ងៃ។
បុគ្គលិកដែលបានអត្តឃាតម្នាក់នេះ ត្រូវបានបញ្ជូនមកពីទីស្នាក់ការប៉ូលិសក្រុងតូក្យូឱ្យទៅបំពេញការងារនៅឯទីស្ដីការនាយករដ្ឋមន្ត្រី ដើម្បីមើលការខុសត្រូវលើការជម្លៀសជនជាតិជប៉ុនត្រឡប់មកពីទីក្រុងវូហានដែលជាមជ្ឈមណ្ឌលធំនៃការឆ្លងរាលដាលរបស់មេរោគវីរុសកូរ៉ូណាប្រភេទថ្មី ដោយរូបគេបានចូលទៅស្នាក់នៅក្នុងមណ្ឌលបង្ខាំងការពារជំងឺមួយនេះកាលពីថ្ងៃទី31 មករា ដើម្បីមើលថែទាំជនជាតិជប៉ុនដែលបានជម្លៀសមកដល់។
ប៉ូលិសសន្និដ្ឋានថា បុគ្គលិកម្នាក់នេះបានធ្វើអត្តឃាត តែដោយសារមិនឃើញមានការសរសេរសំបុត្រផ្ដាំផ្ញើ ឬភ័ស្តុតាងអ្វីផ្សេង ទើបប៉ូលិសត្រូវធ្វើការស៊ើបសួរស្វែងរកមូលហេតុនៃការបញ្ចប់ជីវិតខ្លួនឯងក្នុងគ្រានេះជាបន្ត។
ករណីនេះ បានក្លាយជារឿងជជែកដេញដោលគ្នាយ៉ាងខ្លាំងនៅក្នុងសង្គមជនជាតិជប៉ុននាពេលនេះ ថាតើជាការធ្វើអត្តឃាតមែនឬយ៉ាងណា? តើមានពាក់ព័ន្ធនឹងភារកិច្ចជម្លៀសជនជាតិជប៉ុនគេចពីមេរោគវីរុសកូរ៉ូណាដែរឬទេ? ឬក៏ដោយសារតែមូលហេតុផ្ទាល់ខ្លួនរបស់គេ?
បើមានព័ត៌មានថ្មីបន្ថែមអំពីករណីនេះ គេហទំព័រឡារ៉ែននឹងនាំយកមកជម្រាបជូននៅពេលក្រោយជាបន្តទៀត…៕
ប្រភព៖ សារព័ត៌មានបរទេស
