ប្រធានមន្ទីរសុខាភិបាលខេត្តសៀមរាប លោក ក្រុស សារ៉ាត់ ប្រាប់សារព័ត៌មាននៅរសៀលថ្ងៃទី25 មីនា ថា បុរសជនជាតិខ្មែរដែលមានការសង្ស័យឆ្លងជំងឺកូវីដ-19 ពីប្រទេសម៉ាឡេស៊ី ត្រូវបានអនុញ្ញាតឱ្យត្រឡប់ទៅផ្ទះវិញនៅព្រឹកថ្ងៃទី25នេះ។ លោកពន្យល់ថា បុរសទាំង2 មានសុខភាពធម្មតា ហើយបើរាប់ចាប់ពីថ្ងៃទី3 ពេលត្រឡប់ពីប្រទេសម៉ាឡេស៊ី គឺមានរយៈពេល 21ថ្ងៃហើយ ដូច្នេះអ្នកទាំង2 ពិតជាគ្មានជំងឺកូវីដ-19ឡើយ។
លោកប្រធានមន្ទីរសុខាភិបាលបញ្ជាក់ថា៖« ក្រុមគ្រូពេទ្យបានផ្តល់ប្រឹក្សាយោបល់ និងឱ្យធ្វើអ្វីទៅតាមការណែនាំពីគ្រូពេទ្យ ជាលក្ខណៈពិសេសគឺការធ្វើតេស្ដត្រួតពិនិត្យ 2លើក លទ្ធផលអវិជ្ជមាន ចឹងមានន័យថា ពួកគាត់អត់មានមេរោគទេ។
តាមពិត យើងគួរតែឱ្យគាត់ត្រឡប់ទៅផ្ទះតាំងពីថ្ងៃដំបូង (លទ្ធផលតេស្ដ) តែខ្ញុំចេះតែខ្លាច បារម្ភ ដូច្នេះរយៈពេលមួយសប្ដាហ៍នេះគឺយើងធ្វើការយ៉ាងហ្មត់ចត់បំផុត»៕
