បុគ្គលិកស្រី របស់ក្រុមហ៊ុនមួយ ក្នុងមណ្ឌលសាន់តុង កំពុងផឹកទឹកដែលដួសចេញពីចានបង្គន់ ដើម្បីអះអាងពីស្នាដៃរបស់នាង ក្នុងការសម្អាតអនាម័យដ៏ស្អាតផុតកំពូល និងគ្មានមេរោគ
ឃ្លីបបុគ្គលិកសម្អាតអនាម័យ របស់ក្រុមហ៊ុនមួយនៅក្នុងប្រទេសចិន ដែលបានផឹកទឹកពីចានបង្គន់ ដើម្បីបង្ហាញពីស្នាដៃក្នុងការដុសខាត់សម្អាតចានបង្គន់ បានស្អាតកម្រិតកំពូល គ្មានមេរោគ បានក្លាយជាឃ្លីបដ៏គួរឱ្យភ្ញាក់ផ្អើលមួយ នៅក្នុងពិភពអនឡាញក្នុងប្រទេសចិន។
បុគ្គលិកស្រី សម្អាតអនាម័យរបស់ក្រុមហ៊ុនលក់ចំណីសត្វ សាន់តុង ហ្វ៊ើយឈឹង ក្នុងមណ្ឌលសាន់តុង កំពុងផឹកទឹកដែលបានដួសចេញមកពីចានបង្គន់ប្រភេទអង្គុយចោងហោង ដើម្បីអះអាងពីស្នាដៃសម្អាតអនាម័យរបស់នាងដ៏អស្ចារ្យ និងគ្មានមេរោគ។
បុគ្គលិកស្រី ស៊ែលួ ម្នាក់នោះ បានទទួលការស្ងើចសរសើរ និងលើកតម្កើង ពីការឧទ្ទិសខ្លួនក្នុងតួនាទីការងារ និងបានទទួលរង្វាន់ពិសេសពីក្រុមហ៊ុន ក្នុងឋានៈជាបុគ្គលិក “ឆ្នើមអស្ចារ្យថ្នាក់ពិសេស”។
ទង្វើរបស់ ស៊ែលួ បានក្លាយជាប្រធានបទជជែកវែកញែកយ៉ាងទូលំទូលាយនៅក្នុងបណ្ដាញសង្គមដ៏ល្បីល្បាញរបស់ចិន “វេយបូ” ដោយមានមនុស្សម្នាក់បានខមមិនថា “ក្រុមហ៊ុនមិនគួរជំរុញឱ្យមានទង្វើបែបនេះទេ ក្នុងអំឡុងពេលដែលមានការឆ្លងរាលដាលនៃជំងឺកូវីដ-19”។
និងម្នាក់ទៀតបានសរសេរថា “ឱ្យមេធំរបស់ក្រុមហ៊ុន មកភ្លក្សរសជាតិទឹកពីចានបង្គន់នោះខ្លះផង…”
អ្នកទស្សនាឃ្លីបនេះម្នាក់ទៀត ជឿថា “ស្ត្រីបុគ្គលិកសម្អាតអនាម័យម្នាក់នោះ ត្រូវបានបង្ខំឱ្យធ្វើបែបនោះ ដើម្បីឱ្យទទួលបានលទ្ធផលការងារ តាមគោលដៅរបស់ក្រុមហ៊ុន…ហ៊ឺ! ជីវិតអ្នកសម្អាតអនាម័យ ពិតជាលំបាកមែន”
ខ្នាតទឹកម៉ាស៊ីននៅក្នុងប្រទេសចិន មិនទាន់ស្អាត និងមានសុវត្ថិភាពគ្រប់គ្រាន់សម្រាប់ផឹកនៅឡើយផង តែក្រុមហ៊ុនខាងលើ បែរជាអះអាងថា ទឹកនៅក្នុងចានបង្គន់របស់ក្រុមហ៊ុន ពិតជាស្អាតមានអនាម័យ ដល់ថ្នាក់ផឹកបាន និងអះអាងថា បុគ្គលិកម្នាក់នោះ ធ្វើឡើងដោយការស្ម័គ្រចិត្តទៀតផង។
ចំណែកអ្នកនាំពាក្យរបស់ក្រុមហ៊ុន បាននិយាយថា ស៊ែលួ បានផឹកទឹកពីចានបង្គន់ អស់រយៈពេលជិត 2ឆ្នាំមកហើយក្រោយពីបាន “យកឈ្នះឧបសគ្គខាងចិត្តវិទ្យា” រួចមក៕
ប្រភព៖ សារព័ត៌មានបរទេស
