ថ្ងៃទី ១៨ មេសា ២០២២ នាវាទេសចរណ៍ Pacific Explorer បានចូលចតក្នុងកំពង់ផែ Sydney របស់ អូស្ត្រាលី ហើយនេះគឺលើកដំបូងបង្អស់ដែលកំពង់ផែសមុទ្រនេះបើកទ្វារទទួលនាវាទេសចរណ៍ឡើងវិញ ក្រោយរយៈពេលជាង ២ ឆ្នាំ ដែល អូស្ត្រាលី ដាក់បម្រាមគោចរ ដើម្បីទប់ស្កាត់ការឆ្លងរាលដាលនៃជំងឺកូវីដ-១។
បន្ទាប់ពីបម្រាមគោចរត្រូវបានដកចេញទាំងស្រុង ព្រឹកថ្ងៃទី ១៨ មេសា ២០២២ នាវាទេសចរណ៍ Pacific Explorer បានចូលកាន់កំពង់ផែ Sydney នៅក្នុងទិដ្ឋភាពមួយដ៏គួរឱ្យចាប់អារម្មណ៍ នៅពេលនាវានេះត្រូវបានអមដំណើរដោយក្រុមនាវានាំផ្លូវ និងនាវាបាញ់ទឹក ព្រមទាំងមានបដាដែលសរសេរថា «យើងបានត្រលប់មកផ្ទះវិញហើយ»។ មនុស្សជាច្រើនប្រមូលផ្ដុំគ្នានៅលើស្ពានរបស់កំពង់ផែ ដើម្បីមើលទិដ្ឋភាពនាវាត្រលប់ចូលមកកាន់អូស្ត្រាលី ក្រោយពីបានធ្វើដំណើរជិត ១ ខែ ក្នុងចម្ងាយផ្លូវជាង ១៨,០០០ គីឡូម៉ែត្រ។
លោកស្រី Lyndsey Gordon អ្នកនាំពាក្យរបស់ P&O (អង់គ្លេស) ដែលជាក្រុមហ៊ុនផ្ដល់សេវាកម្មជើងនាវាទេសចរណ៍លំដាប់ប្រណិត បានឱ្យដឹងថា ចំនួនអ្នកកក់សំបុត្រសម្រាប់ដំណើរកម្សាន្តតាមនាវាទេសចរណ៍អូស្ត្រាលី របស់ក្រុមហ៊ុននេះ បានកើនឡើងខ្ពស់ ជិតស្មើនឹងដំណាក់កាលមុនសម័យកូវីដ-១។
យោងតាមទិន្នន័យរបស់សមាគមនាវាទេសចរណ៍អន្តរជាតិ មុនវិបត្តិកូវីដ-១៩ នាវាទេសចរណ៍ប្រហែល ៣៥០ គ្រឿង ដែលមានអតិថិជនសរុបជាង ៦០០,០០០ នាក់ បានមកកាន់ អូស្ត្រាលី រួមចំណែកប្រហែល ៣.៨ ពាន់លានដុល្លារអាម៉េរិក ដល់សេដ្ឋកិច្ចរបស់ប្រទេសនេះ។
មុននោះ កាលពីខែមីនា ២០២០ នាវាទេសចរណ៍អន្តរជាតិទាំងឡាយ ត្រូវបានហាមចូលក្នុងតំបន់សមុទ្ររបស់ អូស្ត្រាលី ក្រោយពីមានករណីផ្ទុះឆ្លងកូវីដ-១៩ ដែលមានប្រភពពីនាវាទេសចរណ៍ Ruby Princess។ Pacific Explorer និងនាវាទេសចរណ៍ ២ គ្រឿងផ្សេងទៀតរបស់ក្រុមហ៊ុន P&O ត្រូវចតអស់រយៈពេលជាច្រើនខែក្នុងឆ្នាំ ២០២១ នៅលើតំបន់សមុទ្ររបស់ ប្រទេសស៊ីប (Cyprus) ដើម្បីរង់ចាំ រដ្ឋាភិបាលអូស្ត្រាលី ដកបម្រាមគោចរខាងលើ៕