យន្តហោះចម្បាំង ១ គ្រឿងរបស់ ប្រទេសរូម៉ានី បានបាត់ខ្លួននៅភាគអាគ្នេយ៍ ចំណែកឧទ្ធម្ភាគចក្រ ១ គ្រឿងក៏បានធ្លាក់នៅក្នុងបេសកកម្មស្វែងរក និងសង្គ្រោះយន្តហោះចម្បាំង។
ក្រសួងការពារជាតិរូម៉ានី បានឱ្យដឹងថា យន្តហោះចម្បាំង MiG-២១ LanceR បានបាត់ខ្លួនពី រ៉ាដា នៅតំបន់ភាគអាគ្នេយ៍ Dobrogea កាលពីចុងថ្ងៃទី ២ មីនា។
RT ផ្សាយថា ករណីគ្រោះថ្នាក់មួយផ្សេងទៀតក៏បានកើតឡើងលើឧទ្ធម្ភាគចក្រ IAR ៣៣០ Puma បន្ទាប់ពីត្រូវបានបញ្ជាឱ្យបំពេញបេសកកម្មស្វែងរក និងជួយសង្គ្រោះយន្តហោះចម្បាំងដែលបានបាត់ខ្លួនខាងលើ។
យោងតាមកងទ័ពរូម៉ានី ឧទ្ធម្ភាគចក្រ IAR ៣៣០ Puma បានបាត់ខ្លួន បន្ទាប់ពីចេញដំណើរបានប្រហែល ២០ នាទី។ មុនពេលឧទ្ធម្ភាគចក្របាត់ខ្លួន អ្នកបើកបរបានរាយការណ៍ថា អាកាសធាតុអាក្រក់ខ្លាំង នៅក្នុងតំបន់កំពុងហោះហើរ។
សារព័ត៌មានក្នុងស្រុកបានរាយការណ៍ថា មនុស្ស ៧ នាក់ បានបាត់បង់ជីវិតនៅក្នុងករណីធ្លាក់ឧទ្ធម្ភាគចក្រ IAR ៣៣០ Puma។
