ប្រភពព័ត៌មានពី ទីក្រុងវ៉ាស៊ីងតោន បានឱ្យដឹងថា រដ្ឋាភិបាលរបស់លោក ចូ បៃឌិត កាលពីថ្ងៃទី ២៦ មករា បានប្រកាសថា សហរដ្ឋអាម៉េរិក បានចែករំលែកវ៉ាក់សាំងបង្ការជំងឺកូវីដ-១៩ ចំនួន ៤០០ លានដូសរួចហើយ ដល់ពិភពលោក។
អ្នកចាត់ការផ្នែកប្រតិកម្មនឹង កូវីដ-១៩ របស់ សេតវិមាន Jeff Zient បានប្រកាសព័ត៌មាននេះ និងឱ្យដឹងថា វ៉ាក់សាំងទាំង ៤០០ លានដូសនេះ ត្រូវបានប្រគល់ជូនប្រទេសចំនួន ១១។ លោក Zient បញ្ជាក់ថា សហរដ្ឋអាម៉េរិក បានចែករំលែកវ៉ាក់សាំងដោយមិនគិតថ្លៃច្រើនជាង ៤ ដង ធៀបនឹងប្រទេសដទៃ។
ចំណែកមន្ត្រីមួយរូបផ្សេងទៀតរបស់ សេតវិមាន បានប្រាប់ថា សហរដ្ឋអាម៉េរិក បានផ្ដល់វ៉ាក់សាំង Pfizer-BioNTech ប្រមាណ ៣.២ លានដូស ដល់ ប្រទេសបង់ក្លាដែស និង ៤.៧ លានដូស ដល់ ប្រទេសប៉ាគីស្ថាន នៅក្នុងសប្ដាហ៍នេះ នាំឱ្យតួលេខនៃវ៉ាក់សាំងដែលបានចែករំលែក កើនឡើងដល់ ៤០០ លានដូស។
វ៉ាក់សាំងដែលជាជំនួសខាងលើ ត្រូវបានចែករំលែកតាមរយៈយន្តការ COVAX ដែលជាគំនិតផ្ដួចផ្ដើមរបស់អង្គការសុខភាពពិភពលោក ក្នុងបំណងជួយដល់យុទ្ធនាការចាក់វ៉ាក់សាំងរបស់បណ្ដាប្រទេសដែលមានចំណូលទាប។
កន្លងមក ប្រធានាធិបតី បៃដិន បានសន្យាចែករំលែកវ៉ាក់សាំងបង្ការជំងឺកូវីដ-១៩ ជាង ១ ពាន់លានដូស ដល់ប្រទេសនានា ហើយនេះគឺជាប្រការដែលក្រុមអ្នកជំនាញយល់ថា មានសារសំខាន់ដើម្បីអាចឆ្លងផុតជំងឺរាតត្បាតកូវីដ-១៩៕
