ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ អាជ្ញាធរជាច្រើនតំបន់នៅ ប្រទេសចិន បន្តលើកទឹកចិត្តឱ្យប្រជាជនទទួលអំណរឆ្នាំថ្មីប្រពៃណីជាតិ នៅនឹងកន្លែង។
នៅ រដ្ឋធានីប៉េកាំង, សៀងហៃ (Shanghai) ធានជីន (Tianjin), ហេណាន (Henan), ជេជាំង (Zhejiang), ក្វាងស៊ី (Guangxi), ម៉ុងហ្គោលីក្នុង(Inner Mongolia) ប្រជាពលរដ្ឋត្រូវបានអាជ្ញាធរអំពាវនាវឱ្យលុបចោលគម្រោងធ្វើដំណើរ និងមិនត្រូវចាកចេញពីទីក្រុង នៅក្នុងរដូវបុណ្យចូលឆ្នាំចិន បើសិនជាមិនចាំបាច់។ តំបន់ជាច្រើនក៏មានផែនការផ្ដល់ជំនួយចាប់ពី ៥០០ ដល់ ១,០០០ យុន/ម្នាក់ ដើម្បីសម្រួលដល់ការចូលឆ្នាំនៅនឹងកន្លែងរបស់ពលរដ្ឋ។ ក្រុមហ៊ុន រោងចក្រជាច្រើនថែមទាំងធានាកន្លែងស្នាក់នៅ ផ្គត់ផ្គង់អាហារហូបចុកនៅក្នុងថ្ងៃចូលឆ្នាំ សម្រាប់កម្មករនៅធ្វើការផងដែរ។
ប្រកាសទាំងឡាយខាងលើត្រូវបានប្រកាសនៅគ្រាដែល ប្រទេសចិន បានរកឃើញអ្នកឆ្លង កូវីដ-១៩ ប្រភេទ អូមីក្រុង ជាច្រើនករណីនៅក្នុងសហគមន៍។
អាជ្ញាធរក៏រឹតបន្តឹងលើការដើរហើររបស់ប្រជាជនទូទៅ។ អ្នកដំណើរនឹងត្រូវតម្រូវឱ្យស្កេនកាត បង្ហាញលិខិតស្នាម ធ្វើតេស្ត PCR បើសិនចូលទៅកាន់ ក្រុងប៉េកាំង ឬចាកចេញពី ធានជីន។ ចំណែកប្រជាជនដែលមកពីខេត្តដទៃ ចូលមករដ្ឋធានី ក៏ត្រូវតែសុំច្បាប់។ ជនបរទេសដែលស្នាក់នៅក្នុងរដ្ឋធានី ត្រូវបានពិនិត្យជាញឹកញាប់នូវប្រវត្តិនៃការធ្វើដំណើរ។
ចំណុចរួមរបស់តំបន់នានាគឺការតម្រូវឱ្យប្រជាជនពីខេត្តដទៃចូលមកលេងឆ្នាំថ្មី ត្រូវបង្ហាញលទ្ធផលតេស្តអវិជ្ជមាន និងតាមដានសុខភាពក្នុងផ្ទះរយៈពេល ១៤ ថ្ងៃ បើសិនមកពីតំបន់ដែលមានហានិភ័យខ្ពស់៕
