នៅព្រឹកថ្ងៃទី ២ ខែសីហា ឆ្នាំ ២០១៩ ស្ថានីយ៍ទូរទស្សន៍ប៉ុស្ដិ៍លេខ៥ បានរៀបចំពិធីក្រុងពាលីរឿងភាគថ្មីមួយទៀតហើយ មានចំណងជើងថា «អន្ទាក់ស្នេហ៍» ដែលមានតារាឯកប្រុសស្រីចូលរួមក្រុងពលីដូចជា សេង មង្គល ដួង ម៉ានិច្ច ប៉ែន សុផានី ញឹម ចាន់ថន ចាន់ ស្រីរត្ន័ យុទ្ធ ឋានៈ កញ្ញាម៉ូនណា ព្រមទាំងតារាសិល្បៈជាច្រើនដួងទៀត។
ក្នុងរឿង«អន្ទាក់ស្នេហ៍»របស់ប៉ុស្តិ៍លេខ៥ អ្វីដែលប្លែកសម្រាប់តួឯកប្រុសស្រី គេស្រាប់តែឃើញតារាលេចធ្លោ ដួង ម៉ានិច្ច និងប្រុសស្អាតលោក សេង មង្គល ប៉ះគ្នាដែលរិតតែធ្វើឲ្យផ្ទៃរឿងខាងលើ ពិតជាកន្ត្រាក់ការទាក់ទាញ ព្រោះអ្នកទាំង២មានប្រវត្តិយល់ដឹងពីល្បិចសម្តែងច្រើន។ ដូចនេះទស្សនិកជន ដែលគាំទ្ររឿងភាគប៉ុស្តិ៍លេខ៥កន្លងមក ពិតជាទទួលបានរសជាតិថ្មីម្តងទៀតជាក់ជាមិនខានឡើយ។
ដួង មានិច្ច និយាយថា នាងនិងលោក មង្គល ទើបតែប៉ះគ្នាលើកដំបូង ហើយមានឈុតឆាកច្រើនដែលសម្តែងកាច់កុងគ្នា។ នាងបន្ដប្រាប់អ្នកសារព័ត៌មានឡារ៉ែនថា តាំងពីប្រឡូកសិល្បៈអស់រយៈ ១០ ឆ្នាំមកនេះ លើកនេះជាការសម្ដែងដំបូងហើយ ដែលមាននាងបានប៉ះពាល់រូបរាងកាយលោក សេង មង្គល ពោលគឺ អ្នកដឹកនាំសម្ដែង ត្រូវឱ្យនាងចាប់ផ្ដើមឈុតឆាករោលរាលស្នេហ៍នៅលើគ្រែជាមួយតួប្រុស ( ចាប់បង្ខំតួប្រុស ..) និងមានឈុតឆាក ឱបថើបផ្អែមល្ហែមដាក់គ្នាជាច្រើនប្លង់ថែមទៀតផង។ នាងថា ពួកយើងរំពឹងថា ការជួបគ្នាទី១នេះ ពិតជាទទួលបានការគាំទ្រច្រើនពីបងប្អូនអ្នកទស្សនា។
តាមការបញ្ជាក់ឱ្យដឹងបន្ថែពីរឿង «អន្ទាក់ស្នេហ៍» នេះ ត្រូវបានចំណាយពេលថតជាច្រើនសប្តាហ៍ដោយពន្លឿនការថតឲ្យបានលឿនដើម្បីប្រមូលការបញ្ចាំងឲ្យបានលឿនតាមការចូលរួមបញ្ចាំងតាមការចង់បានពីទស្សនិកជន។ រឿងនេះជារឿងទី២១ ដែលប៉ុស្តិ៍លេខ៥ បានបង្កើតឡើងតាំងពីដំណើរការថតកន្លងមក។ រឿង«អន្ទាក់ស្នេហ៍» មានចំនួន៣០ភាគ ដែលត្រូវសម្រិតសម្រាំងឲ្យបានល្អឡើងៗ៕
