តាមរយៈសារព័ត៌មាន Entertain.naver បានចេញផ្សាយនៅពេលមុននេះបន្ដិចឱ្យដឹងថា មានការភ្ញាក់ផ្អើលជាខ្លាំង ខណៈដែលកំពូលតារាចម្រៀង Kpop នាង CL ឡើងគីឡូរហូតដល់មិនចង់ស្គាល់។ អ្វីដែលគ្រប់គ្នា សឹងមិនជឿនឹងភ្នែក គឺតារាស្រីរូបនេះរីកមាឌជាងមុនគួរសម ប៉ុន្ដែមានអ្នកគាំទ្រនាងម្នាក់បានលើកឡើងថា នាងឡើងទម្ងន់ដល់ទៅ 78 Kg ហើយគ្រាន់តែពេលឃើញសភាពនាងបែបនេះ អ្នកគាំទ្រផ្ដោតសំខាន់ភ្លាមពីរឿងរ៉ាវប៉ះទង្គិចផ្លូវចិត្តមួយចំនួនដែលកើតមានរវាងនាងជាមួយ YG នៅមួយរយៈចុងក្រោយ។
យ៉ាងណាមិញ YG Entertainment បាននិយាយជាមួយសារពត៌មានថ្ងៃនេះថា « CL ជាមួយខាងផលិតកម្ម គ្មានរឿងជម្លោះអ្វីទាំងអស់ ដោយសារនាងនៅសហរដ្ឋអាមេរិកច្រើនជាងនៅកូរ៉េ ចឹងការផ្លាស់ប្តូរផ្ទះ និងបរិស្ថានធ្វើឱ្យ CL មិនទាន់ស៊ាំតែសុខភាពនាងល្អធម្មតា គ្រាន់តែនាងស្ត្រេសពីការងារ ហើយមិនមានពេលហាត់ប្រាណ ទើបបានជានាងរៀងឡើងគីទ្បូបន្តិច តែប៉ុណ្ណឹងឯង »។
គួរបញ្ជាក់ផងដែរថា មូលហេតុដែលធ្វើឱ្យម្ចាស់ក្សត្រីយប្រចាំចម្រៀង Kpop រូបនេះត្រូវផ្លាស់ទីលំនៅទៅកាន់សហរដ្ឋអាមេរិក ក៏ព្រោះតែរូបនាងត្រៀមបញ្ចេញអាល់ប៊ុមចម្រៀងថ្មី ដែលបានថតទុកតាំងពីឆ្នាំ 2016 មកម្លេះ។ ហើយបទចម្រៀងរបស់នាងដែលមិនទាន់បានបញ្ចេញប្រមាណជាង 200 បទ និងវីដេអូចម្រៀងជាច្រើនបទទៀតនោះ ក៏មានអ្នកគាំទ្រទម្លាយឱ្យដឹងថា ដោយសារតែម្ចាស់ផលិតកម្ម YG លោក យ៉ាង យ៉ុងស៊ុក មិនព្រមឱ្យនាងបញ្ចេញអាល់ប៊ុមចម្រៀងខ្លួន និងធ្វើឱ្យនាងរងសម្ពាធផ្លូវចិត្ត៕
