ថ្មីៗនេះស្រីស្អាត អៀ ម៉ីលិ បានបង្ហាញពីមុខមាត់គូស្នេហ៍របស់នាងជានិស្សិតមកពីបរទេស ដែលមិនត្រឹមតែមានចំណេះដឹងខ្ពស់ទេ តែបុរសម្នាក់នោះថែមទាំងមានរូបរាងសង្ហាទៀតផង និងអ្វីដែលគួរឱ្យចាប់អារម្មណ៍នោះគឺ គូស្នេហ៍របស់តារាសម្ដែងស្រីវ័យក្មេងរូបនេះ គឺជាម្ចាស់បទចម្រៀងនិពន្ធថ្មីដែលមានចំណងជើងថា «ឈប់គិត» ដែលកំពុងតែទទួលបានការពេញនិយមគាំទ្រពីសំណាក់ស្រទាប់យុវវ័យ។ ពួកគេទាំងពីរនាក់ថែមទាំងបានសម្តែងជាមួយគ្នានៅក្នុងវីដេអូចម្រៀងនោះយ៉ាងផ្អែមល្ហែមទៀតផង។
ក្រៅពីបង្ហាញមុខមាត់របស់គូស្នហ៍ដល់អ្នកគាំទ្រហើយ កញ្ញា អៀ ម៉ីលិ ថែមទាំងបង្ហាញរូបថតស្វ៊ីតៗរវាងរូបនាងនឹងគូស្នេហ៍យ៉ាងផ្អែមល្ហែម ដែលមានទាំងរូបបឺតមាត់គ្នាទៀតផង ហើយរូបភាពខ្លះទៀតក៏បង្ហាញឱ្យឃើញដែរថា នាងបានដឹកដៃគូស្នេហ៍ទៅដើរលម្ហែកាយនៅក្រៅប្រទេសផងដែរ។ នាងបានប្រាប់សារព័ត៌មានឡារ៉ែនថា ជុំវិញបញ្ហាស្នេហានេះនាងមិនបានលាក់លៀមទេ នាងនឹងបុរសម្នាក់នោះគឺជាសង្សារនឹងគ្នាពិតមែន ពួកគេបានស្គាល់គ្នាតាមរយៈបណ្ដាញសង្គម។ ទោះបីជាមានការស្គាល់គ្នាតាមបណ្ដាញសង្គមក្ដី តែអ្វីដែលធ្វើឱ្យតារាស្រីវ័យក្មេងរូបនេះហ៊ានបង្ហាញមុខសង្សារជាសាធារណៈ ដោយមិនខ្លាចប៉ះពាល់ដល់ប្រជាប្រិយភាពក្នុងសង្គមសិល្បៈនោះត្រូវបានគេដឹងថា ដោយសារបុរសម្នាក់នោះមិនមែនធម្មតាឡើយ ព្រោះក្រៅពីរូបគេជាសិស្សពូកែប្រឡងជាប់អាហារូបករណ៍រៀននៅបរទេសផ្នែកវិទ្យាសាស្រ្ដនយោបាយ និងសេដ្ឋកិច្ចហើយ គេក៏ជាកូនប្រុសរបស់អ្នកមានទ្រព្យស្ដុកស្ដម្ភម្នាក់នៅឯខេត្ដកោះកុងផងដែរ។
អូនម៉ី បានប្រាប់ថា ពួកគេបានស្គាល់គ្នាជាងមួយឆ្នាំមកហើយ ប៉ុន្ដែទើបតែយល់ចិត្ដ និងស្រឡាញ់គ្នាប្រមាណជាពីរបីខែចុងក្រោយនេះទេ។ កញ្ញា ម៉ីលិ បន្ដថា «ខ្ញុំមិនខ្លាចនឹងបង្ហាញមុខគាត់(សង្សារ)ទេ និងបើចាស់ទុំទាំងសងខាងបានដឹង ហើយ ក៏ពួកគាត់មិនរារាំងខ្ញុំដែរ។ សម្រាប់ម៉ាក់ខ្ញុំវិញ គាត់មានទំនុកចិត្ដលើខ្ញុំ ដូច្នេះគាត់ផ្ដល់សិទ្ធិឱ្យខ្ញុំសម្រេចរឿងអនាគតដោយខ្លួនឯង»។
លើកនេះទំនងជាស្នេហ៍គ្រាដំបូងរបស់នាងហើយ ទើបបានជានាងហ៊ានបង្ហាញទៅកាន់មហាជនដោយមិនលាក់លៀមបែបនេះ។ ជាមួយគ្នានេះកញ្ញា អៀ ម៉ិលិ បានបន្ដប្រាប់ថា «ខ្ញុំស្រឡាញ់គាត់ គាត់ស្រឡាញ់ខ្ញុំ ដូច្នេះមិនមានអ្វីខុសទេ។ ក្រោយពីបានស្គាល់គ្នាមកពួកយើងយល់ថា អាចរស់នៅចុះសម្រុងគ្នាច្រើន។ អ្វីដែលធ្វើឱ្យខ្ញុំព្រមទទួលយកគាត់ជាសង្សារ ព្រោះគាត់យល់ និងស្គាល់ពីខ្ញុំច្បាស់ ម្យ៉ាងគាត់ជាអ្នករៀនសូត្រចេះដឹង ដូច្នេះមុននឹងគាត់ធ្វើអ្វីមួយ គឺបានគិតយ៉ាងល្អិតល្អន់ណាស់»។ គួរបញ្ជាក់ថា ក្រៅពីសាងចំណងស្នេហ៍ជាមួយគ្នាហើយ អ្នកទាំងពីក៏មានបំណងចង់បង្កើតអាជីវកម្មរួមគ្នានាពេលខាងមុខឆាប់ៗនេះដែរ៕
