ថ្មីៗនេះនៅលើវេបសាយ Apple ផ្លូវការ បានបង្ហាញថា ម៉ាស៊ីនចាក់ចម្រៀងដែលល្បីល្បាញកាលពីប៉ុន្មានឆ្នាំមុននោះ ឥឡូវបានចេញស៊េរីថ្មីមកទៀតហើយ គឺ iPod Touch ជំនាន់ទី6 ដោយតម្លៃដាក់លក់ផ្លូវការនៅសហរដ្ឋអាមេរិកសម្រាប់ជម្រើសមេម៉ូរី 32GB មានតម្លៃ 199ដុល្លារ។ មេម៉ូរី 128GB តម្លៃ 299ដុល្លារ និងមេម៉ូរី 256GB តម្លៃ 399ដុល្លារ។
iPod Touch ជំនាន់ទី6 នេះ បានបំពាក់បន្ថែមនូវមុខងារសំខាន់ 2 គឺ Group FaceTime (ជាមុខងារ1 ដែលអាចឱ្យអ្នកប្រើនិយាយគ្នាតាមវីដេអូឡាយហ្វ៍ជាក្រុមបាន) និង AR experience (មុខងារប្រើបច្ចេកវិទ្យា AR)។ ចំពោះផ្នែកផ្សេងៗទៀតមានដូចជា អេក្រង់ទំហំ 4អ៊ិញប្រភេទ Retina មានប៊ូតុង Home តែគ្មាន TouchID។
iPod Touch នៅតែគាំទ្ររន្ធដោតកាសខ្នាត 3.5mm គាំទ្រឌុយ Lightning connector មានរន្ធបញ្ចេញសំឡេង1 និងរន្ធ Microphone 1។ សម្រាប់ថាមពលថ្មអាចប្រើបានប្រមាណ 40ម៉ោង(ចាក់ចម្រៀងជាប់រហូត) និង 8ម៉ោង(ចាក់វីដេអូ)។ វាក៏មានបំពាក់កាមេរ៉ាក្រោយទំហំ 8មេហ្គាភិកសែល និង 1.2មេហ្គាភិកសែលដូច iPod Touch ជំនាន់មុនដែរ។
រីឯបន្ទះឈីប A10 Fusion វិញ Apple បានអះអាងថា នឹងជួយឱ្យដំណើរការលឿនជាងមុន 2ដង និងលឿនជាង 3ដងផ្នែក User experience។ (A10 Fusion គេដឹងថា មានបំពាក់លើ iPhone 7 និង iPhone 7 Plus)៕
