ការប្រឡងបាក់ឌុប3ឆ្នាំចុងក្រោយនេះមានលក្ខណៈខុសប្លែកពីការប្រឡងមុនៗ ព្រោះក្រសួងបានសហការជាមួយនឹងដៃគូពាក់ព័ន្ធដើម្បីធានាការប្រឡងនេះឱ្យមានលក្ខណៈសុក្រឹត។ បេក្ខជនទាំងអស់ត្រូវមានការប្រុងប្រយ័ត្ន ព្រោះទង្វើមួយចំនួនដែលសិស្សទាំងអស់ស្មានមិនដល់ អាចធ្វើឱ្យពួកគេធ្លាក់ ហើយត្រូវផ្អាកមិនឱ្យប្រឡងមួយឆ្នាំថែមទៀត។
ក្រសួងអប់រំ យុវជន និងកីឡា បានចេញសេចក្តីណែនាំពីសកម្មភាពមួយចំនួនដែលអាចធ្វើឱ្យបេក្ខជនប្រឡងបាក់ឌុបធ្លាក់ដោយស្វ័យប្រវត្តិ និងផ្អាកមិនឱ្យប្រឡងមួយឆ្នាំ ដែលក្នុងនោះមានសកម្មភាពដូចជា៖
- បេក្ខជនដែលធ្វើជាមេខ្លោងប្រមូលលុយ ឬណែនាំឱ្យបេក្ខជនដទៃប្រមូលលុយ ឬយកលុយឱ្យអនុរក្ស។
- បេក្ខជនដែលយកសន្លឹកកិច្ចការអ្នកដទៃមកធ្វើជាសន្លឹកកិច្ចការរបស់ខ្លួន។
- បេក្ខជនដែលហែក ឬលាក់សន្លឹកកិច្ចការអ្នកដទៃ។
- បេក្ខជនដែលដណ្តើមយកសន្លឹកកិច្ចការអ្នកដទៃមកចម្លង។
- បេក្ខជនដែលបង្កជម្លោះក្នុងមណ្ឌលប្រឡង ឬបន្ទប់ប្រឡងដោយគំរាមកំហែងលើបេក្ខជនដទៃ។
- បេក្ខជនដែលបោះប្រធានវិញ្ញាសាចេញក្រៅបន្ទប់ប្រឡង ឬចេញទៅយកសំណៅឯកសារ ឬចម្លើយពាក់ព័ន្ធនឹងប្រធានវិញ្ញាសាចូលក្នុងបន្ទប់ប្រឡងវិញ ក្នុងពេលធ្វើវិញ្ញាសា។
- បេក្ខជនដែលសរសេរលើសន្លឹកកិច្ចការអ្នកដទៃ។
- បេក្ខជនដែលឱ្យអ្នកដទៃសរសេរលើសន្លឹកកិច្ចការរបស់ខ្លួន។
- បេក្ខជនដែលឱ្យសន្លឹកកិច្ចការ ឬសំណៅក្រដាសព្រាងរបស់ខ្លួនទៅអ្នកដទៃចម្លង។
- បេក្ខជនដែលផ្លាស់កន្លែងអង្គុយ (លុបលេខតុពីកន្លែងដែលបានកំណត់ ទៅសរសេរលេខតុរបស់ខ្លួននៅកន្លែងផ្សេង)។
- បេក្ខជនដែលហែកសន្លឹកកិច្ចការ ឬមិនព្រមប្រគល់សន្លឹកកិច្ចការជូនអនុរក្ស។
- បេក្ខជនដែលដើរចុះឡើងចេញពីកន្លែងអង្គុយដោយគ្មានការអនុញ្ញាតពីអនុរក្ស។
ទាំងអស់នេះជាទង្វើអាក្រក់ដែលធ្លាប់បានធ្វើដោយសិស្សដែលប្រឡងនៅសម័យប្រឡងកាលពីឆ្នាំមុនៗ ហេតុនេះសូមសិស្សដែលប្រឡងបាក់ឌុបនៅឆ្នាំនេះមេត្តាប្រយ័ត្នដើម្បីចៀសវាងត្រូវធ្លាក់ និងផ្អាកមិនឱ្យប្រឡងមួយឆ្នាំបន្ទាប់៕
