គុណភាព និងចំណេះដឹងរបស់ប្រជាជន ជាឆ្អឹងខ្នងរបស់ប្រទេសដែលការអប់រំ ជាធាតុសំខាន់បំផុតមិនអាចខ្វះបានក្នុងការអភិវឌ្ឍសង្គមមួយប្រកបដោយភាពរឹងមាំ និងសក្តានុពល។
ពីមួយឆ្នាំទៅមួយឆ្នាំ កម្ពុជាបានព្យាយាមអភិវឌ្ឍប្រព័ន្ធអប់រំ តាមរយៈការអនុវត្តផែនការសកម្មភាពសំខាន់ៗដែលចេញដោយក្រសួងអប់រំ យុវជន និងកីឡា ដើម្បីធ្វើយ៉ាងណាបណ្តុះបណ្តាលធនធានមនុស្សឱ្យក្លាយជាកម្លាំងពលកម្មស្នូលសម្រាប់ចាក់បញ្ចូលក្នុងទីផ្សារការងារ។ ទោះបីជាយ៉ាងនេះក្តី កម្ពុជាក៏នៅមានបញ្ហាប្រឈមជាច្រើនដែលទាមទារឱ្យមានការចូលរួម និងបង្កើតដំណោះស្រាយពីគ្រប់សមាសភាពសង្គម។
ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា នៅកម្ពុជាមានបញ្ហាប្រឈមមួយចំនួនដែលទាមទារឱ្យមានការខិតខំប្រឹងប្រែងបន្ថែមទៀត ដូចជាបញ្ហាគុណភាពអប់រំ ការអនុវត្តស្តង់ដារអប់រំ គុណភាពគ្រូនៅមានកម្រិត វិសមភាពនៃធនធានមនុស្សដែលចេញពីសាលា និងទីផ្សារការងារជាក់ស្តែង បញ្ហាហេដ្ឋារចនាសម្ព័ន្ធនៅតាមទីជនបទ សម្ភារបរិក្ខារពិសោធ និងបញ្ហាមួយចំនួនផ្សេងទៀត។ ឯកឧត្តម បានបញ្ជាក់ថា ដើម្បីដោះស្រាយបញ្ហាប្រឈមទាំងអស់នេះ ក្រសួងបានធ្វើការលើកកម្ពស់គុណភាពអប់រំ តាមរយៈការអភិវឌ្ឍសមត្ថភាពគ្រូបង្រៀន ពិនិត្យ និងកែលម្អសៀវភៅសិក្សាឡើងវិញឱ្យស្របតាមកម្មវិធីសិក្សាថ្មី ផ្តល់សម្ភារសិក្សាបច្ចេកទេសដើម្បីរៀន និងបង្រៀនឱ្យបានកាន់តែច្រើន និងផ្តោតការយកចិត្តទុកដាក់លើតម្រង់ទិសវិជ្ជាជីវៈនៅតាមវិទ្យាល័យចំណេះទូទៅ និងបច្ចេកទេស។
ឯកឧត្តម ហង់ ជួនណារ៉ុន បានមានប្រសាសន៍ថា៖ «យើងក៏បានជំរុញឱ្យមានការសិក្សាមុខវិជ្ជាស្ទែម (STEM) និងការស្រាវជ្រាវនៅតាមគ្រឹះស្ថានសិក្សា និងជំរុញឱ្យមានការត្រួតពិនិត្យលើការគ្រប់គ្រងគ្រឹះស្ថានសិក្សានានានៅទូទាំងប្រទេស»។
គួររំឭកផងដែរថា ក្រសួងអប់រំបានធ្វើការសហការជាមួយនឹងស្ថាប័នជាច្រើន ដើម្បីជំរុញឱ្យមានការយកចិត្តទុកដាក់ដល់សិស្សឱ្យមានភាពស្មើគ្នាលើការអប់រំ ដោយការបណ្តុះបណ្តាលគ្រូឱ្យមានចំនួនកាន់តែច្រើន រួមទាំងជំរុញឱ្យអគារអប់រំ ធនធាន និងសាលាគំរូជាច្រើននៅកម្ពុជាដើម្បីផ្តល់ឱកាសឱ្យសិស្សបានសិក្សាស្វែងយល់ពីគំហើញថ្មីៗដោយមានការពិសោធជាក់ស្តែងតែម្តង៕
