នៅពេលដើរចូលសាកលវិទ្យាល័យ ជីវិតនិស្សិតចាប់ផ្តើមផ្លាស់ប្តូរខ្លួនពីអ្នករៀនដើម្បីប្រឡងជាប់ទៅជាអ្នកដែលរៀនដើម្បីអាជីពការងារ។ ដើម្បីទទួលបានការងារល្អ ឬដើម្បីដឹកនាំអាជីវកម្មក៏ដោយ ភាពជាអ្នកដឹកនាំគឺជារឿងសំខាន់បំផុតមួយដែលត្រូវតែមាន ហើយភាពជាអ្នកដឹកនាំទាំងអស់នោះចាំបាច់ត្រូវតែបណ្តុះឱ្យបាននៅក្នុងពេលដែលកំពុងសិក្សា។
ដើម្បីដោះស្រាយបញ្ហានិស្សិតមួយចំនួនដែលកំពុងចង់ស្វែងរកភាពជាអ្នកដឹកនាំ ឬបង្កើនភាពក្លាហានក្នុងការដឹកនាំគម្រោងនានា គេហទំព័រ ឡារ៉ែន សូមធ្វើការបង្ហាញជូននូវចំណុចសំខាន់ៗមួយចំនួនដូចខាងក្រោម។
1. ចាប់ផ្តើមធ្វើការងារស្ម័គ្រចិត្ត
ការធ្វើការងារស្ម័គ្រចិត្តជារឿងសំខាន់មួយដែលអាចជួយឱ្យនិស្សិតមានសមត្ថភាពគ្រប់គ្រាន់ដើម្បីរៀនពីភាពជាអ្នកដឹកនាំ ព្រោះការងារទាំងអស់នេះត្រូវធ្វើជាក្រុមដែលចាំបាច់ត្រូវតែមានបញ្ហាដែលត្រូវដោះស្រាយ។ ម្យ៉ាងវិញទៀត ការធ្វើការស្ម័គ្រចិត្តជាមួយនឹងក្រុមការងារណាមួយអាចធ្វើឱ្យនិស្សិតស្វែងយល់ពីការរៀបចំគម្រោងសំខាន់ៗនានាដែលអាចជំរុញឱ្យនិស្សិតទាំងអស់មានគំនិតច្រើនក្នុងការបង្កើតគម្រោងថ្មីៗក្រោយពេលបញ្ចប់ការសិក្សា ឬអាចមានគំនិតបង្កើតកម្មវិធីថ្មីជាមួយនឹងក្រុមនៅក្នុងសាកលវិទ្យាល័យជាមួយគ្នា។
2. ចំណាយពេលស្វែងរកកង្វះខាតរបស់មនុស្ស
អ្នកដឹកនាំជាច្រើន ជាអ្នកដែលអាចបង្កើតកម្មវីធី ឬអ្នកដែលអាចស្វែងរកវិធីដើម្បីដោះស្រាយបញ្ហារបស់មនុស្ស។ ប្រសិនបើពួកគេជាអ្នកដឹកនាំក្រុមនិស្សិត ពួកគេត្រូវតែជាអ្នកយល់ដឹងច្បាស់ពីការងាររបស់និស្សិត ប្រសិនបើពួកគេជាអ្នកដឹកនាំស្ថាប័នណាមួយពួកគេត្រូវតែយល់ច្បាស់ពីបញ្ហានៃការរស់នៅរបស់មនុស្ស បន្ទាប់មកពួកគេក៏អាចបង្កើតក្រុមការងារដើម្បីដោះស្រាយបញ្ហា។ ការដោះស្រាយបញ្ហានេះហើយ ជាគម្រោងសំខាន់ដែលនិស្សិត ឬមនុស្សគ្រប់គ្នាត្រូវបង្កើតដោយប្រើភាពជាអ្នកដឹកនាំ។
3. ស្វែងរកពេលស្តាប់បេះដូងខ្លួនឯង
នៅលើផ្លូវដើម្បីក្លាយជាអ្នកដឹកនាំម្នាក់ អ្នករាល់គ្នាជាពិសេសនិស្សិតដែលកំពុងសិក្សានៅសាកលវិទ្យាល័យមិនសូវមានបទពិសោធច្រើនក្នុងការដឹកនាំនោះទេ។ ភាពភ័យខ្លាច ការខឹងក្រេវក្រោធ ការធ្វេសប្រហែស និងភាពទន់ជ្រាយជាដើម គឺជាឧបសគ្គចំពោះមនុស្សគ្រប់រូបដែលចង់ដឹកនាំក្រុមណាមួយ។
ការចំណាយពេលវេលាដើម្បីស្តាប់បេះដូងខ្លួនឯងអាចធ្វើឱ្យយើងម្នាក់ៗរកឃើញនូវវិធីដើម្បីដោះស្រាយបញ្ហាដែលកើតមានឡើង ហើយពង្រឹងសមត្ថភាពដើម្បីក្លាយជាអ្នកដឹកនាំល្អម្នាក់៕
