ការទំនាក់ទំនងជារឿងសំខាន់សម្រាប់មនុស្ស ជាពិសេសគឺអ្នករកស៊ីដែលត្រូវការជាចាំបាច់ដើម្បីផ្តល់ឱ្យ និងទាញយកផលប្រយោជន៍ពីដៃគូអាជីវកម្ម និងអតិថិជនរបស់ខ្លួន។
ទោះជាការទំនាក់ទំនងមានសារៈសំខាន់យ៉ាងណាក៏ដោយ តែជាទូទៅវាក៏ផ្តល់នូវផលអវិជ្ជមានមកកាន់មនុស្សផងដែរ ប្រសិនបើមនុស្សម្នាក់មានទំនាក់ទំនងជាមួយនឹងមនុស្សប្រភេទផ្សេងគ្នាច្រើនឡើងៗ ព្រោះដើម្បីរក្សាទំនាក់ទំនងយើងត្រូវកាត់បន្ថយពេលវេលាផ្ទាល់ខ្លួន និងគ្រួសារ ដែលវាអាចធ្វើឱ្យជីវិតមានបញ្ហាបាន។
លោក សោម សម្បត្តិ នាយកប្រតិបត្តិនៃសហគ្រាសផលិតថ្នាំពណ៌ជាតិ Cam-Paint បានលើកឡើងថា នៅពេលដែលទំនាក់ទំនងជាមួយមនុស្សកាន់តែកើនឡើង វានឹងក្លាយជាជំនន់នៃទំនាក់ទំនង ហើយរឿងនេះអាចប៉ះពាល់ដល់ជីវិតប្រចាំថ្ងៃរបស់យើង។ ហេតុនេះយើងត្រូវមានវិធានការដើម្បីដោះស្រាយវា។ កត្តាសំខាន់ដែលត្រូវធ្វើគឺ ត្រូវបែងចែកប្រភេទនៃការទំនាក់ទំនងឱ្យបានច្បាស់លាស់ ហើយកំណត់ពីជំពូកមនុស្សដែលត្រូវទាក់ទងដោយផ្ទាល់ និងមនុស្សដែលត្រូវទាក់ទងដោយប្រយោល។
លោក សោម សម្បត្តិ បាននិយាយថា៖ «មនុស្សម្នាក់អាចមានទាក់ទងមនុស្សច្រើនបាន តែអាចស្និទ្ធជាមួយមនុស្សក្នុងចំនួនតិចតួចល្មមបានហើយ ព្រោះជីវិតយើងគ្មានចន្លោះសម្រាប់ដាក់មនុស្សច្រើនពេកនោះទេ»។
បើតាមលោក សោម សម្បត្តិ អ្នកដែលពូកែទំនាក់ទំនង ហើយមិនមានបញ្ហាដល់ជីវិតត្រូវចេះមើលកាលៈទេសៈ ហើយក៏ជាអ្នកដែលមានភាពប៉ិនប្រសប់។ យើងត្រូវមើលឱ្យឃើញពីពពួកមនុស្សប្រមាណ 20% ដែលមានឥទ្ធិពលដល់អាជីវកម្ម 80% ហើយធ្វើការទាក់ទងដោយផ្ទាល់ ព្រោះគាត់ជាផ្នែកសំខាន់មិនអាចខ្វះបាន តែចំពោះមនុស្ស 80% ទៀតដែលមានឥទ្ធិពលសម្រាប់អាជីវកម្មត្រឹមតែ 20% វិញ គឺយើងអាចធ្វើការទំនាក់ទំនងដោយប្រយោល ដូចជាការទុកតួនាទីឱ្យអ្នកគ្រប់គ្រងបន្តបន្ទាប់ចាត់ចែងដោយយកចិត្តទុកដាក់ទៅតាមការទទួលខុសត្រូវរៀងៗខ្លួន ព្រោះមនុស្សម្នាក់មិនអាចមើលបុគ្គលិកគ្រប់គ្នាដល់ទៅរាប់រយ រាប់ពាន់អ្នកនោះទេ៕
