រដ្ឋាភិបាលរបស់លោក ចូ បៃដិន កំពុងតែពិចារណាអំពីការផ្អាកការយកពន្ធលើប្រេងសាំងនៅទូទាំងប្រទេស ដើម្បីបញ្ចុះតម្លៃឥន្ធនៈ ប៉ុន្តែ ក្រុមអ្នកជំនាញយល់ថា ប្រការនេះនឹងមានប្រសិទ្ធភាពតិចតួចណាស់។
ក្រោយពីបានប្រឹងប្រែងបញ្ចេញប្រេង ១ លានធុង/ថ្ងៃ ពីឃ្លាំងយុទ្ធសាស្ត្រ ប៉ុន្តែមិនមានប្រសិទ្ធភាពក្នុងការរក្សាតម្លៃប្រេងសាំង ប្រធានាធិបតី បៃដិន កំពុងពិចារណាលើវិធីសាស្ត្រផ្សេងមួយទៀត នោះគឺ ការផ្អាកយកពន្ធលើប្រេងសាំងនៅទូទាំងប្រទេស។
យោងតាមសមាគមរថយន្តអាម៉េរិក (AAA) សាំងមួយ gallon កំពុងមានតម្លៃជាមធ្យម ៤.៩៧ ដុល្លារ ទាបជាងបន្តិចធៀបនឹងដើមខែនេះ គ្រាដែលតម្លៃសាំងមធ្យមនៅទូទាំងប្រទេស បានឡើងលើសពី ៥ ដុល្លារជាលើកដំបូង។
សហរដ្ឋអាម៉េរិក មិនបានកំណត់តម្លៃប្រេងសាំងជាទូទៅនោះទេ តែវាអាស្រ័យលើរដ្ឋនីម័យៗ ដោយយោងទៅតាមគោលនយោបាយឧបត្ថម្ភ និងអត្រាពន្ធក្នុងតំបន់ទាំងនោះ។
កាលពីខែកុម្ភៈ តំណាងរាស្ត្ររបស់បក្សប្រជាធិបតេយ្យ Maggie Hassan និង Mark Kelly បានធ្វើសេចក្ដីព្រាងច្បាប់មួយដែលស្នើឱ្យផ្អាកការយកពន្ធលើប្រេងសាំងទូទាំងប្រទេស រហូតដល់ដំណាច់ឆ្នាំនេះ។
គំនិតនេះកំពុងទទួលបានចំណាប់អារម្មណ៍ពីរដ្ឋាភិបាលលោក បៃដិន។ រដ្ឋមន្ត្រីក្រសួងហិរញ្ញវត្ថុអាម៉េរិក Janet Yellen កាលពីចុងសប្ដាហ៍កន្លង បានឱ្យដឹងថា នេះគឺជា «ដំណោះស្រាយប្រាកដប្រជាដែលកំពុងត្រូវបានពិចារណា»។
ប្រធានាធិបតី ចូ បៃដិន កាលពីថ្ងៃទី ២០ មិថុនា ក៏បានទទួលស្គាល់ថា លោកកំពុងពិចារណាលើវិធានការផ្អាកការយកពន្ធលើប្រេងសាំងនេះដែរ។
បើសិនជាការផ្អាកការយកពន្ធលើប្រេងសាំងត្រូវបានរដ្ឋាភិបាលអាម៉េរិក អនុវត្តមែន នោះវានឹងក្លាយជាអ្នកដើរតាមក្រោយរដ្ឋមួយចំនួន ដូចជា Connecticut, Maryland និង Georgia ជាទីដែលបាន និងកំពុងផ្អាកការយកពន្ធលើប្រេងសាំងជាបណ្ដោះអាសន្ន។
រដ្ឋមួយចំនួនផ្សេងទៀត ដូចជា California ជាដើម ថែមទាំងពិចារណាលើការផ្ដល់ជំនួយផ្ទាល់ដល់ប្រជាជនដើម្បីជួយឱ្យពួកគេអាចប៉ះប៉ូវការចំណាយទៅលើប្រេងសាំងដែលកំពុងឡើងថ្លៃខ្ពស់នាបច្ចុប្បន្ន។
ទោះជាយ៉ាងណាក៏ដោយ របាយការណ៍មួយចំនួន ក្នុងនោះមាន អង្គការ Penn Wharton Budget Model (PWBM) ជាដើម បានឱ្យដឹងថា ផលប្រយោជន៍ដែលប្រជាជនទទួលបានពីការផ្អាកការយកពន្ធលើប្រេងសាំង គឺមានកម្រិតទាប។
សាស្ត្រាចារ្យ Kent Smetters មកពីសាលា Wharton នៃសាកលវិទ្យាល័យ Pennsylvania គណនាឃើញថា ពលរដ្ឋម្នាក់នឹងសំច័យប្រាក់បានប្រហែលតែ ៥០ ដុល្លារប៉ុណ្ណោះ បើសិនគោលនយោបាយខាងលើត្រូវបានអនុវត្តចាប់ពីខែមីនា ដល់ដំណាច់ឆ្នាំនេះ។
ចំណែកប្រភពចំណូលរបស់រដ្ឋ ដែលបានមកពីការយកពន្ធលើប្រេងសាំង នឹងត្រូវថយចុះប្រហែល ២០ ពាន់លានដុល្លារ បើសិនមិនយកពន្ធលើប្រេងសាំងរហូតដល់ចុងឆ្នាំ នេះបើតាមរបាយការណ៍របស់ PWBM៕
