ឆ្នាំ ២០២១ យានយន្តជាង ២២ លានគ្រឿង ត្រូវបានសមត្ថកិច្ចធ្វើការត្រួតពិនិត្យ ក្នុងនោះមានជាង ២.២ សែនគ្រឿងត្រូវបានពិនិត្យជាប្រាក់សរុបជាង ១៩ ពាន់លានរៀល (ជិត ៥ លានដុល្លារអាម៉េរិក)។
តួលេខខាងលើនេះគឺយោងទៅតាមការបញ្ជាក់របស់ អគ្គលេខាធិការរង នៃអគ្គលេខាធិការដ្ឋានគណៈកម្មាធិការជាតិសុវត្ថិភាពចរាចរណ៍ផ្លូវគោក និងជា រដ្ឋលេខាធិការក្រសួងមហាផ្ទៃ ឯកឧត្តម នាយឧត្តមសេនីយ៍ យុន ឈុន្នី។ លោកថ្លែងថា ក្នុងចំណោមយានយន្តដែលល្មើសនឹងច្បាប់ចរាចរណ៍ផ្លូវគោកខាងលើ មានម៉ូតូជាង ១.៦ សែនគ្រឿង (៧៥%) និងរថយន្តជាង ៥.៤ ម៉ឺនគ្រឿង (២៥%)។
ព័ត៌មានខាងលើត្រូវបានលើកឡើងនៅក្នុងពិធីសន្និបាតបូកសរុប ការងារសុវត្ថិភាពចរាចរណ៍ផ្លូវគោក នាថ្ងៃទី ៩ ខែកុម្ភៈ ២០២១ របស់ អគ្គលេខាធិការដ្ឋានគណៈកម្មាធិការជាតិសុវត្ថិភាពចរាចរណ៍ផ្លូវគោក។
ចំណែក រដ្ឋមន្ត្រីក្រសួងសាធារណការ និងដឹកជញ្ជូន និងជាអនុប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក ឯកឧត្តមទេសរដ្ឋមន្ត្រី ស៊ុន ចាន់ថុល បានឱ្យដឹងថា សម្រាប់ឆ្នាំ ២០២២ សមត្ថកិច្ចនគរបាល នឹងធ្វើការការពិន័យជាប្រាក់ និងការដកពិន្ទុលើបណ្ណបើកបរ ចំពោះយានយន្តដែលនៅបន្តប្រពឹត្តល្មើសនឹងច្បាប់ចរាចរណ៍។
បច្ចុប្បន្ន ក្រសួងសាធារណការ បានទិញឧបករណ៍ស្កេនដកពិន្ទុលើបណ្ណបើកបរ ចំនួន ៣០០ គ្រឿងរួចហើយ និងគ្រោងទិញបន្ថែម ២៥០ គ្រឿងទៀត សម្រាប់មន្ត្រីនគរបាលចរាចរណ៍បំពេញការងារ។ ស្ថាប័នមានសមត្ថកិច្ចកំពុងសាកល្បងប្រើប្រាស់ឧបករណ៍ទាំងនេះ មានដូចជា ការស្កេនលើបទល្មើសមិនពាក់ខ្សែក្រវាត់សុវត្ថិភាព ការបើកបរលើសល្បឿនកំណត់ ការបើកបរក្នុងស្ថានភាពស្រវឹង ការផ្ទុកមនុស្សលើសការកំណត់ និងការមិនគោរពភ្លើងសញ្ញាចរាចរណ៍។ល។
ឯកឧត្តមទេសរដ្ឋមន្ត្រី ស៊ុន ចាន់ថុល
យោងតាមច្បាប់ស្តីពីចរាចរណ៍ផ្លូវគោក បណ្ណបើកបរដែលមានច្បាស់ប្រព្រឹត្តលើ្មសនឹងច្បាប់ចរាចរណ៍ នឹងត្រូវបានកាត់បន្ថយពន្ទុពី ១ ដល់ ៦ ពិន្ទុ ទៅតាមស្ថានភាពជាក់ស្ដែង។ បណ្ណបើកបរនីមួយៗ ត្រូវបានកំណត់ពិន្ទុសរុប ត្រឹម ១២ ពិន្ទុ។ ក្នុងករណីអស់ពិន្ទុ បណ្ណបើកបរនោះត្រូវបានចាត់ទុកជាមោឃៈ។
ករណីបណ្ណបើកបរអស់ពិន្ទុ ហើយម្ចាស់បណ្ណត្រូវការបណ្ណបើកបរថ្មី នោះពួកគេនឹងត្រូវរៀន និងប្រឡងយកបណ្ណបើកបរសាជាថ្មីឡើងវិញ ក្នុងរយៈពេលយ៉ាងតិច ៦ ខែ គិតចាប់តាំងពីថ្ងៃដែលបណ្ណបើកបរនោះត្រូវអស់ពិន្ទុ៕
