(សហរដ្ឋអាម៉េរិក)-ព្រះខ័នរាជ្យរបស់អធិរាជ ណាប៉ូឡេអុង ដែលត្រូវបានប្រើប្រាស់ក្នុងរដ្ឋប្រហារឆ្នាំ ១៧៩៩ រួមនឹងកាំភ្លើងចំនួន ៥ ដើម របស់ស្ដេចអង្គនេះ ត្រូវបានទិញក្នុងតម្លៃជាង ២.៨ លានដុល្លារអាម៉េរិក នៅក្នុងការលក់ដេញថ្លៃ។
Kevin Hogan ប្រធានក្រុមហ៊ុនរៀបចំការលក់ដេញថ្លៃ Rock Island ដែលមានទីស្នាក់ការកណ្ដាលនៅក្នុងរដ្ឋ Illinois សហរដ្ឋអាម៉េរិក កាលពីថ្ងៃទី ៧ ធ្នូ បានឱ្យដឹងថា អាវុធរបស់អធិរាជបារាំង ណាប៉ូឡេអុង បូណាប៉ារត៍ (Napoleon Bonaparte) ត្រូវបានដាក់លក់តាមរយៈប្រព័ន្ធទូរស័ព្ទកាលពីថ្ងៃទី ៣ ធ្នូ ២០២១។
ដោយចំណាយប្រាក់ ២.៨៧ លានដុល្លារ «អ្នកទិញកំពុងតែក្លាយជាម្ចាស់កម្មសិទ្ធិនៃផ្នែកមួយដ៏មានតម្លៃរបស់ប្រវត្តិសាស្ត្រ» Kevin Hogan បានប្រាប់ AFP ដូច្នេះ។ ព្រះខ័នរាជ្យ និងកាំភ្លើងចំនួន ៥ ដើម ដំបូងឡើយ ត្រូវបានកំណត់តម្លៃចាប់ពី ១.៥ ដល់ ៣.៥ លានដុល្លារ។
ព្រះខ័ននេះគឺជាអាវុធលេចធ្លោបំផុតនៅក្នុងចំណោមអាវុធកំពូលៗដែលត្រូវបានច្នៃឡើងដោយ Nocolas-Noel Boutet ដែលជាប្រធានរោងចក្រជាតិផលិតអាវុធ នៅតំបន់ Versailles។ អធិរាជ ណាប៉ូឡេអុង បានប្រើប្រាស់ព្រះខ័ននេះនៅពេលធ្វើរដ្ឋប្រហារកាលពីខែវិច្ឆិកា ឆ្នាំ ១៧៩៩ ដែលបានផ្ដួលរំលំក្រុមប្រឹក្សានីតិប្បញ្ញត្តិ និងបង្កើតរដ្ឋាភិបាលថ្មី ជួយឱ្យលោកក្លាយជាបុគ្គលដែលមានអំណាចខ្លាំងបំផុតនៅ ប្រទេសបារាំង។ ៥ ឆ្នាំ ក្រោយរដ្ឋប្រហារ ណាប៉ូឡេអុង បានឡើងគ្រងរាជសម្បត្តិនៅ ប្រទេសបារាំង។
បន្ទាប់ពីបានឡើងគ្រងរាជសម្បត្តិ អធិរាជ ណាប៉ូឡេអុង ក៏បានប្រទានព្រះខ័ននេះដល់មន្ត្រីមួយរូបឈ្មោះ Jean-Andoche Junot ប៉ុន្តែ ក្រោយមក ភរិយារបស់មន្ត្រីម្នាក់នេះ បានលក់ចោល ដើម្បីយកប្រាក់មកដោះស្រាយបំណុល។ យោងតាមក្រុមហ៊ុន Rock Island សារមន្ទីរមួយបានទិញព្រះខ័នរាជ្យនេះ ហើយម្ចាស់ចុងក្រោយបំផុតរបស់អាវុធមួយនេះគឺជាជនជាតិអាម៉េរិក ដែលទើបតែបានទទួលមរណភាពកាលពីពេលថ្មីៗនេះ។
ណាប៉ូឡេអុង កើតឆ្នាំ ១៧៦៩ និងបានសោយទិវង្គតក្នុងឆ្នាំ ១៨២១។ អធិរាជអង្គនេះ ធ្លាប់បានកសាងអាណាចក្រដ៏ធំទូលាយដែលគ្របដណ្ដប់ស្ទើរតែពេញមួយទ្វីបអឺរ៉ុប។ ណាប៉ូឡេអុង ត្រូវបានចាត់ទុកថាជាមេដឹកនាំកងទ័ពមួយរូបដែលអស្ចារ្យបំផុតក្នុងប្រវត្តិសាស្ត្រពិភពលោក៕
