សម្ដេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា បានស្នើឱ្យភាគីចិនជួយសហការបណ្ដុះបណ្ដាលធនធានមនុស្ស និងសហការជាមួយនឹងរាជបណ្ឌិត្យសភាកម្ពុជា ក្រសួងអប់រំ យុវជន និងកីឡា ក៏ដូចជាក្រសួងការងារ និងបណ្ដុះបណ្ដាលវិជ្ជាជីវៈកម្ពុជាផងដែរ ដើម្បីជំរុញវិស័យនេះឱ្យកាន់តែរីកចម្រើនទៅមុខ។ នេះបើតាមសេចក្ដីរាយការណ៍ព័ត៌មានស្ដីពីជំនួបរវាងសម្ដេចនាយករដ្ឋមន្ត្រី ហ៊ុន សែន ជាមួយលោក វ៉ាង កាង (Wang Gang) អនុប្រធានសភាប្រឹក្សាប្រជាជនចិន និងជាអតីតរដ្ឋមន្ត្រីក្រសួងវិទ្យាសាស្ត្រ និងបច្ចេកវិទ្យាចិន។
សម្ដេច ហ៊ុន សែន បានមានប្រសាសន៍ថា៖“កិច្ចសហប្រតិបត្តិការលើវិស័យវិទ្យាសាស្ត្រ និងបច្ចេកវិទ្យា គឺចាំបាច់ត្រូវការធនធានមនុស្ស ការស្រាវជ្រាវ និងជំរុញការអភិវឌ្ឍក្នុងយុគសម័យឌីជីថល ឬក្នុងសម័យបដិវត្តន៍ឧស្សាហកម្មទី4នេះ ដែលចាំបាច់ណាស់ត្រូវមានការសិក្សាស្រាវជ្រាវ និងការប្រើប្រាស់បច្ចេកវិទ្យាព័ត៌មានវិទ្យា និងវិទ្យាសាស្ត្រដទៃទៀត”។
សម្តេចបន្តថា សម្រាប់ប្រទេសកម្ពុជា ក៏បានប្រើប្រាស់បច្ចេកវិទ្យា និងវិទ្យាសាស្ត្រនេះផងដែរ ក្នុងន័យនេះ កម្ពុជាកំពុងតែតម្រង់ទិសរបស់ខ្លួនដើម្បីធ្វើយ៉ាងណាឱ្យសមស្របទៅតាមចរន្តនៃយុគសម័យឌីជីថល និងបដិវត្តន៍ឧស្សាហកម្មទី4 ដែលត្រូវការបណ្ដុះបណ្ដាលធនធានមនុស្សឱ្យបានកាន់តែច្រើនលើវិស័យនេះ។ ប៉ុន្តែទោះជាយ៉ាងណាក៏នៅតែត្រូវការការអភិវឌ្ឍលើវិស័យនេះថែមទៀតដែរ។
ក្នុងជំនួបនេះ លោក Wang Gang បានជម្រាបជូនសម្តេចថា នេះជាលើកទី1 ហើយដែលលោកបានមកកាន់ប្រទេសកម្ពុជា ហើយបានឃើញការអភិវឌ្ឍរបស់កម្ពុជា។ ដំណើរទស្សនកិច្ចរបស់លោកមកពេលនេះ គឺមានគោលបំណងសំខាន់2៖ ទី1 គឺដើម្បីចូលជួបសម្តែងការគួរសមចំពោះសម្ដេចតេជោនាយករដ្ឋមន្ត្រី និងទី2 គឺដើម្បីពង្រឹងនូវកិច្ចសហប្រតិបត្តិការរវាងប្រទេសទាំងពីរ ជាពិសេសលើវិស័យវិទ្យាសាស្ត្រ និងបច្ចេកវិទ្យា។ ក្នុងឱកាសនោះ លោក វ៉ាង កាង បានគោរពស្នើសុំទស្សនរបស់សម្ដេចតេជោលើកិច្ចសហប្រតិបត្តិការលើវិស័យវិទ្យាសាស្ត្រ និងបច្ចេកវិទ្យានេះ។
សូមបញ្ជាក់ថា ការប្រើប្រាស់បច្ចេកវិទ្យាបានបង្កើតឱកាសសម្រាប់អាជីវកម្មថ្មីៗ និងការច្នៃប្រឌិតមួយចំនួន រួមទាំងសហគ្រិនភាពឱ្យមានការរីកចម្រើនជាបណ្តើរៗ ស្របនឹងនិន្នាការប្រទេសក្នុងតំបន់។ ក៏ប៉ុន្តែសមត្ថភាពចាប់យក និងសកម្មភាពនៃការប្រើប្រាស់បច្ចេកវិទ្យាឌីជីថលនេះនៅមានកម្រិតទាបនៅឡើយ មិនថានៅក្នុងវិស័យសាធារណៈ ឬនៅក្នុងវិស័យឯកជននោះទេ។
ទន្ទឹមនឹងនេះការទទួលយកបច្ចេកវិទ្យាទូរស័ព្ទចល័តជំនាន់ក្រោយមានភាពយឺតយ៉ាវ ហើយការទទួលយកសេវា4Gវិញ កាន់តែមានអត្រាទាបថែមទៀត។ អត្រានៃការប្រើប្រាស់សេវាអុីនធើណិតអចល័តដែលអាចមានសមត្ថភាពបញ្ជូនទិន្នន័យធំៗវិញ នៅមានកម្រិតទាបនៅឡើយ។
ម្យ៉ាងវិញទៀត ការវិនិយោគដោយវិស័យឯកជនក្នុងបច្ចេកវិទ្យាឌីជីថលនេះក៏មានការយឺតយ៉ាវផងដែរ ដែលឆ្លុះបញ្ចាំងពីសម្ពាធនៃការប្រកួតប្រជែង និងបរិយាកាសវិនិយោគស្របពេលដែលការទទួលយកបច្ចេកវិទ្យាឌីជីថលដោយមជ្ឈដ្ឋានធនាគារក៏ហាក់ដូចជាមានកម្រិតទាបនៅឡើយដែរ។
លើសពីនេះទៀត ការយល់ដឹងអំពីបច្ចេកវិទ្យាឌីជីថលនៅក្នុងចំណោមប្រជាជន ជាពិសេសនៅតាមទីជនបទនៅមានកម្រិតទាបនៅឡើយ ក្នុងខណៈដែលការអប់រំផ្នែកនេះនៅមានបរិមាណតិចតួច។ ក្នុងន័យនេះ ការយកចិត្តទុកដាក់គួរតែផ្តល់អាទិភាពលើរៀបចំ និងការវិនិយោគបន្ថែមលើហេដ្ឋារចនាសម័ន្ធឌីជីថល ព្រមទាំងការរៀបចំ និងកែលម្អក្របខ័ណ្ឌច្បាប់ចាំបាច់នានា រួមទាំងការលើកទឹកចិត្តផ្នែកសារពើពន្ធសម្រាប់គាំទ្រដល់សេដ្ឋកិច្ចឌីជីថលនៅកម្ពុជា។
ឯកឧត្តម អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុធ្លាប់បានថ្លែងឱ្យដឹងកាលពីពេលកន្លងមកថា ដើម្បីផ្លាស់ប្ដូរសេដ្ឋកិច្ចបែបបច្ចេកវិទ្យាឱ្យទាន់ពេលវេលា ត្រូវផ្អែកលើកត្តាចំនួន4 ដូចជាទី1 ភាពអំណោយផលផ្នែកប្រជាសាស្ត្រ ដោយសារវត្តមាននៃចំនួនយុវជនដ៏ច្រើនដែលមានការអប់រំខ្ពស់ និងងាយទទួលយកនូវបច្ចេកវិទ្យាឌីជីថលយ៉ាងឆាប់រហ័ស។ ទី2 ការកើនឡើងយ៉ាងឆាប់រហ័សនៃការប្រើប្រាស់ទូរស័ព្ទដៃ និងឧបករណ៍វៃឆ្លាត (Smart Device)។ ទី3 ការរីកចម្រើនយ៉ាងរហ័សលើផ្នែកបច្ចេកវិទ្យាតាមរយៈលំហូរវិនិយោគផ្ទាល់ពីបរទេស និងទី4 ឥទ្ធិពលដ៏លឿននៃឌីជីថលភាវូនីយកម្មដែលកំពុងមាននៅក្នុងគ្រប់វិស័យសំខាន់នៃសេដ្ឋកិច្ចជាតិ៕
