ពិព័រណ៍ទេសចរណ៍ជាតិដ៏ធំ ជាលើកដំបូងដែលរៀបចំដោយក្រសួងទេសចរណ៍ និងសមាគមទីភ្នាក់ងារទេសចរណ៍កម្ពុជា (CATA =The Cambodia Association of Travel Agents)ដើម្បីផ្សព្វផ្សាយពីផលិតផលទេសចរណ៍ និងចូលរួមជំរុញចលនាទេសចរណ៍ក្នុងស្រុកដែលកំពុងមានការកើនឡើងជារៀងរាល់ឆ្នាំត្រូវបានបញ្ចប់កាលពីថ្ងៃទី22 ខែកក្កដា ឆ្នាំ2018 ម្សិលមិញ។
ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បាននិយាយថា វិស័យទេសចរណ៍កម្ពុជា ដែលជាទេសចរណ៍វប្បធម៌ និងធម្មជាតិ ត្រូវបានរាជរដ្ឋាភិបាលចាត់ទុកជា «មាសបៃតង»។ វិស័យនេះបាននឹងកំពុងបោះជំហានទៅមុខ និងរីកចម្រើនជាលំដាប់ ដោយរក្សាបាននូវកំណើនជារៀងរាល់ឆ្នាំ បានរួមចំណែកប្រមាណ12% នៃផលិតផលក្នុងស្រុកសរុប និងផ្តល់ការងារដោយផ្ទាល់ប្រមាណជាង 62ម៉ឺននាក់ និងដោយប្រយោលជាច្រើនម៉ឺននាក់ទៀត។
លោករដ្ឋមន្ត្រីបន្តថា សម្រាប់ទេសចរណ៍ក្នុងស្រុក កំណើនភ្ញៀវមានការកើនឡើងជាលំដាប់ពីមួយឆ្នាំទៅមួយឆ្នាំ (6% ជាមធ្យម)។ ជាក់ស្តែង នៅឆ្នាំ2015 ទេសចរក្នុងស្រុកមានចំនួនជាង 9.6លាននាក់ កើនដល់ជាង 10លាននាក់នៅឆ្នាំ2016 និងជិត 11លាននាក់នៅឆ្នាំ2017 ហើយជាចក្ខុវិស័យក្រសួងទេសចរណ៍រំពឹងថា នឹងមានទេសចរប្រមាណ 19លាននាក់នៅឆ្នាំ2025។
ចំណែកភ្ញៀវទេសចរអន្តរជាតិមាន 5.6លាននាក់នៅឆ្នាំ2017 កើនឡើង11.8%។ ហើយក្នុងរយៈពេល5ខែ ដើមឆ្នាំ2018នេះ កម្ពុជាទទួលបានទេសចរអន្តរជាតិប្រមាណ 2,6លាននាក់។ តាមការព្យាករ កម្ពុជានឹងទទួលបានទេសចរអន្តរជាតិប្រមាណ 6.2លាននាក់នៅឆ្នាំ2018នេះ 7លាននាក់នៅឆ្នាំ2020 និង15លាននាក់នៅឆ្នាំ2030។
ឯកឧត្តមរដ្ឋមន្ត្រីក្រសួងទេសចរណ៍បានបញ្ជាក់ថា ពិព័រណ៍នេះមានតួនាទីសំខាន់ក្នុងការជួយរដ្ឋាភិបាលឱ្យសម្រេចបានទិសដៅទេសចរណ៍របស់ខ្លួន។ «ខ្ញុំជឿថា តាមរយៈពិព័រណ៍នេះជាលើកដំបូងនៅកម្ពុជាយើងនឹងខិតកាន់តែកៀកដល់គោលដៅរបស់យើងក្នុងចំណោមទេសចរក្នុងស្រុកចំនួន 11 លាននាក់ត្រឹមឆ្នាំ2025»។
លោកស្រី ឆាយ ស៊ីវលីន ប្រធានសមាគម CATA បានថ្លែងថា៖ «ការតាំងពិព័រណ៍នេះបានលើកកម្ពស់តំបន់ទេសចរណ៍កម្ពុជាជាមួយនឹងការធ្វើដំណើរក្នុងស្រុក» ។ ប្រតិបត្តិករទេសចរណ៍ ភោជនីយដ្ឋាន និងអ្នកផលិតផលិតផលក្នុងស្រុក ក៏បានបង្ហាញពីសេវាកម្ម និងផលិតផលរបស់ពួកគេក្នុងរយៈពេល 3ថ្ងៃ ហើយក៏បានអនុញ្ញាតឱ្យភ្ញៀវទេសចរទទួលបានការយល់ដឹងកាន់តែប្រសើរឡើងអំពីគោលដៅទេសចរណ៍ក្នុងស្រុកផលិតផល និងម្ហូបអាហារ ដែលក្នុងពិព័រណ៍នេះមានស្តង់បង្ហាញផលិតផលទេសចរណ៍ប្រមាណជា 150ស្តង់។
លោកស្រីបន្តថា៖ «ប្រជាជនកម្ពុជាកាន់តែច្រើនកំពុងជ្រើសរើសធ្វើដំណើរទេសចរណ៍ក្នុងប្រទេស ពិសេសក្នុងអំឡុងពេលថ្ងៃឈប់សម្រាករយៈពេលយូរ។ ការកែលម្អសេវាកម្ម និងផលិតផលទេសចរណ៍ត្រូវតែជាអាទិភាពសម្រាប់វិស័យសាធារណៈ និងឯកជន។ យើងចាំបាច់ត្រូវបន្តធ្វើឱ្យគោលដៅទេសចរណ៍របស់យើងកាន់តែមានភាពទាក់ទាញសម្រាប់ភ្ញៀវទេសចរក្នុងស្រុក និងបរទេស»៕
