វិស័យទេសចរណ៍ត្រូវបានគេស្គាល់ថាជាឧស្សាហកម្មគ្មានផ្សែងដែលអាចនាំចំណូលជាច្រើនដល់ប្រទេសជាតិ ហើយថែមទាំងធ្វើឱ្យសេដ្ឋកិច្ចការរស់នៅរបស់ប្រជាជនកាន់តែមានលក្ខណៈរស់រវើកថែមទៀតផង។
ឯកឧត្តម ថោង ខុន រដ្ឋមន្ត្រីក្រសួងទេសចរណ៍បានលើកឡើងថា វិស័យទេសចរណ៍នៅកម្ពុជាត្រូវការកម្លាំងការងារប្រមាណ 1.2លាននាក់នៅឆ្នាំ 2020 និងប្រមាណជា 1.7លាននាក់នៅឆ្នាំ2030 ដើម្បីឆ្លើយតបនឹងចំនួនភ្ញៀវទេសចរជាតិ និងអន្តរជាតិរាប់លាននាក់ដែលនឹងមកកម្សាន្ត និងទស្សនាកម្ពុជា។
ឯកឧត្តមក៏បានគាំទ្រឱ្យមានការលើកកម្ពស់ការបណ្តុះបណ្តាលជំនាញលើវិស័យទេសចរណ៍ និងបដិសណ្ឋារកិច្ចឱ្យកាន់តែខ្លាំងឡើងពីគ្រប់សមាសភាពសង្គមដើម្បីអភិវឌ្ឍធនធានមនុស្សក្នុងវិស័យទេសចរណ៍ដែលកំពុងរីកចម្រើនជារៀងរាល់ឆ្នាំ។
ឯកឧត្តម ថោង ខុន បានមានប្រសាសន៍ថា៖ “ឆ្នាំ2020 ក្រសួងទេសចរណ៍ និងភាគីពាក់ព័ន្ធនឹងសហការគ្នាចូលរួមបង្កើតការងារ និងជំនាញដល់យុវជនកម្ពុជាប្រមាណ 1លាននាក់ ហើយជំរុញឱ្យមានអ្នកជំនាញយ៉ាងតិច 50% មានវិញ្ញាបនបត្រ ឬសញ្ញាបត្របញ្ជាក់សមត្ថភាពស្របតាមស្តង់ដារជាតិ និងអាស៊ាន។
រដ្ឋមន្ត្រីក្រសួងទេសចរណ៍បានលើកឡើងផងដែរថា កត្តាសន្តិភាព សន្តិសុខ និងសុវត្ថិភាពសង្គមពេញផ្ទៃប្រទេសជាមូលដ្ឋានគ្រឹះក្នុងការអភិវឌ្ឍប្រទេសក្នុងនោះវិស័យទេសចរណ៍កម្ពុជាក៏បានចូលរួមចំណែកប្រមាណ13% នៃផលិតផលក្នុងស្រុកសរុប (GDP) និងមានការរីកចម្រើនយ៉ាងឆាប់រហ័សដោយនៅក្នុងឆ្នាំ2017កន្លងទៅ កម្ពុជាទទួលបានទេសចរអន្តរជាតិប្រមាណ 5.6លាននាក់ក្នុងកំណើន11.8%។
ពាក់ព័ន្ធនឹងបញ្ហានេះលោក ជួប រតនា ប្រធានផ្នែកស្តង់ដារ និងវាយតម្លៃគ្រូបង្គោលអាស៊ានបានលើកឡើងថា ទេសចរណ៍ពិតជាមានសារៈសំខាន់ណាស់សម្រាប់សង្គមកម្ពុជា ព្រោះថា ប្រសិនបើយើងគិតពីស្ថិតិទេសចរណ៍ពិភពលោក ក្នុងតំបន់ និងកម្ពុជា យើងឃើញថា នៅឆ្នាំ2017 ទេសចរអន្តរជាតិមានចំនួន 1,323លាននាក់ កើនឡើង 7% ពីឆ្នាំ2016។ ទេសចរណ៍ជាផ្នែកយ៉ាងសំខាន់មួយផងដែរក្នុងការកាត់បន្ថយភាពអត់ការងារធ្វើនៅក្នុងប្រទេសព្រោះថាតាមរយៈវិស័យដ៏សំខាន់នេះ យើងអាចស្រូបទាញមនុស្សឱ្យធ្វើការងារបានច្រើនវិស័យ។
ជាស្ថានភាពជាក់ស្តែងនៅកម្ពុជា លោក រតនា បានបញ្ជាក់ថា យើងនៅមានបញ្ហាខ្វះខាតខ្លះលើបញ្ហាធនធានមនុស្ស ដូចជាទី1 យើងមានការខ្វះខាតអ្នកជំនាញ ទី2 យើងខ្វះខាតសាលាបណ្តុះបណ្តាលព្រោះសាលាបណ្តុះបណ្តាលរបស់យើងនៅមានចំនួនតិចតួចនៅឡើយ ហើយអ្នកធ្វើការងារនៅក្នុងផ្នែកសំខាន់ៗនៃវិស័យទេសចរណ៍មួយចំនួនមិនមានសញ្ញាបត្រជំនាញ ឬមកពីជំនាញផ្សេងដែលមិនមែនទេសចរណ៍។
លោក រតនា បាននិយាយថា៖ “ជាដំណោះស្រាយក្រសួងទេសចរណ៍ បានសហការបង្កើតសាលាជាតិទេសចរណ៍ចំនួន 2បន្ថែមទៀតនៅចុងឆ្នាំ2019ព្រមទាំងធ្វើការជំរុញឱ្យមានកម្មវិធីបណ្តុះបណ្តាលជំនាញផ្ទាល់នៅក្នុងស្ថាប័នដែលពួកគាត់កំពុងធ្វើការងារនោះទៀតផង។ ការធ្វើបែបនេះ នឹងធ្វើឱ្យយើងអាចបង្កើតជំនាញគ្រូបង្គោលដើម្បីបណ្តុះបណ្តាលបុគ្គលិកបន្តឱ្យកាន់តែមានសមត្ថភាពឡើង។
លោក ជួប រតនា បានបញ្ជាក់ថា អ្នកធ្វើការងារក្នុងវិស័យទេសចរណ៍ គួរតែមានការគិតគូរឱ្យបានច្បាស់លាស់ថា ការជ្រើសរើសយកជំនាញនេះ គឺមានវិថីនៃអាជីពច្បាស់លាស់ ព្រោះថា អ្នកទាំងអស់គ្នាអាចចាប់ផ្តើមពីចំណុចតូចបំផុត តែប៉ុន្មានឆ្នាំក្រោយមក គឺអាចក្លាយជាអ្នកគ្រប់គ្រង និងអាចក្លាយជាម្ចាស់អាជីវកម្មទេសចរណ៍ផងក៏មាន។ ហេតុនេះ ចាប់ផ្តើមពីការជ្រើសរើសយកជំនាញខាងទេសចរណ៍ គឺមានន័យថា យើងកំពុងចាប់យកឱកាសយ៉ាងមានសក្តានុពលក្នុងការអភិវឌ្ឍ៕
