អន្តរជាតិ - La Reine Media

យន្តហោះចម្បាំងកូរ៉េខាងជើង ១២ គ្រឿង ចូលមកក្បែរព្រំដែនកូរ៉េខាងត្បូង

កងទ័ពកូរ៉េខាងត្បូង ប្រកាសថា យន្តហោះចម្បាំង ១២ គ្រឿងរបស់ កូរ៉េខាងជើង ធ្វើសមយុទ្ធនៅក្បែរព្រំដែនប្រទេសនេះ ធ្វើឱ្យ ទីក្រុងសេអ៊ូល បញ្ជូនយន្តហោះចម្បាំង ៣០ គ្រឿងទៅទប់ទល់។

ក្រុមប្រឹក្សានៃសេនាធិការដ្ឋានចម្រុះកូរ៉េខាងត្បូង ថ្ងៃនេះបានឱ្យដឹងថា យន្តហោះចម្បាំង ៨ គ្រឿង និងយន្តហោះទម្លាក់គ្រាប់បែក ៤ គ្រឿងរបស់ កូរ៉េខាងជើង ហោះហើរឆ្ពោះទៅកាន់ព្រំដែនភាគខាងជើង និងត្រូវបានគេជឿថា ធ្វើសមយុទ្ធអាកាសប្រឆាំងដី។

កូរ៉េខាងត្បូង បានបញ្ជូនយន្តហោះចម្បាំង ៣០ គ្រឿងចេញទៅទប់ទល់សកម្មភាពរបស់ កូរ៉េខាងជើង។ បច្ចុប្បន្ន ទីក្រុងព្យុងយ៉ាង មិនទាន់មានប្រតិកម្មអ្វីនៅឡើយ ទាក់ទិននឹងព័ត៌មាននេះ។

កូរ៉េខាងជើង ថ្មីៗនេះ បានធ្វើការបាញ់ប្លោងមីស៊ីលជាបន្តបន្ទាប់។ ប្រទេសនេះកាលពីព្រឹកមិញក៏បានបាញ់មីស៊ីលប្លោង ២ គ្រាប់ទៅកាន់សមុទ្រខាងកើត ដែលនេះក៏ជាការបាញ់មីស៊ីលលើកទី ៦ របស់ទីក្រុងព្យុងយ៉ាង ក្នុងរង្វង់ ១២ ថ្ងៃកន្លងមក។

សហរដ្ឋអាម៉េរិក និង កូរ៉េខាងត្បូង ប៉ុន្មានសប្ដាហ៍កន្លងទៅនេះ បានបង្កើនការធ្វើសមយុទ្ធរួមគ្នា ដើម្បីកំញើញ កូរ៉េខាងជើង។ ទីក្រុងព្យុងយ៉ាង បានថ្កោលទោសថា នេះគឺជា «ការបង្កភាពតានតឹងនៅ ឧបទ្វីបកូរ៉េ៕

October 6, 2022

អំពើបាញ់ប្រហារយ៉ាងឃោរឃៅនៅក្នុងមណ្ឌលកុមារថៃ សម្លាប់មនុស្សយ៉ាងតិច ៣៤ នាក់ស្លាប់!

ថ្ងៃទី ០៦ តុលា មានករណីផ្ទុះអាវុធដ៏ឃោរឃៅមួយបានកើតឡើងនៅក្នុងមណ្ឌលកុមារមួយកន្លែងស្ថិតក្នុងស្រុក Na Klang ខេត្ត Nong Bua Lamphu ភាគខាងជើងប្រទេសថៃ បណ្ដាលឱ្យមនុស្សយ៉ាងតិច ៣៤ នាក់ បាត់បង់ជីវិត។

លោក Archon Kraitong អ្នកនាំពាក្យរបស់ប៉ូលិសថៃ ឱ្យដឹងថា យ៉ាងហោចណាស់មានអ្នកស្លាប់ចំនួន ៣៤ នាក់ ក្នុងនោះមានក្មេងចំនួន ២២ នាក់ នៅក្នុងអំពើបាញ់ប្រហារខាងលើ នេះបើតាម Reuters។

រូបភាព និងវីដេអូនៅកន្លែងកើតហេតុបង្ហាញថា មានសាកសពកុមារជាច្រើននាក់នៅក្នុងថ្នាក់រៀន។ ខាងក្រៅមណ្ឌលកុមារវិញ ក្រុមអាណាព្យាបាល និងសិស្សកំពុងតែស្រែកទ្រហោយំ ខណៈដែលរថយន្តសង្គ្រោះបន្ទាន់កំពុងមកដល់។

យោងតាមក្រុមមន្ត្រីថៃ ជនសង្ស័យមានឈ្មោះថា Panya Khamrap អាយុ ៣៤ ឆ្នាំ។ ជននេះត្រូវបានបណ្ដេញចេញពីជួរកងកម្លាំងប៉ូលិសកាលពីឆ្នាំ ២០២១ ដោយសារប្រើប្រាស់គ្រឿងញៀន។ ករណីបាញ់ប្រហារនេះកើតឡើងនៅម៉ោង ១២ កន្លះថ្ងៃនេះ មួយថ្ងៃមុនពេលជនសង្ស័យត្រូវឡើងតុលាការ។

អ្នកនាំពាក្យរដ្ឋាភិបាលថៃ ឱ្យដឹងថា នាយករដ្ឋមន្ត្រីប្រទេសនេះបានស្នើឱ្យគ្រប់ស្ថាប័នសមត្ថកិច្ច ធ្វើសកម្មភាពបន្ទាន់ដើម្បីចាប់ខ្លួនជនដៃដល់ក្នុងរយៈពេលខ្លីបំផុត។

ក្រោយពីបង្កហេតុ ជននេះបានបាញ់សម្លាប់ប្រពន្ធ កូន និងរត់គេចខ្លួនតាមរថយន្ត Vigo 4 ដែលមានស្លាកលេខចុះឈ្មោះនៅ Bangkok។

ក៏ប៉ុន្តែ ក្រោយមកទៀត សមត្ថកិច្ចថៃ ក៏បានប្រកាសថា ជនសង្ស័យ Panya Khamrap បានសម្លាប់ខ្លួនបន្ទាប់ពីរត់គេចពីប៉ូលិស។

October 6, 2022

អ្នកអវកាសរុស្ស៊ី «ធ្វើដំណើរដោយសារ» យានអវកាស SpaceX ឡើងទៅកាន់ស្ថានីយ ISS

យានអវកាស Dragon Endurance ដឹកក្រុមអ្នកដំណើរ Crew-5 ហោះឡើងតាមរយៈកាំជ្រួច Falcon 9 ដែលបាញ់ចេញពីប្រព័ន្ធបាញ់បង្ហោះ 39A នៅមជ្ឈមណ្ឌលអវកាស Kennedy របស់ ណាសា កាលពីម៉ោង ២៣ ថ្ងៃទី ០៥ តុលា (ម៉ោងនៅ កម្ពុជា)។

យានអវកាសរបស់ SpaceX ចាប់ផ្ដើមជើងហោះហើរ ២៩ ម៉ោង ទៅកាន់ស្ថានីយអវកាសនៅលើគន្លងគោចរផែនដី។ អវកាសចរ ៤ នាក់ រួមមាន Nicole Mann និង Josh Cassada របស់ ណាសា, អ្នកអវកាសជនជាតិជប៉ុន Koichi Wakata និងអ្នកអវកាសរុស្ស៊ី Anna Kikina។

ជើងហោះហើរនេះបានធ្វើឱ្យ Mann ក្លាយជាស្ត្រីជនជាតិដើមភាគតិចរបស់ សហរដ្ឋអាម៉េរិក ដំបូងគេ ដែលហោះឡើងទៅកាន់ស្ថានីយអវកាសអន្តរជាតិ (ISS) និង Kikina ក្លាយជាអ្នកអវកាសរុស្ស៊ី ដំបូង ដែលហោះទៅកាន់ទីអវកាសតាមរយៈយានអវកាសឯកជនរបស់ សហរដ្ឋអាម៉េរិក។

ប្រហែល ៩.៥ នាទី បន្ទាប់ពីបានបាញ់បង្ហោះ កំណាត់ដំបូងរបស់រ៉ុក្កែត Falcon 9 បានចុះចតនៅលើ Just Read the Instructions ដែលជាស្រឡាងគ្មានមនុស្សបើកបររបស់ SpaceX ចតនៅលើមហាសមុទ្រអាត្លង់ទិច ក្នុងដែនទឹករបស់ រដ្ឋ Florida សហរដ្ឋអាម៉េរិក។ នេះគឺជាការចុះចតដំបូងរបស់កំណាត់រុញច្រាននេះ។

ក្រោយការហោះឡើងបាន ២ នាទី និង ៤០ វិនាទី ម៉ាស៊ីនរ៉ុក្កែតបានផ្អាកដំណើរការ។ កំណាត់លើរបស់ Falcon 9 បានផ្ដាច់ខ្លួនពីកំណាត់ដំបូង។ ២០ នាទីក្រោយមក យាន Dragon Endurance បានផ្ដាច់ខ្លួនពីកំណាត់លើដូចការគ្រោងទុក និងចាប់ផ្ដើមដេញតាម ISS។

តាមផែនការ យាន Dragon Endurance នឹងភ្ជាប់ខ្លួនទៅនឹង ISS មុនម៉ោង ៤ ព្រឹកថ្ងៃទី ០៧ តុលា។ ក្រុមអ្នកអវកាសនៅលើយាននេះនឹងរស់នៅលើ ISS ក្នុងរយៈពេល ៥ ខែ និងធ្វើការពិសោធផ្នែកវិទ្យាសាស្ត្រ រួមនឹងការងារជាច្រើនផ្សេងទៀត។

បច្ចុប្បន្ន ISS មានអ្នកអវកាសចំនួន ៧ នាក់ ហើយនៅពេលក្រុមអវកាសចរថ្មីបានចូលទៅដល់ ស្ថានីយអវកាសអន្តរជាតិនេះនឹងមានអ្នកធ្វើការសរុប ១១ នាក់៕

October 6, 2022

កូរ៉េខាងជើង បាញ់មីស៊ីល ដែលមានគន្លងហោះហើរខុសធម្មតា

កូរ៉េខាងជើង បានបាញ់ប្លោងមីស៊ីលរយៈចម្ងាយជិតចំនួន ២ គ្រាប់ ទៅកាន់តំបន់សមុទ្រ ក្នុងនោះ មាន ១ គ្រាប់ត្រូវបានគេជឿថា មានគន្លងហោះហើរខុសប្រក្រតី។

នាព្រឹកនេះ កូរ៉េខាងជើង បានបាញ់ប្លោងមីស៊ីលរយៈចម្ងាយខ្លី ២ គ្រាប់ ទៅកាន់តំបន់សមុទ្រភាគខាងកើតប្រទេស ក្រោយពី សហរដ្ឋអាម៉េរិក និង កូរ៉េខាងត្បូង ធ្វើសមយុទ្ធបាញ់មីស៊ីល និង វ៉ាស៊ីងតោន បញ្ជូនក្រុមប្រយុទ្ធនាវាផ្ទុកយន្តហោះ USS Ronald Reagan ត្រលប់មកកាន់តំបន់នេះ បន្ទាប់ពី ទីក្រុងព្យុងយ៉ាង បានសាកល្បងមីស៊ីលមុននោះ។

រដ្ឋមន្ត្រីការពារជាតិជប៉ុន Yasukazu Hamada ឱ្យដឹងថា មីស៊ីលដំបូងហោះហើរកម្ពស់ ១០០ គីឡូម៉ែត្រ និងហោះបានចម្ងាយ ៣៥០ គីឡូម៉ែត្រ ខណៈដែលគ្រាប់ទីពីរហោះកម្ពស់ ៥០ គីឡូម៉ែត្រ ចម្ងាយ ៨០០ គីឡូម៉ែត្រ និងអាច «ប្រើប្រាស់គន្លងគោចរមិនធម្មតា» នៅក្នុងការហោះហើរ។ «កូរ៉េខាងជើង បានបង្កភាពតានតឹងដោយឯកតោភាគី ពិសេសគឺចាប់ពីដើមឆ្នាំនេះ» លោក Hamada ថ្លែងដូច្នេះ។

នេះគឺជាការសាកល្បងមីស៊ីលលើកទី ៦ របស់ កូរ៉េខាងជើង ក្នុងរយៈពេល ១២ ថ្ងៃកន្លងទៅ និងត្រូវបានធ្វើឡើងក្រោយពីប្រទេសនេះបានបាញ់មីស៊ីលរយៈចម្ងាយឆ្ងាយរំលងទឹកដីរបស់ ជប៉ុន បាន ២ ថ្ងៃ។ «នោះគឺជារឿងដែលមិនអាចទទួលយកបាន» នាយករដ្ឋមន្ត្រីជប៉ុន Fumio Kishida ថ្លែងនាព្រឹកនេះដូច្នេះ។

October 6, 2022

អ៊ុយក្រែន ប្រកាសចាប់ផ្ដើមយុទ្ធនាការរំដោះខេត្ត Lugansk

អភិបាលខេត្ត Lugansk នៃ រដ្ឋាភិបាលអ៊ុយក្រែន ប្រកាសថា កងទ័ពដណ្ដើមបានទឹកដីមួយចំនួននៅក្នុងខេត្តនេះ ពី ដៃកងទ័ពរុស្ស៊ី។

«យុទ្ធនាការរំដោះ Lugansk ចាប់ផ្ដើមជាផ្លូវការ។ តំបន់មួយចំនួនត្រូវបានរំដោះពីដៃរបស់ កងទ័ពរុស្ស៊ី។ ទាហានរុស្ស៊ី ទាំងអស់សុទ្ធតែដឹងថា ពួកគេមិនអាចគេចពីការវាយបក ហើយពួកគេកំពុងត្រូវបានវាយឱ្យបរាជ័យ» អភិបាលខេត្ត Lugansk លោក Serhiy Gaidai នៃរដ្ឋាភិបាលរបស់ អ៊ុយក្រែន ថ្លែងនៅលើកញ្ចក់ទូរទស្សន៍ជាតិកាលពីថ្ងៃទី ០៥ តុលា។

លោក Serhiy Gaidai អំពាវនាវដល់ប្រជាជនដែលបានភៀសខ្លួនពី Lugansk កាលពីដើមឆ្នាំ កុំអាលប្រញាប់ត្រលប់មកវិញ ដោយសន្យាថា នឹងប្រកាសពេលវេលាជាក់លាក់សម្រាប់ការវិលត្រលប់នេះ។ លោកថា ប្រជាជននៅក្នុងបណ្ដាតំបន់ដែលកំពុងត្រូវបានគ្រប់គ្រងដោយ រុស្ស៊ី ក៏គួរតែភៀសខ្លួនចេញពីសមរភូមិ ឬស្វែងរកទីសុវត្ថិភាព។

រូបភាពបង្ហោះលើបណ្ដាញសង្គមបង្ហាញថា កងទ័ពអ៊ុយក្រែន កំពុងស្ថិតនៅក្នុងភូមិមួយក្នុងខេត្ត Lugansk បន្ទាប់ពីបានសម្រុកចូលតាមខេត្ត Donetsk ដែលនៅក្បែរនោះ។ ក្នុងរូបថតគឺជាក្រុមទាហានកំពុងកាន់ទង់ជាតិអ៊ុយក្រែន ឈរជុំវិញស្លាកសញ្ញាបង្ហាញផ្លូវនៅក្នុងភូមិ Hrekivka។

រុស្ស៊ី គ្រប់គ្រងទឹកដីស្ទើរតែទាំងអស់របស់ខេត្ត Lugansk ក្រោយពីដណ្ដើមបានទីក្រុង Severodonetsk និង Lysychansk កាលពីខែកក្កដា ២០២២។

រដ្ឋាភិបាលរបស់លោក ពូទីន បានប្រកាសបញ្ចូលខេត្ត Lugansk រួមនឹងខេត្ត Donetsk, Zaporizhzhia និង Kherson របស់ អ៊ុយក្រែន ទៅក្នុងទឹកដីរបស់ រុស្ស៊ី កាលពីប៉ុន្មានថ្ងៃនេះ ធ្វើឱ្យ អ៊ុយក្រែន បើកការវាយបកយ៉ាងខ្លាំងក្លា ដើម្បីរំដោះមកវិញ៕

October 6, 2022

មន្ត្រីរុស្ស៊ី សាទរសំណើសន្តិភាពសម្រាប់ អ៊ុយក្រែន របស់មហាសេដ្ឋីអាម៉េរិក អ៊ីឡុន ម៉ាស

វិមានក្រឹមឡាំង សាទរចំពោះមហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក អ៊ីឡុន ម៉ាស ដែលបានលើកសំណើសម្រាប់សន្តិភាពដើម្បីបញ្ចប់សង្គ្រាមរវាង រុស្ស៊ី និង អ៊ុយក្រែន បន្ទាប់ពី ទីក្រុងកៀវ រិះគន់គំនិតនេះ។

«ពិតជារឿងល្អ នៅពេលបុរសម្នាក់ដូចលោក អ៊ីឡុន ម៉ាស (Elon Musk) កំពុងស្វែងរកដំណោះស្រាយសន្តិភាព» អ្នកនាំពាក្យរបស់ វិមានក្រឹមឡាំង Dmitry Peskov និយាយដូច្នេះកាលពីថ្ងៃទី ០៤ តុលា។

«ខុសពីអ្នកការទូតអាជីពជាច្រើនរូប លោក អ៊ីឡុន ម៉ាស កំពុងស្វែងរកវិធីដើម្បីសម្រេចបានសន្តិភាព។ ការសម្រេចបានសន្តិភាពដោយមិនឆ្លើយតបតាមលក្ខខណ្ឌរបស់ រុស្ស៊ី គឺជាប្រការមិនអាចទៅរួច» លោក Peskov បន្ថែម។

លោក អ៊ីឡុន ម៉ាស កាលពីថ្ងៃទី ០៣ តុលា បានបង្ហោះលើ Twitter នូវសំណើមួយដែលស្នើឱ្យ អ៊ុយក្រែន ទទួលស្គាល់ថា គ្រីមៀ គឺជាទឹកដីរបស់ រុស្ស៊ី និងធ្វើប្រជាមតិឡើងវិញក្រោមការគ្រប់គ្រងរបស់ អង្គការសហប្រជាជាតិ នៅក្នុង ៤ តំបន់របស់ អ៊ុយក្រែន ដែល រុស្ស៊ី ទើបតែបានរឹបអូស ហើយ ទីក្រុងកៀវ ត្រូវតែរក្សាអព្យាក្រឹតភាព។ លោក ម៉ាស ក៏បានអំពាវនាវដល់អ្នកលេងបណ្ដាញសង្គមឱ្យចូលរួមបោះឆ្នោតសម្រាប់សំណើរបស់លោក ដោយការជ្រើសរើសយក «យល់ព្រម» ឬ «ប្រឆាំង»។

សំណើរបស់មហាសេដ្ឋី អ៊ីឡុន ម៉ាស ត្រូវបានក្រុមមន្ត្រីរបស់ អ៊ុយក្រែន និងអ្នកការទូតជាច្រើនរិះគន់យ៉ាងខ្លាំងក្លា។ គិតមកដល់ថ្ងៃទី ០៤ តុលា សំណើរបស់ អ៊ីឡុន ម៉ាស ទទួលបានការចូលរួមបោះឆ្នោតជ្រើសរើសប្រមាណ ២.៥ លានលើក ក្នុងនោះមាន ៦៩% ប្រឆាំង៕

October 5, 2022

បវរកញ្ញានៅ គ្រីមៀ ត្រូវ រុស្ស៊ី ដាក់ទោស ព្រោះតែច្រៀងចម្រៀងរបស់ អ៊ុយក្រែន

បវរកញ្ញាស្ត្រីមេផ្ទះគ្រីមៀ ត្រូវអាជ្ញាធរដាក់ទោស «ព្រោះតែធ្វើឱ្យបាត់បង់កេរ្ដិ៍ឈ្មោះរបស់កងទ័ពរុស្ស៊ី» ដោយសារច្រៀងបទចម្រៀងដែលបង្ហាញអំពីទឹកចិត្តស្នេហាជាតិរបស់ អ៊ុយក្រែន។

Olga Valeyeva ជយលាភីក្នុងការប្រកួតដណ្ដើមតំណែងបវរកញ្ញាស្ត្រីមេផ្ទះគ្រីមៀ ២០២២ រួមនឹងមិត្តម្នាក់ទៀត បានច្រៀងបទចម្រៀងដ៏ល្បីឈ្មោះ Chervona Kalyna របស់ អ៊ុយក្រែន នៅលើរានហាល។ វីដេអូស្ដីពីពួកគេត្រូវបានបង្ហោះលើ Stories របស់ Instagram និងត្រូវបានលុបដោយស្វ័យប្រវត្តក្នុងរយៈពេល ២៤ ម៉ោង។

ស្ថាប័នមហាផ្ទៃគ្រីមៀ (Crime/គ្រីមៀ ជាឧបទ្វីបរបស់ អ៊ុយក្រែន ដែលត្រូវបាន រុស្ស៊ី រឹបអូសកាលពីឆ្នាំ ២០១៤) កាលពីថ្ងៃទី ០៣ តុលា បានឱ្យដឹងថា បទចម្រៀងដែលស្ត្រីទាំងពីររូបខាងលើច្រៀង «គឺជាបទលើកទឹកចិត្តឱ្យប្រយុទ្ធរបស់ក្រុមជ្រុលនិយមមួយក្រុម» និងចោទថា ធ្វើឱ្យបាត់បង់កិត្យានុភាពកងទ័ពរុស្ស៊ី និងផ្សព្វផ្សាយជាសាធារណៈនូវនិមិត្តរូបហ្វាស៊ីស។

ប៉ូលិសគ្រីមៀ ឱ្យដឹងថា Valeyeva ត្រូវបានពិន័យជាប្រាក់ ៤០,០០០ រូប្ល (៦៨៤ ដុល្លារអាម៉េរិក) ចំណែកមិត្តរបស់នាង ត្រូវឃុំខ្លួន ១០ ថ្ងៃ៕

October 5, 2022

ប្រធានាធិបតីអ៊ុយក្រែន ហ្សេឡែនស្គី ចុះហត្ថលេខាលើបទបញ្ជា «ហាមការចរចាជាមួយលោក ពូទីន»

ប្រធានាធិបតីអ៊ុយក្រែន លោក ហ្សេឡែនស្គី បានចុះហត្ថលេខាលើបទបញ្ជាមួយដែលហាមឃាត់រាល់លទ្ធភាពចរចាជាមួយលោក ពូទីន ប៉ុន្តែ ទុកផ្លូវសម្រាប់ការចរចាជាមួយ «ប្រធានាធិបតីផ្សេងរបស់ រុស្ស៊ី»។

«អ៊ុយក្រែន សម្រេចចិត្តថា ការចរចាជាមួយ ប្រធានាធិបតីរុស្ស៊ី វ្ល៉ាឌីមៀ ពូទីន គឺជារឿងមិនអាចទៅរួច» ប្រការទី ១ នៅក្នុងបទបញ្ជាលេខ ៦៧៩ ដែលត្រូវបានលោក ហ្សេឡែស្គី ចុះហត្ថលខាកាលពីម្សិលមិញ មានឃ្លាសរសេរដូច្នេះ។

បទបញ្ជានេះហាមឃាត់រាល់លទ្ធភាពដែល អ៊ុយក្រែន អាចធ្វើការចរចាជាមួយ រុស្ស៊ី នៅពេលលោក ពូទីន នៅតែកាន់អំណាច។

លោក ពូទីន វ័យជិតដល់ ៧០ បានដឹកនាំ ប្រទេសរុស្ស៊ី ក្នុងរយៈពេលជាង ២ ទសវត្សរ៍មកហើយ និងអាចបន្តឈរឈ្មោះជាបេក្ខភាពប្រធានាធិបតី ២ អាណត្តិបន្ថែមទៀត ដោយយោងទៅតាមរដ្ឋធម្មនុញ្ញ ដែលប្រការនេះនឹងជួយឱ្យលោកអាចកាន់អំណាចរហូតដល់ឆ្នាំ ២០៣៦។

បទបញ្ជារបស់លោក ហ្សេឡែស្គី ត្រូវបានធ្វើឡើងក្នុងគ្រាដែលកងទ័ពរបស់ អ៊ុយក្រែន វាយបំបែកខ្សែការពារជួរមុខរបស់ រុស្ស៊ី នៅភាគខាងត្បូងប្រទេស និងបើកការវាយប្រហារនៅភាគខាងកើត ដណ្ដើមបានតំបន់មួយចំនួនដែល រុស្ស៊ី ទើបតែបានធ្វើប្រជាមតិរឹបអូស៕

October 5, 2022

សហរដ្ឋអាម៉េរិក ផ្ដល់ជំនួយបន្ថែមជាង ៦០០ លានដុល្លារ ដល់ អ៊ុយក្រែន

ប្រធានាធិបតី ចូ បៃដិន ប្រកាសថា សហរដ្ឋអាម៉េរិក នឹងផ្ដល់ជំនួយសន្តិសុខបន្ថែមតម្លៃ ៦២៥ លានដុល្លារ ដល់ អ៊ុយក្រែន ក្នុងនោះមានទាំងប្រព័ន្ធមីស៊ីល HIMARS ផងដែរ។

នៅក្នុងការពិភាក្សាតាមទូរស័ព្ទជាមួយ ប្រធានាធិបតីអ៊ុយក្រែន ប្រធានាធិបតីអាម៉េរិក លោក ចូ បៃដិន បានថ្លែងថា ទីក្រុងវ៉ាស៊ីងតោន សន្យាថា «បន្តជួយដល់ អ៊ុយក្រែន ដើម្បីឱ្យប្រទេសនេះអាចការពារខ្លួននៅចំពោះមុខ រុស្ស៊ី ក្នុងពេលចាំបាច់» នេះបើតាមប្រកាសរបស់ សេតវិមាន។

កញ្ចប់ជំនួយតម្លៃ ៦២៥ លានដុល្លារនេះ រួមមាន ប្រព័ន្ធ HIMARS ចំនួន ៤ គ្រឿង អមជាមួយមីស៊ីល, កាំភ្លើងធំ Howitzer ៣២ គ្រឿង រួមនឹងគ្រាប់កាំភ្លើង និងរថពាសដែកជាដើម។ គិតមកដល់ពេលនេះ សហរដ្ឋអាម៉េរិក បានសន្យាផ្ដល់ជំនួយជាអាវុធ HIMARS ចំនួន ២០ គ្រឿង សម្រាប់ អ៊ុយក្រែន។

ប្រធានាធិបតីអ៊ុយក្រែន លោក ហ្សេឡែនស្គី បានអរគុណ្យដល់សមភាគីអាម៉េរិក ព្រោះបាន «បន្តផ្ដល់ជំនួយផ្នែកការពារជាតិ និងហិរញ្ញវត្ថុ» ដល់ អ៊ុយក្រែន។

ខ្ទង់ប្រាក់ជាង ៦០០ លានដុល្លារខាងលើគឺជាកញ្ចប់ជំនួយដំបូងរបស់ សហរដ្ឋអាម៉េរិក រាប់ចាប់តាំងពី រុស្ស៊ី ប្រកាសរឹបអូសទឹកដី ៤ ខេត្តរបស់ អ៊ុយក្រែន។

រដ្ឋាភិបាលរបស់លោក បៃដិន បានផ្ដល់ជំនួយជាង ១៦.៨ ពាន់លានដុល្លារដល់ ទីក្រុងកៀវ ចាប់តាំងពី រុស្ស៊ី បើកយុទ្ធនាការយោធាពិសេសនៅ អ៊ុយក្រែន កាលពីថ្ងៃទី ២៤ កុម្ភៈ ២០២២៕

October 5, 2022

មន្ត្រីនៅ សេតវិមាន ព្យាករថា រុស្ស៊ី នឹងបរាជ័យធំនៅ Kherson

ជំនួយការរបស់ រដ្ឋមន្ត្រីក្រសួងការពារជាតិអាម៉េរិក បានអះអាងថា រុស្ស៊ី ប្រឈមមុខនឹងហានិភ័យបរាជ័យធំ នៅពេលត្រូវបាន អ៊ុយក្រែន វាយខ្ទាតចេញពីឆ្នេរខាងលិចនៃទន្លេ Dnieper។

នៅក្នុងព្រឹត្តិការណ៍របស់មជ្ឈមណ្ឌលស្រាវជ្រាវយុទ្ធសាស្ត្រ និងអន្តរជាតិ (CSIS) កាលពីថ្ងៃទី ០៣ តុលា Celeste Wallander ជំនួយការរបស់ រដ្ឋមន្ត្រីក្រសួងការពារជាតិអាម៉េរិក ទទួលបន្ទុកសន្តិសុខអន្តរជាតិ អះអាងថា អ៊ុយក្រែន កំពុងតែស្ថិតនៅលើឈ្នាន់រុញច្រានកងកម្លាំងរបស់ រុស្ស៊ី នៅឆ្នេរខាងលិចរបស់ទន្លេ Dnieper។

«នោះនឹងជាបរាជ័យធំចំពោះ រុស្ស៊ី ព្រោះថា ប្រការនេះនឹងកាន់តែរាំងស្ទះដល់ការគ្រប់គ្រងរបស់ រុស្ស៊ី នៅ Odessa ដែលជាគោលដៅមួយក្នុងចំណោមគោលដៅដែលពួកគេបានដាក់ចេញកាលពីដើមឆ្នាំនេះ។ អ៊ុយក្រែន មានទីតាំងការពារបន្ថែមដើម្បីទប់ទល់នឹងការវាយប្រហារខ្លាំងក្លាដែលគ្រោងនឹងកើតឡើងនៅក្នុងរដូវរងា» លោកស្រី Wallander បន្ថែមដូច្នេះ និងបានអំពាវនាវដល់ សហរដ្ឋអាម៉េរិក និងសហគមន៍អន្តរជាតិបន្តជួយដល់ អ៊ុយក្រែន។

ភាគីខាងរុស្ស៊ី មិនទាន់មានការអធិប្បាយអ្វីឆ្លើយតបនឹងមតិរបស់លោកស្រី Wallander នៅឡើយ។ បច្ចុប្បន្ន ទីក្រុងមូស្គូ គ្រប់គ្រងទឹកដីស្ទើរតែទាំងអស់នៅ Kherson និងបានប្រកាសច្របាច់បញ្ចូលខេត្តនេះទៅក្នុងទឹកដីរុស្ស៊ី រួចហើយ។

មតិរបស់លោកស្រី Wallander ត្រូវបានលើកឡើងបន្ទាប់ពីមានព័ត៌មានថា អ៊ុយក្រែន បានបើកការវាយប្រហារនៅក្នុងខេត្ត Kherson ក្នុងនោះមានអង្គភាពមួយបានវាយបំបែកខ្សែការពារ និងបានរុលទៅជ្រៅតាមបណ្ដោយទន្លេ Dnieper ឆ្ពោះទៅកាន់ Dudchany។

ការវាយប្រហារនៅក្នុងខេត្ត Kherson របស់ កងកម្លាំងអ៊ុយក្រែន ត្រូវបានធ្វើឡើងក្នុងគ្រាដែលតំបន់ Donbass កំពុងមានការប្រយុទ្ធគ្នាយ៉ាងសាហាវ។

October 4, 2022

Category: អន្តរជាតិ