អន្តរជាតិ - La Reine Media

ប្រទេសថៃ តម្រូវឱ្យអ្នកឆ្លងដែនបង្ហាញកាតចាក់វ៉ាក់សាំងកូវីដ-19

យោងតាមអាជ្ញាធរគ្រប់គ្រងអាកាសចរណ៍ថៃ (CAAT) ប្រទេសនេះនឹងតម្រូវឱ្យភ្ញៀវអន្តរជាតិបង្ហាញកាតចាក់វ៉ាក់សាំងកូវីដ-19 គ្រប់គ្រាន់ មុនពេលអនុញ្ញាតឱ្យចូលទឹកដីនេះ ដោយសារតែជឿថា នឹងមានភ្ញៀវចិនចូលមកបន្ថែមទៀត។

អ្នកនាំពាក្យរបស់ រាជរដ្ឋាភិបាលថៃ Traisuree Taisaranakul កាលពីថ្ងៃទី 08 មករា បានឱ្យដឹងថា ជើងហោះហើរពាណិជ្ជកម្មដំបូងពី ប្រទេសចិន មកកាន់ ប្រទេសថៃ របស់ Xiamen Airlines នឹងធ្វើដំណើរពីតំបន់ Xiamen មកកាន់ បាងកក នៅថ្ងៃទី 09 មករា ដោយដឹកអ្នកដំណើរចំនួន 286 នាក់។

ដើម្បីត្រៀមសម្រាប់ការទទួលភ្ញៀវពី ប្រទេសចិន ឡើងវិញ CAAT បញ្ជាក់ថា ចាប់ពីថ្ងៃទី 09 មករា ភ្ញៀវអន្តរជាតិទាំងអស់ដែលចូលមក ប្រទេសថៃ នឹងត្រូវបានស្នើឱ្យបង្ហាញកាតចាក់វ៉ាក់សាំងកូវីដ-19 គ្រប់គ្រាន់។ បើសិនមិនមានកាត់ចាក់វ៉ាក់សាំង ពួកគេនឹងត្រូវតម្រូវឱ្យបញ្ជាក់ថា ខ្លួនបានជាពីជំងឺកូវីដ-19 ក្នុងរង្វង់ 6 ខែ។

ចំពោះភ្ញៀវដែលមិនទាន់បានចាក់វ៉ាក់សាំងកូវីដ-19 គ្រប់គ្រាន់ ពួកគេត្រូវតែបង្ហាញលិខិតបញ្ជាក់សុខភាពដែលបកស្រាយអំពីមូលហេតុដែលខ្លួនមិនទាន់បានចាក់វ៉ាក់សាំង នេះបើតា Reuters។

បច្ចុប្បន្ន CAAT ឱ្យដឹងថា ក្រុមហ៊ុនអាកាសចរណ៍នឹងទទួលខុសត្រូវក្នុងការពិនិត្យលិខិតស្នាមនានាមុនពេលភ្ញៀវឡើងយន្តហោះ។ ក្រសួងសុខាភិបាលថៃ ឱ្យដឹងថា ភ្ញៀវបរទេសមកកាន់ ប្រទេសថៃ ពីប្រទេសមួយដែលតម្រូវឱ្យបញ្ជាក់លទ្ធផលធ្វើតេស្ត RT-PCR អវិជ្ជមាន ត្រូវបង្ហាញបន្ថែមនូវលិខិតបញ្ជាក់ការធានារ៉ាប់រងសម្រាប់ការព្យាបាលជំងឺកូវីដ-19 មុននឹងត្រូវបានអនុញ្ញាតឱ្យចូលប្រទេសថៃ។

ក្រៅពីនេះ រាល់សំណើទាក់ទងនឹងការឆ្លងដែនចូលមកប្រទេសថៃ នឹងមិនត្រូវបានអនុវត្តឡើយ ចំពោះអ្នកដំណើរដែលមានលិខិតឆ្លងដែនថៃ ឬភ្ញៀវដែលគ្រាន់តែធ្វើដំណើរឆ្លងកាត់ប្រទេសនេះ។

ចំពោះសុពលភាពវិញ CAAT ឱ្យដឹងថា នឹងបន្តអនុវត្តគោលការណ៍ខាងលើយ៉ាងតិចត្រឹមចុងខែមករា 2023 ដើម្បីត្រៀមទទួលភ្ញៀវពី ប្រទេសចិន ក្រោយពីប្រទេសនេះបើកទ្វារព្រំដែនជាផ្លូវការចាប់ពីថ្ងៃទី 08 មករា 2023។ ការតម្រូវឱ្យភ្ញៀវបរទេសបង្ហាញកាត់ចាក់វ៉ាក់សាំងកូវីដ-19 ត្រូវបានរដ្ឋាភិបាលថៃ លុបចោលតាំងពីខែតុលា 2022 ហើយទើបតែចាប់ផ្ដើមអនុវត្តឡើងវិញ ក្រោយពី ប្រទេសចិន បានបន្ធូរបន្ថយគោលការណ៍ Zero-Covid និងបើកទ្វារព្រំដែនជាថ្មី៕

January 9, 2023

អំពើហិង្សានៅសភាប្រេស៊ីល ត្រូវបានក្រុមមេដឹកនាំពិភពលោកថ្កោលទោស

បណ្ដាមេដឹកនាំពិភពលោក បានរិះគន់ទៅលើហ្វូងមនុស្សដែលគាំទ្រអតីតប្រធានាធិបតីប្រេស៊ីល Bolsonaro ដែលបានសម្រុកចូលវិមានសភា និងបានហៅករណីនេះថា ជាអំពើហិង្សាជ្រុលនិយម។

ហ្វូងមនុស្សដែលគាំទ្រអតីតប្រធានាធិបតីប្រេស៊ីល Jair Bolsonaro កាលពីថ្ងៃទី 08 មករា 2023 បាននាំគ្នាសម្រុកចូលវិមានសភា វិមានប្រធានាធិបតី និងតុលាការកំពូលរបស់ប្រទេសនេះ បង្កឱ្យមានអំពើហិង្សាកើតឡើង។ ប្រហែល 3 ម៉ោងបន្ទាប់ពីមានព័ត៌មានបឋមស្ដីពីករណីខាងលើ កងកម្លាំងសន្តិសុខរបស់ ប្រេស៊ីល បានគ្រប់គ្រងអគារទាំងនេះ។ ប៉ូលិសបាននិយាយថា បានធ្វើការចាប់ខ្លួន 170 លើក។

ប្រធានាធិបតីអាម៉េរិក លោក ចូ បៃដិន បានថ្កោលទោសចំពោះករណីវាយប្រហារដែលលោកអធិប្បាយថា «មិនអាចទទួលយកបាន» ព្រមទាំងបានសម្ដែងការគាំទ្រចំពោះអាជ្ញាធររបស់ប្រធានាធិបតីថ្មីនេះ ប្រទេសប្រេស៊ីល លោក Luiz Inacio Lula da Silva ផងដែរ។

«ខ្ញុំថ្កោលទោសករណីវាយប្រហារសំដៅលើរបបប្រជាធិបតេយ្យ និងដំណើរការនៃការប្រគល់អំណាចដោយសន្តិវិធីនៅ ប្រេស៊ីល។ យើងគាំទ្រទាំងស្រុងចំពោះរបបប្រជាធិបតេយ្យនៅ ប្រេស៊ីល ហើយមិនអនុញ្ញាតឱ្យអ្នកណាមួយធ្វើឱ្យចុះខ្សោយគោលគំនិតរបស់ប្រជាជនប្រេស៊ីល។ ខ្ញុំសង្ឃឹមថានឹងបានបន្តកិច្ចសហការជាមួយប្រធានាធិបតី Lula» លោក បៃដិន សរសេរដូច្នេះ។

ប្រធានាធិបតីបារាំង លោក អេម៉ានុយអែល ម៉ាក្រុង ក៏បានបង្ហោះសារនៅលើបណ្ដាញសង្គម សម្ដែងការគាំទ្រចំពោះថ្នាក់ដឹកនាំថ្មីរបស់ ប្រេស៊ីល និងអះអាងថា ត្រូវតែគោរព «គោលគំនិតរបស់ប្រជាជនប្រេស៊ីល រួមនឹងរបបប្រជាធិបតេយ្យ»។

ប្រធានាធិបតីស៊ីលី លោក កាព្រីយ៉ែល បូរិច ក៏រិះគន់ថា នេះគឺជា «ការវាយប្រហារដ៏ថោកទាបសម្ដៅលើរបបប្រជាធិបតេយ្យ» និងសង្កត់ធ្ងន់ថា អាជ្ញាធររបស់ប្រធានាធិបតី Lula មានការគាំទ្រពេញទំហឹងពី ប្រទេសស៊ីលី។

ក្រៅពីនេះក៏នៅមានមន្ត្រីកំពូលៗជាច្រើនរូបរបស់ សហភាពអឺរ៉ុប និងមន្ត្រីជាន់ខ្ពស់នានារបស់ សហរដ្ឋអាម៉េរិក ជាដើម បានធ្វើការរិះគន់ចំពោះករណីនៅ ប្រេស៊ីល នេះដែរ៕

January 9, 2023

យន្ដហោះដឹកអ្នកដំណើរម៉ិកស៊ិក ត្រូវគ្រាប់កាំភ្លើងពេលកងទ័ពប្រយុទ្ធគ្នានឹងក្រុមគ្រឿងញៀន

យន្តហោះ AM165 របស់ក្រុមហ៊ុន Aeromexico ត្រូវគ្រាប់នៅពេលកងកម្លាំងរបស់ ប្រទេសម៉ិកស៊ិក និងក្រុមសង្គមងងឹត Sinaloa ប្រយុទ្ធគ្នានៅក្បែរយន្តហោះ ប៉ុន្តែ សំណាងល្អ មិនមានអ្នកដំណើរណាម្នាក់បានស្លាប់។

«នៅពេលយន្តហោះបង្កើនល្បឿនដើម្បីហោះឡើង យើងបានឮសំឡេងគ្រាប់កាំភ្លើងនៅក្បែរយន្តហោះ។ យើងនាំគ្នាក្រាបចុះ» អ្នកដំណើរឈ្មោះ David Tellez អាយុ 42 ឆ្នាំ រៀបរាប់អំពីហេតុការណ៍ដែលអ្នកដំណើរលើយន្តហោះ AM165 របស់ក្រុមហ៊ុនអាកាសចរណ៍ Aeomexico បានជួបប្រទះ ពេលត្រៀមហោះចេញពីទីក្រុង Culiacan ដើម្បីទៅកាន់ រដ្ឋធានីម៉ិកស៊ីកូ កាលពីព្រឹកព្រលឹមថ្ងៃទី 05 មករា។

ក្រុមហ៊ុនអាកាសចរណ៍ខាងលើបានបញ្ជាក់ថា យន្តហោះដឹកអ្នកដំណើររបស់ពួកគេត្រូវគ្រាប់នៅពេលត្រៀមហោះឡើង ប៉ុន្តែមិនមានអ្នកស្លាប់ ឬរងរបួសនៅលើយន្តហោះនេះឡើយ។ ជើងយន្តហោះនេះ ក្រោយមកក៏ត្រូវបានលុបចោល ដើម្បីសុវត្ថិភាព។

មូលហេតុដែលនាំឱ្យយន្តហោះត្រូវគ្រាប់គឺដោយសារការប្រយុទ្ធគ្នារវាងកម្លាំងរដ្ឋាភិបាលម៉ិកស៊ិក និងក្រុមសង្គមងងឹត។ ក្រុមខ្មាន់កាំភ្លើងរបស់ក្រុមជនពាល Sinaloa ពេលនោះបានបើកការវាយប្រហារសងសឹកជាច្រើនលើក បន្ទាប់ពីកម្លាំងប៉ូលិស និងទាហានសហការគ្នាចាប់បាន Ovidio Guzman ដែលជាកូនប្រុសរបស់មេគ្រឿងញៀន El Chapo កាលពីវេលាទៀបភ្លឺក្នុងថ្ងៃជាមួយគ្នា៕

January 6, 2023

រាជធានីតូក្យូ ផ្ដល់ប្រាក់សំណងសម្រាប់ពលរដ្ឋដែលយល់ព្រមចាកចេញពីទីក្រុង

រាជធានីតូក្យូ របស់ ប្រទេសជប៉ុន នឹងផ្ដល់ប្រាក់សំណងដល់ពលរដ្ឋទាំងឡាយណាដែលយល់ព្រមចាកចេញពីទីក្រុង ដោយយោងទៅតាមការកំណត់ថ្មីដែលនឹងមានសុពលភាពចាប់ពីខែមេសា 2023។

ដើម្បីកាត់បន្ថយសម្ពាធនៃចំនួនប្រជាជននៅ 23 ខណ្ឌក្នុងរាជធានីតូក្យូ រាជរដ្ឋាភិបាលជប៉ុន បានឱ្យដឹងថា នឹងផ្ដល់ជំនួយ 5 លានយ៉េន (37,700 ដុល្លារអាម៉េរិក) ដល់គ្រួសារទាំងឡាយណាដែលយល់ព្រមរើពីរដ្ឋធានីទៅរស់នៅ និងធ្វើការរកស៊ីនៅកន្លែងដទៃ។

យោងតាមគោលនយោបាយខាងលើ គ្រួសារនីមួយៗនឹងទទួលបានសំណង ឬជំនួយ 1 លានយ៉េន (7,550 ដុល្លារអាម៉េរិក) សម្រាប់សមាជិកដែលមានអាយុក្រោម 18 ឆ្នាំ។ បើសិនគ្រួសារមួយមានកូន 2 នាក់អាយុក្រោម 18 ឆ្នាំ ចាកចេញពី តូក្យូ និងបើកអាជីវកម្មមួយនៅលំនៅថ្មី ពួកគេនឹងទទួលបានកញ្ចប់ជំនួយឡើងដល់ 5 លានយ៉េន។

បច្ចុប្បន្ន នៅទូទាំងប្រទេសជប៉ុន មានភូមិ និងទីរួមស្រុកប្រហែល 1,300 បានចុះឈ្មោះទទួលយកអ្នកដែលចង់ចាកចេញពី តូក្យូ។

រាជធានីតូក្យូ មានប្រជាជនប្រហែល 35 លាននាក់ ស្មើនឹង 28% នៃប្រជាជនសរុបនៅ ជប៉ុន និងជាតំបន់ទីក្រុងដែលមានមនុស្សច្រើនជាងគេលើពិភពលោក។ ចំណែកនៅទីរួមស្រុក និងភូមិឋាននៅជនបទ មិនមានមនុស្សច្រើន ក្រុមហ៊ុន សហគ្រាសតែងតែខ្វះបុគ្គលិក និងអតិថិជន។

តាមការប៉ាន់ស្មាន ចំនួនផ្ទះដែលមិនមានមនុស្សរស់នៅក្នុងប្រទេសជប៉ុន នឹងកើនដល់ប្រហែល 10 លានខ្នងនៅក្នុងឆ្នាំនេះ៕

January 5, 2023

«ស្លាប់បាត់ហើយ» ក្មេងអាយុ 10 ដែលធ្លាក់ជាប់ក្នុងបំពង់សសរក្រោមដីជម្រៅ 35 ម៉ែត្រនៅវៀតណាម

ក្មេងប្រុសរងគ្រោះ Thai Ly Hao Nam ដែលបានជាប់ 4 ថ្ងៃនៅក្នុងបំពង់សសរបេតុងក្រោមដីជម្រៅ 35 ម៉ែត្រ នៅក្នុងការដ្ឋានសាងសង់ស្ពានមួយកន្លែងនៅភាគខាងត្បូងប្រទេសវៀតណាម បានស្លាប់ហើយ ក្រោយការរត់ប្រណាំងនឹងពេលវេលារបស់ក្រុមសង្គ្រោះ។

យោងតាមសារព័ត៌មាន VNexpress ដំណឹងអាក្រក់នេះត្រូវបានបញ្ជាក់ដោយអភិបាលរងខេត្ត Dong Thap កាលពីវេលាម៉ោង 18 និង 31 នាទីថ្ងៃទី 04 មករា 2022 នៅកន្លែងកើតហេតុ។

មកដល់អំឡុងពេលនោះ ក្រុមសង្គ្រោះបានចំណាយពេលជិត 100 ម៉ោងក្នុងការជួយសង្គ្រោះ ប៉ុន្តែមិនបានជោគជ័យ។ បំពង់សសរបេតុងប្រវែង 35 ម៉ែត្រ ដែលក្មេងរងគ្រោះកំពុងជាប់ខាងក្នុងនោះ មិនទាន់ត្រូវបានដកឡើងពីក្រោមដីនៅឡើយ។

ករណីធ្លាក់ក្មេងចូលបំពង់សសរបេតុងខាងលើនេះបានកើតឡើងកាលពីម៉ោងប្រហែល 11 និង 30 នាទី ថ្ងៃទី 31 ធ្នូ 2022។ មុនពេលកើតហេតុ ក្មេងរងគ្រោះមានឈ្មោះថា Thai Ly Hao Nam (អាយុ 10 ឆ្នាំ) និងក្មេង 3 នាក់ទៀត បានចូលក្នុងការដ្ឋានសាងសង់ស្ពានមួយកន្លែងដើម្បីរើសអេតចាយ។ ប៉ុន្តែ Hao Nam ក៏បានធ្លាក់ទៅក្នុងបំពង់សសរបេតុងប្រហែលដែលត្រូវបានដាំទៅក្នុងដីជម្រៅប្រហែល 35 ម៉ែត្រ។

January 4, 2023

តៃវ៉ាន់នឹងចែកអាំងប៉ាវតម្លៃ 6,000 ដុល្លារតៃវ៉ាន់ ជូនប្រជាជនគ្រប់រូប

មេដឹកនាំស្ថាប័នអនុវត្តច្បាប់របស់ កោះតៃវ៉ាន់ ឱ្យដឹងថា អាជ្ញាធរមានផែនការផ្ដល់អាំងប៉ាវជាសាច់ប្រាក់ 6,000 ដុល្លារតៃវ៉ាន់ សម្រាប់ប្រជាជនគ្រប់រូបនៅលើកោះនេះ នៅក្នុងពិធីបុណ្យចូលឆ្នាំចិនខាងមុខ។

«ឆ្នាំនេះ សមិទ្ធផលសេដ្ឋកិច្ចនឹងត្រូវបានចែករំលែកជូនប្រជាជនគ្រប់រូប ទាំងក្មេងទាំងចាស់» លោក Su Zhenchang មេដឹកនាំស្ថាប័នអនុវត្តច្បាប់របស់ តៃវ៉ាន់ ប្រកាសនាថ្ងៃនេះដូច្នេះ។ «យើងខ្ញុំមានបំណងជូនពរគ្រប់គ្នានៅក្នុងឱកាសបុណ្យចូលឆ្នាំចិន»។

លោក Su Zhenchang ថ្លែងថា ជាសរុប ទឹកប្រាក់ 140 ពាន់លានដុល្លារតៃវ៉ាន់ (ជាង 4.5 ពាន់លានដុល្លារអាម៉េរិក) ជាផ្នែកមួយដែលបានពីពន្ធដារ គ្រោងនឹងត្រូវបានចែកក្នុងទម្រង់សាច់ប្រាក់ជូនដល់ប្រជាជន។ ប្រជាជនតៃវ៉ាន់ម្នាក់ៗនឹងទទួលបានអាំងប៉ាវ 6,000 ដុល្លារតៃវ៉ាន់ (ប្រហែល 195 ដុល្លារអាម៉េរិក) ប៉ុន្តែ លោក Su Zhenchang មិនបានបញ្ជាក់ថា នឹងផ្ដល់អាំងប៉ាវនេះតាមរយៈធនាគារ ឬដោយផ្ទាល់ដៃនោះទេ។

គម្រោងចែកអាំងប៉ាវ (红包 – (Hongbao) ដែលភាសាចិនកាតាំង ហៅថា 利是（laishi) មានន័យថា ស្រោមសំបុត្រក្រហម) ខាងលើនេះទំនងជានឹងត្រូវបានសភាតៃវ៉ាន់អនុម័ត ព្រោះថា គណបក្សប្រជាធិបតេយ្យជឿនលឿនកំពុងកាន់អំណាច មានសំឡេងភាគច្រើន។

សេដ្ឋកិច្ចតៃវ៉ាន់ ដែលអាស្រ័យច្រើនទៅលើការនាំចេញ មានកំណើន 6.45% ក្នុងឆ្នាំ 2021 លឿនបំផុតក្នុងអំឡុងជាងមួយទសវត្សរ៍កន្លងមកនេះ។ ប៉ុន្តែ កំណើនសេដ្ឋកិច្ចតៃវ៉ាន់ ត្រូវបានព្យាករថា បន្ថយល្បឿននៅឆ្នាំ 2022 និង 2023។ ឆ្នាំ 2023 ធនាគារជាតិតៃវ៉ាន់ ព្យាករថា ផលិតផលសរុបក្នុងស្រុក (GDP) របស់កោះនេះនឹងមានកំណើន 2.53%៕

January 4, 2023

វៀតណាមត្រៀមរួចហើយដើម្បីដក «បំពង់សសរបេតុងដែលក្មេងធ្លាក់ជាប់ 4 ថ្ងៃ» នៅម៉ោង 09 ព្រឹកនេះ

ឈានចូលដល់ថ្ងៃទី 5 នៃការសង្គ្រោះ បំពង់សសរបេតុងដែលបានដាំក្នុងដីជម្រៅ 35 ម៉ែត្រ ដែលមានក្មេងរងគ្រោះកំពុងជាប់នៅខាងក្នុង នឹងត្រូវបានទាញ ដកឡើងនៅវេលាម៉ោង 09 ថ្ងៃទី 04 មករា 2023 នេះ។

វេលាម៉ោង 07 និង 45 នាទីព្រឹកថ្ងៃទី 04 មករា 2022 សមាជិកម្នាក់ក្នុងគណៈបញ្ជាការសង្គ្រោះបានឱ្យដឹងថា ការទាញ ដកសសរបេតុងប្រហោងក្នុងពីដី នឹងស៊ីពេលអស់ប្រហែល 2 ម៉ោង។ ក្រោយពីសសរនេះត្រូវបានទាញផុតពីដី កម្លាំងសង្គ្រោះនឹងកំណត់ទីតាំងរបស់ក្មេងរងគ្រោះដែលកំពុងជាប់នៅក្នុងសសរនេះ រួចហើយកាត់សសរយកក្មេងនេះចេញមកក្រៅ។

បច្ចុប្បន្ន ក្រុមសង្គ្រោះបានបាញ់សម្អាតដីចុងក្រោយនៅក្នុងបំពង់ដែកថែបដែលព័ទ្ធពីក្រៅបំពង់សសរបេតុងរួចហើយ។ តាមផែនការ នៅពេលក្បាលដែកខួងចូលដល់ជម្រៅ 27 ម៉ែត្រ ក្រុមសង្គ្រោះនឹងរឹតខ្សែកាបទៅលើសសរបេតុង ដើម្បីទាញ ដកឡើងមកលើ។

ករណីធ្លាក់ក្មេងចូលបំពង់សសរបេតុងខាងលើនេះបានកើតឡើងកាលពីម៉ោងប្រហែល 11 និង 30 នាទី ថ្ងៃទី 31 ធ្នូ 2022។ មុនពេលកើតហេតុ ក្មេងរងគ្រោះមានឈ្មោះថា Thai Ly Hao Nam (អាយុ 10 ឆ្នាំ) និងក្មេង 3 នាក់ទៀត បានចូលក្នុងការដ្ឋានសាងសង់ស្ពានមួយកន្លែងដើម្បីរើសអេតចាយ។ ប៉ុន្តែ Hao Nam ក៏បានធ្លាក់ទៅក្នុងបំពង់សសរបេតុងប្រហែលដែលត្រូវបានដាំទៅក្នុងដីជម្រៅប្រហែល 35 ម៉ែត្រ។

ប្រហែលកន្លះម៉ោងក្រោយពីកុមារនេះបានជួបគ្រោះថ្នាក់ កម្លាំងសង្គ្រោះក៏បានទៅដល់កន្លែងកើតហេតុ និងចាប់ផ្ដើមដំណើរការជួយសង្គ្រោះ៕

January 4, 2023

ការសង្គ្រោះ «ក្មេងធ្លាក់ចូលបំពង់សសរបេតុងជម្រៅ 35 ម៉ែត្រនៅវៀតណាម ឈានចូលថ្ងៃទី 5 ហើយ!

ក្រោយរយៈពេល 5 ថ្ងៃនៃការជួយសង្គ្រោះក្មេងប្រុសវ័យ 10 ឆ្នាំ ដែលធ្លាក់ចូលបំពង់សសរបេតុង មិនទាន់មានលទ្ធផលនៅឡើយ ប៉ុន្តែ ក្រុមសង្គ្រោះបានចាប់ផ្ដើមធ្វើតេស្តលើការកំណត់ទីតាំងរបស់ក្មេងរងគ្រោះ និងកាត់សសរបេតុង ខណៈដំណាក់កាលចុងក្រោយជិតចូលមកដល់។

យប់ថ្ងៃទី 03 មករា ក្រុមសង្គ្រោះបានធ្វើការជាបន្តបន្ទាប់ និងយ៉ាងដុតដៃដុតជើង។ វេលាម៉ោង 21 ម្សិលមិញ ក្រុមសង្គ្រោះបានយកឧបកណ៍សង្គ្រោះសម្រាប់ជំហានបន្ទាប់ មកសាកល្បងការកំណត់ទីតាំងរបស់ក្មេង និងកាត់បំពង់សសរបេតុង។ ម៉ោងជាង 23 កម្លាំងសង្គ្រោះបានបាញ់ទឹកជម្រះដីរឹងដែលជាប់នៅជុំវិញសសរនៅក្រោមដីដែលត្រូវបានអមដោយបំពង់ដែកថែបពីខាងក្រៅ។

អាជ្ញាធរវៀតណាម មិនទាន់បញ្ជាក់អំពីជម្រៅក្បែលដែកខួងបានទៅដល់ ប៉ុន្តែ ក្រុមសង្គ្រោះកំពុងធ្វើការរត់ប្រណាំងនឹងពេលវេលា។

ករណីធ្លាក់ក្មេងចូលបំពង់សសរបេតុងខាងលើនេះបានកើតឡើងកាលពីម៉ោងប្រហែល 11 និង 30 នាទី ថ្ងៃទី 31 ធ្នូ 2022។ មុនពេលកើតហេតុ ក្មេងរងគ្រោះមានឈ្មោះថា Thai Ly Hao Nam (អាយុ 10 ឆ្នាំ) និងក្មេង 3 នាក់ទៀត បានចូលក្នុងការដ្ឋានសាងសង់ស្ពានមួយកន្លែងដើម្បីរើសអេតចាយ។ ប៉ុន្តែ Hao Nam ក៏បានធ្លាក់ទៅក្នុងបំពង់សសរបេតុងប្រហែលដែលត្រូវបានដាំទៅក្នុងដីជម្រៅប្រហែល 35 ម៉ែត្រ។

ប្រហែលកន្លះម៉ោងក្រោយពីកុមារនេះបានជួបគ្រោះថ្នាក់ កម្លាំងសង្គ្រោះក៏បានទៅដល់កន្លែងកើតហេតុ និងចាប់ផ្ដើមដំណើរការជួយសង្គ្រោះ៕

January 4, 2023

ប្រទេសអ៊ូហ្កង់ដា ផ្ដល់ម៉ូតូអគ្គិសនីដល់ប្រជាជនដោយមិនគិតថ្លៃ

បច្ចុប្បន្ន លើពិភពលោកមានការលើកទឹកចិត្ត និងការបញ្ចុះអត្រាពន្ធជាច្រើនដើម្បីជួយឱ្យយានយន្តអគ្គិសនីមានតម្លៃទាបជាងមុន ប៉ុន្តែ ថ្មីៗនេះ ប្រទេសអ៊ូហ្កង់ដា បានធ្វើឱ្យមានការចាប់អារម្មណ៍ខ្លាំងនៅពេលប្រកាសចែកម៉ូតូអគ្គិសនីដល់ពលរដ្ឋដោយមិនគិតថ្លៃ។

នៅក្នុងសេចក្ដីថ្លែងការណ៍ចុងឆ្នាំ ប្រធានាធិបតីរបស់ សាធារណរដ្ឋអ៊ូហ្កង់ដា លោក Yoweri Kaguta Museveni ប្រកាសថា នឹងមានការចែកម៉ូតូអគ្គិសនីជូនដល់ប្រជាពលរដ្ឋដោយមិនគិតថ្លៃ។ ការចែកជូននេះនឹងត្រូវបានធ្វើឡើងក្នុងទម្រង់ដោះដូរសម្រាប់អ្នកដែលកំពុងប្រើប្រាស់ម៉ូតូម៉ាស៊ីនចំហេះក្នុង។

រដ្ឋាភិបាលអ៊ូហ្កង់ដា នឹងមិនមែនជាអ្នកផ្ដល់ជំនួយដោយផ្ទាល់សម្រាប់កម្មវិធីនេះទេ។ «យើងបានព្រមព្រៀងគ្នាជាមួយនឹងអ្នកវិនិយោគមួយចំនួនស្ដីពី «ការបោះបង់ម៉ូតូសាំង និងងាកទៅប្រើម៉ូតូអគ្គិសនី»។ ការដោះដូរនេះនឹងជួយឱ្យអ្នកប្រើប្រាស់អាចកាត់បន្ថយការចំណាយបាន 50%។

អ្នកវិនិយោគទាំងនោះនឹងទទួលបានអាជ្ញាប័ណ្ណសម្រាប់ដំណើរការស្ថានីយបញ្ចូលថាមពលអគ្គិសនី និងស្ថានីយប្ដូរថ្ម ដើម្បីឱ្យពួកគេរកចំណូលត្រលប់មកវិញ។

ម៉ូតូអគ្គិសនីដែលយកមកប្ដូរគឺជាប្រភេទអាចរត់ឌុបបាន និងជាម៉ូតូដែលផលិតនៅ អ៊ូហ្កង់ដា ហើយមានតម្លៃប្រហែល 5 លានស៊ីលីងអ៊ូហ្គង់ដា ប្រហែលនឹង 1,350 ដុល្លារអាម៉េរិក។

ម៉ូតូអគ្គិសនីម៉ាក Zembo ដែលផលិតនៅ អ៊ូហ្កង់ដា

ក្រៅពីផលប្រយោជន៍ផ្នែកបរិស្ថាន ម៉ូតូអគ្គិសនីក៏ជួយដល់អ្នករត់ឌុបឯករាជ្យផងដែរ ដោយសារតែការចំណាយលើការបញ្ចូលអគ្គិសនីមានកម្រិតទាបជាងម៉ូតូសាំង៕

January 3, 2023

ប្រធាន FIFA ដាក់សំណើថា «គ្រប់ប្រទេសត្រូវតែមានកីឡដ្ឋានមួយដែលមានឈ្មោះ Pele»

ប្រធាន FIFA លោក Gianni Infantino ធ្លាប់បានលើកឡើងគំនិតមួយចំនួនដែលបង្កការភ្ញាក់ផ្អើលខ្លាំង ហើយថ្មីៗនេះ លោកក៏បានស្នើឱ្យប្រទេសទាំងអស់ ត្រូវមានកីឡដ្ឋានមួយដែលមានឈ្មោះ Pele អតីតស្ដេចបាល់ទាត់ពិភពលោក ដែលទើបបានទទួលមរណភាពកាលពីចុងឆ្នាំកន្លង។

ប្រទេសប្រេស៊ីល កំពុងកាន់ទុក្ខ បន្ទាប់ពីលោក Pele (Edson Arantes do Nascimento) បានទទួលមរណភាពក្នុងវ័យ 82 ឆ្នាំ។ កាលពីថ្ងៃទី 02 មករា 2023 ទីក្រុង Santos ជាកន្លែងដែលលោក Pele ចំណាយពេលប្រកួតពេញមួយអាជីពរបស់គាត់ បានប្រារព្ធពិធីរម្លឹកវិញ្ញាណក្ខន្ធពិសេសដែលអូសបន្លាយពេលពេញមួយថ្ងៃដើម្បីជាការគោរពដល់សពលោក Pele ក្នុងនោះក៏មានការចូលរួមរបស់ប្រធាន FIFA លោក Gianni Infantino ផងដែរ។

«យើងនៅទីនេះក្នុងក្ដីសោកសៅយ៉ាងធំធេង។ Pele គឺជាអមតៈ ជានិមិត្តរូបសកលមួយរបស់បាល់ទាត់។ មនុស្សជំនាក់ក្រោយត្រូវតែស្គាល់ និងចងចាំឈ្មោះ Pele» លោក Gianni Infantino ថ្លែងដូច្នេះ និងបន្ត «FIFA នឹងស្នើដល់ប្រទេសទាំងអស់លើពិភពលោក ត្រូវយកឈ្មោះ Pele ដើម្បីដាក់ឱ្យកីឡដ្ឋានមួយរបស់ពួកគេ»។

គំនិតរបស់លោក Gianni Infantino នេះ ក៏បានធ្វើឱ្យមានមតិចម្រូងចម្រាសច្រើន។ គេដឹងហើយថា Pele មានឥទ្ធិពលធំធេង ប៉ុន្តែការតម្រូវឱ្យគ្រប់ប្រទេសត្រូវមានកីឡដ្ឋានមួយដែលមានឈ្មោះ Pele គឺមានលក្ខណៈបង្ខិតបង្ខំបន្តិចហើយ។

ក្រោយពីទទួលមរណភាព ទីស្នាក់ការកណ្ដាលរបស់ FIFA នៅទីក្រុង Zurich របស់ ស្វ៊ីស បានបង្ហូតទង់ពាក់កណ្ដាលដងដើម្បីសម្ដែងការគោរពសោកស្ដាយចំពោះសពអតីតកីឡាករដែលត្រូវបានចាត់ទុកថា ឆ្នើមជាងគេបង្អស់ក្នុងសតវត្សរ៍ទី 20។ នៅឯ Santos វិញ មឈូសរបស់សពលោក Pele ត្រូវបានកូនប្រុស Edinho និងក្រុមអតីតកំពូលកីឡាកររបស់ក្លឹប Santos ដង្ហែទៅកាន់ព្រលានបាល់ទាត់ Vila Belmiro នៅព្រឹកថ្ងៃទី 02 មករា 2023។ តាំងពីដំបូង អ្នកគាំទ្ររាប់ពាន់នាក់បានទៅកាន់ទីតាំងតម្កល់សពដើម្បីមើលមុខស្ដេចបាល់ទាត់ជាលើកចុងក្រោយ។

តាមគម្រោង ពិធីហែសពលោក Pele នឹងធ្វើដំណើរឆ្លងកាត់តាមដងផ្លូវសំខាន់ក្នុងទីក្រុង Santos មុនពេលធ្វើពិធីបញ្ចុះសពនៅថ្ងៃទី 03 មករានេះ៕

January 3, 2023

Category: អន្តរជាតិ