អន្តរជាតិ - La Reine Media

ចិនបង្កើតបណ្ដាញឧទ្យានជាតិ «ធំជាងគេបង្អស់លើពិភពលោក»

ប្រទេសចិននឹងមានបណ្ដាញឧទ្យានជាតិធំជាងគេបង្អស់លើពិភពលោកបើគិតអំពីផ្ទៃក្រឡាដែលត្រូវបានការពារ បើសិនស្ថាបនានៅលើតំបន់សក្ដានុពលទាំង 49 របស់ប្រទេសនេះ។

ឧទ្យានជាតិ Sanjiangyuan, Giant Panda, North China Tiger and Leopard, Hainan Tropical Rainforest និង Wuyishan គឺជាឧទ្យានជាតិដំបូងដែលត្រូវបានបង្កើតឡើងដើម្បីការពារសត្វព្រៃ និងបរិស្ថានរស់នៅរបស់ពួកវាឱ្យបានល្អជាងមុន។

លោក Huang Jincheng ប្រធានគណៈកម្មការគ្រប់គ្រងឧទ្យានជាតិ Hainan Tropical Rainforest ថ្លែងថា ចាប់តាំងពីឧទ្យាននេះត្រូវបានបង្កើតឡើង ក្រុមការងារកែលំអរបរិស្ថានរស់នៅរបស់ទោច Hainan បានប្រហែល 267 ហិកតា និងដើមឈើដែលពួកវាចូលចិត្ត ជាង 100,000 ដើម។

លោក Fan Dexing កសិករដាំដំណាំតែមួយរូប បាននិយាយថា គោលដៅរបស់ឧទ្យានជាតិ Wuyishan គឺការថែរក្សាធម្មជាតិ។ ធម្មជាតិល្អ ពួកគាត់ក៏អាចដាំបានដំណាំតែប្រភេទល្អៗ។

ចំណែកលោក Tian Junliang អនុប្រធានឧទ្យានជាតិ Sanjiangyuan ថ្លែងថា «ការស្រុះស្រួលរវាងមនុស្ស និងធម្មជាតិគឺជាចំណុចអាទិភាពមួយរបស់ឧទ្យានជាតិ។ ប្រការនេះដើរតួនាទីសំខាន់ក្នុងការការពារភាពសម្បូរបែបរបស់វប្បធម៌ និងជីវសាស្ត្ររបស់ផែនដី និងកាត់បន្ថយផលប៉ះពាល់នៃបម្រែបម្រួលអាកាសធាតុ»។

ប្រទេសចិនបានជ្រើសរើសតំបន់ដែលមានសក្ដានុពលចំនួន 49 ដើម្បីបង្កើតជាបណ្ដាញឧទ្យានជាតិដែលមានទំហំផ្ទៃដីសរុបប្រហែល 1.1 លានគីឡូម៉ែត្រក្រឡា រួមមានតំបន់ដីគោកចំនួន 44, តំបន់សមុទ្រចំនួន 3 និងតំបន់ដីគោក-សមុទ្រចំនួន 2។

អាជ្ញាធរចិនបានឱ្យដឹងថា ប្រទេសនេះនឹងមានបណ្ដាញឧទ្យានជាតិធំជាងគេបង្អស់លើពិភពលោក បើគិតទៅលើផ្ទៃក្រឡាដែលត្រូវបានការពារ បើសិនកសាងនៅលើតំបន់សក្ដានុពលទាំង 49។ សត្វព្រៃមានឆ្អឹងជាង 5,000 ប្រភេទ និងរុក្ខជាតិ 29,000 ប្រភេទស្ថិតនៅក្នុងបណ្ដាញឧទ្យាននេះ។

បណ្ដាញឧទ្យាននេះគ្រោងនឹងមានសត្វ និងរុក្ខជាតិជាង 80% នៅក្នុងចំណោមប្រភេទដែលត្រូវបានអាជ្ញាធរចិនការពារយ៉ាងម៉ត់ចត់។ បណ្ដាញឧទ្យាននេះក៏ជួយការពារតំបន់ទាំងឡាយដែលសត្វព្រៃធ្វើដំណើរឆ្លងកាត់ផងដែរ៕

សត្វទោចនៅឧទ្យានជាតិ Hainan Tropical Rainforest

សត្វខ្លានៅក្នុងឧទ្យាន North China Tiger and Leopard

January 14, 2023

រូបភាពច្បាស់បំផុតស្ដីពីផ្ទៃរបស់ព្រះចន្ទ ដែលថតបានពីផែនដី

ដោយប្រើប្រាស់កញ្ចុំរ៉ាដាដែលមានថាមពលមិនស្មើដល់ចង្ក្រានម៉ៃក្រូវ៉េវ ក្រុមអ្នកស្រាវជ្រាវបង្កើតបានបណ្ដារូបភាពដែលមានភាពច្បាស់កម្រិតខ្ពស់ស្ដីពីផ្ទៃរបស់ព្រះចន្ទ ថតពីផែនដី។

រូបភាពថ្មីៗដែលត្រូវបានប្រកាសកាលពីថ្ងៃទី 10 មករា នៅក្នុងកិច្ចប្រជុំលើកទី 241 របស់សមាគមតារាសាស្ត្រអាម៉េរិក (AAS) នៅទីក្រុង Seattle នៃរដ្ឋ Washington បានបង្ហាញយ៉ាងច្បាស់ទីតាំងចុះចតនៃបេសកកម្ម Apollo 15 របស់ ណាសា ក៏ដូចជាមាត់រណ្ដៅ Tycho ដែលជាតំបន់ប៉ះទង្គិចដ៏លេចធ្លោនៅលើតំបន់ខ្ពង់រាបភាគខាងត្បូងព្រះចន្ទ។

បណ្ដារូបថតរបស់ក្រុមស្រាវជ្រាវខាងលើ ត្រូវបានបង្កើតឡើងដោយការប្រើប្រាស់តេឡេស្កុប Green Bank (GBT) ដែលមានអង្កត់ផ្ចិត 100 ម៉ែត្រ នៅ Virginia ខាងលិច ដែលជាតេឡេស្កុបវិទ្យុអាចបង្វែរទិសធំជាងគេបង្អស់លើពិភពលោក នេះបើតាមអ្នកគ្រប់គ្រងរ៉ាដានៅ ស្ថានីយសង្កេត Green Bank និងស្ថានីយជាតិសង្កេតតារាសាស្ត្រដោយតេឡេស្កុបវិទ្យុ (NRAO)។ GBT បាញ់រលកវិទ្យុបំភ្លឺតំបន់គោលដៅនៅលើព្រះចន្ទ។ រលកចំណាំងប្លាតរបស់វាត្រូវបានប្រមូលដោយបណ្ដុំតេឡេស្កុបវិទ្យុចំនួន 4 នៅមូលដ្ឋាន Very Long Baseline Array ក្នុងតំបន់ Hilo រដ្ឋ Hawaii។

រូបភាពច្បាស់បំផុតស្ដីពីផ្ទៃរបស់ព្រះចន្ទ ដែលថតបានពីផែនដី។ ក្នុងរូបនេះគឺជាទីតាំងចុះចតនៃបេសកកម្ម Apollo 15 របស់ ណាសា

ក្នុងការថតរូប ឧបករណ៍រ៉ាដាមួយគ្រឿងនៅលើ GBT បញ្ជូនអគ្គិសនីកម្លាំង 700 វ៉ាត់ ដែលស្មើនឹងឧបករណ៍មួយគ្រឿងនៅផ្ទះបាយ ឬអំពូលភ្លើងមួយកញ្ចុំ។ ប៉ុន្តែ វាអាចមើលឃើញទីតាំងទំហំ 1.5 ម៉ែត្រក្រឡា នៅជុំវិញតំបន់ចុះចតរបស់យានអវកាស Apollo 15 និងវត្ថុទំហំ 5 ម៉ែត្រនៅឯមាត់រណ្ដៅ Tycho។

អង់តែននៃតេឡេស្កុបវិទ្យុមួយនៅ California ខាងជើង គឺជាតេឡេស្កុបមួយក្នុងចំណោម 10 របស់ប្រព័ន្ធ Very Long Baseline Array

ក្រុមអ្នកគ្រប់គ្រងឧបករណ៍ខាងលើមានបំណងអភិវឌ្ឍកំណែលំដាប់ខ្ពស់បំផុតសម្រាប់ឧបករណ៍ខាងលើ ដែលនឹងអនុញ្ញាតឱ្យបញ្ជូនរលកវិទ្យុកម្លាំងខ្លាំងជាងនេះ 700 ដង (500 គីឡូវ៉ាត់)។ ដោយមានថាមពលខ្លាំងកម្រិតនេះ ឧបករណ៍នឹងអាចត្រូវបានប្រើប្រាស់ដើម្បីស្រាវជ្រាវភូគព្ភសាស្ត្ររបស់ព្រះចន្ទ និងស្វែងរកបំណែកសំរាមអវកាស ក៏ដូចជាកំណត់ទីតាំងរបស់អាចម៍ផ្កាយដែលអាចគំរាមកំហែងដល់ផែនដី។ ប្រការនេះនឹងអាចឱ្យអ្នកវិទ្យាសាស្ត្រនៅ GBT ប្រើឧបករណ៍ប្រភេទខាងលើជំនួសស្ថានីយសង្កេតតារា Arecibo នៅ Puerto Rico ដែលបានដួលរលំកាលពីឆ្នាំ 2020៕

January 13, 2023

អ្នកជំនាញចិន ណែនាំថា «ពុំគួរទៅសួរសុខទុក្ខមនុស្សចាស់ក្នុងរដូវចូលឆ្នាំ»

ក្រុមអ្នកជំនាញផ្នែកសុខាភិបាលលំដាប់កំពូលៗនៅប្រទេសចិន ណែនាំដល់មនុស្សគ្រប់គ្នាថា មិនគួរទៅសួរសុខទុក្ខមនុស្សវ័យចំណាស់នៅក្នុងរដូវចូលឆ្នាំចិន នៅពេលដែលកូវីដ-19 ផ្ទុះឆ្លងរាលដាលខ្លាំង។

ការណែនាំនេះបានក្លាយជាប្រធានបទដែលទទួលបានការចូលអានច្រើនជាងគេបំផុតនៅលើបណ្ដាញសង្គម Weibo ថ្ងៃនេះ។ តាមការរំពឹងទុក មនុស្សរាប់សិបលាននាក់នឹងធ្វើដំណើរពីបណ្ដាទីក្រុង ទៅកាន់ស្រុកកំណើតនៅជនបទ ក្នុងឱកាសបុណ្យចូលឆ្នាំប្រពៃណីចិន នាពេលខាងមុខ។

«នេះគឺជាការណែនាំដ៏សមស្រប។ ទៅស្រុក ឬទុកសុខភាពរបស់មនុស្សចាស់ជាធំ» អ្នកលេងបណ្ដាញសង្គមម្នាក់សរសេរលើ Weibo ដូច្នេះ។ ចំណែកម្នាក់ទៀតសរសេរថា មិនហ៊ានទៅសួរសុខទុក្ខលោកយាយទេ តែនឹងទុកជំនូនជូនគាត់នៅខាងមុខទ្វារ និងបន្ថែមថា «ជិតដល់ចូលឆ្នាំហើយ ខ្ញុំខ្លាចថា លោកយាយគាត់ឯកា»។

ការផ្លាស់ទីរបស់ប្រជាជនចិនក្នុងរដូវបុណ្យចូលឆ្នាំប្រពៃណីជាតិ អាចប៉ះពាល់ដល់សុខភាពរបស់មនុស្សវ័យចំណាស់ ពេលឆ្លងជំងឺកូវីដ-19

អង្គការសុខភាពពិភពលោក (WHO) កាលពីថ្ងៃទី 11 មករា បានឱ្យដឹងថា នឹងពិបាកខ្លាំងណាស់ក្នុងការគ្រប់គ្រងវីរុសក្នុងរដូវបុណ្យទាន ពេលដែលប្រទេសចិនមានមនុស្សយ៉ាងច្រើនត្រូវធ្វើដំណើរទៅស្រុកកំណើត។

អាជ្ញាធរចិនបានព្យាករថា ក្នុងរដូវបុណ្យចូលឆ្នាំចិនឆ្នាំនេះ នឹងមានមនុស្សធ្វើដំណើរប្រមាណ 2.1 ពាន់លានជើងនៅទូទាំងប្រទេស។ ក្រុមអ្នកជំនាញបានសង្កត់ធ្ងន់ថា ការផ្លាស់ទីដ៏ធំនេះអាចធ្វើឱ្យមានការឆ្លងរាលដាលជំងឺកាន់តែច្រើន និងបង្កគ្រោះថ្នាក់ដល់មនុស្សវ័យចំណាស់ ក៏ដូចជាក្រុមមនុស្សដែលមិនទាន់បានចាក់វ៉ាក់សាំង៕

January 12, 2023

ប្រធានាធិបតី ហ្សែនឡែនស្គី៖ ច្បាស់ហើយថា ភាគីណាជាអ្នកឈ្នះសង្គ្រាមនៅអ៊ុយក្រែន

ប្រធានាធិបតីអ៊ុយក្រែន លោក ហ្សែនឡែនស្គី អះអាងថា បានដឹងច្បាស់ហើយថាខាងណាជាអ្នកឈ្នះសង្គ្រាមនៅ អ៊ុយក្រែន ហើយយល់ថា សង្គ្រាមលោកលើកទីបីនឹងមិនអាចកើតឡើង។

«ពេលនេះជាឆ្នាំ 2023 សង្គ្រាមនៅ អ៊ុយក្រែន នៅតែមិនទាន់បានបញ្ចប់ ប៉ុន្តែស្ថានការណ៍បានប្រែប្រួល ហើយខាងណាជាអ្នកដណ្ដើមបានជ័យជម្នះក៏បានច្បាស់ហើយដែរ» ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡែនស្គី អះអាងនៅក្នុងសេចក្ដីថ្លែងការណ៍ដែលបានចាក់ផ្សាយក្នុងព្រឹត្តិការណ៍ប្រគល់ពានរង្វាន់ផែនដីមាស (Golden Globes) នៅ សហរដ្ឋអាម៉េរិក កាលពីថ្ងៃទី 10 មករា។

លោក ហ្សេឡែនស្គី ហាក់ជឿជាក់ថា កងកម្លាំងរបស់អ៊ុយក្រែន ដណ្ដើមបានជ័យជម្នះលើរុស្ស៊ី ដែលទំនងជាចង់និយាយអំពីការវាយបកដ៏ខ្លាំងក្លារបស់ ទីក្រុងកៀវ កាលពីពេលថ្មីៗនេះដែលបានជួយឱ្យពួកគេរំដោះបានតំបន់ជាច្រើនដែលកន្លងមកធ្លាប់ត្រូវបានកាន់កាប់ដោយទីក្រុងមូស្គូ។

មេដឹកនាំអ៊ុយក្រែន បន្តថា នឹងមិនមានសង្គ្រាមលោកលើកទីបីឡើយ បន្ទាប់ពីបានលើកឡើងថា សង្គ្រាមលោកលើកទីមួយបានសម្លាប់មនុស្សរាប់លាននាក់ និងសង្គ្រាមលោកលើកទីពីរក៏បានធ្វើឱ្យមនុស្សរាប់សិបលាននាក់បាត់បង់ជីវិត។

លោក ហ្សេឡែនស្គី ក៏បានថ្លែងអំណរគុណដល់អ្នកទាំងឡាយដែលគាំទ្រសេរីភាពសម្រាប់ អ៊ុយក្រែន និងហៅប្រការនោះថាជា «ការប្រយុទ្ធរួមរបស់យើងដើម្បីសេរីភាព ប្រជាធិបតេយ្យ ដើម្បីសិទ្ធិរស់រានមានជីវិត សិទ្ធិស្រលាញ់គ្នា»។

លោក ហ្សេឡែនស្គី បានថ្លែងការណ៍នៅក្នុងព្រឹត្តិការណ៍វប្បធម៌មួយចំនួនដើម្បីប្រមូលការគាំទ្រសម្រាប់អ៊ុយក្រែន។ កាលពីឆ្នាំមុន មេដឹកនាំអ៊ុយក្រែនក៏បានបង្ហាញវត្តមាននៅក្នុងព្រឹត្តិការណ៍ប្រគល់រង្វាន់ Grammy ផងដែរ។ ក៏ប៉ុន្តែ ភាគីខាង Oscar វិញ បានបដិសេធសំណើដើម្បីឱ្យលោក ហ្សេឡែនស្គី ធ្វើសេចក្ដីថ្លែងការណ៍។

សង្គ្រាមនៅអ៊ុយក្រែន បានឈានចូលដល់ខែទី 11 ហើយប្រទេសនេះបានទទួលការគាំទ្រយ៉ាងសកម្មពីបណ្ដាប្រទេសលោកខាងលិច។ សារព័ត៌មានរុស្ស៊ី TASS បានឱ្យដឹងថា ជំនួយផ្នែកយោធាសរុបរបស់លោកខាងលិចសម្រាប់អ៊ុយក្រែន ចាប់ពីចុងខែកុម្ភៈ 2022 ដល់បច្ចុប្បន្ន គឺជិតស្មើនឹង 95% នៃកញ្ចប់ថវិកាការពារជាតិរបស់រុស្ស៊ី ក្នុងឆ្នាំ 2021៕

January 12, 2023

ណាសា (NASA) រកឃើញពិភពថ្មី ទំហំប៉ុនផែនដី អាចមានទឹករាវ និងជីវិត

ទីភ្នាក់ងារអវកាសអាម៉េរិក (NASA) ប្រកាសថា បានរកឃើញពិភពខាងក្រៅប្រព័ន្ធព្រះអាទិត្យដែលមានចម្ងាយពីផែនដីប្រហែល 100 ឆ្នាំពន្លឺ ស្ថិតក្នុងតំបន់ដែលមានអំណោយផលសម្រាប់ការកកើតជីវិត។

វត្ថុអវកាសដែលមានឈ្មោះថា TOI 700 e អាចជាពិភពថ្មមួយដែលមានទំហំស្មើនឹង 95% ធៀបនឹងផែនដី។ នេះគឺជាពិភពទីបីដែលត្រូវបានរកឃើញនៅជុំវិញកូនផ្កាយ TOI 700។ ពិភពទាំងអស់នេះសុទ្ធតែរកឃើញដោយផ្កាយរណបសង្កេតភពក្រៅប្រព័ន្ធព្រះអាទិត្យ TESS របស់ ណាសា នេះបើតាមរបាយការណ៍ដែលបានប្រកាសកាលពីថ្ងៃទី 10 មករា នៅក្នុងកិច្ចប្រជុំលើកទី 241 របស់សមាគមតារាសាស្ត្រអាម៉េរិក នៅ Seattle។

ពិភពមួយផ្សេងទៀតនៅក្នុងប្រព័ន្ធផ្កាយខាងលើ ត្រូវបានរកឃើញកាលពីឆ្នាំ 2020 និងត្រូវបានដាក់ឈ្មោះឱ្យថា TOI 700 d ក៏មានទំហំប្រហែលនឹងផែនដី។ ទាំង TOI 700 d និង TOI 700 e សុទ្ធតែស្ថិតនៅក្នុងតំបន់ដែលអាចឱ្យជីវិតរស់នៅបាន ដែលនេះមានន័យថា គម្លាតរបស់ពួកវាពីផ្កាយមេគឺអនុញ្ញាតឱ្យមានវត្តមានទឹករាវហូរនៅលើផ្ទៃខាងលើ។ វត្តមានរបស់ទឹករាវ បង្ហាញថា ពិភពទាំងនេះអាចកំពុង ឬធ្លាប់មានវត្តមានជីវិត។

ក្នុងចំណោមពិភពចំនួន 4 របស់ប្រព័ន្ធផ្កាយ TOI 700 ពិភព TOI 700 b ស្ថិតនៅក្បែរផ្កាយមេបំផុត។ TOI 700 b មានទំហំស្មើនឹង 90% ធៀបនឹងផែនដី និងចំណាយពេល 10 ថ្ងៃក្នុងការគោចរបានមួយជុំផ្កាយមេ។ បន្ទាប់មកគឺ TOI 700 c ធំជាងផែនដី 2.5 ដង ហើយមួយឆ្នាំរបស់វាស្មើនឹង 16 ថ្ងៃ។

ពិភពទីពីរ និងទីបីគឺ TOI 700 d និង TOI 700 e ស្ថិតក្នុងតំបន់ដែលអាចឱ្យមានវត្តមានជីវិត ហើយមួយឆ្នាំរបស់ពួកវាគឺ 37 ថ្ងៃ និង 28 ថ្ងៃ។ ពិភព TOI 700 e ដែលទើបត្រូវបាន ណាសា ប្រកាសកាលពីម្សិលមិញ គឺស្ថិតនៅចន្លោះពិភព TOI 700 c និង TOI 700 d៕

January 11, 2023

ប្រជាជននៅតូក្យូ ហាក់មិនរីករាយនឹងការបោះបង់ទីក្រុងទៅនៅជនបទ បើទោះរដ្ឋផ្ដល់ប្រាក់ឧបត្ថម្ភច្រើន

រាជធានីតូក្យូ របស់ប្រទេសជប៉ុន បង្កើនខ្ទង់ប្រាក់ឧបត្ថម្ភដើម្បីលើកទឹកចិត្តឱ្យប្រជាជនរើទៅរស់នៅឯជនបទ ដើម្បីកាត់បន្ថយសម្ពោធនៅតំបន់ស្នូលរបស់រាជធានី ប៉ុន្តែ មិនអាចទាក់ទាញបានចំណាប់អារម្មណ៍ច្រើននោះទេ។

តូក្យូមានផែនការឧបត្ថម្ភប្រាក់ 1 លានយ៉េន (7,500 ដុល្លារអាម៉េរិក) ដល់ក្មេងអាយុក្រោម 18 ឆ្នាំនៅក្នុងគ្រួសារនានា ដែលព្រមរើចេញពី 23 ខណ្ឌនៅកណ្ដាលរាជធានី ទៅតាំងលំនៅយ៉ាងតិច 5 ឆ្នាំ នៅក្នុងតំបន់ជនបទក្បែររាជធានី។

ខ្ទង់ប្រាក់ឧបត្ថម្ភនេះខ្ពស់ជាង 3 ដង ធៀបនឹងខ្ទង់ប្រាក់ដែលអនុវត្តតាំងពីឆ្នាំ 2019 ធ្វើឱ្យខ្ទង់ប្រាក់ជំនួយសម្រាប់គ្រួសារនានាឡើងដល់ 3 លានយ៉េន។ ផែនការថ្មីនេះត្រូវបានគេរំពឹងថា នឹងទាក់ទាញគ្រួសារបានប្រហែល 10,000 គ្រួ ត្រឹមឆ្នាំ 2027 ជួយឱ្យដង់ស៊ីតេប្រជាជនថយចុះ និងកាត់បន្ថយសម្ពាធលើសាលារៀន មន្ទីរពេទ្យ និងមូលដ្ឋាននានានៅរាជធានី។

23 ខណ្ឌនៅកណ្ដាលរាជធានីតូក្យូ គឺជាកន្លែងរស់នៅរបស់ប្រជាជនជាង 9.2 លាននាក់ និងមានដង់ស៊ីតេប្រជាជនជាង 14,400 នាក់/គីឡូម៉ែត្រក្រឡា។ ក្នុងចំណោមប្រជាជន 125 លាននាក់នៅជប៉ុន មានប្រហែល 35 លាននាក់ ស្មើនឹង 28% កំពុងរស់នៅក្នុងរាជធានីតូក្យូ និងតំបន់ក្បែរខាង ធ្វើឱ្យទីនេះក្លាយជាតំបន់ទីក្រុងធំជាងគេមួយលើពិភពលោក។

ប្រជាជនជាច្រើនដែលរស់នៅក្នុងទីក្រុងតូក្យូ មានចំណាប់អារម្មណ៍ ឬចូលចិត្តរស់នៅបែបស្រុកចំការ ប៉ុន្តែពួកគេហាក់ចាត់ទុកថា ជីវភាពបែបនោះគឺសម្រាប់តែអ្នកចូលនិវត្តន៍ប៉ុណ្ណោះ។ គ្រួសារថ្មីភាគច្រើនយល់ថា ការរស់នៅក្នុងទីក្រុងនៅតែជាកន្លែងល្អបំផុតដែលផ្ដល់ឱកាសច្រើនដល់ការសិក្សា ធ្វើការ រកស៊ី និងកំសាន្ត។

យោងតាម Nikkei កម្មវិធីខាងលើរបស់តូក្យូ ទាក់ទាញបាន 71 គ្រួសារចូលរួមកាលពីឆ្នាំ 2019។ តួលេខនេះបានកើនដល់ 290 គ្រួសារនៅឆ្នាំ 2020 និង 1,184 គ្រួសារនៅឆ្នាំ 2021៕

January 11, 2023

មនុស្សជាង 80 នាក់បានស្លាប់ និងរងរបួស នៅក្នុងបាតុកម្មប្រឆាំងរដ្ឋាភិបាលប៉េរូ

ហ្វូងបាតុករប្រឆាំងរដ្ឋាភិបាលប៉េរូ ស្វែងរកវិធីសម្រុកចូលអាកាសយានដ្ឋាននៅទីក្រុង Juliaca និងបានប៉ះទង្គិចជាមួយក្រុមប៉ូលិស បណ្ដាលឱ្យមានមនុស្សស្លាប់យ៉ាងតិច 17 នាក់។

បាតុកររាប់ពាន់នាក់ដែលខឹងខ្លាំង កាលពីថ្ងៃទី 09 មករា បានទៅដល់ព្រលានយន្តហោះ Juliaca នៅទីក្រុង Juliaca ក្នុងតំបន់ Puno ភាគខាងត្បូងប្រទេសប៉េរូ ដើម្បីប្រឆាំងនឹងអាជ្ញាធររបស់ប្រធានាធិបតីថ្មី Dina Boluarte និងទាមទារឱ្យដោះលែងអតីតប្រធានាធិបតី Pedro Castillo។

អំពើហិង្សាបានកើតឡើងនៅពេលមនុស្សប្រហែល 2,000 នាក់ វាយប្រហារលើកម្លាំងប៉ូលិស និងទាហានដែលកំពុងការពារអាកាសយានដ្ឋាន។ កាលពីចុងសប្ដាហ៍កន្លង ហ្វូងបាតុករក៏បានស្វែងរកវិធីដើម្បីសម្រុកចូលទៅក្នុងព្រលានយន្តហោះ ប៉ុន្តែមិនបានសម្រេច។

ស្នូរផ្ទុះរបស់គ្រាប់កាំភ្លើងបានលាន់ឡើងនៅពេលហ្វូងបាតុករគប់ដុំថ្មសំដៅប៉ូលិស។ នាយកដ្ឋានសុខាភិបាលតំបន់ Puno បានឱ្យដឹងថា យ៉ាងហោចណាស់មានមនុស្ស 17 នាក់បានស្លាប់ និង 68 នាក់រងរបួស ក្រោយការប៉ះទង្គិចគ្នា ក្នុងនោះមានសាកសពខ្លះមានស្នាមគ្រាប់កាំភ្លើង។

AFP ដកស្រង់សម្ដីរបស់បាតុករម្នាក់ឱ្យដឹងថា «ប៉ូលិសបាញ់ប្រហារលើពួកខ្ញុំ»។ ចំណែក Oscar Caceres ដែលជាអភិបាលក្រុង Juliaca បាននិយាយថា «ជនជាតិប៉េរូ កំពុងសម្លាប់គ្នា។ ខ្ញុំសូមឱ្យគ្រប់គ្នាស្ងប់ចិត្ត»។

ចំនួនមនុស្សស្លាប់ក្នុងករណីថ្មីនេះ បានធ្វើឱ្យតួលេខសរុបនៃអ្នកស្លាប់ក្នុងការប៉ះទង្គិចគ្នារវាងបាតុករ និងសមត្ថកិច្ចប៉េរូ ដែលបានផ្ទុះឡើងតាំងពីដើមខែធ្នូ 2022 កើនឡើងដល់ 39 នាក់។

សភាប៉េរូ បានអនុម័តបណ្ដេញប្រធានាធិបតី Castillo ចេញពីអំណាចកាលពីថ្ងៃទី 07 ធ្នូ 2022 បន្ទាប់ពីលោកបានប្រកាសរំសាយសភាដើម្បីទប់ស្កាត់ការថ្កោលទោសរបស់សភាមកលើរូបលោក ទាក់ទងនឹងអំពើពុករលួយ។

លោក Castillo ត្រូវបានចាប់ខ្លួននៅពេលលោកកំពុងធ្វើដំណើរទៅកាន់ស្ថានទូតម៉ុកស៊ិក ជាទីដែលលោកសុំសិទ្ធិជ្រកកោន។ លោកស្រី Boluarte ដែលធ្លាប់កាន់តំណែងអនុប្រធានាធិបតីក្នុងសម័យរបស់លោក Castillo បានឡើងកាន់អំណាចជំនួស។ ចាប់តាំងពីឆ្នាំ 2016 ប្រទេសប៉េរូ បានឆ្លងកាត់ប្រធានាធិបតីចំនួន 6 រូបរួចមកហើយ៕

January 10, 2023

ថៃ «លុបចោល» ការតម្រូវឱ្យភ្ញៀវបរទេសបង្ហាញលិខិតបញ្ជាក់ការចាក់វ៉ាក់សាំងកូវីដ-19 មុនពេលឱ្យចូលទឹកដី

កាលពីថ្ងៃទី 09 មករា 2023 រាជរដ្ឋាភិបាលថៃ បានវិលទៅរកសភាពការណ៍ដើម នៅពេលលុបចោលការតម្រូវឱ្យភ្ញៀវបរទេសបង្ហាញលិខិតបញ្ជាក់ការចាក់វ៉ាក់សាំងបង្ការជំងឺកូវីដ-19 ដែលត្រូវបានប្រកាសកាលពីចុងសប្ដាហ៍កន្លង។

យោងតាម SCMP អាជ្ញាធរគ្រប់គ្រងអាកាសចរណ៍ស៊ីវិលថៃ (CAAT) កាលពីថ្ងៃទី 07 មករា 2023 បានប្រកាសវិធានការថ្មីដើម្បីទប់ស្កាត់កូវីដ-19 ដែលត្រូវអនុវត្តចំពោះភ្ញៀវបរទេស បន្ទាប់ពី ប្រទេសចិន បានបើកទ្វារព្រំដែនជាផ្លូវការ ក្រោយការបិទអស់រយៈពេលប្រហែល 3 ឆ្នាំ។

វិធានការដែលបានប្រកាសកាលពីចុងសប្ដាហ៍កន្លង រួមមានជាអាទិ៍ ការតម្រូវឱ្យភ្ញៀវបរទេសបង្ហាញលិខិតចាក់វ៉ាក់សាំងពេញលេញ ភស្ដុតាងបញ្ជាក់ពីការចាក់វ៉ាក់សាំង ឬលិខិតបញ្ជាក់មូលហេតុនៃការមិនទាន់ចាក់វ៉ាក់សាំង លិខិតបញ្ជាក់អំពីការជាសះស្បើយពីជំងឺកូវីដ-19 ក្នុងរង្វង់ 6 ខែ នៅមុនពេលត្រូវបានអនុញ្ញាតឱ្យចូលមកទឹកដីថៃ។

CAAT បានឱ្យដឹងថា វិធានការខាងលើនឹងមានសុពលភាពចាប់ពីថ្ងៃទី 09 មករា និងអូសបន្លាយពេលយ៉ាងតិចត្រឹមដំណាច់ខែនេះ ដើម្បីត្រៀមសម្រាប់ទទួលភ្ញៀវពី ប្រទេសចិន។

ក៏ប៉ុន្តែ មកដល់ថ្ងៃទី 09 មករា ប្រកាសថ្មីពី ក្រសួងសុខាភិបាលថៃ បានឱ្យដឹងថា ប្រទេសនេះបានលុបចោលវិធានការទប់ស្កាត់កូវីដ-19 ខាងលើនេះហើយ។ ក្រុមអ្នកជំនាញរបស់ ប្រទេសថៃ បានបញ្ជាក់ថា ការតម្រូវឱ្យភ្ញៀវបរទេសបង្ហាញភស្ដុតាងស្ដីពីការចាក់វ៉ាក់សាំងគឺជារឿងមិនចាំបាច់ ដោយសារថា ការចាក់វ៉ាក់សាំងនៅទូទាំងពិភពលោកមានអត្រាខ្ពស់ នេះបើតាម SCMP។

ក្រសួងសុខាភិបាលថៃ បញ្ជាក់ថា ទេសចរបរទេសដែលមិនទាន់បានចាក់វ៉ាក់សាំងពេញលេញ ក៏ត្រូវបានអនុញ្ញាតឱ្យចូលទឹកដីថៃ ដោយមិនត្រូវរងការកំណត់អ្វីឡើយ។ ប៉ុន្តែ ភ្ញៀវត្រូវតែបង្ហាញលិខិតធានារ៉ាប់រងផ្នែកសុខភាពសម្រាប់ការព្យាបាលជំងឺកូវីដ-19 ដែលប្រការនេះនឹងអនុវត្តចំពោះភ្ញៀវដែលឆ្លងកាត់ប្រទេសដដែលតម្រូវឱ្យបង្ហាញលិខិតបញ្ជាក់ការធ្វើតេស្តអវិជ្ជមានកូវីដ-19 មុនពេលអនុញ្ញាតឱ្យចូលប្រទេស៕

January 10, 2023

ផ្កាយដុះកន្ទុយហោះក្បែរផែនដីបំផុតក្នុងអំឡុង 50,000 ឆ្នាំ

ផ្កាយដុះកន្ទុយ C/2022 E3 (ZFT) អាចត្រូវបានមើលឃើញដោយភ្នែកទទេនៅពេលវាហោះក្បែរផែនដីបំផុតនៅក្នុងខែមករា និងកុម្ភៈ 2023 ក្រោយរយៈពេល 50,000 ឆ្នាំ។

អ្នកថតរូប John Chumack របស់ទំព័រ GalacticImages.com កាលពីថ្ងៃទី 07 មករា ថតបានផ្កាយដុះកន្ទុយ C/2022 E3 (ZFT) នៅលើផ្ទៃមេឃពេលយប់របស់ Yellow Spring រដ្ឋ Ohio សហរដ្ឋអាម៉េរិក។ យោងតាម Chumack អ្នកដែលចូលចិត្តវិស័យតារាសាស្ត្រ អាចមើលឃើញផ្កាយដុះកន្ទុយ C/2022 E3 នេះ រហូតដល់ខែកុម្ភៈឆ្នាំ 2023។

យោងតាម Space ផ្កាយដុះកន្ទុយនេះមានកន្ទុយចំនួនពីរ ក្នុងនោះមានកន្ទុយមួយវែងជាងគេ និងមានពណ៌បៃតង។ ក្បាលរបស់វាមានពណ៌ខៀវ ដោយសារមានផ្ទុកសារធាតុ dicarbon។

ទំព័រ NPR បានឱ្យដឹងថា ផ្កាយដុះកន្ទុយគឺជាវត្ថុអវកាសដែលមានផ្ទុកឧស្ម័ន ថ្ម និងធូលីដែលកករឹង។ ប៉ុន្តែ នៅពេលពួកវាហោះមកក្បែរព្រះអាទិត្យ ពួកវានឹងបំភាយឧស្ម័ន និងធូលី ដោយសារតែត្រូវកម្ដៅ នាំឱ្យមានបាតុភូតដុះកន្ទុយវែងព្រោះតែចំណាំងប្លាតពន្លឺថ្ងៃ។

C/2022 E3 (ZTF) ត្រូវបានរកឃើញដំបូងក្នុងឆ្នាំ 2022 ដោយតេឡេស្កុប Schmidt នៅលើភ្នំ Palomar ដែលពេលនោះវាស្ថិតនៅត្រង់កញ្ចុំផ្កាយ Aquila និងឆ្ងាយជាង 5 ដង ធៀបនឹងចម្ងាយពីផែនដីទៅព្រះអាទិត្យ។ ផ្កាយដុះកន្ទុយនេះនឹងស្ថិតនៅត្រង់កញ្ចុំផ្កាយ Camelopardalis នៅព្រលប់ថ្ងៃទី 01 កុម្ភៈ 2023។

យោងតាម ណាសា ផ្កាយដុះកន្ទុយ C/2022 E3 (ZTF) មានវដ្ដប្រហែល 50,000 ឆ្នាំ ដែលប្រការនេះមានន័យថា មុនពេលវាមានគម្លាតពីព្រះអាទិត្យប្រហែល 160 លានគីឡូម៉ែត្រនៅថ្ងៃទី 12 មករា និងមានចម្ងាយពីផែនដី 42 លានគីឡូម៉ែត្រនៅថ្ងៃទី 02 កុម្ភៈ វាទំនងជាធ្លាប់បានហោះមកដល់គម្លាតនេះជាលើកចុងក្រោយកាលពីយុគថ្មបំបែក៕

January 9, 2023

ទិដ្ឋភាព «ថ្ងៃហិង្សា» នយោបាយ នៅរដ្ឋធានីរបស់ប្រទេសប្រេស៊ីល

បាតុកររាប់ពាន់នាក់ដែលគាំទ្រអតីតប្រធានាធិបតីប្រេស៊ីល លោក Bolsonaro នាំគ្នាសម្រុកចូលក្នុងវិមានសភា រួមនឹងអគារសំខាន់នានារបស់រដ្ឋាភិបាលនៅ រដ្ឋធានី នាំឱ្យកម្លាំងប៉ូលិសប្រើប្រាស់ឧទ្ធម្ភាគចក្រ និងគ្រាប់បែកផ្សែងបង្ហូរទឹកភ្នែកដើម្បីទប់ទល់។

ហ្វូងបាតុករដែលមានប្រៀបជាងកម្លាំងប៉ូលិស កាលពីថ្ងៃទី 08 មករា បានបំបែកទ្វារ និងបង្អួចដើម្បីចូលទៅក្នុងវិមានសភា ហើយវាយបំផ្លាញការិយាល័យរបស់តំណាងរាស្ត្រ។

អំពើហិង្សាបានផ្ទុះឡើងនៅពេលហ្វូងបាតុករបានសម្ដែងការគាំទ្រចំពោះអតីតប្រធានាធិបតីប្រេស៊ីល វ័យ 67 ឆ្នាំ លោក Bolsonaro។ លោក Bolsonaro កាលពីខែតុលា 2022 បានបរាជ័យនៅចំពោះមុខគូប្រជែង Luiz Inacio Lula da Silva ក្នុងការបោះ ដោយទទួលបានសំឡេងឆ្នោតគាំទ្រ 49.1% ទល់នឹង 50.9%។ លោក Bolsonaro មិនព្រមចាញ់ ប៉ុន្តែក៏មិនបានរារាំងដំណើរការប្រគល់អំណាចឱ្យលោក Lula។

មិនត្រឹមតែបានរំលោភចូលទៅក្នុងវិមានសភានោះទេ ក្រុមបាតុករថែមទាំងបានសម្រុកចូលវិមានប្រធានាធិបតី និងទីស្នាក់ការរបស់តុលាការកំពូលទៀតផង។ ក្រុមបាតុករឱ្យដឹងថា ពួកគេចង់ឱ្យអាជ្ញាធរប្រេស៊ីល ពិនិត្យឡើងវិញនូវ «ការបោះឆ្នោតដែលមានការលួចបន្លំ»។

លោក Lula បានចោទថា លោក Bolsonaro គឺជាអ្នកនៅពីក្រោយអំពីហិង្សានេះ។ «ពួកគេបានធ្វើនូវរឿងដែលមិនធ្លាប់មានក្នុងប្រវត្តិសាស្ត្ររបស់ប្រទេសជាតិ» លោក Lula ថ្លែងដូច្នេះ និងបន្តថា អ្នកទាំងឡាយដែលប្រព្រឹត្តអំពើនេះនឹងត្រូវបានដាក់ទោសតាមច្បាប់។

អំពើហិង្សាខាងលើនេះបាននាំឱ្យមានការរិះគន់ និងថ្កោលទោសជាបន្តបន្ទាប់ពីសហគមន៍អន្តរជាតិ ក្នុងនោះមានទាំងមេដឹកនាំរបស់ សហរដ្ឋអាម៉េរិក សហភាពអឺរ៉ុប ជាដើម។ល។

អំពើហិង្សានេះកំពុងតែបង្កឧបសគ្គចំពោះលោក Lula ដែលទើបតែបានស្បថចូលកាន់តំណែងប្រធានាធិបតីកាលពីថ្ងៃទី 01 មករា 2023 និងបានសន្យាថា នឹងបង្រួបបង្រួមជាតិដែលកំពុងត្រូវបានបំបែកបំបាក់ដោយលទ្ធិប្រជាកលនិយម (Populism) របស់អតីតប្រធានាធិបតីប្រេស៊ីល Bolsonaro៕

January 9, 2023

Category: អន្តរជាតិ