អន្តរជាតិ - La Reine Media

ទ័ពអាកាសអាម៉េរិកធ្វើតេស្តជោគជ័យលើ «អាវុធល្បឿនជាងសំឡេង»

ទ័ពអាកាសអាម៉េរិកបានធ្វើតេស្តរួចរាល់ដោយជោគជ័យនូវអាវុធល្បឿនជាងសំឡេង HAWC ដើម្បីបម្រើដល់កម្មវិធីអភិវឌ្ឍអាវុធដទៃទៀត។

អង្គភាពស្រាវជ្រាវគម្រោងការពារទំនើប (DARPA) របស់អាម៉េរិក កាលពីថ្ងៃទី 30 មករា ប្រកាសថា បានសហការជាមួយទ័ពអាកាសអាម៉េរិក បញ្ចប់ដំណាក់កាលសាកល្បងចុងក្រោយស្ដីពីកម្មវិធីអាវុធល្បឿនលឿនជាងសំឡេងដែលប្រើប្រាស់ម៉ាស៊ីនស្រូបឧស្ម័នធម្មជាតិ (HAWC)។

ក្នុងការធ្វើតេស្ត កំណែមីស៊ីលរបស់ក្រុមហ៊ុន Lockheed Martin បំពាក់ម៉ាស៊ីន Sramjet Aerojet Rockedtdyne ដែលមានតួនាទីបង្ហាប់ឧស្ម័នជាបន្តបន្ទាប់ដើម្បីផ្លាស់ទីក្នុងល្បឿនលឿនជាងសំឡេង បានទទួលជោគជ័យគ្រប់គោលដៅដំបូងរបស់កម្មវិធី។

«ការសាកល្បងនេះរបស់ HAWC នឹងផ្ដល់ទិន្នន័យសំខាន់សម្រាប់ការប្រឹងប្រែងអភិវឌ្ឍបច្ចេកវិទ្យាល្បឿនលឿនជាងសំឡេងរបស់មជ្ឈមណ្ឌលស្រាវជ្រាវទ័ពអាកាស (AFRL)» DARPA ឱ្យដឹងដូច្នេះ។

កំណែគំរូនៃមីស៊ីលល្បឿនលឿនជាងសំឡេង HAWC ដែលផលិតដោយ Lockheed Martin អាចហោះហើរក្នុងល្បឿន Mach 5 (លឿនជាងសំឡេង 5 ដង), កម្ពស់ជាង 18,000 ម៉ែត្រ និងរយៈចម្ងាយជាង 555 គីឡូម៉ែត្រ នៅក្នុងការធ្វើតេស្តចុងក្រោយ។ យោងតាម DARPA ការសាកល្បងនេះបានបង្ហាញថា សមត្ថភាព និងប្រសិទ្ធភាពរបស់មីស៊ីលគំរូ HAWC បានសម្រេចជាស្ថាពរ។

កម្មវិធី HAWC កំពុងឈានចូលដល់ដំណាក់កាលចុងក្រោយ ហើយគ្រប់ភាគីដែលចូលរួមកំពុងវិភាគទិន្នន័យដែលបានពីការសាកល្បង និងនៅតែមានឱកាសក្នុងការកែលំអបច្ចេកវិទ្យាបន្ថែមទៀត។ ក្រោយពីកម្មវិធី HAWC បានបញ្ចប់ សហរដ្ឋអាម៉េរិកមានមីស៊ីលល្បឿនលឿនជាងសំឡេងពីរប្រភេទដែលត្រូវអភិវឌ្ឍឱ្យបានពេញលេញ និងកែលំអបន្ថែមទៀតនាពេលអនាគត ក្នុងនោះ មួយប្រភេទគឺជារបស់ Lockheed Martin និងមួយទៀតគឺជារបស់ Raytheon។

DARPA បានរៀបគម្រោងអភិវឌ្ឍពេញលេញនូវអាវុធគំរូដែលមានល្បឿនលឿនជាងសំឡេងក្នុងកម្មវិធី «បន្ថែមឱកាសជាមួយនឹង HAWC (MOHAWC)» ដែលក្នុងនោះមានទាំងការច្នៃ និងសាកល្បងមធ្យោបាយដែលមានល្បឿនលឿនជាងសំឡេងដោយយោងទៅតាមបច្ចេកវិទ្យារបស់ HAWC។ មធ្យោបាយ ឬមីស៊ីលទាំងនេះនឹងក្លាយជាគ្រឹះសម្រាប់ការអភិវឌ្ឍអាវុធទំនើបៗនាពេលអនាគត។

កាលពីឆ្នាំ 2021 អតីតឧត្ដមសេនីយ៍យោធាអាម៉េរិកមួយរូបបានទទួលស្គាល់ថា អាម៉េរិកដើរមិនទាន់សភាពការណ៍បច្ចុប្បន្ន បើធៀបនឹងរុស្ស៊ី និងចិន ទាក់ទិននឹងអាវុធល្បឿនលឿនជាងសំឡេង។ អតីតមន្ត្រីយោធារូបនេះអះអាងថា អាម៉េរិកនឹងត្រូវការពេលច្រើនឆ្នាំ ហើយត្រូវចំណាយធនធានច្រើនដើម្បីដណ្ដើមបានតួនាទីនាំមុខគេនៅក្នុងវិស័យនេះ៕

January 31, 2023

អារ៉ាប៊ីសាអូឌីត វិនិយោគប្រាក់ជាង 266 ពាន់លានដុល្លារសម្រាប់វិស័យថាមពលស្អាត

អាជ្ញាធរអារ៉ាប៊ីសាអូឌីត ប្ដេជ្ញាចិត្តជំរុញការផលិតឥន្ធនៈអ៊ីដ្រូសែន និងពង្រីកបណ្ដាញអគ្គិសនីបៃតងដើម្បីចូលរួមកាត់បន្ថយការបំភាយឧស្ម័នកាបូន។

«យើងប្ដេជ្ញាក្លាយជាអ្នកនាំចេញអ៊ីដ្រូសែនធំជាងគេមួយ ក៏ដូចជាផ្គត់ផ្គង់អ៊ីដ្រូសែនស្អាតក្នុងស្រុកនៅក្នុងវិស័យឧស្សាហកម្មធុនធ្ងន់ដើម្បីបង្កើតផលិតផលបៃតង មានជាអាទិ៍ ដែកថែបបៃតង អាលុយមីញូមបៃតង ជីសម្រាប់ដំណាំ និងបណ្ដាផលិតផលដទៃទៀតក្នុងតម្លៃសមរម្យ» ព្រះអង្គម្ចាស់ Abdulaziz bin Salman រដ្ឋមន្ត្រីក្រសួងថាមពលអារ៉ាប៊ីសាអូឌីត ថ្លែងកាលពីថ្ងៃទី 30 មករា នៅក្នុងវេទិកា IKTVA នៅ Dhahran ដែលរៀបចំដោយក្រុមហ៊ុនប្រេង Aramco។

ព្រះអង្គម្ចាស់ Salman ក៏បានឱ្យដឹងថា ខ្ទង់ប្រាក់វិនិយោគតម្លៃជាង 1 ទ្រីលានរីយ៉ាល់ (266.4 ពាន់លានដុល្លារអាម៉េរិក) ក៏ត្រូវបានចំណាយក្នុងបំណងពង្រីក និងធ្វើទំនើបកម្មបណ្ដាញចែកចាយអគ្គិសនី ហើយចុងក្រោយអាចនាំចេញទៅបរទេស។

អារ៉ាប៊ីសាអូឌីតក៏បានកំណត់គោលដៅបង្កើនឱ្យបានទ្វេដងនូវដំណោះស្រាយប្រមូលយកកាបូនផងដែរ។ «យើងនឹងមិនសាងសង់រោងចក្រអគ្គិសនីថ្មីដែលមិនមានប្រព័ន្ធប្រមូលយកកាបូននៅអនាគត»។

បើទោះជាបានកំណត់គោលដៅបំភាយឧស្ម័នកាបូនស្មើនឹងសូន្យនៅឆ្នាំ 2060 ប៉ុន្តែ អារ៉ាប៊ីសាអូឌីត នៅតែពឹងផ្អែកច្រើនទៅលើការនាំចេញប្រេងឆៅ ដែលបានជួយឱ្យប្រទេសនេះរីកចម្រើនអស់ជាច្រើនទសវត្សរ៍ ធ្វើឱ្យមានការមន្ទិលសង្ស័យទាក់ទងនឹងសក្ដានុពលក្នុងការស្ថាបនាឡើងវិញនូវខឿនសេដ្ឋកិច្ចរបស់ប្រទេសនេះក្នុងពេលខាងមុខ។

តម្លៃប្រេងឆៅដែលកើនឡើងខ្ពស់ខ្លាំងដោយសារតែសង្គ្រាមរវាងរុស្ស៊ី និងអ៊ុយក្រែន បានអនុញ្ញាតឱ្យអារ៉ាប៊ីសាអូឌីត សម្រេចបានអតិរេកថវិកាជាតិជាលើកដំបូងក្នុងអំឡុង 9 ឆ្នាំ កាលពីឆ្នាំ 2022 និងបាននាំមកនូវអំណាចផ្នែកហិរញ្ញវត្ថុដល់ប្រទេសនេះដើម្បីអភិវឌ្ឍសេដ្ឋកិច្ចជាតិ៕

January 31, 2023

អាជ្ញាធរខេត្តរុស្ស៊ី ប្រកាសផ្ដល់រង្វាន់ដល់ទាហានដែលចាប់បានរថក្រោះលោកខាងលិច

ទាហានរុស្ស៊ីអាចទទួលបានប្រាក់ឡើងដល់ 43,000 ដុល្លារអាម៉េរិក បើសិនដណ្ដើមបានរថក្រោះ Leopard មួយគ្រឿងដែលនៅដំណើរការបាន ពីសត្រូវនៅលើទឹកដីអ៊ុយក្រែន។

លោក Alexander Osipov អភិបាលខេត្ត Zabaikalsky នៅភាគខាងកើតប្រទេសរុស្ស៊ី បានសន្យាផ្ដល់រង្វាន់ដល់បណ្ដាទាហានរបស់ខេត្តនេះ បើសិនពួកគេដណ្ដើមបាន ឬកម្ទេចបានរថក្រោះរបស់ណាតូនៅអ៊ុយក្រែន។ ប្រកាសនេះត្រូវបានធ្វើឡើងបន្ទាប់ពីក្រុមហ៊ុនឯកជនមួយរបស់រុស្ស៊ី ក៏បានសន្យាផ្ដល់ប្រាក់រង្វាន់ដូចគ្នានេះដល់អ្នកទាំងឡាយណាដែលដណ្ដើមបានរថក្រោះដែលផលិតដោយលោកខាងលិច។

អភិបាលខេត្តខាងលើប្រកាសថា អ្នកទាំងឡាយណាដែលដណ្ដើមបានរថក្រោះ Leopard មួយគ្រឿងដែលនៅដំណើរការបាន អាចទទួលបានប្រាក់រង្វាន់ 3 លានរូប្លរុស្ស៊ី (42,909 ដុល្លារអាម៉េរិក)។ ប្រាក់រង្វាន់ 14,303 ដុល្លារអាម៉េរិក នឹងត្រូវបានប្រគល់ឱ្យអ្នកដែលបានកម្ទេចរថក្រោះមួយគ្រឿងរបស់អាល្លឺម៉ង់នៅអ៊ុយក្រែន។ ចំណែកអ្នកដែលជួយដណ្ដើមបានជោគជ័យនឹងទទួលបាន 7,150 ដុល្លារអាម៉េរិក ហើយអ្នកជួយកម្ទេចរថក្រោះ Leopard បានមួយគ្រឿងនឹងទទួលបាន 2,240 ដុល្លារអាម៉េរិក។

ប្រាក់រង្វាន់ 21,450 ដុល្លារអាម៉េរិក នឹងត្រូវបានប្រគល់ឱ្យអ្នកណាដែលដណ្ដើមបានរថក្រោះអាម៉េរិក M1 Abrams មួយគ្រឿង បើសិនកម្ទេចបានរថក្រោះនេះនឹងទទួលបាន 7,150 ដុល្លារ។

លោក Osipov បញ្ជាក់ថា ទាហានដែលកំពុងរកវិធីដើម្បីកម្ទេច ឬដណ្ដើមរថក្រោះរបស់បស្ចិមលោកនៅអ៊ុយក្រែន ដំបូងបង្អស់ត្រូវតែធ្វើសកម្មភាពដើម្បី «ការពារអាយុជីវិត និងសុខភាពផ្ទាល់ខ្លួន»។

កាលពីសប្ដាហ៍កន្លងទៅ អាល្លឺម៉ង់ បានប្រកាសថា នឹងផ្ដល់ឱ្យទីក្រុងកៀវនូវរថក្រោះ Leopard 2 ចំនួន 14 គ្រឿង និងអនុញ្ញាតឱ្យបណ្ដាប្រទេសនៅអឺរ៉ុប នាំចេញរថក្រោះនេះទៅកាន់អ៊ុយក្រែន។ នាយករដ្ឋមន្ត្រី Olaf Scholz ប្រកាសថា អាល្លឺម៉ង់ និងដៃគូសហការកំពុងរកវិធីដើម្បីផ្គត់ផ្គង់រថក្រោះ Leopard 112 គ្រឿងទៅឱ្យអ៊ុយក្រែន។

ចំណែកសហរដ្ឋអាម៉េរិកវិញ ក៏បានសន្យាផ្ដល់រថក្រោះ Abrams ចំនួន 31 គ្រឿងដល់ទីក្រុងកៀវ ប៉ុន្តែរថក្រោះទាំងនេះត្រូវបានគេជឿថា នឹងមិនអាចបញ្ជូនទៅកាន់សមរភូមិបានឡើយ រហូតដល់ចុងឆ្នាំនេះ។

រុស្ស៊ីអះអាងថា ការផ្ដល់អាវុធទៅឱ្យអ៊ុយក្រែន បង្ហាញថា ណាតូ កំពុងចូលរួមប្រយុទ្ធ ហើយថា ប្រការនេះនឹងធ្វើឱ្យសង្គ្រាមនៅអ៊ុយក្រែនអូសបន្លាយកាន់តែយូរ៕

January 31, 2023

របបតាលីបង់នៅអាហ្វហ្កានីស្ថាន ហាមសិស្សស្រីប្រលងចូលមហាវិទ្យាល័យ

ក្រសួងអប់រំរបស់អាជ្ញាធរតាលីបង់ ស្នើឱ្យសាកលវិទ្យាល័យឯកជននានានៅប្រទេសអាហ្វហ្គានីស្ថាន ហាមសិស្សស្រីប្រលងចូលមហាវិទ្យាល័យក្នុងឆ្នាំសិក្សាខាងមុខ។

កាលពីចុងសប្ដាហ៍កន្លង ក្រសួងអប់រំរបស់អាជ្ញាធរតាលីបង់ បានផ្ញើលិខិតទៅកាន់សាកលវិទ្យាល័យឯកជននៅក្នុងបណ្ដាខេត្តក្រុងភាគខាងជើងប្រទេសអាហ្វហ្គានីស្ថាន ក្នុងនោះមានទាំងរដ្ឋធានីកាប៊ុលផងដែរ ដើម្បីស្នើឱ្យមានការហាមសិស្សស្រីប្រលងចូលមហាវិទ្យាល័យដែលនឹងធ្វើឡើងចាប់ពីចុងខែកុម្ភៈខាងមុខ។ លិខិតរបស់តាលីបង់ថែមទាំងបានព្រមានថា ស្ថាប័នណាដែលមិនអនុវត្តតាមសំណើនេះនឹងត្រូវប្រឈមនឹងចំណាត់ការតាមផ្លូវច្បាប់។

មុននោះ របបតាលីបង់ បានស្នើឱ្យសាកលវិទ្យាល័យទាំងអស់នៅអាហ្វហ្កានីស្ថាន «ហាមសិស្សស្រីទៅសាលារៀនរហូតដល់មានប្រកាសថ្មី»។ រដ្ឋមន្ត្រីក្រសួងអប់រំរបស់តាលីបង់ ក្រោយមកបានបកស្រាយថា មូលហេតុដែលសិស្សស្រីនៅអាហ្វហ្កានីស្ថានត្រូវបានហាមមិនឱ្យចូលរៀននៅមហាវិទ្យាល័យគឺដោយសារពួកគេមិនបានគោរពតាមការណែនាំ ក្នុងនោះមានការកំណត់ស្ដីពីសម្លៀកបំពាក់សមស្របជាដើម។

បណ្ដាមេដឹកនាំពិភពលោកបានសម្ដែងការបារម្ភអំពីបទបញ្ជាខាងលើរបស់តាលីបង់ និងរិះគន់ថា ប្រការនេះនឹងបំផ្លាញអនាគត និងប្រមាថចំពោះសិទ្ធិសេរីភាពមូលដ្ឋានរបស់ស្ត្រីនៅអាហ្វហ្កានីស្ថាន។

កន្លងមក តាលីបង់បានប្រកាសថា បានផ្លាស់ប្ដូរច្រើនធៀបនឹងអំឡុងពេលកាន់អំណាចកាលពីជាង 20 ឆ្នាំមុន ព្រមទាំងបានអះអាងថា កំពុងអនុញ្ញាតឱ្យស្ត្រីទទួលបានសិទ្ធិទៅតាមច្បាប់សាសនាអ៊ីស្លាម និងវប្បធម៌របស់អាហ្វហ្កានីស្ថាន។ ក៏ប៉ុន្តែ ការកំណត់ ឬបទបញ្ជាដ៏តឹងរឹងរបស់ពួកគេក្នុងប៉ុន្មានខែកន្លងទៅនេះ បានធ្វើឱ្យពិភពលោកមន្ទិលសង្ស័យ និងមានការរិះគន់ច្រើនផងដែរ៕

January 30, 2023

ហែកឃើរ បញ្ចូលសេចក្ដីថ្លែងការណ៍របស់ប្រធានាធិបតីអ៊ុយក្រែនទៅលើទូរទស្សន៍នៅគ្រីមៀ

ក្រុមមន្ត្រីរុស្ស៊ីនៅឧបទ្វីបគ្រីមៀ (Crimea) និយាយថា ហែកឃើរ (Hacker) បានធ្វើឱ្យមានភាពរអាក់រអួល និងបញ្ចូលសេចក្ដីថ្លែងការណ៍របស់ប្រធានាធិបតីអ៊ុយក្រែន ទៅក្នុងរលកទូរទស្សន៍ដែលផ្សាយក្នុងតំបន់នេះ។

ទូរទស្សនិកជនដែលបានតាមដានទូរទស្សន៍នៅឧបទ្វីបគ្រីមៀ កាលពីថ្ងៃទី 25 មករា បានរាយការណ៍ថា កម្មវិធីដែលពួកគេកំពុងមើល ស្រាប់តែត្រូវដាច់ និងជំនួសដោយសេចក្ដីថ្លែងការណ៍របស់ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡែនស្គី ក្នុងរយៈពេលប្រហែល 1 នាទី មុនពេលបញ្ហាត្រូវបានដោះស្រាយ។

ក្រុមមន្ត្រីនៅឧបទ្វីបគ្រីមៀ ចោទថា ហែកឃើរបានវាយប្រហារលើរលកទូរទស្សន៍ក្នុងតំបន់នេះ និងទម្លាក់កំហុសទៅលើស្ថាប័នចារកម្មរបស់អ៊ុយក្រែន។

រុស្ស៊ីបានរឹបអូសយកឧបទ្វីបគ្រីមៀពីអ៊ុយក្រែន ក្រោយការធ្វើប្រជាមតិក្នុងឆ្នាំ 2014។ សហរដ្ឋអាម៉េរិក អឺរ៉ុប និងអ៊ុយក្រែនបានហៅសកម្មភាពរបស់រុស្ស៊ីថាជាអំពើរំលោភច្បាប់។ ទីក្រុងកៀវបានប្រកាសជាច្រើនដងថា នឹងរំដោះឧបទ្វីបគ្រីមៀឱ្យបាន។

ក្រៅពីគ្រីមៀ ហេតុការណ៍ហែកឃើរវាយប្រហារទូរទស្សន៍ក៏បានកើតឡើងនៅក្នុងខេត្ត Belgorod នៅភាគខាងលិចប្រទេសរុស្ស៊ី ជាប់ព្រំដែននឹងអ៊ុយក្រែន។ អាជ្ញាធរខេត្តនេះមិនទាន់ចោទប្រកាន់លើភាគីណាមួយ ប៉ុន្តែឱ្យដឹង កំពុងស្រាវជ្រាវ។

ទាក់ទិននឹងហេតុការណ៍ហែកឃើរវាយប្រហារលើរលកទូរទស្សន៍ក្នុងតំបន់គ្រីមៀ ភាគីខាងអ៊ុយក្រែន មិនទាន់បញ្ចេញប្រតិកម្មអ្វីនៅឡើយ។

វិមានក្រឹមឡាំង កាលពីថ្ងៃទី 19 មករា បានព្រមានអ៊ុយក្រែនថា ការវាយប្រហារលើគ្រីមៀគឺជាសកម្មភាពគ្រោះថ្នាក់ បន្ទាប់ពីអ្នកនាំពាក្យក្រសួងការបរទេសអាម៉េរិក Ned Price កាលពីថ្ងៃទី 18 មករា បានប្រកាសថា ឧបទ្វីបគ្រីមៀគឺជាផ្នែកមួយរបស់អ៊ុយក្រែន ហើយវ៉ាស៊ីងតោនកំពុងផ្គត់ផ្គង់អាវុធដើម្បីជួយឱ្យទីក្រុងកៀវការពារទឹកដីរបស់ខ្លួន៕

January 28, 2023

ជនសង្ស័យបាញ់សម្លាប់មនុស្ស 7 នាក់នៅ California និយាយថា ត្រូវគេសម្លុតគំរាម

(សហរដ្ឋអាម៉េរិក) – ជនសង្ស័យ Chunli Zhao ដែលបានបាញ់សម្លាប់មនុស្ស 7 នាក់នៅក្នុងកសិដ្ឋានចំនួន 2 នៅ California បានសារភាពថា ខ្លួនធ្លាប់ត្រូវគេសម្លុតគំរាមនៅកន្លែងធ្វើការ ទើបនាំឱ្យមានអំពើឃាតកម្មនេះកើតឡើង។

Chunli Zhao អាយុ 66 ឆ្នាំ កាលពីថ្ងៃទី 26 មករា បានប្រាប់ NBC Bay Area ថា ខ្លួនគាត់ធ្លាប់ត្រូវបានគេសម្លុតគំរាម ត្រូវបង្ខំឱ្យធ្វើការច្រើនម៉ោងជាបន្តបន្ទាប់នៅក្នុងកសិដ្ឋាន និងត្រូវគេមិនអើពើនៅពេលមានការតវ៉ា។ Zhao បន្ថែមថា គាត់មករស់នៅលើទឹកដីអាម៉េរិកបាន 11 ឆ្នាំហើយ និងមានលិខិតស្នាក់នៅ និងរស់នៅជាមួយភរិយានៅក្នុងទីក្រុង Half Moon Bay។

អ្នកតំណាងរបស់កសិដ្ឋាន Terra Garden ជាកន្លែងកើតហេតុបានបញ្ជាក់ថា Zhao រស់នៅក្នុងកសិដ្ឋានជាមួយភរិយា ប៉ុន្តែថា ពួកគេមិនបានដឹងពីការតវ៉ាណាមួយស្ដីពីករណីសម្លុតគំរាមទៅលើ Zhao នោះទេ។

ជនសង្ស័យ Zhao បានរៀបរាប់អំពីករណីបាញ់ប្រហារពីរលើកកាលពីថ្ងៃទី 23 មករា ថា ដំបូងគាត់បានសម្រុកចូលក្នុងកសិដ្ឋាន Terra Garden និងបានបាញ់សម្លាប់មនុស្ស 4 នាក់ និងរបួសធ្ងន់ម្នាក់។ ក្រោយមក Zhao ក៏បានបើកឡានទៅកាន់កសិដ្ឋាន Concord ដែលនៅក្បែរនោះ ជាទីដែលគាត់ធ្លាប់បានធ្វើការ និងបានបាញ់សម្លាប់មនុស្ស 3 នាក់ថែមទៀត។ Zhao និយាយថា កាំភ្លើងដែលប្រើប្រាស់ក្នុងករណីខាងលើ គឺគាត់ទិញបានយ៉ាងងាយកាលពីឆ្នាំ 2021។

តុលាការស្រុក San Mateo បានចោទប្រកាន់ពីបទមនុស្សឃាត 7 ករណី និងបទប៉ុនប៉ងសម្លាប់មនុស្សចំនួន 1 ករណី ប្រឆាំងនឹង Zhao ដែលទាំងនេះអាចនាំឱ្យជនសង្ស័យត្រូវប្រឈមនឹងទោសប្រហារជីវិត ឬជាប់ពន្ធនាគារអស់មួយជីវិតដោយមិនមានការបន្ធូរបន្ថយ។

ករណីសម្លាប់មនុស្ស 7 នាក់របស់ជនសង្ស័យឈ្មោះ Zhao នេះ កើតឡើងក្រោយពីករណីបាញ់សម្លាប់មនុស្ស 11 នាក់នៅ Monterey Park រដ្ឋ California កាលពីប្រហែល 48 ម៉ោងមុន។ ជនសង្ស័យត្រូវបានគេដឹងថា ឈ្មោះ Huu Can Tran អាយុ 72 ឆ្នាំ ប៉ុន្តែមិនទាន់ដឹងច្បាស់ពីមូលហេតុនៃអំពើឃាតកម្មនេះនៅឡើយ៕

January 27, 2023

សហរដ្ឋអាម៉េរិក វាយឆ្មក់ កម្ទេចមេដឹកនាំក្រុមភេរវកររដ្ឋអ៊ីស្លាម (IS)

កងទ័ពអាម៉េរិកធ្វើការវាយឆ្មក់នៅសូម៉ាលី ទៅតាមបញ្ជារបស់ប្រធានាធិបតី បៃដិន កម្ចាត់បានមេដឹកនាំតំបន់សំខាន់របស់ក្រុមភេរវកររដ្ឋអ៊ីស្លាម (IS) Bilal al-Sudani។

ក្រុមមន្ត្រីអាម៉េរិក កាលពីថ្ងៃទី 26 មករា បានឱ្យដឹងថា Sudani ត្រូវបានសម្លាប់ក្នុងការប្រយុទ្ធ បន្ទាប់ពីកងទ័ពអាម៉េរិកសម្រុកចូលតំបន់រូងភ្នំនៅភាគខាងជើងប្រទេសសូម៉ាលី ដើម្បីចាប់ខ្លួនមេដឹកនាំរដ្ឋអ៊ីស្លាម (IS)។ សមាជិកប្រហែល 10 នាក់របស់ក្រុមភេរវកររដ្ឋអ៊ីស្លាមសូដង់ បានបាត់បង់ជីវិតនៅកន្លែងកើតហេតុ ប៉ុន្តែភាគីអាម៉េរិក មិនមានអ្នកស្លាប់ និងរបួសនោះទេ។

«កាលពីថ្ងៃទី 25 មករា ដោយអនុវត្តតាមបទបញ្ជារបស់ប្រធានាធិបតី កងទ័ពអាម៉េរិកបានធ្វើយុទ្ធនាការវាយប្រហារនៅភាគខាងជើងប្រទេសសូម៉ាលី បណ្ដាលឱ្យសមាជិកមួយចំនួនរបស់ IS ត្រូវបាត់បង់ជីវិត រួមទាំង Bilal al-Sudani ផងដែរ» រដ្ឋមន្ត្រីការពារជាតិអាម៉េរិក Lloyd Austin បានឱ្យដឹងដូច្នេះនៅក្នុងប្រកាសនាពេលថ្មី ៗនេះ។

«Al-Sudani ទទួលបន្ទុកក្នុងការជំរុញវត្តមានកាន់តែច្រើនរបស់ IS នៅទ្វីបអាហ្វ្រិក និងផ្ដល់ជំនួយដល់បណ្ដាសកម្មភាពរបស់ក្រុមនេះនៅទូទាំងពិភពលោក ក្នុងនោះក៏មានអាហ្វហ្កានីស្ថាន» លោក Austin បន្ថែម។

ពីមូលដ្ឋានលើភ្នំនៅភាគខាងជើងប្រទេសសូម៉ាលី Al-Sudani បានបែងចែក និងផ្ដល់ជំនួយដល់បណ្ដាសាខារបស់ IS មិនត្រឹមតែនៅទ្វីបអាហ្វ្រិកនោះទេ តែក៏នៅរដ្ឋអ៊ីស្លាម Khorasan ដែលជាសាខារបស់ IS នៅអាហ្វហ្កានីស្ថានទៀតផង នេះបើតាមមន្ត្រីអាម៉េរិកមួយរូបដែលសុំមិនបញ្ចេញឈ្មោះ។

កាលពី 10 ឆ្នាំមុន មុនពេលចូលក្រុម IS Sudani បានចូលរួមជ្រើសរើស និងបង្វឹកក្រុមខ្មាន់កាំភ្លើងសម្រាប់ចលនាជ្រុលនិយម al-Shabaab នៅសូម៉ាលី។

«Sudani មានតួនាទីសំខាន់ក្នុងផ្នែកហិរញ្ញវត្ថុ និងសកម្មភាព ដោយមានជំនាញខ្ពស់ ធ្វើឱ្យគាត់ក្លាយជាគោលដៅសំខាន់នៅក្នុងសកម្មភាពប្រឆាំងអំពើភេរវកម្មរបស់សហរដ្ឋអាម៉េរិក» មន្ត្រីអាម៉េរិកខាងលើនិយាយបន្ថែម។

យុទ្ធនាការវាយឆ្មក់នេះត្រូវបានរៀបផែនការក្នុងរយៈពេលច្រើនខែ ដោយមានការហាត់ស៊ាំនៅលើទីតាំងដែលត្រូវបានសាងសង់ឡើងដើម្បីត្រាប់តាមកន្លែងលាក់ខ្លួនរបស់ Sudani។ លោក បៃដិន កាលពីដើមសប្ដាហ៍នេះ បានអនុញ្ញាតឱ្យធ្វើការវាយប្រហារ ក្រោយពីបានពិភាក្សាជាមួយក្រុមមន្ត្រីកំពូលៗនៅក្រសួងការពារជាតិ ចារកម្ម និងសន្តិសុខ។

កងកម្លាំងអាម៉េរិក បាន និងកំពុងធ្វើសកម្មភាពនៅសូម៉ាលី ដោយមានការសហការ និងការជំនួសមុខឱ្យរដ្ឋាភិបាលទាំងពីរ។ ទ័ពអាម៉េរិក តែងវាយប្រហារតាមអាកាសដើម្បីគាំទ្រដល់កម្លាំងរបស់រដ្ឋាភិបាលសូម៉ាលី ក្នុងការប្រយុទ្ធប្រឆាំងនឹងកងទ័ពបះបោរ Shabaab៕

January 27, 2023

មុខរបរប៉ះភ្ជាប់ក្រដាសប្រាក់ដុល្លារអាម៉េរិកដាច់រហែលនៅស៊ីមបាវ៉េ

Cuthbert Gudza កាន់ក្រដាសប្រាក់ដុល្លារមកមើល រួចវាយតម្លៃកន្លែងរហែក ហើយចាប់ផ្ដើមលាបកាវយ៉ាងប្រុងប្រយ័ត្ន និងហាលថ្ងៃ មុនពេលប្រកាសថា «វាបានដូចថ្មី»។

ក្រដាសប្រាក់ដុល្លារអាម៉េរិកដែលចាស់ រហែក កំពុងត្រូវបានកែប្រែឱ្យអាចចាយវិញបាន នៅលើដងផ្លូវក្នុងរដ្ឋធានីហារ៉ារ៉េរបស់ប្រទេសស៊ីមបាវ៉េ ជាទីដែលវាត្រូវបាន «ជួសជុល» និងលក់យកចំណេញ ក្នុងកាលៈទេសៈដែលប្រជាជននៅប្រទេសនេះស្វែងរកគ្រប់មធ្យោបាយដើម្បីរស់នៅក្នុងវិបត្តិហិរញ្ញវត្ថុ។

ប្រជាជនក្នុងស្រុកនៅស៊ីមបាវ៉េ ត្រូវប្រើប្រាស់ប្រាក់ដុល្លារអាម៉េរិកសម្រាប់ការទិញដូរប្រចាំថ្ងៃ រាប់ចាប់ពីពេលប្រាក់ដុល្លារស៊ីមបាវ៉េបាត់បង់តម្លៃក្នុងឆ្នាំ 2009 ដោយសារអតិផរណាកើនឡើងខ្ពស់ខ្លាំង។ ក្រដាសប្រាក់ដុល្លារអាម៉េរិកដែលដាច់រហែកត្រូវបានយកមកបិទភ្ជាប់ក្នុងគ្រាដែលប្រភពផ្គត់ផ្គង់ប្រាក់មានកំណត់បំផុត។

ក្រដាសប្រាក់រហែកតែងត្រូវបានផ្សារទំនើប និងស្ថាប័នជំនួញផ្នែកហិរញ្ញវត្ថុផ្លូវការបដិសេធ។ វាត្រូវបានយកទៅកាន់កន្លែងរបស់មនុស្សដូច Gudza ដែលជាជាងជួញដូរប្រាក់ក្នុងទីផ្សារងងឹតនៅតំបន់ពាណិជ្ជកម្មមួយក្នុងទីរួមស្រុក Kuwadzana មានចម្ងាយពីរដ្ឋធានីហារ៉ារ៉េ ប្រហែល 15 គីឡូម៉ែត្រទៅទិសខាងលិច។

បណ្ដាធនាគារនៅស៊ីមបាវ៉េ ទទួលយកក្រដាសប្រាក់ចាស់ ដាច់រហែក ប៉ុន្តែប្រជាជនបានបាត់បង់ទំនុកចិត្តលើប្រព័ន្ធហិរញ្ញវត្ថុ ក្រោយពីបានបាត់បង់ខ្ទង់ប្រាក់សន្សំដោយសារអតិផរណា។ ប្រការនេះធ្វើឱ្យពួកគេចូលចិត្តដោះដូរជាមួយអ្នកទិញលក់ប្រាក់នៅក្នុងទីផ្សារងងឹតជាជាងធនាគារ។

«យើងទទួលទិញប្រាក់ដុល្លារដាច់រហែកក្នុងតម្លៃសមរម្យ សូមអញ្ជើញចូល» នេះជាសំឡេងស្រែកពពាយនាយពីឧបករណ៍បំពងសំឡេងចល័តនៅក្នុងតំបន់ពាណិជ្ជកម្មនៅ Kuwadzana។

Gudza អាយុ 33 ឆ្នាំ មានកូន 3 នាក់ និយាយថា «លក្ខខណ្ឌទិញដូរគឺថា លេខស៊េរីនៅលើក្រដាសប្រាក់ត្រូវតែអាចមើលឃើញ។ មុខរបរសំខាន់របស់ខ្ញុំគឺលក់ដំឡូងបារាំង ប៉ុន្តែខ្ញុំទិញដូរប្រាក់ដុល្លារចាស់ ដាច់រហែកក៏ព្រោះតែមើលឃើញឱកាសរកស៊ី។ ក្រដាសប្រាក់ទាំងនេះត្រូវផ្សារទំនើបបដិសេធ ប៉ុន្តែខ្ញុំទិញដើម្បីលក់យកចំណេញ»។

«យើងឱ្យ 600 ដុល្លារស៊ីមបាវ៉េសម្រាប់ 1 ដុល្លារអាម៉េរិក។ អ្នកដែលមិនចង់កាន់សាច់ប្រាក់នឹងទទួលបានដំឡូងបារាំង ផ្លែក្រូច ឬប៉ោម។ បើសិនជាប្រាក់រហែកមិនអាចប៉ះបាន ខ្ញុំនឹងយកទៅកាន់ធនាគារ» Gudza ឱ្យដឹងដូច្នេះ។

ដោយដឹងពីសភាពការណ៍ ធនាគារជាតិស៊ីមបាវ៉េក៏បានស្នើឱ្យប្រជាជនប្រើប្រាស់ស្ថាប័នផ្លូវការដើម្បីប្ដូរប្រាក់ចាស់ ដាច់រហែក យកប្រាក់ថ្មី ដោយដាក់ចេញគោលការណ៍ច្បាស់លាស់។

«មុខរបរសំខាន់របស់ខ្ញុំគឺលក់ដំឡូងបារាំង ប៉ុន្តែខ្ញុំទិញដូរប្រាក់ដុល្លារចាស់ ដាច់រហែកក៏ព្រោះតែមើលឃើញឱកាសរកស៊ី» Gudza អាយុ 33 ឆ្នាំ មានកូន 3 នាក់ និយាយដូច្នេះ

Persistence Gwanyanya សមាជិកគណៈកម្មគោលនយោបាយហិរញ្ញវត្ថុរបស់ធនាគារជាតិស៊ីមបាវ៉េ បញ្ជាក់ថា «បើសិនមានបញ្ហា ធនាគារកណ្ដាលនឹងប្ដូរជូនអ្នកនូវក្រដាសប្រាក់ល្អជាង។ គ្រប់ធនាគារមានលទ្ធភាពគ្រប់គ្រាន់ក្នុងការទទួលយកក្រដាសប្រាក់ចាស់»៕

January 26, 2023

ទ័ពជើងទឹកថៃ រៀបផែនការទិញនាវាពិឃាដទីពីរ

ទ័ពជើងទឹករបស់រាជាណាចក្រថៃ បានស្នើសុំគណៈរដ្ឋមន្ត្រីប្រទេសនេះ ផ្ដល់ថវិកា 15 ពាន់លានបាត (457 លានដុល្លារអាម៉េរិក) ក្នុងរង្វង់ 5 ឆ្នាំខាងមុខ សម្រាប់ការដំឡើងនាវាពិឃាដខ្នាតតូចថ្មីមួយគ្រឿងទៀត។

សំណើខាងលើត្រូវបានលើកឡើងដោយក្រសួងការពារជាតិថៃ នៅក្នុងសេចក្ដីព្រាងច្បាប់គម្រោងថវិកាជាតិសម្រាប់ឆ្នាំ 2024 ដែលចាប់ផ្ដើមពីថ្ងៃទី 01 តុលាឆ្នាំនេះ។

សារព័ត៌មានថៃបានឱ្យដឹងថា សំណើនេះត្រូវបានគណៈរដ្ឋមន្ត្រីពិនិត្យជាលើកដំបូងកាលពីថ្ងៃទី 24 មករា ហើយបើតាមគោលការណ៍ សំណើនេះទទួលបានការគាំទ្ររួចហើយ។

ខ្ទង់ប្រាក់ដំបូងនៃកញ្ចប់ថវិកាខាងលើសម្រាប់ឆ្នាំ 2024 គឺមានតម្លៃ 1.7 ពាន់លានបាត ដែលប្រហែលនឹង 52 លានដុល្លារអាម៉េរិក។

បច្ចុប្បន្ន គម្រោងទិញនាវាពិឃាដខ្នាតតូចរបស់ទ័ពជើងទឹកថៃ កំពុងទទួលបានចំណាប់អារម្មណ៍ពីបណ្ដាក្រុមហ៊ុនផលិតនាវានៅបរទេស មានជាអាទិ៍ ក្រុមហ៊ុននៅកូរ៉េខាងត្បូង អេស្ប៉ាញ រុស្ស៊ី និងបារាំង។

គម្រោងនាវាពិឃាដខាងលើនេះគឺជាគ្រឿងទីពីររបស់ទ័ពជើងទឹកថៃ បន្ទាប់ពី HTMS Bhumibol Adulyadej ដែលផលិតនៅកូរ៉េខាងត្បូង និងបានប្រគល់ឱ្យថៃកាលពីឆ្នាំ 2019៕

January 26, 2023

ព្រឹល និងអាកាសធាតុត្រជាក់ខ្លាំងកំពុងវាយប្រហារលើប្រទេសជប៉ុន!

តំបន់មួយចំនួននៅប្រទេសជប៉ុន មានសីតុណ្ហភាពទាបជាងពេលណាទាំងអស់ក្នុងអំឡុងមួយទសវត្សរ៍កន្លង បណ្ដាលឱ្យស្ទះចរាចរណ៍ និងបង្កឱ្យមានមនុស្សស្លាប់យ៉ាងតិចម្នាក់ នេះបើតាមមន្ត្រីនៅស្ថាប័នឧតុនិយមជប៉ុន។

តំបន់ឆ្នេរសមុទ្រភាគខាងលិចប្រទេសជប៉ុន ទទួលរងឥទ្ធិពលធ្ងន់ធ្ងរដោយសារព្យុះព្រឹលកាលពីយប់ថ្ងៃទី 24 មករា ខណៈដែលរាជធានីតូក្យូ និងតំបន់ជុំវិញមិនមានព្រឹលធ្លាក់ ប៉ុន្តែមានសីតុណ្ហភាពចុះទាបខុសពីធម្មតា។

តំបន់មួយនៅក្នុងខេត្ត Kumamoto ភាគខាងត្បូងប្រទេសជប៉ុន មានសីតុណ្ហភាព -9 អង្សាសេ ដែលជាកម្រិតទាបបំផុតរាប់ចាប់ពីឆ្នាំ 1977។

ខាងលើគឺជាទិដ្ឋភាពរុក្ខជាតិ និងវិហារ Kinkakuji នៅអតីតរាជធានី Kyoto កាលពីថ្ងៃទី 25 មករា

(រូបខាងលើ)-ទិដ្ឋភាពនៅក្នុងទីក្រុង Toyama ក្នុងភាគកណ្ដាលប្រទេសជប៉ុនកាលពីថ្ងៃទី 24 មករា

(រូបខាងលើ)-កម្មករកំពុងសម្អាតព្រឹលនៅក្នុងទីក្រុង Yasuki ខេត្ត Shimane កាលពីថ្ងៃទី 25 មករា

(រូបខាងលើ)-ព្រឹលធ្លាក់គ្របដណ្ដប់ពេញរថយន្តនៅទីក្រុង Yonago ខេត្ត Tottori កាលពីថ្ងៃទី 25 មករា

(រូបខាងលើ)-ព្រឹលគ្របដណ្ដប់ពេញដំបូលផ្ទះ វត្តអារាម និងការដ្ឋាននៅទីក្រុង Nagano កាលពីថ្ងៃទី 25 មករា

(រូបខាងលើ)-រថយន្តដឹកទំនិញពីរជួរស្ទះបន្តកន្ទុយគ្នាព្រោះតែព្រឹលនៅលើដងផ្លូវល្បឿនលឿន Shin-meishin ក្នុងទីក្រុង Suzuka ខេត្ត Mie កាលពីម្សិលមិញ

(រូបខាងលើ)-អ្នកដំណើរត្រូវជាប់គាំង 4 ម៉ោងលើរថភ្លើងអគ្គិសនី ពេលផ្លូវដែកត្រូវរអាក់រអួលព្រោះតែអាកាសធាតុត្រជាក់ខ្លាំងនៅក្នុងខេត្ត Kyoto កាលពីថ្ងៃទី 24 មករា

(រូបខាងលើ)-កម្មករកំពុងបោសសម្អាតព្រឹលចេញពីផ្លូវនៅទីក្រុង Aomori ខេត្ត Aomori កាលពីម្សិលមិញ

(រូបខាងលើ)-អ្នកដំណើរកំពុងរង់ចាំរថយន្តក្រុងក្រោមមេឃកំពុងធ្លាក់ព្រឹលនៅ Kyoto កាលពីម្សិលមិញ

(រូបខាងលើ)-ព្រឹលគ្របដណ្ដប់ពេញកំពូលភ្នំ Kirishima ត្រង់ជួរភ្នំដែលខណ្ឌចែកទឹកដីរវាងខេត្ត Kagoshima និង Miyazaki កាលពីថ្ងៃទី 25 មករា៕

January 26, 2023

Category: អន្តរជាតិ