អន្តរជាតិ - La Reine Media

តំណាងរាស្ត្រអាម៉េរិក អំពាវនាវឱ្យ «បាញ់ទម្លាក់» យន្តហោះចម្បាំងរុស្ស៊ី ក្រោយករណីធ្លាក់ UAV

តំណាងរាស្ត្រនៅសភាជាន់ខ្ពស់អាម៉េរិក Lindsey Graham បានលើកសំណើឱ្យវ៉ាស៊ីងតោនបាញ់ទម្លាក់យន្តហោះចម្បាំងរុស្ស៊ីដែលហោះមកក្បែរយានយោធាអាម៉េរិក ដើម្បីឆ្លើយតបនឹងករណីធ្លាក់យន្តហោះគ្មានមនុស្សបើក (UAV) របស់អាម៉េរិកនៅលើសមុទ្រខ្មៅកាលពីប៉ុន្មានថ្ងៃមុន។

«បើជាប្រធានាធិបតី Ronald Reagan វិញ លោកនឹងធ្វើអ្វីនៅក្នុងស្ថានការណ៍នេះ? លោកនឹងបញ្ជាឱ្យបាញ់ទម្លាក់យន្តហោះរុស្ស៊ី បើពួកគេគំរាមដល់យានយោធារបស់យើង» លោក Lindsey Graham សមាជិកសភារបស់បក្សសាធារណរដ្ឋ បានថ្លែងលើកញ្ចក់ទូរទស្សន៍កាលពីថ្ងៃទី 15 មីនាដូច្នេះ។

លោក Graham យល់ថា រុស្ស៊ីត្រូវតែទទួលខុសត្រូវក្នុងករណីធ្លាក់ UAV MQ-9 Reaper របស់សហរដ្ឋអាម៉េរិកនៅសមុទ្រខ្មៅកាលពីមុននោះមួយថ្ងៃ ព្រមទាំងបានចេញការព្រមានដល់ក្រុមមេដឹកនាំរុស្ស៊ីផងដែរថា «បើសិនជាយន្តហោះរុស្ស៊ី នៅតែហោះក្បែរយានយោធាអាម៉េរិកដែលធ្វើសកម្មភាពនៅលើដែនអាកាសអន្តរជាតិ វានឹងត្រូវបានបាញ់ទម្លាក់»។

ប្រតិកម្មទៅនឹងប្រកាសរបស់លោក Graham ឯកអគ្គរដ្ឋទូតរុស្ស៊ីប្រចាំសហរដ្ឋអាម៉េរិក Anatoly Antonov ឱ្យដឹងថា ម៉ូស្គូមិនចង់ប្រឈមមុខដាក់គ្នាជាមួយវ៉ាស៊ីងតោន ប៉ុន្តែបានសង្កត់ធ្ងន់ថា រាល់ការវាយប្រហារដោយចេតនាមកលើយន្តហោះរុស្ស៊ីលើដែនអាកាសអន្តរជាតិនឹងជា «ការប្រកាសសង្គ្រាមសំដៅលើមហាអំណាចនុយក្លេអែរធំជាងគេលើលោក»។

បញ្ជាការដ្ឋានកងទ័ពប្រចាំអឺរ៉ុបរបស់អាម៉េរិក បានឱ្យដឹងថា យន្តហោះចម្បាំង Su-27 ពីរគ្រឿងរបស់រុស្ស៊ី បានហោះមកក្បែរ ហោះកាត់មុខ និងបាញ់ប្រេងសាំងទៅលើ UAV MQ-9 Reaper នៅលើតំបន់សមុទ្រអន្តរជាតិកាលពីថ្ងៃទី 14 មីនា មុនពេលយន្តហោះ Su-27 មួយគ្រឿងផ្សេងទៀតប៉ះទង្គិចលើស្លាបកង្ហាររបស់ UAV បង្ខំឱ្យទ័ពអាកាសអាម៉េរិកទម្លាក់ UAV ចូលក្នុងសមុទ្រ។

តំណាងរាស្ត្រនៅសភាជាន់ខ្ពស់អាម៉េរិក Lindsey Graham

មន្ទីរបញ្ចកោណនិយាយថា MQ-9 ពេលនោះកំពុងឈ្លបយកការណ៍ដូចធម្មតា។ អាម៉េរិកប្រើប្រាស់ MQ-9 សម្រាប់សកម្មភាពឈ្លបយកការណ៍ និងវាយប្រហារគោលដៅលើដី។ យន្តហោះគ្មានមនុស្សបើកនេះតែងហោះលើសមុទ្រខ្មៅដើម្បីតាមដានកងទ័ពរុស្ស៊ី។

ក្រុមមន្ត្រីរុស្ស៊ីបានច្រានចោលការចោទប្រកាន់ពីអាម៉េរិក និងយល់ថា UAV របស់អាម៉េរិកផ្លាស់ប្ដូរទិសដៅរហ័ស និងធ្លាក់ដោយឯកឯងនៅពេលបាត់បង់ការគ្រប់គ្រង។ ឯកអគ្គរដ្ឋទូតរុស្ស៊ីប្រចាំអាម៉េរិក Anatoly Antonov អះអាងថា MQ-9 កំពុងប្រមូលទិន្នន័យដើម្បីបញ្ជូនទៅឱ្យអ៊ុយក្រែន មុនពេលត្រូវធ្លាក់។

នេះគឺជាការប៉ះទង្គិចផ្ទាល់ជាលើកដំបូងរវាងកងកម្លាំងរុស្ស៊ី និងអាម៉េរិក រាប់ចាប់តាំងពីសង្គ្រាមនៅអ៊ុយក្រែនបានផ្ទុះឡើងកាលពីខែកុម្ភៈឆ្នាំកន្លង។ ហេតុការណ៍នេះមិនបានធ្វើឱ្យមានការប្រឈមមុខដាក់គ្នានៅកន្លែងជាក់ស្ដែងបន្ទាប់ទៀតនោះទេ ប៉ុន្តែវាធ្វើឱ្យទ័ពអាកាសអាម៉េរិកខាតបង់អស់យ៉ាងតិច 30 លានដុល្លារអាម៉េរិក នៅពេល MQ-9 Reaper បានបាត់ខ្លួនទាំងស្រុងពីអាកាស៕

March 16, 2023

កូរ៉េខាងត្បូងសម្រេចចំណាយជិតបីពាន់លានដុល្លារទៀតដើម្បីទិញយន្តហោះចម្បាំងអាម៉េរិក

រដ្ឋាភិបាលកូរ៉េខាងត្បូងអនុម័តគម្រោងចំណាយជិតបីពាន់លានដុល្លារអាម៉េរិកដើម្បីទិញយន្តហោះចម្បាំងអាម៉េរិក F-35A ក្នុងគ្រាដែលភាពតានតឹងកំពុងកើនឡើងនៅឧបទ្វីបកូរ៉េ។

ការិយាល័យគ្រប់គ្រងកម្មវិធីទិញដូរកូរ៉េខាងត្បូង (DAPA) កាលពីថ្ងៃទី 15 មីនា ប្រកាសថា រដ្ឋាភិបាលកូរ៉េខាងត្បូងបានអនុម័តផែនការតម្លៃ 2.85 ពាន់លានដុល្លារអាម៉េរិកដើម្បីទិញយន្តហោះចម្បាំងអាម៉េរិក F-35A បន្ថែមទៀត និងគ្រោងទទួលបាននៅឆ្នាំ 2028។

មកដល់ពេលនេះមិនទាន់ដឹងច្បាស់ថា គម្រោងទិញយន្តហោះចម្បាំងខាងលើនឹងមានចំនួនប៉ុន្មានគ្រឿងនៅឡើយ។ ទ័ពអាកាសកូរ៉េខាងត្បូងកំពុងគ្រប់គ្រងយន្តហោះ F-35A ចំនួន 40 គ្រឿង និងគ្រោងទិញ 20 គ្រឿងថែមទៀត។ ចំណែកទ័ពជើងទឹកកូរ៉េខាងត្បូងក៏មានគម្រោងទិញ F-35B ចំនួន 20 គ្រឿង ប៉ុន្តែសភាមិនទាន់អនុញ្ញាត។

រដ្ឋាភិបាលកូរ៉េខាងត្បូងក៏បានអនុម័តគម្រោងទិញមីសស៊ីលការពារដែនអាកាស SM-6 តម្លៃ 582.8 លានដុល្លារអាម៉េរិក ដែលគ្រោងនឹងធ្វើឡើងជាពីរដំណាក់កាល។ មីស៊ីលទាំងនេះនឹងត្រូវបានបំពាក់ឱ្យនាវាពិឃាតថ្នាក់ Sejong ជំនាន់ទីពីរ។

ការហោះឡើង និងចុះចតរបស់យន្តហោះចម្បាំង F-35

ក្រសួងការពារជាតិកូរ៉េខាងត្បូង កាលពីថ្ងៃទី 15 មីនា ក៏បានអះអាងថា ពួកគេចង់អភិវឌ្ឍនាវាផ្ទុកយន្តហោះសម្រាប់ F-35B ផងដែរ។

គម្រោងទាំងឡាយខាងលើនេះត្រូវបានលើកឡើងក្នុងគ្រាដែលភាពតានតឹងនៅឧបទ្វីបកូរ៉កំពុងកើនឡើង។ កាលពីថ្ងៃទី 16 កុម្ភៈ កូរ៉េខាងត្បូងបានប្រកាសបង្ហាញសៀវភៅសការពារជាតិឆ្នាំ 2022 ក្នុងនោះ ទីក្រុងសេអ៊ូលបានហៅកូរ៉េខាងជើងថា «សត្រូវ» ជាលើកដំបូងក្រោយរយៈពេល 6 ឆ្នាំ និងបានបង្ហាញពីគោលជំហរម៉ឺងម៉ាត់ជាងមុនចំពោះទីក្រុងព្យុងយ៉ាង។

បងប្អូនគូសត្រូវនៅឧបទ្វីបកូរ៉េ ប៉ុន្មានខែចុងក្រោយនេះបានដំឡើងសាច់ដុំដាក់គ្នាជាបន្តបន្ទាប់។ ទីក្រុងព្យុងយ៉ាងបាញ់សាកល្បងមីស៊ីលជាហូរហែ ខណៈដែលទីក្រុងសេអ៊ូលក៏បង្កើនការធ្វើសមយុទ្ធយោធាជាមួយសម្ព័ន្ធមិត្ត៕

March 16, 2023

អតិផរណានៅប្រទេសម្ចាស់ជើងឯក World Cup 2022 កើនឡើងលើសពី 100%

ជាលើកដំបូងក្នុងរយៈពេលជាង 30 ឆ្នាំមកនេះ អតិផរណានៅប្រទេសអាហ្សង់ទីនបានកើនឡើងលើសពី 100% ដែលនេះបង្ហាញថា ក្រុមមន្ត្រីប្រទេសនេះនៅតែជួបបញ្ហាក្នុងការគ្រប់គ្រងតម្លៃទំនិញ។

ការិយាល័យជាតិស្ថិតិអាហ្សង់ទីន (INDEC) កាលពីថ្ងៃទី 14 មីនា បានឱ្យដឹងថា សន្ទស្សន៍ថ្លៃទំនិញប្រើប្រាស់ (CPI) របស់ប្រទេសនេះក្នុងខែកុម្ភៈ កើន 102.5% ធៀបនឹងឆ្នាំកន្លង។ ល្បឿននេះស្ថិតក្នុងក្រុមប្រទេសដែលមានអតិផរណាខ្ពស់បំផុតលើពិភពលោក។

កាលពីខែមករា 2023 អតិផរណារបស់អាហ្សង់ទីគឺ 6.6%។ អាហារ និងភេសជ្ជស្ថិតក្នុងក្រុមទំនិញដែលឡើងថ្លៃខ្ពស់ជាងគេ ដោយអតិផរណាកើន 9.8% នៅក្នុងខែកុម្ភៈ បើធៀបនឹងខែមករា។ ទំនិញដែលបានឡើងថ្លៃខ្ពស់បន្ទាប់គឺទំនិញជាឧបករណ៍ព័ត៌មានវិទ្យា ភោជនីយដ្ឋាន និងសណ្ឋាគារ។

សេដ្ឋកិច្ចធំជាងគេលំដាប់ទីបីនៅអាម៉េរិកឡាទីន កំពុងវិលវល់ក្នុងវិបត្តិហិរញ្ញវត្ថុ និងសង្គមដែលបានកើតឡើងក្នុងរយៈពេលច្រើនឆ្នាំចុងក្រោយនេះ។ ថ្មីៗនេះ សេដ្ឋកិច្ចរបស់អាហ្សង់ទីនកាន់តែដុនដាបទៅៗ ដោយសារតែសង្គ្រាមរុស្ស៊ី-អ៊ុយក្រែន។

ដើម្បីទប់ទល់នឹងបញ្ហាអតិផរណា និងទប់ស្កាត់ការធ្លាក់ថ្លៃរបស់រូបិយប័ណ្ណប៉េសូ រដ្ឋាភិបាលរបស់ប្រធានាធិបតី Alberto Fernandez បានអនុវត្តគោលនយោបាយគាំទ្រអត្រាប្តូរប្រាក់ចំពោះវិស័យមួយចំនួន។ គោលនយោបាយនេះជួយឱ្យបណ្ដាក្រុមហ៊ុនអាចទិញរូបិយប័ណ្ណដុល្លារអាម៉េរិកបានថោកជាងទីផ្សារ។

ទន្ទឹមនឹងនេះ រដ្ឋាភិបាលក៏ចាត់វិធានការជាច្រើនផ្សេងទៀតដើម្បីទប់ទល់នឹងអតិផរណា មានជាអាទិ៍ ការដំឡើងការប្រាក់របស់ធនាគារជាតិ ការផ្អាកសកម្មភាពបោះពុម្ពក្រដាសប្រាក់។ល។

យោងតាម CNN និង Reuters នៅលើពិភពលោកបច្ចុប្បន្ន មិនមែនមានតែអាហ្សង់ទីនមួយទេដែលកំពុងឈឺក្បាលនឹងបញ្ហាទំនិញឡើងថ្លៃ។ ទិន្នន័យផ្លូវការថ្មីបំផុតដែលប្រទេសវ៉េណេស៊ុយអេឡាប្រកាសកាលពីខែតុលាឆ្នាំកន្លងបង្ហាញថា អតិផរណានៅប្រទេសនេះបានឡើងដល់ 155%។ ចំណែកនៅប្រទេសលីបង់វិញ តម្លៃទំនិញប្រើប្រាស់ក្នុងខែមករា 2023 បានកើនដល់ 124% គ្រាដែលអតិផរណានៅប្រទេសស៊ីមបាវ៉េក្នុងខែមករាក៏កើនដល់ 101.5%៕

March 16, 2023

ពីឡុតរុស្ស៊ីបង្ហោះវីដេអូបង្ហាញពីយន្តហោះចម្បាំងហោះកៀកនឹង UAV របស់អាម៉េរិក

យន្តហោះចម្បាំងក្នុងត្រកូល Su-27 របស់រុស្ស៊ី ហោះទៅក្បែរយន្តហោះគ្មានមនុស្សបើក MQ-9 របស់អាម៉េរិក និងហោះទៅហួសព្រោះតែល្បឿនខុសគ្នា នៅក្នុងវីដេអូដែលទើបតែបង្ហោះនាពេលថ្មីៗនេះ ក្រោយពីមានហេតុការណ៍ធ្លាក់យន្តហោះ UAV របស់អាម៉េរិកនៅសមុទ្រខ្មៅ។

គណនី Fighter Bomber របស់អ្នកបើកបរយន្តហោះចម្បាំងរុស្ស៊ីម្នាក់ កាលពីថ្ងៃទី 15 មីនា បានបង្ហោះវីដេអូលើ Telegram បង្ហាញអំពីយន្តហោះចម្បាំងរុស្ស៊ី កំពុងហោះក្បែរយន្តហោះគ្មានមនុស្សបើក (UAV) MQ-9 របស់អាម៉េរិក។ ពេលវេលា និងទីកន្លែងថតវីដេអូនេះមិនត្រូវបានបង្ហើបឱ្យដឹង ហើយក៏មិនច្បាស់ថា នេះគឺជា MQ-9 ដែលបានធ្លាក់លើសមុទ្រខ្មៅ ឬយ៉ាងណានៅឡើយ។

វីដេអូមានរយៈពេលបួនវិនាទីបង្ហាញថា យន្តហោះចម្បាំងនេះស្ថិតក្នុងត្រកូល Su-27 តែមិនច្បាស់អំពីកំណែ ហោះទៅក្បែរ UAV អាម៉េរិកពីក្រោយ និងពីខាងស្ដាំ។ គម្លាតនេះអាចឱ្យគេមើលឃើញច្បាស់ផ្លាកលេខ «294» របស់ UAV។ UAV នេះគឺជាម៉ូដែល MQ-9 ប្រើប្រាស់ស្លាបកង្ហារចំនួនបួន និងត្រូវបានដំឡើងធុងប្រេងបន្ថែមដើម្បីបង្កើនចម្ងាយនៃការហោះហើរ ព្រមទាំងមានអង់តែនថ្មីនៅត្រង់ពោះរបស់វា។

ក្នុងវីដេអូ យន្តហោះទាំងពីរសុទ្ធតែហោះប្រកបដោយស្ថិរភាព មិនមានការហោះឆ្វែល ឬគំរាមដល់សុវត្ថិភាពគ្នា។ Su-27 របស់រុស្ស៊ី ហោះលឿនជាងឆ្ងាយធៀបនឹង UAV របស់អាម៉េរិក។

«នេះអាចជាមូលហេតុមួយដែលនាំឱ្យមានការប៉ះទង្គិតគ្នា ក្នុងនោះ យន្តហោះរុស្ស៊ីទំនងជាបានប៉ះ UAV ដោយអចេតនា ពេលដែល UAV របស់អាម៉េរិកផ្លាស់ប្ដូរល្បឿន ឬទិសដៅហោះហើរ» អ្នកជំនាញ Thomas Newdick របស់ទំព័រយោធា War Zone យល់ដូច្នេះ។

បញ្ជាការដ្ឋានកងទ័ពប្រចាំអឺរ៉ុបរបស់អាម៉េរិក បានឱ្យដឹងថា យន្តហោះចម្បាំង Su-27 ពីរគ្រឿងរបស់រុស្ស៊ី បានហោះមកក្បែរ ហោះកាត់មុខ និងបាញ់ប្រេងសាំងទៅលើ UAV MQ-9 Reaper នៅលើតំបន់សមុទ្រអន្តរជាតិកាលពីថ្ងៃទី 14 មីនា មុនពេលយន្តហោះ Su-27 មួយគ្រឿងផ្សេងទៀតប៉ះទង្គិចលើស្លាបកង្ហាររបស់ UAV បង្ខំឱ្យទ័ពអាកាសអាម៉េរិកទម្លាក់ UAV ចូលក្នុងសមុទ្រ។

មន្ទីរបញ្ចកោណនិយាយថា MQ-9 ពេលនោះកំពុងឈ្លបយកការណ៍ដូចធម្មតា។ អាម៉េរិកប្រើប្រាស់ MQ-9 សម្រាប់សកម្មភាពឈ្លបយកការណ៍ និងវាយប្រហារគោលដៅលើដី។ យន្តហោះគ្មានមនុស្សបើកនេះតែងហោះលើសមុទ្រខ្មៅដើម្បីតាមដានកងទ័ពរុស្ស៊ី។

ក្រុមមន្ត្រីរុស្ស៊ីបានច្រានចោលការចោទប្រកាន់ពីអាម៉េរិក និងយល់ថា UAV របស់អាម៉េរិកផ្លាស់ប្ដូរទិសដៅរហ័ស និងធ្លាក់ដោយឯកឯងនៅពេលបាត់បង់ការគ្រប់គ្រង។ ឯកអគ្គរដ្ឋទូតរុស្ស៊ីប្រចាំអាម៉េរិក Anatoly Antonov អះអាងថា MQ-9 កំពុងប្រមូលទិន្នន័យដើម្បីបញ្ជូនទៅឱ្យអ៊ុយក្រែន មុនពេលត្រូវធ្លាក់។

វីដេអូបង្ហាញពីយន្តហោះចម្បាំងរបស់រុស្ស៊ី ហោះកៀកនឹង UAV របស់អាម៉េរិក

នេះគឺជាការប៉ះទង្គិចផ្ទាល់ជាលើកដំបូងរវាងកងកម្លាំងរុស្ស៊ី និងអាម៉េរិក រាប់ចាប់តាំងពីសង្គ្រាមនៅអ៊ុយក្រែនបានផ្ទុះឡើងកាលពីខែកុម្ភៈឆ្នាំកន្លង។ ហេតុការណ៍នេះមិនបានធ្វើឱ្យមានការប្រឈមមុខដាក់គ្នានៅកន្លែងជាក់ស្ដែងបន្ទាប់ទៀតនោះទេ ប៉ុន្តែវាធ្វើឱ្យទ័ពអាកាសអាម៉េរិកខាតបង់អស់យ៉ាងតិច 30 លានដុល្លារអាម៉េរិក នៅពេល MQ-9 Reaper បានបាត់ខ្លួនទាំងស្រុងពីអាកាស៕

March 16, 2023

ទីក្រុងរបស់ឥណ្ឌូណេស៊ី តម្រូវឱ្យសិស្សចូលថ្នាក់រៀនតាំងពីព្រឹកព្រលឹម

ទីក្រុង Kupang ភាគខាងកើតប្រទេសឥណ្ឌូណេស៊ី កំពុងសាកល្បងកម្មវិធីសិក្សាមួយដែលតម្រូវឱ្យសិស្សចូលថ្នាក់រៀននៅវេលាម៉ោង 5 និង 30 នាទីព្រឹក ដើម្បី «លើកកម្ពស់វិន័យ» បង្កឱ្យមានមតិចម្រូងចម្រាសក្នុងសង្គម។

ទិដ្ឋភាពសិស្សសាលាស្ងាបពេលកំពុងធ្វើដំណើរទៅកាន់សាលារៀននៅពេលព្រឹកព្រលឹម បានក្លាយជារឿងសាមញ្ញនៅក្នុងប៉ុន្មានថ្ងៃកន្លងទៅនៅ Kupang ដែលជាទីក្រុងរដ្ឋបាលរបស់ខេត្ត Nusa Tenggara ភាពខាងកើត របស់ប្រទេសឥណ្ឌូណេស៊ី។ នោះគឺជាសិស្សចុងកម្រិតរបស់សាលាវិទ្យាល័យចំនួនដប់ដែលកំពុងអនុវត្តកម្មវិធីសាកល្បងចូលសាលារៀននៅម៉ោង 05 និង 30 នាទីព្រឹក។

កម្មវិធីដែលត្រូវបានប្រកាសកាលពីខែមុនដោយលោក Viktor Laiskodat អភិបាលក្រុង Kupang នេះ គឺធ្វើឡើងក្នុងលើកម្ពស់វិន័យសម្រាប់សិស្ស។ ក៏ប៉ុន្តែ កម្មវិធីទទួលបានការរិះគន់ច្រើនពីសាធារណជន។ អាណាព្យាបាលរបស់សិស្សនិយាយថា កូនៗរបស់ពួកគាត់អស់កម្លាំងខ្លាំងពេលត្រលប់មកផ្ទះ។ សាលារៀនផ្សេងទៀតនៅឥណ្ឌូណេស៊ី ជាធម្មតាតម្រូវឱ្យសិស្សចាប់ផ្ដើមរៀនពីម៉ោង 07 ឬម៉ោង 08 ព្រឹក។

អាជ្ញាធរឥណ្ឌូណេស៊ីបានស្នើឱ្យរដ្ឋាភិបាលធ្វើអន្តរាគមន៍ ពិនិត្យឡើងវិញចំពោះកម្មវិធីខាងលើ។ ចំណែកក្រុមមន្ត្រីក្នុងតំបន់ក៏បានស្នើឱ្យលុបចោលកម្មវិធីដែលពួកគេហៅថា «គោលនយោបាយគ្មានហេតុផល» ចំពោះសិស្សមួយនេះផងដែរ៕

March 15, 2023

តំណាងរាស្ត្រជប៉ុនមួយរូបដែល «មិនចូលធ្វើការសោះ» ត្រូវសភាដកហូតអភ័យឯកសិទ្ធិ

សមាជិកសភាជាន់ខ្ពស់ជប៉ុន Higashitani មានប្រភពពី YouTuber ល្បីឈ្មោះ ត្រូវបានដកហូតអភ័យឯកសិទ្ធិជាតំណាងរាស្ត្រ ព្រោះតែមិនបានមកកន្លែងធ្វើការទាល់តែសោះចាប់តាំងពីបានជាប់ឆ្នោតកាលពីឆ្នាំកន្លង។

ក្រុមប្រឹក្សាវិន័យរបស់សភាជប៉ុន កាលពីថ្ងៃទី 14 មីនា 2023 បានសម្រេចដកហូតអភ័យឯកសិទ្ធិនៅសភាជាន់ខ្ពស់របស់លោក Yoshikazu Higashitani ដែលត្រូវបានគេស្គាល់ថា GaaSyy អាយុ 51 ឆ្នាំ ដោយសារមិនដែលមកចូលរួមកិច្ចប្រជុំណាមួយសោះ ចាប់តាំងពីបានជាប់ឆ្នោតកាលពីខែកក្កដា 2022។

ការសម្រេចចិត្តរបស់សភាជប៉ុននេះត្រូវបានធ្វើឡើងបន្ទាប់ពីបានស្នើឱ្យលោក GaaSyy មកកាន់រាជធានីតូក្យូដើម្បីសូមអភ័យទោសដោយផ្ទាល់ចំពោះអវត្តមានជាបន្តបន្ទាប់របស់ខ្លួន និងបន្ថែមថា នេះគឺជាឱកាសចុងក្រោយរបស់លោក។ ក៏ប៉ុន្តែ GaaSyy មិនបានបង្ហាញខ្លួន ហើយនៅតែធ្វើសកម្មភាពលើឆានែល YouTube ប្រកាសពីគម្រោងជួយដល់ហេតុការណ៍រញ្ជួយដីនៅប្រទេសតួកគី។

តំណែងរបស់ GaaSyy នឹងត្រូវបានដាក់ជំនួសដោយបេក្ខភាពមួយរូបមកពីបក្ស Seijika Joshi 48 របស់លោក។ ជំនួសមុខឱ្យ GaaSyy តំណាងរាស្ត្រ Satoshi Hamada របស់បក្ស Seijika Joshi 48 បានជំទាស់នឹងការសម្រេចរបស់សភា ដោយថ្លែងថា វាផ្ទុយទៅនឹងបំណងរបស់អ្នកដែលបានបោះឆ្នោតជូន GaaSyy។

មុនពេលបានក្លាយជាតំណាងរាស្ត្រ លោក GaaSyy មានឈ្មោះល្បីនៅលើបណ្ដាញសង្គម YouTube ដោយសារតែធ្វើវីដេអូនិយាយពីបុគ្គលល្បីឈ្មោះជាប្រចាំ។

លោក Yoshikazu Higashitani ដែលត្រូវបានគេស្គាល់ថា GaaSyy

លោក GaaSyy ត្រូវបានគេជឿថា កំពុងស្ថិតនៅទីក្រុងឌូបៃ ប្រទេសអេមីរ៉ាតអារ៉ាប់រួម។ លោក GaaSyy ប្រាប់ថា មិនអាចវិលត្រលប់មកកាន់ជប៉ុន ព្រោះបារម្ភពីការចាប់ខ្លួន។ នៅជប៉ុន ប៉ូលិសកំពុងស៊ើងអង្កេតលើរូបលោក GaaSyy ក្រោមការចោទប្រកាន់ពីបទគំរាម និងបរិហាកេរ្តិ៍បុគ្គលល្បីឈ្មោះ នៅក្នុងបណ្ដាវីដេអូដែលលោកបានបង្ហោះលើបណ្ដាញសង្គម។

ការដកហូតអភ័យឯកសិទ្ធិរបស់តំណាងរាស្ត្រគឺជាការពិន័យធ្ងន់ធ្ងរបំផុតសម្រាប់សមាជិកសភានៅជប៉ុន។ រាប់ចាប់ពីឆ្នាំ 1950 សភាជប៉ុនបានសម្រេចចិត្តដកអភ័យឯកសិទ្ធិតែពីរករណីប៉ុណ្ណោះ ហើយលោក Yoshikazu Higashitani គឺជាតំណាងរាស្ត្រដំបូងដែលត្រូវបានបណ្ដេញពីសភា ព្រោះតែអវត្តមានជាបន្តបន្ទាប់៕

March 15, 2023

បឹងទឹកក្រោមដីដែលធំជាងគេបង្អស់លើពិភពលោករបស់ណាមីប៊ី

បឹងក្នុងល្អាងដង្ហើមនាគមានទំហំប្រហែលពីរហិកតា ជម្រៅជាង 200 ម៉ែត្រ ព្រមទាំងមានទឹកថ្លាឆ្វង់ និងមានសត្វ និងត្រីរស់នៅ។ នេះបើតាមទំព័រ IFL Science។

នៅជ្រៅក្នុងប្រទេសណាមីប៊ី មានល្អាងពេញដោយទឹកមួយដែលត្រូវបានគេហៅថា ល្អាងដង្ហើមនាគ (Dragon’s Breath)។ ល្អានេះមានលាក់បឹងក្រោមដីមិនស្ថិតក្រោមទឹកកកធំជាងគេលើពិភពលោក។ អស់ជាច្រើនទសវត្សរ៍ ពិភពលោកមិនដឹងអំពីទំហំពិតប្រាកដរបស់តំបន់មានទឹកមួយនេះ ព្រោះតែអ្នកវិទ្យាសាស្ត្រមិនអាចមុជទឹកចុះជ្រៅបានតាមចិត្ត។ ប៉ុន្តែ បច្ចេកវិទ្យាបច្ចុប្បន្ន បាន និងកំពុងតែបង្ហើបឱ្យដឹងអាថ៌កំបាំងរបស់ល្អាងនេះបន្តិចម្ដង។

ការស្រាវជ្រាវដោយប្រើប្រាស់រ៉ូបូតក្នុងប៉ុន្មានឆ្នាំចុងក្រោយនេះបង្ហាញថា ល្អាងដង្ហើមនាគមានជម្រៅជាង 200 ម៉ែត្រ។ អ្នកវិទ្យាសាស្ត្រពិបាកក្នុងការរកឃើញទំហំពិតប្រាកដរបស់បឹងក្រោមដីនេះ ប៉ុន្តែអ្នកជំនាញខ្លះជឿថា វាមានទំហំប្រហែលពីរហិកតា ធំជាង Lost Sea ដែលជាបឹងក្រោមដីមិនស្ថិតក្រោមទឹកកកធំជាងគេនៅសហរដ្ឋអាម៉េរិក និងធំជាងគេលំដាប់ទីពីរលើពិភពលោក ដោយមានទំហំប្រមាណ 1.8 ហិកតា។

ណាមីប៊ីគឺជាប្រទេសស្ថិតនៅជាប់នឹងមាត់សមុទ្រភាគខាងត្បូងរបស់ទ្វីបអាហ្វ្រិក។ ប្រទេសនេះមានល្អាងយ៉ាងតិច 124 កន្លែង។ ឈ្មោះ «ដង្ហើមនាគ» របស់ល្អាងនេះមានប្រភពពីជំនោរខ្យល់ក្ដៅ និងមានសំណើមនៅត្រង់ច្រកចេញចូល។ ទឹកក្នុងបឹងរបស់ល្អាងនេះមានសភាពថ្លាឆ្វង់ និងមានជីវិតរស់នៅ ក្នុងនោះ មានខ្លះមានទម្រង់ស្រដៀងជន្លេន កំពឹស ហើយក៏មានត្រីអណ្ដែងលឿងផងដែរ។

យោងតាមការស្រាវជ្រាវបែបទំនើបបច្ចុប្បន្ន ល្អាងនេះមានរូបរាងស្រដៀងទៅនឹងស្បែកជើងមានច្រមុះស្រួច៕

March 15, 2023

ក្រុមតារាវិទូរកឃើញពិភពថ្មីមួយដែលអាចជា «ពិភពមហាសមុទ្រ»

ក្រុមតារាវិទូបានរកឃើញពិភព «អន្តរការី» មួយមានចម្ងាយ 138 ឆ្នាំពន្លឺពីផែនដី ដែលអាចផ្ទុកពេញដោយទឹក និងកំពុងតែប្រែប្រួល។

យោងតាមលទ្ធផលនៃការសិក្សាស្រាវជ្រាវដែលបានចុះផ្សាយលើទំព័រ arXiv ពិភពដែលទើបរកឃើញនេះត្រូវបានដាក់ឈ្មោះថា HD-207496b។ វាកំពុងវិលជុំវិញកូនផ្កាយមួយដែលមានឈ្មោះថា HD-207496។ ភពនេះវិលមួយជុំផ្កាយមេរបស់វាដោយចំណាយពេលតែ 6.44 ថ្ងៃ។ HD-207496b មានកាំស្មើនឹង 2.25 ដង និងមានម៉ាសធំជាង 6.1 ដង ធៀបនឹងផែនដី។ នេះបើតាម Science Alert ចុះផ្សាយកាលពីថ្ងៃទី 13 មីនា។

ក្រោយការសង្កេតមើលយ៉ាងម៉ត់ចត់ ក្រុមអ្នកវិទ្យាសាស្ត្ររកឃើញថា ភព HD-207496b មិនមែនជាថ្មទាំងស្រុងឡើយ។ «…យើងសន្និដ្ឋានថា ពិភពនេះមានសម្បកខាងក្រៅសម្បូរទឹក ឧស្ម័ន ឬចម្រុះគ្នាទាំងពីរ» ក្រុមស្រាវជ្រាវបានសរសេរក្នុងរបាយការណ៍ដូច្នេះ។

ការសិក្សាស្វែងយល់បានបង្ហាញថា បើសិនជា HD-207496b មានបរិយាកាសជាឧស្ម័នអ៊ីដ្រូសែន និងអេល្យូម នោះស្ថានភាពនេះគ្រាន់តែជារឿងបណ្ដោះអាសន្ន ព្រោះថា ផ្កាយមេរបស់វានឹងដុតកម្ដៅវានៅក្នុងរង្វង់ 520 លានឆ្នាំទៀត។ បរិយាកាសរបស់ HD-207496b ក៏ប្រហែលជាបានបាត់បង់ទាំងស្រុង ហើយ HD-207496b បច្ចុប្បន្នគឺជាពិភពសមុទ្រដែលមិនមានអ្វីគ្របដណ្ដប់។

ក្នុងការស្រាវជ្រាវបន្ទាប់ ក្រុមអ្នកវិទ្យាសាស្ត្រចង់ស្វែងយល់បន្ថែមពីបរិយាកាសរបស់ HD-207496b បើសិនជាមាន។ ប្រការនោះអាចបង្ហាញច្បាស់នូវស្ថានភាពពិត និងវាសនាចុងក្រោយរបស់ពិភពមួយនេះ៕

March 14, 2023

អាស៊ានមានអាទិភាពផ្សេងត្រូវដោះស្រាយមុន «ការបង្កើតរូបិយប័ណ្ណរូមក្នុងតំបន់»

អគ្គលេខាធិការអាស៊ាន បានឱ្យដឹងថា ការបង្កើតរូបិយប័ណ្ណរួមសម្រាប់សមាគមប្រជាជាតិអាស៊ីអាគ្នេយ៍ មិនមែនជាអាទិភាពនាពេលបច្ចុប្បន្ន ក្នុងគ្រាដែលតំបន់នេះកំពុងមានរបៀបវារៈផ្សេងទៀតត្រូវការអនុវត្ត។

កាលពីថ្ងៃទី 13 មីនា 2023 ពីជាយក្រុងហ្សាការតា ប្រទេសឥណ្ឌូណេស៊ី អគ្គលេខាធិការអាស៊ាន លោក កៅ គឹមហួន បានថ្លែងថា ការស្ដារសេដ្ឋកិច្ចក្រោយសម័យកូវីដ-19 បច្ចុប្បន្នគឺជាអាទិភាពចម្បងលើសគេរបស់អាស៊ាន។

លោក កៅ គឹមហួន ថ្លែងថា «ខ្ញុំគិតថា គំនិតស្ដីពីរូបិយប័ណ្ណរួមត្រូវបានពិភាក្សាតាំងពី 10 ឬ 20 ឆ្នាំមុនមកហើយ។ ប៉ុន្តែ ដំណើរការនេះនៅវែងឆ្ងាយនៅឡើយ ព្រោះយើងកំពុងមានអាទិភាពផ្សេងទៀត»។

ក្រៅពីការស្ដារសេដ្ឋកិច្ចក្រោយសម័យកូវីដ-19 អគ្គលេខាធិការអាស៊ាន ក៏បានលើកឡើងអំពីរបៀបវារៈដទៃ មានដូចជា ការតភ្ជាប់អាស៊ាន, ការជំរុញសេដ្ឋកិច្ចបៃតង និងការបង្កើនពាណិជ្ជកម្មរវាងបណ្ដាប្រទេសក្នុងសមាគមមួយនេះ។

ជំនួសឱ្យការបង្កើតរូបិយប័ណ្ណរួម ឥណ្ឌូណេស៊ី ក្នុងនាមជាប្រធានបន្តវេនអាស៊ានសម្រាប់ឆ្នាំ 2023 បានស្នើឱ្យមានការអភិវឌ្ឍបណ្ដាញទូទាត់ប្រាក់ក្នុងតំបន់ដើម្បីជំរុញការទូទាត់ឆ្លងប្រទេស។

គិតមកដល់ពេលនេះ ធនាគារចំនួនប្រាំក្នុងតំបន់អាស៊ាន ដែលរួមមាន ធនាគារឥណ្ឌូណេស៊ី (BI), ធនាគារ Negara របស់ម៉ាឡេស៊ី (BNM), ធនាគារហ្វ៊ីលីពីន Bangko Sentral ng Pilipinas (BSP), អាជ្ញាធររូបិយវត្ថុសិង្ហបុរី (MAS) និងធនាគារជាតិថៃ (BOT) បានយល់ព្រមបង្កើនកិច្ចសហប្រតិបត្តិការក្នុងការតភ្ជាប់ការទូទាត់ក្នុងតំបន់។

កម្មវិធីសហការនេះនឹងត្រូវមានហេដ្ឋារចនាសម្ព័ន្ធទូទាត់បែបឌីជីថលរបស់បណ្ដាប្រទេសជាប់ទាក់ទង ក្នុងនោះក៏មានប្រព័ន្ធទូទាត់ដោយ QR កូដឆ្លងប្រទេស និងប្រព័ន្ធទូទាត់រហ័សផងដែរ៕

March 14, 2023

ឥណ្ឌូណេស៊ីត្រៀមស្ថានីយបញ្ចូលថាមពលរថយន្តអគ្គិសនីសម្រាប់កិច្ចប្រជុំកំពូលអាស៊ាន

ក្រុមហ៊ុនអគ្គិសនីឥណ្ឌូណេស៊ីនឹងផ្គត់ផ្គង់ស្ថានីយបញ្ចូលថាមពលចំនួន 100 គ្រឿង សម្រាប់បម្រើដល់រថយន្តអគ្គិសនី និងម៉ូតូអគ្គិសនីប្រមាណ 400 គ្រឿង ដែលនឹងត្រូវប្រើប្រាស់ក្នុងកិច្ចប្រជុំកំពូលអាស៊ាន (ASEAN) នៅប៉ុន្មានខែខាងមុខ។

ក្រុមហ៊ុនអគ្គិសនីឥណ្ឌូណេស៊ី (PT PLN) ប្រកាសថា បានសហការជាមួយសាខាអគ្គិសនីខេត្ត Nusa Tenggara ខាងកើត (NTT) ត្រៀមជាស្រេចស្ថានីយបញ្ចូលថាមពលសម្រាប់រថយន្តអគ្គិសនី (SPKLU) ដើម្បីបម្រើដល់កិច្ចប្រជុំកំពូលរបស់សមាគមប្រជាជាតិអាស៊ីអាគ្នេយ៍ (ASEAN) 2023 ដែលនឹងធ្វើឡើងនៅ Labuan Bajo ស្រុក Manggarai ខេត្ត NTT។

អគ្គនាយិកា PT PLN តំបន់ NTT លោកស្រី Fintje Lumembang កាលពីថ្ងៃទី 12 មីនាបាននិយាយថា «PLN នឹងផ្គត់ផ្គង់ SPKLU ចំនួន 100 គ្រឿងសម្រាប់បម្រើដល់រថយន្តអគ្គិសនីចំនួន 275 គ្រឿងដែលត្រូវប្រើប្រាស់ក្នុងការដឹកក្រុមមន្ត្រីតំណាងប្រទេសនានា ក៏ដូចជាបម្រើដល់បេសកកម្មរក្សាសន្តិសុខ និងការគ្រប់គ្រង»។

ដើម្បីចូលរួមបេសកកម្មអមដំណើរ និងល្បាតនៅក្នុងអំឡុងកិច្ចប្រជុំខាងលើ PLN ក៏នឹងប្រើប្រាស់ម៉ូតូអគ្គិសនីប្រហែល 105 គ្រឿងផងដែរ។

យោងតាមផែនការ កិច្ចប្រជុំកំពូលអាស៊ាន 2023 លើកទី 42 នឹងត្រូវបានធ្វើឡើងនៅ Labuan Bajo ក្នុងខែឧសភាខាងមុខ។ ចំណែកកិច្ចប្រជុំកំពូលបន្ទាប់គ្រោងនឹងធ្វើឡើងនៅរដ្ឋធានីហ្សាការតានៅខែកញ្ញា 2023៕

March 13, 2023

Category: អន្តរជាតិ