Category: អន្តរជាតិ

“Jet li” ប្រាប់ថា លោកបានប្រគល់ទ្រព្យសម្បត្តិដែលមានទាំងអស់ជាង 2,000លានយន់(ប្រមាណ 250លានដុល្លា) ឱ្យទៅភរិយាជាអ្នកគ្រប់គ្រងទាំងអស់ ព្រោះមានអារម្មណ៍ថា លោកជំពាក់គុណនាងច្រើនណាស់ ហើយនាងថែមទាំងជាស្នេហ៍ពិតប្រាកដ និងស្នេហ៍គ្រាដំបូងរបស់លោកទៀតផង។

តារាភាពយន្តលំដាប់ពិភពលោករូបនេះ បាននិយាយរឿងនេះនៅក្នុងកម្មវិធីទូរទស្សន៍មួយ ដែលលោកបានចូលរួមកាលពីពេលថ្មីៗនេះ ដោយលោកបានប្រាប់ថា ដែលលោកសម្រេចចិត្តប្រគល់ទ្រព្យសម្បត្តិទាំងអស់ឱ្យទៅភរិយា ក៏ព្រោះតែកន្លងមក នាងបានលះបង់ច្រើនណាស់ដើម្បីរូបលោក ជាពិសេសក្នុងអំឡុងពេលដែលនាងនៅមានការងារដែលត្រូវធ្វើច្រើន។ លី ជឺ ភរិយារបស់ ចិត លី ដែលជាអតីតបវរកញ្ញាប្រចាំទ្វីបអាស៊ី (Miss Asia) នោះ បានសម្រេចចិត្តបោះបង់ចោលការងារក្នុងពិភពភាពយន្តដែលពេលនោះកំពុងមមាញឹក ដើម្បីមកជួយមើលថែទាំរូបលោក ទាំងលើរឿងការងារ និងរឿងផ្ទាល់ខ្លួន។

ក្រៅពីនោះ នៅក្នុងរឿងស្នេហាវិញ ចិត លី នៅបានទទួលស្គាល់ថា លី ជឺ គឺជាស្នេហាពិតប្រាកដរបស់លោក។ ចិត លី ប្រាប់ថា លោកធ្លាប់មានអារម្មណ៍ស្រឡាញ់ស្ត្រីផ្សេងខ្លះដែរ តែនៅពេលបានមកជួប លី ជឺ ទើបលោកយល់ច្បាស់ថា សេចក្ដីស្នេហាពិតប្រាកដគឺអ្វី។

ចិត លី ធ្លាប់ឆ្លងកាត់ការរៀបអាពាហ៍ពិពាហ៍ ម្ដងរួចមកហើយ ជាមួយតារាសម្ដែងស្រីម្នាក់ ដែលលោកធ្លាប់រួមការងារជាមួយគ្នា ដែលមានឈ្មោះថា ហួង ឈីវយៀន ដែលចិត លី បានប្រាប់ត្រង់ៗថា ដែលលោកសម្រេចចិត្តរៀបការជាមួយនាង ក៏ព្រោះតែចាស់ៗណែនាំថា បើបានរៀបការជាមួយនាង នឹងជួយលើកជោគជតារាសី ឱ្យជីវិតរបស់លោកល្អប្រសើរឡើង ដែលនៅពេលនោះ ជីវិតរបស់ចិត លី កំពុងជួបប្រទះបញ្ហាយ៉ាងច្រើន។

កាលនោះ អាជីពជាតារាភាពយន្តរបស់ចិត លី នៅដុនដាបនៅឡើយ ចេញពីប្រទេសចិនដីគោក ត្រូវមកស្វែងរកឱកាសនៅទីក្រុងហុងកុង ហើយនៅឆ្នាំ1989 លោកបានសម្ដែងក្នុងខ្សែភាពយន្ត 1រឿង និងបានជួបជាមួយ លី ជឺ ដែលសម្ដែងក្នុងរឿងនោះជាមួយគ្នាដែរ និងក៏បានស្រឡាញ់គ្នានាពេលក្រោយមក។ ពេលនោះនាងបានជួយទំនុកបម្រុងលោកយ៉ាងច្រើន ដែលកាលនោះ ចិត លី នៅមិនទាន់បានក្លាយជាតារាភាពយន្តដែលល្បីល្បាញដូចសព្វថ្ងៃនេះឡើយ។

ក្រោយពីសេពគប់គ្នាអស់រយៈពេល 9ឆ្នាំមក នៅឆ្នាំ1999 ចិត លី ដែលពេលនោះបានក្លាយជាតារាភាពយន្តលំដាប់ពិភពលោកហើយនោះ បានសម្រេចចិត្តរៀបការជាមួយ លី ជឺ ជាស្វាមី-ភរិយាពេញច្បាប់៕

ប្រភព៖ សារព័ត៌មានបរទេស

ក្រសួងការពារជាតិអាហ្សែបែហ្សង់ (Azerbaijan) បាននិយាយថា កងកម្លាំងប្រដាប់អាវុធដែលគាំទ្រដោយប្រទេសអាមេនី (Armenia) បានបាញ់កាំជ្រួចផ្លោងចំនួន3គ្រាប់ នៅក្នុងសមរភូមិ ប៉ុន្តែពួកវាមិនបានផ្ទុះនោះទេ។

កាលពីថ្ងៃទី30កញ្ញា តំណាងរបស់ក្រសួងការពារជាតិអាហ្សែបែហ្សង់ បានឱ្យដឹងថា៖ “ប្រទេសអាមេនី បានប្រើប្រាស់កាំជ្រួចផ្លោងយុទ្ធសាស្ត្រ Tochka-U នៅក្នុងបន្ទាត់ព្រំដែនជាប់គ្នាជាមួយតំបន់ Nagorno-Karabakh។ ដោយសារភាពមិននឹងន និងគុណភាពអន់នៃអាវុធរបស់សត្រូវ កាំជ្រួចចំនួន3គ្រាប់ដែលត្រូវបានបាញ់ មិនបានផ្ទុះនោះទេ”។

អាហ្សែបែហ្សង់ ក៏បានប្រកាសថា កងទ័ពប្រទេសនេះ ក្រោយមកក៏បានវាយប្រហារតបតទៅលើទីបញ្ជាការមួយរបស់កងកម្លាំងអាមេនីនៅក្នុងភូមិ Agdere ក្នុងតំបន់ Nagorno-Karabakh។ នៅក្នុងសេចក្ដីប្រកាសមួយ ក្រសួងការពារជាតិអាហ្សែបែហ្សង់ ឱ្យដឹងថា៖ “ភាគីសត្រូវ ទទួលរងការខូចខាតយ៉ាងធ្ងន់ធ្ងរចំពោះកម្លាំងទាហាន ក៏ដូចជាប្រព័ន្ធសព្វាវុធ”។

ទាក់ទងនឹងការចោទប្រកាន់ខាងលើរបស់អាហ្សែបែហ្សង់ កងកម្លាំងដែលស្និទ្ធនឹងអាមេនី នៅតំបន់ Nagorno-Karabakh ក៏បានច្រានចោលទាំងស្រុង។ មន្ត្រីនៅតំបន់ Nagorno-Karabakh បានបង្ហោះសារនៅលើ Facebook ដែលមានខ្លឹមសារថា៖ “ប្រព័ន្ធឃោសនារបស់អាហ្សែបែហ្សង់ ជាថ្មីម្ដងទៀត បានផ្សាយព័ត៌មានមិនពិត”។

នៅក្នុងថ្ងៃទី30កញ្ញាដដែល ក្រសួងការពារជាតិអាមេនី បានប្រកាសថា ខ្លួនបានកម្ទេចរថក្រោះ11គ្រឿង រថពាសដែក9គ្រឿង ប្រព័ន្ធកាំភ្លើងធំ TOS-1 មួយកន្លែង រួមនឹងប្រព័ន្ធអាវុធ BM-27 Uragan និង BM-30 Smerch មួយ​ចំនួន​របស់​កង​ទ័ព​​អាហ្សែបែហ្សង់ផងដែរ។ ភាគីខាងអាហ្សែបែហ្សង់ មិនទាន់បានបញ្ចេញប្រតិកម្មអ្វីទៅនឹងព័ត៌មាននេះនៅឡើយ។

សូមបញ្ជាក់ថា ការប្រយុទ្ធគ្នារវាងអាហ្សែបែហ្សង់ និងអាមេនី នៅក្នុងតំបន់ Nagorno-Karabakh បានឈានចូលដល់ថ្ងៃទី4ហើយ។ ប្រទេសទាំង2 សុទ្ធតែបានប្រកាសរៀងៗខ្លួនថា គូបដិបក្ខបានទទួលរងការខូចខាតធ្ងន់​ធ្ងរ។ អាមេនីឱ្យដឹងថា ទាហាន104នាក់ រួមនឹងជនស៊ីវិល23នាក់របស់ខ្លួន បានបាត់បង់ជីវិត ខណៈ​ដែល​អាហ្សែបែហ្សង់មិនទាន់បានប្រកាសអំពីតួលេខនៃការស្លាប់ដោយសារការប្រយុទ្ធនេះនៅឡើយ។

ប្រធានាធិបតីរុស្ស៊ី លោក Vladimir Putin និងប្រធានាធិបតីបារាំង លោក Emmanuel Macron បានអំពាវនាវឱ្យអាមេនី និងអាហ្សែបែហ្សង់ “បញ្ឈប់ការប្រយុទ្ធគ្នាទាំងស្រុង” នៅតំបន់ Nagorno-Karabakh និងប្រើប្រាស់ស្ថាប័នការបរទេសដើម្បីដោះស្រាយជម្លោះ។

យ៉ាងណាក៏ដោយ អាមេនី និងអាហ្សែបែហ្សង់ មិនបានអើពើដល់ការអំពាវនាវរបស់អន្តរជាតិនោះទេ ដែលនេះបានធ្វើឱ្យមានការព្រួយបារម្ភកាន់តែខ្លាំងចំពោះហានិភ័យដែលថា ជម្លោះនេះក្លាយទៅជាសង្គ្រាមធំ និងនាំឱ្យបណ្ដាប្រទេសមហាអំណាចក្នុងតំបន់ ដូចជាទួរគី និងរុស្ស៊ីជាដើម ចូលធ្វើអន្តរាគមន៍។

តំបន់ Nagorno-Karabakh គឺជាខេត្តមួយរបស់អាហ្សែបែហ្សង់ ក៏ប៉ុន្តែ ប្រជាជនភាគច្រើនគឺជាជនជាតិអាមេនី។ ប្រជាជនទាំងនេះ តែងរកវិធីដើម្បីបំបែកខ្លួនពីអាហ្សែបែហ្សង់ ដើម្បីបង្រួបបង្រួមជាមួយអាមេនី។ បច្ចុប្បន្ន ផ្ទៃដីភាគច្រើននៃតំបន់ Nagorno-Karabakh កំពុងត្រូវបានកងកម្លាំងដែលស្និទ្ធជាមួយនឹងអាមេនី ជាអ្នកកាន់កាប់។

ជម្លោះដណ្ដើមទឹកដីនៅតំបន់ Nagorno-Karabakh បានផ្ទុះឡើង និងបានជាការប្រយុទ្ធគ្នាយ៉ាងខ្លាំងក្លាក្នុងរយៈពេល6ឆ្នាំរវាងអាហ្សែបែហ្សង់ និងអាមេនី រាប់ចាប់ពីខែកុម្ភៈ1988 ដល់ខែឧសភា1994។ បើទោះជាមានកិច្ចព្រមព្រៀងឈប់បាញ់កាលពីឆ្នាំ1994 រួមនឹងកិច្ចចរចារកសន្តិភាពជាច្រើនលើកផ្សេងទៀតត្រូវបានធ្វើឡើង ការប្រយុទ្ធគ្នារប៉េះរប៉ោះ នៅតែកើតមានឡើងជាហូរហែដដែលនៅក្នុងតំបន់នេះ៕

ប្រភព៖ RIA Novosti

ថ្មីៗនេះ ក្រោយពីបានបញ្ចប់កិច្ចជជែកតតាំងជាមួយលោក Biden លោក Donald Trump បានអះអាងថា លោកដណ្ដើមបានជ័យជំនះ (ដោយងាយស្រួល” ហើយថា គូប្រជែងរបស់លោក គឺលោក Joe Biden វិញ មានភាព “ទន់ជ្រាយ និងត្អូញត្អែរច្រើន”។

ប្រធានាធិបតី Donald Trump បានប្រាប់អ្នកយកព័ត៌មាននៅលើវាលស្មៅរបស់សេតវិមានកាលពីថ្ងៃទី30កញ្ញាថា៖ “ខ្ញុំឃើញ rating (អត្រាអ្នកចូលរួមទស្សនាទូរទស្សន៍ក្នុងពេលជាមួយគ្នា) ពិតជាខ្ពស់ ហើយពិតជាល្អណាស់ដែលបានឈរនៅលើឆាកទីនោះ និងមានអារម្មណ៍ធូរស្រាលណាស់។ ខ្ញុំវាយតម្លៃខ្ពស់ទៅលើរាល់ពាក្យសម្ដីល្អប្រសើរ”។

ក្រោយមកទៀត លោក Trump បានអះអាងថា៖ “ខ្ញុំបានឮថា គាត់ (លោក Biden) មិនចង់បន្ត (កិច្ចជជែកតតាំង) ទៀតទេ ប៉ុន្តែ ប្រការនេះគឺអាស្រ័យទៅលើខ្លួនគាត់ ចំណែកខ្ញុំវិញ គឺនៅតែចង់បន្ត”។ លោកបន្តថា៖ “ខ្ញុំបានឈ្នះនៅក្នុងកិច្ចជជែកតតាំងកាលពីយប់កន្លងទៅដោយងាយស្រួល។ ខ្ញុំគិតថា គាត់ពិតជាអន់ខ្សោយខ្លាំងណាស់។ គាត់មើលទៅដូចទន់ជ្រាយ និងចូលចិត្តត្អូញត្អែរ។ ពិតណាស់ យើងបានឈ្នះនៅក្នុងកិច្ចជជែកតតាំងនេះ បើយោងទៅតាមការស្ទង់មតិទាំងអស់ដែលខ្ញុំបានមើល”។

ក៏ប៉ុន្តែ ការស្ទង់មតិរបស់ CNN បានបង្ហាញថា ក្នុងចំណោមមនុស្សចំនួន10នាក់ដែលត្រូវបានសួរ គឺមាន6នាក់ជឿថា លោក Biden ធ្វើបានល្អជាងលោក Trump នៅក្នុងកិច្ចជជែកតតាំងលើកទីមួយ។ ចំណែកការស្ទង់មតិរបស់ CBS News បានបង្ហាញថា 48% នៃអ្នកទស្សនា ជឿថា លោក Biden ឈ្នះ ខណៈ41% និយាយថា លោក Trump បានបង្ហាញសមត្ថភាពល្អជាងលោក Biden។

កិច្ចជជែកតតាំងរវាងលោក Trump និងលោក Biden ដែលដឹកនាំកម្មវិធីដោយលោក Chris Wallace បានក្លាយទៅជាព្រឹត្តិការណ៍ដ៏ច្របូកច្របល់ នៅពេលលោក Trump បានកាត់សម្ដីរបស់លោក Biden និងលោក Wallace ជាបន្តបន្ទាប់ ព្រមទាំងបានវាយប្រហារយ៉ាងខ្លាំងក្លាទៅលើលោក Biden និងបាននិយាយថា លោក Biden មិនឆ្លាត។ ចំណែកលោក Biden វិញ ក៏បានអធិប្បាយថា លោក Trump គឺជា “ជនបោកប្រាស់” ហើយពេលខ្លះក៏បានស្នើឱ្យលោក Trump “ស្ងាត់មាត់” ផងដែរ។

ទាក់ទងនឹងលទ្ធផលនៃការជជែកតតាំងគ្នាកាលពីថ្ងៃទី29កញ្ញារវាងលោក Biden និងលោក Trump កាលពីថ្ងៃទី30កញ្ញា លោក Biden ថ្លែងថា៖ “ខ្ញុំមិនគួរនិយាយអំពីប្រការនេះ ក៏ប៉ុន្តែ ប្រធានាធិបតីសហរដ្ឋអាមេរិក បានបញ្ចេញឥរិយាបថ​ទៅ​តាម​អ្វី​ដែល​គាត់តែងតែធ្វើ។ ខ្ញុំគិតថា នោះគឺជាភាពអាម៉ាស់របស់ជាតិ”។

សូមបញ្ជាក់ថា កិច្ចជជែកតតាំងគ្នារបន្ទាប់ទៀត វាងលោក Donald Trump និងលោក Joe Biden នឹងត្រូវធ្វើឡើងនៅថ្ងៃទី15តុលា នៅមជ្ឈមណ្ឌលសិល្បៈ Adrienne Arsht (Adrienne Arsht Center for the Performing Arts of Miami-Dade County) នៅទីក្រុង Miami រដ្ឋ Florida។ ចំណែកកិច្ចជជែកតតាំងលើកទីបីនឹងត្រូវធ្វើឡើង​នៅ​ថ្ងៃ​ទី​22​តុលា​ នៅ​សាកល​វិទ្យាល័យ​ Belmont ក្នុងទីក្រុង Nashville នៃរដ្ឋ Tennessee៕

ប្រភព៖ AFP, Hill

កាលពីថ្ងៃទី27 កញ្ញាកន្លងទៅ ស្ថានីយទូរទស្សន៍ NHK របស់ជប៉ុន បានរាយការណ៍ពីសោកនាដកម្មមួយគឺ តួឯកស្រីដ៏ល្បីល្បាញរបស់ជប៉ុន យូកុ ថាខេអ៊ុជិ វ័យ 40ឆ្នាំ បានបញ្ចប់ជីវិតខ្លួនឯងយ៉ាងទាន់ហន់ គ្មាននរណានឹកស្មានដល់ ព្រោះនាងគ្មានបង្ហាញពីភាពខុសប្រក្រតីអ្វី ឱ្យក្រុមគ្រួសារសង្កេតឃើញពីមុនមកទាល់តែសោះ ខណៈដែលអង្គការការពារការធ្វើអត្តឃាតរបស់ជប៉ុន មានការព្រួយបារម្ភថា អាចនឹងមានរឿងគួរឱ្យសោកស្ដាយបែបនេះកើតឡើងទៀត…។

លោក ថៃគិ ណាកាបាយ៉ាឈិ ស្វាមីដែលជាតារាសម្ដែងដូចគ្នា បានប្រទះឃើញរាងកាយរបស់យូកុ នៅអំឡុងម៉ោង 2ទៀបភ្លឺ ថ្ងៃអាទិត្យ ទី27 កញ្ញា នៅក្នុងផ្ទះ ក្នុងតំបន់ឈិប៊ូយៈ ក្រុងតូក្យូ។ នៅពេលនាំទៅដល់មន្ទីរពេទ្យ ពេទ្យបានប្រកាសអះអាងថា នាងបានស្លាប់បាត់ទៅហើយ។

អាជ្ញាធរប៉ូលិស បានធ្វើការត្រួតពិនិត្យបឋម មិនឃើញមានសំបុត្រ ឬសំណេរប្រាប់ពីការលាគ្នាណាមួយឡើយ។ ស្រដៀងគ្នានឹងករណី តារាជប៉ុនល្បីឈ្មោះយ៉ាងតិច 3នាក់ កាលពីពេលមុននេះ ដែលមិនបានបន្សល់ទុកសំណេរអ្វីទាំងអស់ មុនពេលបញ្ចប់ជីវិតខ្លួនឯង មិនថា សេអ៊ិ អាឈិណៈ តារាស្រីវ័យ 36ឆ្នាំ ដែលមានស្នាដៃសម្ដែងក្នុងខ្សែភាពយន្តអន្តរជាតិរឿង Silk ដែលបានឃ្លាតចាកទៅកាលពីថ្ងៃទី14 កញ្ញាកន្លងទៅថ្មីៗនេះ នៅឯអាផាតមិនត៍ ក្នុងតំបន់ឈិប៊ូយៈ ក្រុងតូក្យូដូចគ្នាដែរ។

តារាឯកប្រុស ហារុម៉ៈ មិអ៊ូរ៉ាក់ វ័យ 30ឆ្នាំ សម្ដែងក្នុងរឿង Titan ​បានផ្ដាច់ជីវិតខ្លួនឯង កាលពីខែកក្កដា​កន្លងទៅ នៅក្នុងបន្ទប់ស្នាក់ ក្នុងតំបន់មិណាតុ ក្រុងតូក្យូ និង ហាណៈ ឃិមូរ៉ៈ តារាកីឡាការិនីចំបាប់ដ៏ល្បីល្បាញ ដែលធ្លាប់ចូលរួមក្នុងកម្មវិធី រៀលលីធី សូ របស់កម្មវិធី Netflix មុននឹងបញ្ចប់ជីវិតខ្លួនឯង កាលពីខែឧសភា ក្នុងឆ្នាំនេះដូចគ្នាទាំងអស់។

តាមរយៈទិន្នន័យរបស់អង្គការសុខភាពពិភពលោក បានឱ្យដឹងថា ជប៉ុន ស្ថិតក្នុងក្រុមប្រទេសដែលមានអត្រាការធ្វើអត្តឃាតខ្ពស់ជាប់លំដាប់ពិភពលោក តែក្រោយពីមានវិធានការការពារយ៉ាងច្បាស់លាស់ តាំងពីឆ្នាំ2015មក តួលេខក៏បានធ្លាក់ចុះជារឿយៗ។

លោក ថាត់សឺយ៉ៈ ឈិប៊ូអ៊ិ អ្នកយកព័ត៌មានឯករាជ្យ ដែលតាមដាន និងរាយការណ៍ពីទិន្នន័យនៃការធ្វើអត្តឃាតជាច្រើនឆ្នាំមកហើយនោះ បានផ្ដល់ការយល់ឃើញថា ពិភពភាពយន្តកម្សាន្ត ច្រើនតែណែនាំបង្ហាញពីទិដ្ឋភាពមុខឆាកដែលល្អស្អាត តែខាងក្រោយឆាក ឬជីវិតពិតវិញ ទម្រាំតែតារាសម្ដែងនឹងបានទទួលសម្ដែង វាគឺជាពិភពមួយដែលដាក់សម្ពាធដ៏ធ្ងន់ និងទាំងអស់នោះហើយដែលធ្វើឱ្យអារម្មណ៍តារាសម្ដែង មិននឹងនរ។

លោកថាត់សឺយ៉ៈ និយាយថា “រឹតតែអ្នក លក់បានច្រើនប៉ុនណា ភាពតានតឹង និងសម្ពាធចំពោះអនាគត រឹតតែច្រើនឡើងប៉ុននោះដែរ ហើយបើនៅសុខៗ អ្នកបែរត្រឡប់ មើលមកជីវិតរបស់ខ្លួនឯង រវាងការងារ និងជីវិតផ្ទាល់ខ្លួនផងនោះ ផ្លូវចិត្តអាចនឹងធ្លាក់ដាំក្បាលចុះទៅរកភាពសោកសៅ​នៅត្រង់ចន្លោះនោះ និងកើតមានអារម្មណ៍ថា តើយើងធ្លាប់មានពេលវេលាគ្រប់គ្រាន់ក្នុងការមើលថែទាំខ្លួនឯងដែរឬទេ ក្នុងពេលដែលយើងកំពុងបាត់បង់តុល្យភាពខាងផ្លូវចិត្ត?”។

ចំណែកលោក យ៉ាម៉ាតុ សាតុ អគ្គនាយកអង្គការការពារសិទ្ធិតារា​ និងជនល្បីឈ្មោះ បានថ្លែងថា តារាល្បីៗមានភាពតានតឹងក្នុងចិត្តជាគ្រឹះប្រចាំថ្ងៃស្រាប់ទៅហើយ ហើយថែមទាំងឆ្នាំនេះ នៅមានកើតស្ថានការណ៍ជំងឺរាតត្បាតកូវីដ-19 ដែលត្រូវប្រើភាពអត់ធ្មត់កាន់តែច្រើនឡើងផងនោះ ទើបអាចស្ថិតក្នុងអំឡុងពេលដែលត្រូវប្រឈមមុខជាមួយខ្លួនឯង និងភាពតានតឹងធុញថប់ចំពោះអនាគត។

ចំណែក យ៉ាស៊ឹយូគិ ឈិមិស៊ឹ CEO របស់សមាគមកម្លាំងចិត្តជីវិត ការពារការធ្វើអត្តឃាត បានថ្លែងអំពីក្ដីវិតក្កកង្វល់ថា ការស្លាប់របស់តារាឯកស្រី យូកុ អាចមានផលខាងចិត្តវិទ្យាដល់មនុស្សធម្មតាទូទៅ។

លោកយ៉ាស៊ឹយូគិ ឈិមិស៊ឹ ថ្លែងថា “ពេលដែលតារា ឬជនល្បីឈ្មោះធ្វើអត្តឃាត មនុស្សក្នុងសង្គមសឹងតែគាំងបេះដូង បើរបាយការណ៍នៅតែមានបន្តទៀត អាចនឹងហុចផលប៉ះពាល់ មិនចំពោះតែអ្នកនៅក្នុងពិភពកម្សាន្តនោះទេ តែមនុស្សធម្មតាដែលស្ថិតក្នុងវ័យជំទង់ ឬអ្នកដែលមានភាពធុញថប់តានតឹងស្រាប់ហើយ រឹតតែមានកូវីដ-19ផងនោះ ធ្វើឱ្យឱកាសចង់និយាយជាមួយអ្នកដទៃកាន់តែថយចុះតិចទៅ ទើបគួរឱ្យព្រួយបារម្ភចំពោះស្ថានការណ៍នេះខ្លាំងណាស់។

លោកបានណែនាំឱ្យជនជាតិជប៉ុនដែលមានភាពធុញថប់តានតឹងក្នុងអារម្មណ៍ថា  កុំនៅស្ងាត់ៗតែម្នាក់ឯង រកអ្នកជិតស្និទ្ធជជែកលេងជាមួយ ឬសរសេរទម្លាយអារម្មណ៍ដែលមាននៅក្នុងចិត្ត។ ទាំងអស់នេះអាចនឹងជួយបានខ្លះ រួមទាំងទំនាក់ទំនងអង្គការសង្គ្រោះបន្ទាន់ដែលអាចផ្ដល់ការប្រឹក្សាបានជានិច្ច។

ពីស្ត្រីស្រស់ស្អាតភ្លឺថ្លា ក្លាយជាស្ត្រីរឹងមាំ

យូកុ ថាខេអ៊ូជិ កើតនៅថ្ងៃទី1 មេសា 1980 នៅទីក្រុងអ៊ុរ៉ាវៈ ខេត្តសៃតាម៉ៈ ឈានចូលពិភពសិល្បៈតាំងពីនៅវ័យជំទង់ មានឈ្មោះល្បីនៅពេលបានសម្ដែងជាតារាឯកនៅក្នុងរឿង Asuka របស់ស្ថានីយទូរទស្សន៍ NHK កាលពីឆ្នាំ1999។

ក្លាយជាតារាឯកស្រីក្នុងដួងចិត្តប្រជាជនជប៉ុន ដែលមានវិវឌ្ឍនាការការសម្ដែងចេញពីតួនាងក្រមុំស្រស់ស្អាតគួរឱ្យស្រឡាញ់ ធំធាត់ឡើង បានទទួលការពេញនិយមជាមួយនឹងតួនាងក្រមុំក្បែរផ្ទះ ដែលមានស្នាមញញឹមធ្វើឱ្យពិភពលោកស្រស់ថ្លា រហូតក្លាយជាស្ត្រីពូកែ រឹងប៉ឹងនៅពេលដល់វ័យ 30ប្លាយ ដែលមិនថាសម្ដែងជាតួអ្វី ក៏យូកុ ប្រៀបដូចជាមេដែកឆក់ ដែលទាញរេតធីង បានខ្ពស់ទាំងរឿងភាគសម័យដើម និងរឿងភាគរួមសម័យ។

ក្រៅពីស្នាដៃខាងរឿងភាគ និងខ្សែភាពយន្តដែលល្បីល្បាញក្នុងប្រទេសជប៉ុនហើយ យូកុ ថែមទាំងដណ្ដើមបានរង្វាន់ជាតារាសម្ដែងឆ្នើម 3ឆ្នាំជាប់ៗគ្នា ក្នុងអំឡុងឆ្នាំ2004-2007 និងថែមទាំងមានការងារដើរបង្ហាញម៉ូដ ផ្សាយពាណិជ្ជកម្មផលិតផលល្បីៗ និងថតម៉ូដលើគម្របទស្សនាវដ្ដីល្បីៗ និងនៅមានស្នាដៃដែលបានទទួលការពេញនិយមយ៉ាងទូលំទូលាយនៅឆាកអន្តរជាតិទៀតផង។

ស្នាដៃរឿងភាគចុងក្រោយៗរបស់យូកុ មានដូចជា ការសម្ដែងជាតួ ស៊ើឡក់ ហូមស៍ Versionស្រី នៅក្នុងរឿង Miss Sherlock របស់បុស្តិ៍ HBO ក្នុងឆ្នាំ2018 និងរឿង Queen ឆ្នាំ2019 ក្នុងតួមេធាវីស្រីដ៏ពូកែ។

ជីវិតផ្ទាល់ខ្លួន នាងបានរៀបការលើកដំបូងយ៉ាងអឹកធឹកគគ្រឹកគគ្រេងជាមួយលោក ឈិនដូ ណាកាមូរ៉ៈ តារាកំប្លែង និងជាតារាឯកប្រុសដែលសម្ដែងគូគ្នានៅក្នុងខ្សែភាពយន្តល្បីល្បាញរឿង Be With Me។ រស់នៅជាមួយគ្នាក្នុងអំឡុងឆ្នាំ2005-2008 មានកូនប្រុសម្នាក់ជាមួយគ្នា មុននឹងជីវិតអាពាហ៍ពិពាហ៍ត្រូវដួលរលំ នៅពេលខាងប្រុសបែកធ្លាយព័ត៌មានថា មានស្រីផ្សេង។

ភាពរឹងប៉ឹងរបស់យូកុ ក្រោយការលែងលះ ធ្វើឱ្យនាងបានទទួលកម្លាំងចិត្ត និងសំឡេងស្ងើចសរសើរ ពីអ្នកគាំទ្រជាស្ត្រីជប៉ុនយ៉ាងច្រើន។

តមក នៅឆ្នាំ2019 យូកុ រៀបការម្ដងទៀតជាមួយតារាសម្ដែងជំនាន់ប្អូន ថៃគិ ណាកាបាយ៉ាឈិ ដែលមានអាយុខុសគ្នា 5ឆ្នាំ នៅថ្ងៃទី27 កុម្ភៈ និងទើបតែមានកូនប្រុសម្នាក់ទៀត ប្រសូតកាលពីខែកុម្ភៈ ឆ្នាំនេះ(2020) ដែលមានអាយុប្អូនកូនប្រុសច្បង 14ឆ្នាំ។

ការឃ្លាតទៅរបស់យូកុ​ ក្នុងគ្រានេះ មានមិត្តភក្តិតារាភាពយន្ត និងអ្នកនៅក្នុងពិភពសិល្បៈ រួមទាំងបណ្ដាអ្នកគាំទ្រផង បាននាំគ្នាផូស្តពាក្យសោកស្ដាយ និងអាណិតនាងយ៉ាងច្រើនកុះករ។

លោក ហ៊ីដេអូ ណាកាតៈ អ្នកដឹកនាំខ្សែភាពយន្តរឿង Ring ដែលជ្រើសរើសយកយូកុ មករួមសម្ដែងក្នុងខ្សែភាពយន្តនេះ កាលពីនាងមានអាយុត្រឹមតែ​17ឆ្នាំនោះ បានផូស្តសំណេរថា “ខ្ញុំបានជួបនាង ពេលជ្រើសរើសអ្នកសម្ដែងក្នុងរឿង Ring ពេលនោះ នាងមើលទៅស្អាត និងចែងចាំងខ្លាំងណាស់ ខ្ញុំសោកស្ដាយណាស់ សោកស្ដាយមែនទែន ដែលនាងឃ្លាតទៅបែបនេះ”៕

ប្រភព៖ សាព័ត៌មានបរទេស

ការកាត់សម្ដីជាច្រើនលើក ការដណ្ដើមគ្នានិយាយ និងការស្រែកខ្លាំងៗទៅកាន់គូបដិបក្ខ បានកើតឡើងជាបន្តបន្ទាប់នៅក្នុងកិច្ចជជែកតតាំងទល់មុខគ្នាលើកដំបូងរវាងប្រធានាធិបតី Donald Trump មកពីបក្សសាធារណរដ្ឋ និងលោក Joe Biden បេក្ខភាពប្រធានាធិបតី មកពីបក្សប្រជាធិបតេយ្យ ដែលព្រឹត្តិការណ៍នេះ ត្រូវបានធ្វើឡើងកាលពីយប់ថ្ងៃទី29កញ្ញា (ម៉ោងនៅសហរដ្ឋអាមេរិក)។

នៅពេលកិច្ចជជែកតតាំងគ្នាបានចាប់ផ្ដើម លោកទាំង2បានកាត់សម្ដីគ្នាជាបន្តបន្ទាប់ ឬដណ្ដើមគ្នានិយាយក្នុងពេលតែមួយ។ លោក Trump តែងតែរិះគន់លើគូប្រជែង និងអ្នកដឹកនាំកម្មវិធី គឺលោក Chris Wallace ដើម្បីអូសទាញអ្នកទាំង2ឱ្យចូលទៅក្នុង “សង្គ្រាមពាក្យសម្ដី”។ សារព័ត៌មាន New York Times បានសរសេរថា សកម្មភាពនេះរបស់លោក Trump គឺដើម្បីទប់ស្កាត់ការយកចិត្តទុកដាក់របស់ទស្សនិកជន ទៅលើកំហុសឆ្គងរបស់ខ្លួន និងមិនឱ្យលោក Biden មានឱកាសបញ្ចេញឥរិយាបថជាប្រធានាធិបតី។

លោក Biden និយាយទៅកាន់លោក Trump ថា៖ “លោកស្ងាត់មាត់ទៅ បានទេ?”។

ក្នុងកិច្ចជជែកតតាំងគ្នានេះ គេឃើញអតីតអនុប្រធានាធិបតី Joe Biden មានការអស់សំណើច ដកដង្ហើមវែង ញញឹមពេបជ្រាយ នៅពេលលោក Trump រៀបរាប់អំពីបញ្ហាក្ដៅៗ ដូចជា ការតែងតាំងចៅក្រមតុលាការកំពូល រឿងអាស្រូវគេចពន្ធ ធានារ៉ាប់រងសុខាភិបាល និងបញ្ហា COVID-19 ជាដើម។

រាល់ពេលដែលលោក Trump កាត់សម្ដី និងនិយាយមិនឈប់ បើទោះមានអន្តរាគមន៍ពីអាជ្ញាកណ្ដាល Chris Wallace លោក Biden ក៏ជាគ្រវីក្បាលជាញឹកញាប់។ អ្នកយកព័ត៌មានរបស់សារព័ត៌មាន Politico បានអធិប្បាយថា៖ “លោក Biden បង្ហាញអំពីភាពនឹងធឹងល្អគួរសមនៅក្នុងកិច្ចជជែកតតាំងគ្នានេះ។ ចំណែកលោក Trump វិញ តែងតែប្រើប្រាស់យុទ្ធសាស្ត្រវាយប្រហារផ្ទួនៗនៅលើឆាក មិនឱ្យអ្នកណានិយាយបាន។ ក្រុមអ្នកតាមដាន យល់ថា ប្រការនេះមិនអាចជួយអ្វីដល់លោក Trump នៅពេលលោកខិតខំស្វែងរកវិធីដើម្បីបញ្ចុះបញ្ចូលម្ចាស់ឆ្នោតដែលចង់ឃើញមានការចងកំហឹងគ្នាតិចជាងមុននៅលើទឹកដីអាមេរិក”។

លោក Biden ថា៖ “លោក (Trump) គឺជាប្រធានាធិបតីអន់បំផុតក្នុងប្រវត្តិសាស្ត្រសហរដ្ឋអាមេរិក”។

លោក Trump បានកាត់សម្ដីរបស់លោក Biden ជាបន្តបន្ទាប់ ពិសេសគឺនៅពេលបេក្ខភាពមកពីបក្សប្រជាធិបតេយ្យ និយាយអំពីការខិតខំរបស់លោក Trump ក្នុងការលុបចោលច្បាប់ការពារអ្នកជំងឺ និងការថែទាំសុខភាពស្របតាមហោប៉ៅ (Obamacare)។ ជាច្រើនលើក ម្ចាស់សេតវិមានក៏សួរសំណួរបន្តបន្ទាប់ បង្វែងដានកិច្ចជជែកតតាំង និងមិនឱ្យលោក Biden និងលោក Wallace សួរនាំ ឬឆ្លើយតបបាន។ ជាងនេះ លោក Trump ថែមទាំងបានចោទប្រកាន់ថា លោក Biden និងលោក Wallace គឺជាបក្សពួកតែមួយទៀតផង។

“ជាក់ស្ដែងគឺថា គ្រប់យ៉ាង មកដល់ពេលនេះ លោក Trump គ្រាន់តែនិយាយកុហក។ ខ្ញុំមិនចង់បកអាក្រាតសម្ដីរបស់លោកនៅទីនេះនោះទេ” លោក Biden និយាយបែបនេះ។ ភ្លាមនោះ លោក Trump ក៏ស៊កសម្ដី៖ “នៅពេលបញ្ចប់ការសិក្សា លោក (Biden) ជាប់ចំណាត់ថ្នាក់អន់ជាងគេក្នុងថ្នាក់ គឺមិនបានលេខ1នោះឡើយ”។

បើទោះជាលោក Wallace បានរំឭកលោក Trump ដើម្បីទុកឱ្យលោក Biden និយាយឱ្យចប់សេចក្ដីក៏ដោយ ប៉ុន្តែ លោក Trump មិនស្ដាប់តាមសំណើនេះ។ ចុងក្រោយ អាជ្ញាកណ្ដាលរូបនេះ ក៏ធ្វើការព្រមានបេក្ខភាពទាំង2 ដោយសារមិនគោរពតាមការកំណត់ដែលបានចែងនៅក្នុងកម្មវិធីនេះ។

ក្រោយពីកិច្ចជជែកតតាំងគ្នាខាងលើបានបញ្ចប់ មនុស្សជាច្រើនបានអធិប្បាយថា វាដូចទៅនឹង “កម្មវិធីតូចតាច ថោកទាប”។ Jake Tapper ដែលជាអ្នកដឹកនាំកម្មវិធីរបស់ CNN បានបញ្ចេញមតិថា៖ “នេះគឺជាកិច្ចជជែកតតាំងគ្នា លំដាប់អន់បំផុតដែលខ្ញុំធ្លាប់បានឃើញ។ វាមិនមិនដូចទៅនឹងកិច្ចជជែកតតាំងគ្នានោះទេ ប៉ុន្តែវាដូចទៅនឹងការដៀល បន្ទោសបង្អាប់គ្នា។ ហើយមូលហេតុចម្បងគឺមកពីប្រធានាធិបតី Trump”។

ទស្សនិកជនជាច្រើនបានប្រៀបប្រដូចកិច្ចជជែកតតាំងគ្នានេះ ទៅនឹងកិច្ចប្រជុំដែលមិនត្រូវបានគ្រប់គ្រងត្រឹមត្រូវ និងខ្វះប៊ូតុងបិទសំឡេង ដែលមិនដូចទៅនឹងកម្មវិធី Zoom។ អ្នកប្រើប្រាស់ Twitter ម្នាក់ សរសេរថា៖ “ខ្ញុំភ្នាល់10ដុល្លារ ខ្ញុំថាលោក Wallace នឹងស្នើឱ្យរៀបចំកិច្ចជជែកតតាំងគ្នាបន្ទាប់នៅលើ Zoom ដើម្បីអាចចុចប៊ូតុងបិទសំឡេងបាន”។

អ្នកលេង Twitter ជាច្រើននាក់ផ្សេងទៀតក៏នាំគ្នារំឭកដល់កម្មវិធីទូរទស្សន៍ជាក់ស្ដែងមួយចំនួន ដូចជា Real Housewives (បកប្រែក្រៅផ្លូវការថា៖ មេផ្ទះពិតប្រាកដ” ជាដើម។ អ្នកលេង Twitter ម្នាក់ សរសេរថា៖ “ពិតជាគួរឱ្យអស់សំណើចណាស់។ អ្នកទាំង2 ប្រយុទ្ធគ្នាអន់ជាងសង្គ្រាមរវាងស្ត្រីមេផ្ទះទៅទៀត”៕

ប្រភព៖ CNet, NY Times, The Guardian, AP

ស្ត្រីអ្នកនយោបាយអាមេរិកាំង3រូបនៅក្នុងរដ្ឋ Pennsylvania បាននាំគ្នាដោះសម្លៀកបំពាក់ដើម្បីជាការណែនាំម្ចាស់ឆ្នោតអំពីរបៀបបោះឆ្នោតតាមរយៈការផ្ញើសំបុត្រ ក្នុងបំណងចៀសវាងបញ្ហាសន្លឹកឆ្នោតស្របច្បាប់ក្លាយជាសន្លឹកឆ្នោត “អាក្រាត” មិនបានការ ដោយសារតែម្ចាស់ឆ្នោតភ្លេចដាក់ក្នុងស្រោមសំបុត្រ2ជាន់។

យោងតាមសារព័ត៌មាន Guardian រដ្ឋ Pennsylvania បច្ចុប្បន្នត្រូវបានគេមើលឃើញថា ជា “ទីលានប្រយុទ្ធ” មួយក្នុងចំណោម “សមរភូមិ” ក្ដៅបំផុតសម្រាប់ការបោះឆ្នោតប្រធានាធិបតីសហរដ្ឋអាមេរិកនាថ្ងៃទី3វិច្ឆិកាខាងមុខ។ ដូច្នេះហើយ រាល់សន្លឹកឆ្នោតក្នុងរដ្ឋនេះ សុទ្ធតែត្រូវបានចាត់ទុកថាមានសារសំខាន់ជាងគេ និងមានតម្លៃជាងគេ ព្រោះវាអាចបង្វែរស្ថានការណ៍ទាំងមូលបាន។

ដោយសារតែមានការព្រួយបារម្ភចំពោះបញ្ហាដែលម្ចាស់ឆ្នោតមិនទាន់យល់អំពីការកំណត់ស្ដីអំពីរបៀបបោះឆ្នោតតាមរយៈការផ្ញើជាសំបុត្រ ហើយនឹងអាចធ្វើខុសនីតិវិធី នាំឱ្យសន្លឹកឆ្នោតត្រូវគេចាត់ទុកជាមោឃ ដូច្នេះ សមាជិកនៃក្រុមប្រឹក្សាភិបាលនៃតំបន់ Allegheny លោកស្រី Bethany Hallam ក៏បានសម្រេចចិត្តអាក្រាតកាយដើម្បីទាក់ទាញចំណាប់អារម្មណ៍របស់ក្រុមម្ចាស់ឆ្នោត ក្នុងបំណងបញ្ជូនសារអំពីរបៀបនៃការបោះឆ្នោតឱ្យបានត្រឹមត្រូវ។

ក្រោយមក លោកស្រី Bethany Hallam ក៏បានអញ្ជើញលោកស្រី Olivia Bennett ដែលជាសមាជិកម្នាក់នៃក្រុមប្រឹក្សាភិបាលតំបន់ Allegheny ឱ្យចូលរួមធ្វើសកម្មភាពនេះ។

លោកស្រី Hallam និងលោកស្រី Bennett បន្ទាប់មកទៀតក៏បានអញ្ជើញលោកស្រី Emily Kindead ដែលជាអ្នកនយោបាយម្នាក់កំពុងតែធ្វើសកម្មភាពដើម្បីបានចូលទៅកាន់សភាជាន់ទាបថ្នាក់រដ្ឋ នៅ Pennsylvania ឱ្យចូលរួមធ្វើកិច្ចការបញ្ជូនសារនេះដែរ។ ស្ត្រីអ្នកនយោបាយទាំង3រូបនេះ បានអាក្រាតកាយពាក់កណ្ដាលខ្លួន រួចថតរូប និងបង្ហោះរូបទាំងនោះនៅលើបណ្ដាញសង្គម ជាមួយនឹងសារណែនាំអំពីរបៀបបោះឆ្នោតឱ្យបានត្រឹមត្រូវ។

យោងតាមការកំណត់របស់រដ្ឋ Pennsylvania សន្លឹកឆ្នោតទាំងអស់ដែលបោះតាមរយៈសំបុត្រ ត្រូវតែដាក់នៅក្នុងស្រោមសំបុត្រចំនួន2ជាន់ ដោយជាន់ទី1គឺជា “ស្រោមសំបុត្រសម្ងាត់” និងជាន់ទី2គឺជាស្រោមសំបុត្រដែលមានសរសេរអាសយដ្ឋាន។

បើសិនជាម្ចាស់ឆ្នោតភ្លេចដាក់សន្លឹកឆ្នោតនៅក្នុង “ស្រោមសំបុត្រសម្ងាត់” នោះគណៈកម្មការរៀបចំការបោះឆ្នោតនឹងដាក់វាចូលទៅក្នុងប្រភេទសន្លឹកឆ្នោត “អាក្រាត” ពោលគឺសន្លឹកឆ្នោតដែលខុសពីការកំណត់ ហើយនឹងមិនត្រូវបានរាប់បញ្ចូលទៅក្នុងសន្លឹកឆ្នោតបានការឡើយ។ ដូច្នេះហើយ ស្ត្រីអ្នកនយោបាយទាំង3រូបខាងលើ ក៏ប្រើប្រាស់រូបភាពអាក្រាតកាយរបស់ពួកគេក្នុងបំណងទាក់ទាញចំណាប់អារម្មណ៍របស់ម្ចាស់ឆ្នោត ដើម្បីឱ្យពួកគេមានការប្រុងប្រយ័ត្នក្នុងការបោះឆ្នោត។

នៅក្នុងការបោះឆ្នោតអាណត្តិមុនៗ រដ្ឋ Pennsylvania តែងមិនអនុញ្ញាតឱ្យបោះឆ្នោតតាមរយៈការផ្ញើសំបុត្រក្នុងទ្រង់ទ្រាយធំនោះទេ។ ទន្ទឹមនឹងនេះ គោលការណ៍ស្តីអំពីការប្រើប្រាស់ស្រោមសំបុត្រ2ជាន់ នាំឱ្យក្រុមមន្ត្រីព្រមានថា សន្លឹកឆ្នោតប្រមាណ100,000សន្លឹកដែលបោះតាមរយៈការផ្ញើសំបុត្រក្នុងឆ្នាំនេះ អាចត្រូវបានចាត់ទុកជា “សន្លឹកឆ្នោតអាក្រាត” (មិនបានការ)។

នៅក្នុងរដ្ឋ Pennsylvania ការបោះឆ្នោតកាលពីឆ្នាំ2016 ប្រធានាធិបតី Donald Trump ធ្លាប់ទទួលបានសំឡេងឆ្នោតច្រើនជាងគូប្រកួតត្រឹមតែជាង44,000សន្លឹកប៉ុណ្ណោះ។ ដូច្នេះ បើសិនជាម្ចាស់ឆ្នោតយល់ខុស និងធ្វើខុសពីការកំណត់របស់គណៈកម្មការរៀបចំការបោះឆ្នោត នោះសន្លឹករបស់ពួកគេនឹងត្រូវចាត់ទុកជាអសារបង់ ហើយប្រការនេះក៏នឹងប៉ះពាល់ដល់លទ្ធផលចុងក្រោយនៃការបោះឆ្នោតនេះផងដែរ។

លោកស្រី Bethany Hallam គឺជាសមាជិកនៃគណបក្សប្រជាធិបតេយ្យ ហើយលោកស្រីក៏គាំទ្រយ៉ាងពេញទំហឹងចំពោះបេក្ខភាព Joe Biden នៅក្នុងការបោះឆ្នោតជ្រើសរើសប្រធានាធិបតីសហរដ្ឋអាមេរិកក្នុងឆ្នាំ2020នេះ៕

ប្រភព៖ Guardian

យោងតាមព័ត៌មានចារកម្ម និងទិន្នន័យស្ដីអំពីលំហូរទឹកសមុទ្រ ប៉ូលិសកូរ៉េខាងត្បូងអះអាងថា មន្ត្រីជលផលម្នាក់ដែលត្រូវបានទាហានកូរ៉េខាងជើងបាញ់សម្លាប់នោះ មានបំណងគេចខ្លួនចូលទៅកាន់ប្រទេសកូរ៉េខាងជើង។

“មន្ត្រីរូបនេះ ពាក់អាវពោង និងតោងជាប់ទៅនឹងវត្ថុអណ្ដែតមួយនៅពេលត្រូវបានក្រុមទាហានកូរ៉េខាងជើងប្រទះឃើញ” នេះបើតាមលោក Yoon Seong-hyun ប្រធានក្រុមអ្នកស្រាវជ្រាវនៃនគរបាលល្បាតសមុទ្រកូរ៉េខាងត្បូង ដែលបានឱ្យដឹងនៅក្នុងសន្និសីទសារព័ត៌មានមួយកាលពីចុងសប្ដាហ៍កន្លងទៅ។ លោកបន្តថា “ក្រៅពីនេះ កូរ៉េខាងជើងក៏បានដឹងអំពីព័ត៌មានផ្ទាល់ខ្លួនរបស់មន្ត្រីរូបនេះ ដូចជាឈ្មោះ អាយុ ស្រុកកំណើត និងកម្ពស់”។

ទិន្នន័យទាំងឡាយខាងលើ រួមនឹងព័ត៌មានចារកម្មពីកងទ័ព និងលទ្ធផលនៃការពិនិត្យលើលំហូរទឹកជោរនៅក្នុងថ្ងៃកើតហេតុ ប៉ូលិសល្បាតសមុទ្រកូរ៉េខាងត្បូងយល់ថា មន្ត្រីរូបនេះត្រូវបានទាហានកូរ៉េខាងជើងបាញ់សម្លាប់នៅពេលកំពុងរកផ្លូវគេចខ្លួនចូលទឹកដីកូរ៉េខាងជើង។

ការស្រាវជ្រាវរបស់ក្រុមប៉ូលិសល្បាតសមុទ្រកូរ៉េខាងត្បូង ត្រូវបានធ្វើឡើងបន្ទាប់ពីមន្ត្រីជលផលកូរ៉េខាងត្បូងម្នាក់ អាយុ47ឆ្នាំ ត្រូវបានទាហានកូរ៉េខាងជើងបាញ់សម្លាប់នៅក្នុងតំបន់សមុទ្រនៃប្រទេសនេះកាលពីថ្ងៃទី22កញ្ញា។ មន្ត្រីវ័យ47ឆ្នាំនេះ បានបាត់ខ្លួនមុននោះមួយថ្ងៃនៅពេលកំពុងត្រួតពិនិត្យជលផលក្បែរព្រំដែនសមុទ្រភាគខាងជើង (NLL) ដែលជាបន្ទាត់បែងចែកដែនសមុទ្ររវាងកូរ៉េខាងត្បូង និងកូរ៉េខាងជើង។

កងទ័ពកូរ៉េខាងត្បូងយល់់ថា ទាហានកូរ៉េខាងជើងបានបាញ់សម្លាប់មន្ត្រីរូបនេះ រួចដុតសាកសពបំបាត់ភស្ដុសតាង ខណៈដែលទីក្រុងព្យុងយ៉ាងបានសរសេរលិខិតសុំទោសមួយច្បាប់ទៅកាន់ទីក្រុងសេអ៊ូល ទាក់ទិននឹងហេតុការណ៍នេះ និងបញ្ជាក់ថា ពួកគេគ្រាន់តែដុតពោងរបស់មន្ត្រីរូបនេះទៅតាមវិធានការទប់ស្កាត់COVID-19 ក្រោយពីមិនបានរកឃើញសាកសព។

ក្រុមមន្ត្រីស្រាវជ្រាវមកពីកងនគរបាលសមុទ្រកូរ៉េខាងត្បូងបានវិភាគទៅលើលំហូរនៃទឹកសមុទ្រកាលពីថ្ងៃទី21កញ្ញា និងបានសន្និដ្ឋានថា បុរសនេះមិនអាចត្រូវបានទឹកគួចទៅដល់កន្លែងកើតហេតុនោះឡើយ លើកលែងតែមានការព្យាបាលហែលទៅទីនោះ។ លោក Yoon ឱ្យដឹងថា មូលហេតុបណ្ដាលមកពីគ្រោះថ្នាក់ ឬការធ្វើអត្តឃាត ត្រូវបានគេចាត់ទុកថា ពិបាកកើតឡើង។

ក្រុមអ្នកស្រាវជ្រាវបានរកឃើញស្បែកជើងរបស់មន្ត្រីដែលត្រូវគេបាញ់សម្លាប់នេះ និងបានបញ្ជូនទៅកាន់អង្គភាពកោសល្យវិច្ច័យដើម្បីធ្វើការវិភាគ។ ក្រុមនេះក៏បានពិនិត្យទៅលើវីដេអូចំនួន731ឈុតដែលថតបានដោយកាមេរ៉ានៅលើនាវា ប៉ុន្តែមិនបានរកឃើញព័ត៌មានសំខាន់អ្វីនោះឡើយ។

លោក Yoon និយាយថា៖ “យោងតាមលទ្ធផលនៃការស្រាវជ្រាវ រហូតមកដល់ពេលនេះ យើងជឿថា គាត់មានបំណងរត់គេចចូលទៅកាន់ទឹកដីកូរ៉េខាងជើង”។ លោកបន្តថា មន្ត្រីរូបនេះ “ដឹងច្បាស់អំពីតំបន់សមុទ្រនៅជុំវិញកោះ Yeonpyeong” ដែលជាកោះមួយនៅក្បែរ NLL ជាកន្លែងដែលមន្ត្រីរូបនេះបាត់ខ្លួន។

នាវា​កូរ៉េខាង​ត្បូង​កំពុង​ស្វែង​រក​សាកសព​មន្ត្រី​ជល​ផល​កងទ័ពជើងទឹកកូរ៉េខាងត្បូង កាលពីថ្ងៃទី27កញ្ញា បានបញ្ជូននាវាចម្បាំង16គ្រឿង និងយន្តហោះ6គ្រឿង ខណៈប៉ូលិសល្បាតសមុទ្របញ្ជូននាវាល្បាត23គ្រឿង ទៅកាន់កន្លែងកើតហេតុដើម្បីស្វែងរកសាកសពមន្ត្រីជលផលដែលបានបាត់ខ្លួនខាងលើ។ ភាគីកូរ៉េខាងជើងបានព្រមានថា សកម្មភាពនេះរបស់កូរ៉េខាងត្បូង អាចបង្កឱ្យមានបញ្ហារំលោភដែនសមុទ្ររបស់ប្រទេសនេះ ហើយទន្ទឹមនឹងនេះ កូរ៉េខាងជើងក៏បានសន្យាថា នឹងប្រគល់សាកសពឱ្យកូរ៉េខាងត្បូង បើសិនពួកគេរកឃើញ៕

ប្រភព៖ Yonhap

ទីភ្នាក់ងារព័ត៌មាន The Mirror បានរាយការណ៍ពី រឿងក្ដីឃាតកម្មដ៏សាហាវ រន្ធត់ស្មារតីមួយ នៅក្នុងប្រទេសព័រទុយហ្គាល់។ ក្រមុំគូស្នេហ៍ 2នាក់ រួមគ្នាសម្លាប់បុរសគូស្នេហ៍ម្នាក់ កាត់ជាកង់ៗ និងកាត់យកម្រាមដៃរបស់ជនរងគ្រោះ ដើម្បីប្រើស្នាមខ្ចៅដៃរបស់សាកសព ស្គែនចូលបញ្ជីធនាគារនៅក្នុងទូរស័ព្ទដៃជនរងគ្រោះ កាលពីខែមីនាកន្លងទៅ។

នាងក្រមុំ ម៉ារីយ៉ា ម៉ាល់វេអ៊ីរ៉ូ ជាបុគ្គលិកសន្តិសុខ អាយុ 19ឆ្នាំ និងសង្សាររបស់នាង គឺកញ្ញា ម៉ារីអាណា ហ្វ៉នសេកា(ស្រីស្រឡាញ់ភេទដូចគ្នា) ជាជំនួយការគ្រូពេទ្យ អាយុ 23ឆ្នាំ បានក្លាយជាជនសង្ស័យក្នុងអំពើឃាតកម្មលោក ឌីយ៉ូគូ កនខាល់វេស ជាបុគ្គលិកសណ្ឋាគារ អាយុ 21ឆ្នាំ រស់នៅភូមិភាគ អាល់កាវី ភាគខាងត្បូង កាលពីថ្ងៃទី18 មីនា 2020 កន្លងទៅ។

សារព័ត៌មាន Correio da Manha បានចុះផ្សាយមួយផ្នែករបស់ពាក្យបណ្ដឹងដោយបុគ្គលិកអយ្យការនៅថ្ងៃទី28 កញ្ញាថា នាងក្រមុំ ម៉ាល់វេអ៊ីរ៉ូ និងនាង ហ្វ៉នសេកា បានកាត់ម្រាមដៃខាងស្ដាំទាំងអស់របស់លោក ឌីយ៉ូគូ ដើម្បីប្រើស្នាមខ្ចៅដៃរបស់សាកសព ស្គែនចូលទូរស័ព្ទរបស់ជនរងគ្រោះ ដើម្បីផ្ទេរប្រាក់ចំនួន 75,000ដុល្លារអាមេរិក ពីបញ្ជីធនាគាររបស់ជនរងគ្រោះ ចូលទៅលេខបញ្ជីធនាគារររបស់ខ្លួន។

បន្ទាប់ពីនោះ នាងក្រមុំទាំង 2នាក់ ក៏ចាត់ការពន្លះ និងកាត់រាងកាយជនរងគ្រោះជា 2ចំណែក។ ចំណែកទី1 គឺក្បាល ដៃ និងជើង និងចំណែកទី2 គឺដងខ្លួន ប្រមូលដាក់ដោយឡែកពីគ្នា នៅក្នុងរថយន្ត 2គ្រឿង ដោយ 1គ្រឿង គឺរថយន្តមែរសឺដេស របស់ជនរងគ្រោះ។

រហូតដល់ 4ថ្ងៃក្រោយការបង្កហេតុ ពួកគេបានយកដងខ្លួនសាកសពទៅបោះចោលជាមុនសិន ដោយបោះពីលើប៉មភ្លើង នៅលើមាត់ច្រាំងខ្ពស់ ជិតឆ្នេរបេលីឆេ ចូលទៅក្នុងសមុទ្រក្នុងទីក្រុងសាក្រេស និង1ថ្ងៃបន្ទាប់មក ទើបនាំយកបំណែកអវយវៈដែលនៅសល់របស់សាកសព ទៅបោះចោលនៅជិតកន្លែងទឹកជ្រោះប៉េកូ ដូអ៊ីន ហ្វើណូ ជិតទីក្រុងថាវីរ៉ា។

ក្រៅពីនេះ នាងក្រមុំគូស្នេហ៍ភេទដូចគ្នាទាំង2 បានប្រើពេលវេលា 3ថ្ងៃ ក្នុងចន្លោះថ្ងៃទី20-23 មីនា ផ្ញើសំណេរឆាតតាមហ្វេសប៊ុករបស់លោកឌីយ៉ូគូ ទៅបណ្ដាមិត្តរួមការងាររបស់ជនរងគ្រោះ ដើម្បីបន្លំធ្វើជាជនរងគ្រោះនៅមានជីវិតរស់នៅឡើយ។

ចំណែក សារព័ត៌មាន Jornal de Noticias បានបង្ហាញពីសេចក្ដីលម្អិតនៃការធ្វើឃាតនោះថា នាងក្រមុំម៉ាល់វេរ៉ូ ស្គាល់លោកឌីយ៉ូគូ និងឆ្លៀតឱកាសដាក់ថ្នាំសន្លប់នៅក្នុងកែវទឹកក្រូចរបស់ជនរងគ្រោះ បន្ទាប់ពីនោះ ក៏ចាប់ជនរងគ្រោះចងជាប់នឹងកៅអី រួចយកខ្សែរឹត-ក រហូតដល់ស្លាប់ ហើយនាងក្រមុំហ្វ៉នសេកា បានមកចូលរួមពន្លះ និងកាត់សាកសពជាកង់ៗ និងដឹកយកទៅបោះចោលដើម្បីបំបាត់ភ័ស្តុតាង។

យ៉ាងណាក៏ដោយ ដងខ្លួនរបស់សាកសពលោកឌីយ៉ូគូ មិនបានលិចទៅក្នុងសមុទ្រទេ តែបែរជាអណ្ដែតមកទើរនៅលើឆ្នេរខ្សាច់ ក្លាយជាភ័ស្តុតាងសំខាន់ នាំឆ្ពោះទៅរកការតាមដានរកតម្រុយ ហើយប៉ូលិសបានរកឃើញ និងចាប់ឃាត់ខ្លួនស្រីគូស្នេហ៍ទាំង2 បាននៅទីបំផុត។

នាងកញ្ញា ម៉ាល់វេអ៊ីរ៉ូ បានផ្ដល់ចម្លើយទៅតុលាការថា ខ្លួន និងគូស្នេហ៍(កញ្ញា ហ្វ៉នសេកា) បានទទួលកម្លាំងជំរុញចិត្តពី ដេកស៍ធើរ៍ កម្មវិធីទូរទស្សន៍ដ៏ល្បីល្បាញរបស់អាមេរិក ដែលបានចាក់បញ្ចាំងពីរឿងរ៉ាវរបស់អ្នកនីតិវិទ្យាសាស្ត្រម្នាក់ ដែលក្លាយខ្លួនជាឃាតករសម្លាប់ឥតរើសមុខ។

ទាំងអស់នេះ នាងកញ្ញា ម៉ាល់វេអ៊ីរ៉ូ និងនាងកញ្ញា ហ្វ៉នសេកា មិនធ្លាប់មានប្រវត្តិប្រព្រឹត្តអំពើឧក្រិដ្ឋកម្មម្ដងណាឡើយ តែនឹងត្រូវជាប់ទោសទណ្ឌពីបទឃាតកម្មគិតទុកជាមុន កម្ទេចសាកសព កេងបន្លំខាងកុំព្យូទ័រ និងលួចរថយន្តអ្នកដទៃ៕

ប្រភព៖ សារព័ត៌មានបរទេស

ក្រុមតំណាងរាស្ត្រមកពីបក្សប្រជាធិបតេយ្យនៅក្នុងសភាជាន់ទាបសហរដ្ឋអាមេរិក បានស្នើឱ្យបញ្ចេញកញ្ចប់ថវិកាជំនួយដែលមានទំហំទឹកប្រាក់ 2.2លានលានដុល្លារ (2,200,000,000,000) បន្ថែមទៀត ដើម្បីទប់ទល់នឹងCOVID-19 ព្រមទាំងបានបង្ហាញពីគោលបំណងក្នុងការចរចាជាមួយសេតវិមានផងដែរ។

ក្រុមអ្នកតំណាងរាស្ត្រមកពីបក្សប្រជាធិបតេយ្យនៅសភាជាន់ទាបសហរដ្ឋអាមេរិក កាលពីថ្ងៃទី28កញ្ញាកន្លងទៅ បានប្រកាសបង្ហាញសេចក្ដីព្រាងច្បាប់មួយដែលបើកផ្លូវឱ្យរដ្ឋាភិបាលប្រើប្រាស់កញ្ចប់ថវិកាមួយបន្ថែមទៀត ដើម្បីជួយដល់សកម្មភាពទប់ទល់នឹងCOVID-19 នៅមុនការបោះឆ្នោតខែវិច្ឆិកាខាងមុខ។ កញ្ចប់ថវិកាដែលមានទឹកប្រាក់ចំនួន 2.2លានលានដុល្លារនេះ គឺតិចជាងឆ្ងាយបើធៀប​ជា​មួយ​នឹងការស្នើដំបូងដែលមានទំហំទឹកប្រាក់ដល់ទៅ 3.4​លាន​លាន​ដុល្លារ​សហ​រដ្ឋ​អាមេរិក​​ (3,400,000,000,000)​ របស់​សភា​ជាន់​ទាប។ ខ្ទង់ប្រាក់ជំនួយនេះនឹងត្រូវយកទៅប្រើប្រាស់នៅក្នុងរដ្ឋបាលមូលដ្ឋាន ការជួយដល់វិស័យអប់រំ ក្រុមហ៊ុនខ្នាតតូច និងសកម្មភាពទប់ទល់នឹងCOVID-19 ដូចជា ការធ្វើតេស្តរកវីរុស ការតាមដាន ស្វែងរក និងដាក់ដោយឡែកចំពោះអ្នកបានឆ្លងវីរុស។

ប្រធានសភាជាន់ទាប លោកស្រី Nancy Pelosi មានប្រសាសន៍ថា៖ “សមាជិកទាំងឡាយរបស់បក្សប្រជាធិបតេយ្យ កំពុងតែអនុវត្តត្រឹមត្រូវទៅតាមការសន្យាអំពីការព្រមព្រៀងជាមួយនឹងសេចក្ដីព្រាងច្បាប់នេះ។ នេះគឺជាប្រការចាំបាច់ដើម្បីដោះស្រាយបញ្ហាវិបត្តិសេដ្ឋកិច្ច និងសុខាភិបាល ដែលក្រុមគ្រួសារអ្នកពលកម្មអាមេរិកាំងកំពុងជួបប្រទះ”។

លោកស្រី Pelosi រួមនឹងមេដឹកនាំមកពីបក្សប្រជាធិបតេយ្យនៅសភាជាន់ខ្ពស់ រដ្ឋមន្ត្រីការសួងហិរញ្ញវត្ថុ Steven Mnuchin និងប្រធានការិយាល័យរបស់សេតវិមាន លោក Mark Medows កាលពីថ្ងៃទី7សីហា បានចរចាជាមួយគ្នាអំពីកញ្ចប់ថវិកាជំនួយទំហំ 3.4លានលានដុល្លារ ក៏ប៉ុន្តែ មិនទទួលបានជោគជ័យ ដោយសារតែមានការខ្វែងគំនិតគ្នាច្រើនពេក។

សមាជិកមួយចំនួនរបស់បក្សសាធារណរដ្ឋនៅសភាជាន់ខ្ពស់អាមេរិក បានស្នើកញ្ចប់ថវិកាជំនួយដែលមានទំហំទឹកប្រាក់ 1លានលានដុល្លារ ប៉ុន្តែត្រូវបានសមាជិកជាច្រើននៅក្នុងបក្ស មិនយល់់ស្រប ព្រោះគិតថា វាច្រើនហួស ខណៈក្រុមមកពីបក្សប្រជាធិបតេយ្យយល់ថា តិចហួស។

“យើងត្រៀមខ្លួនជានិច្ចសម្រាប់ការចរចា” លោកស្រី Pelosi កាលពីចុងសប្ដាហ៍កន្លងទៅបានឱ្យដឹងដូច្នេះ និងបញ្ជាក់ថា លោកស្រីទើបតែបានពិភាក្សាតាមទូរស័ព្ទជាមួយរដ្ឋមន្ត្រីក្រសួងហិរញ្ញវត្ថុ Mnuchin។

ប្រធានគណៈកម្មាធិការយន្តការនិងនិតិវិធី (United States House Committee on Ways and Means) នៃសភាជាន់ទាបអាមេរិក កាលពីសប្ដាហ៍មុន បានឱ្យដឹងថា កិច្ចខិតខំដើម្បីអនុម័តលើសេចក្ដីព្រាងច្បាប់ស្ដីអំពីកញ្ចប់ថវិកា​ជំនួយ 2.2​លាន​លាន​ដុល្លារ​នេះ នឹងត្រូវបានអនុវត្តនាពេលដ៏ខ្លីខាងមុខ។ ចំណែកប្រធានអង្គភាពបម្រុងនៃសហរដ្ឋអាមេរិក (Chair of the Federal Reserve) លោក Jerome Powell មុននោះក៏បាននិយាយថា ក្រុមតំណាងរាស្ត្រគួរតែជួយដល់សេដ្ឋកិច្ចដែលកំពុងជួបបញ្ហាវឹកវរដោយសារCOVID-19។

បច្ចុប្បន្ន គេមិនទាន់បានដឹងច្បាស់ថា តើសេតវិមានយល់ព្រមជាមួយនឹងកញ្ចប់ថវិកាជំនួយដ៏ធំនេះដែរ ឬយ៉ាងណានៅឡើយ។

សូមរំឭកថា COVID-19 បានបង្ហាញខ្លួនជាលើកដំបូងនៅប្រទេសចិន និងបានឆ្លងរាលដាលដល់ប្រទេសនិងដែនដី​ជាង​200​នៅ​ទូទាំង​ពិភព​លោក​ បណ្ដាលឱ្យមនុស្សជាង 33.5លាននាក់ត្រូវឆ្លងវីរុស និងជាង1លាននាក់បានស្លាប់។ សហរដ្ឋអាមេរិក​ គឺជាសម្បុកវីរុសCOVID-19 ធំជាងគេបង្អស់ក្នុងពិភពលោក ដោយមានអ្នកឆ្លងវីរុសជាង7.3លាននាក់ និងជាង2សែននាក់បានបាត់បង់ជីវិត៕

ប្រភព៖ Reuters/ USA Today