អន្តរជាតិ - La Reine Media

បាតុករប្រឆាំងវ៉ាក់សាំង COVID-19 ប៉ះទង្គិចគ្នានឹងសមត្ថកិច្ច នៅក្រុងឡុងដ៍ (វីដេអូ)

ហ្វូងបាតុករប្រឆាំងវ៉ាក់សាំង បានប៉ះទង្គិចនឹងក្រុមប៉ុលិស នៅក្នុងពេលព្យាយាមសម្រុកចូលស្ថាប័នសុខាភិបាលរបស់ អង់គ្លេស ស្របពេលដែលប្រទេសនេះ កំពុងរៀបចំដើម្បីចាក់វ៉ាក់សាំងបង្ការ COVID-19 ដល់កុមារចាប់ពីវ័យ 12 ដល់ 17 ឆ្នាំ។

យ៉ាងហោចមានសមត្ថកិច្ច 4 នាក់ ត្រូវរងរបួស និងបាតុករច្រើននាក់ត្រូវបានចាប់ខ្លួន ខណៈមនុស្សរាប់រយនាក់ប្រមូលផ្ដុំគ្នាតវ៉ានៅខាងក្រៅការិយាល័យគ្រប់គ្រងឱសថ និងផលិតថែទាំសុខភាព របស់ អង់គ្លេស (MHRA) នៅតំបន់ Canary Wharf ភាគខាងកើតទីក្រុងឡុងដ៍ កាលពីថ្ងៃទី 3 កញ្ញា។

ក្រុមប៉ូលិស បានប្រើដំបងឆក់ ដើម្បីគ្រប់គ្រងហ្វូងបាតុករ និងបានសុំជំនួយបន្ថែមពីថ្នាក់លើ នៅពេលក្រុមបាតុករព្យាយាមសម្រុកចូលខាងក្នុងការិយាល័យ MHRA។ បាតុករមួយចំនួន ក្រោយមកក៏បានប៉ះទង្គិចជាមួយសមត្ថកិច្ចនៅខាងក្រៅមជ្ឈមណ្ឌលចាក់វ៉ាក់សាំង នៅឯសារមន្ទីរវិទ្យាសាស្ត្រ នៅភាគខាងលិចទីក្រុងឡុងដ៍។

ប៉ូលិសក្រុងឡុងដ៍ បានសរសេរនៅ Twitter ថា៖ «បាតុករមួយចំនួនបានប្រើហិង្សាលើសមត្ថកិច្ច។ ប៉ូលិស 4 នាក់របស់យើង បានរងរបួសក្នុងការប៉ះទង្គិចគ្នា។ បញ្ហានេះមិនអាចទទួលយកបានទេ។ យើងនៅតែមានវត្តមាននៅកន្លែងកើតហេតុ»។

មូលហេតុនៃបាតុកម្មនេះ ត្រូវបានគេជឿថា ដោយសារក្រុមបាតុករមិនពេញចិត្តនឹងព័ត៌មានដែលថា អាជ្ញាធរនឹងបើកយុទ្ធនាការចាក់វ៉ាក់សាំងដល់កុមារ។ ក្នុងសប្ដាហ៍នេះ មនុស្សមួយក្រុមដែលហៅខ្លួនឯងថា Official Voice បានអំពាវនាវលើបណ្ដាញសង្គម ដល់បាតុករ ឱ្យស្លៀកឈុតខ្មៅ និងប្រមូលផ្ដុំគ្នានៅឯស្ថានីយរថភ្លើងក្រោមដី Canary Wharf ក្នុងបំណងស្នើឱ្យ MHRA ឆ្លើយនឹងសំនួររបស់ពួកគេ។

MHRA កាលពីខែមុន បានអនុម័តឱ្យចាក់វ៉ាក់សាំង COVID-19 របស់ Moderna សម្រាប់កុមារ និងក្មេងជំទង់អាយុចាប់ពី 12 ដល់ 17 ឆ្នាំ ក្រោយរយៈពេលប៉ុន្មានសប្ដាហ៍ប៉ុណ្ណោះដែលវ៉ាក់សាំង Pfizer ត្រូវបានអនុញ្ញាតឱ្យចាក់ដល់ក្រុមគោលដៅនេះ។ ការសម្រេចនេះត្រូវបានធ្វើឡើងបន្ទាប់ពីមានសេចក្ដីប្រកាសថា សិក្សដែលមានវ័យចាប់ពី 16 ដល់ 17 ឆ្នាំ នៅ អង់គ្លេស នឹងត្រូវបានចាក់វ៉ាក់សាំងបង្ការ COVID-19 ដូសដំបូង មុនពេលសាលារៀននានា បើកដំណើរការឡើងវិញ៕

September 4, 2021

COVID-19 ប្រភេទថ្មីឈ្មោះ Mu គ្រោះថ្នាក់ដល់កម្រិតណា បានជា WHO ចាត់វាជាវ៉ារ្យ៉ង់ ដែលត្រូវយកចិត្តទុកដាក់?

ការសិក្សាស្រាវជ្រាវមួយដែលផ្សាយនៅលើទំព័រ Medrxiv បានព្រមានថា COVID-19 ប្រភេទបំប្លែងថ្មីដែលមានឈ្មោះថា Mu អាចកាត់បន្ថយប្រសិទ្ធភាពរបស់វ៉ាក់សាំង និងអាចធ្វើឱ្យអ្នកជំងឺ ប្រឈមនឹងហានិភ័យត្រូវចូលពេទ្យខ្ពស់។

ក្រោយការតាមដានរយៈពេល 8 ខែ ចុងក្រោយ វ៉ារ្យ៉ង់មួយប្រភេទរបស់ COVID-19 ដែលរកឃើញដំបូងនៅ កូឡុំប៊ី កាលពីខែមករា ត្រូវបាន WHO បញ្ចូលឈ្មោះទៅក្នុងបញ្ជីនៃក្រុមវីរុសបំប្លែងខ្លួនថ្មីដែលគួរឱ្យយកចិត្តទុកដាក់។

វ៉ារ្យ៉ង់ថ្មីនេះ ត្រូវបានអង្គការសុខភាពពិភពលោក ដាក់ឈ្មោះថា Mu និងចាត់វាទៅក្នុងក្រុមវីរុសបំប្លែងថ្មីដែលមានគ្រោះថ្នាក់ប្រហាក់ប្រហែលគ្នានឹង Lambda, Kappa, Iota និង Eta។ នៅលំដាប់ខ្ពស់ជាងនេះមួយថ្នាក់ គឺមានបណ្ដាវ៉ារ្យ៉ង់ដែលគួរឱ្យព្រួយបារម្ភ រួមមាន Alpha, Beta, Gamma និង Delta។

វ៉ារ្យ៉ង់ Mu បានបង្ហាញវត្តមាននៅក្នុងប្រទេសជាង 40 រួចមកហើយ។ Mu ត្រូវបានរកឃើញច្រើននៅក្នុងបណ្ដាប្រទេសនៅទ្វីបអាមេរិកខាងត្បូង រួមមាន ប៉េរូ, អ៊ុយរ៉ាហ្គាយ, បូឡាវី និង ប៉ារ៉ាហ្គាយ។ ក្រៅពីនេះ វាក៏ត្រូវបានរកឃើញនៅ អេស្ប៉ាញ, បារាំង និង សហរដ្ឋអាមេរិក។ ថ្មីៗនេះ Mu ក៏បង្ហាញវត្តមាននៅ ជប៉ុន ផងដែរ។

ក្រោយការតាមដានរយៈពេល 8 ខែ ចុងក្រោយ វ៉ារ្យ៉ង់មួយប្រភេទរបស់ COVID-19 ដែលរកឃើញដំបូងនៅ កូឡុំប៊ី កាលពីខែមករា ត្រូវបាន WHO បញ្ចូលឈ្មោះទៅក្នុងបញ្ជីនៃក្រុមវីរុសបំប្លែងខ្លួនថ្មីដែលគួរឱ្យយកចិត្តទុកដាក់។

មូលហេតុដែលនាំឱ្យ WHO ចាត់ Mu ទៅក្នុងបញ្ជីនៃក្រុមវ៉ារ្យ៉ង់ ដែលគួរឱ្យយកចិត្តទុកដាក់គឺដោយសារវាបានឆ្លងផុតស្ដង់ដាកំណត់របស់ WHO៖

1-មានការប្រែប្រួលហ្សែនដែលត្រូវបានគេព្យាករ ឬដឹងថា នឹងប៉ះពាល់ដល់ចំនុចពិសេសរបស់វីរុស ដូចជា លទ្ធភាពនៃការឆ្លងរាលដាល, កម្រិតនៃភាពធ្ងន់ធ្ងររបស់ជំងឺ និងអាចគេចពីប្រព័ន្ធការពាររាងកាយ។ល។

2-បង្កើតជាការឆ្លងរាលដាលខ្លាំងក្នុងសហគមន៍ នៅក្នុងប្រទេសជាច្រើន ជាមួយនឹងអត្រាឆ្លងកាន់តែច្រើនឡើងទៅតាមពេលវេលា។

3-អាចប៉ះពាល់ដល់ផ្នែករោគឆ្លងយ៉ាងច្បាស់ផ្សេងទៀត ដែលអាចបញ្ជាក់អំពីហានិភ័យថ្មីចំពោះសុខភាពសាធារណៈនៅទូទាំងសកលលោក។

តើ Mu ទប់ទល់នឹងវ៉ាក់សាំង បាន ឬទេ?

ការពិសោធរបស់ក្រុមអ្នកវិទ្យាសាស្ត្រអ៊ីតាលី បានបង្ហាញថា «Mu នៅតែត្រូវបានគ្រប់គ្រងដោយវ៉ាក់សាំង Pfizer»។ ប៉ុន្តែ អ្នកវិទ្យាសាស្ត្រ បញ្ជាក់ថា អង្គបដិប្រាណដែលវ៉ាក់សាំងបង្កើតឡើងចំពោះ Mu គឺមានកម្រិតទាបជាង បើធៀបនឹងវីរុស COVID-19 ប្រភេទដំបូង។

តើ Mu ងាយស្រួលឆ្លងពីមនុស្សម្នាក់ ទៅមនុស្សម្នាក់ ឬទេ?

មកដល់បច្ចុប្បន្ន នៅមានការសិក្សាស្រាវជ្រាវតិចតួចនៅឡើយ អំពីវ៉ារ្យ៉ង់ Mu។ ដូច្នេះ អ្នកវិទ្យាសាស្ត្រពិបាកវាយតម្លៃលើសមត្ថភាពនៃការឆ្លងរាលដាលរបស់វា។

បើទោះជា Mu មិនទាន់មានលក្ខណៈដូចទៅនឹងវ៉ារ្យ៉ងដែលគួរឱ្យខ្លាច ដូចជា Delta ប៉ុន្តែ អ្នកស្រាវជ្រាវឱ្យដឹងថា WHO គួរតែតាមដានវាឱ្យបានម៉ត់ចត់៕

September 3, 2021

នាយករដ្ឋមន្ត្រីជប៉ុន ជិតលាលែងពីតំណែង ខណៈការបោះជ្រើសរើសប្រធានបក្ស និងនាយករដ្ឋមន្ត្រី ជិតចូលមកដល់

នាយករដ្ឋមន្ត្រីជប៉ុន លោក Yoshihide Suga ប្រកាសថា លោកនឹងមិនឈរឈ្មោះជាបេក្ខភាពប្រធានបក្សកាន់អំណាចទៀតទេ ហើយថា នឹងបញ្ចប់អាណត្តិនាយករដ្ឋមន្ត្រីរបស់ខ្លួននៅក្នុងខែនេះ។

សារព័ត៌មានជប៉ុន ថ្ងៃនេះ បានរាយការណ៍ថា នាយករដ្ឋមន្ត្រី Suga ប្រកាសថា លោកសម្រេចចិត្តលាលែងពីតំណែង នៅក្នុងកិច្ចប្រជុំបន្ទាន់មួយជាមួយនឹងសមាជិកជាន់ខ្ពស់នានារបស់គណបក្សប្រជាធិបតេយ្យសេរី (LDP) ដែលកំពុងកាន់អំណាច។ តាមផែនការ លោក Suga នឹងបញ្ចប់អាណត្តិយ៉ាងឆាប់នៅក្នុងខែនេះ ដើម្បីផ្ដល់ឱកាសឱ្យបេក្ខភាពដទៃនៃបក្ស LDP។

ការសម្រេចចិត្តខាងលើ ត្រូវបានលើកឡើងក្រោយការឡើងកាន់អំណាចមិនដល់មួយឆ្នាំរបស់លោក Suga នៅក្នុងគ្រាដែលបក្ស LDP ត្រៀមខ្លួនសម្រាប់ការបោះឆ្នោតជ្រើសរើសប្រធាននៅថ្ងៃទី 29 កញ្ញា។ មេដឹកនាំបក្ស LDP ទំនងជានឹងក្លាយជានាយករដ្ឋមន្ត្រី ព្រោះថា បក្សនេះគ្រប់គ្រងអាសនៈភាគច្រើននៅសភាជាតិ។

ការបោះឆ្នោតជាតិនៅ ជប៉ុន នឹងត្រូវបានធ្វើឡើងនៅពេលអាណត្តិរបស់សភាជាន់ទាប បញ្ចប់នៅក្នុងខែតុលាខាងមុខ។ អតីតរដ្ឋមន្ត្រីការបរទេស Fumio Kishida ធ្លាប់បានប្រកាសអំពីបំណងឈរឈ្មោះជាបេក្ខភាពនាយករដ្ឋមន្ត្រីនៅ អាណត្តិបន្ទាប់។ ចំណែកអតីតរដ្ឋមន្ត្រីក្រសួងមហាផ្ទៃ Sanae Takaichi ក៏មានបំណងដូចគ្នានេះដែរ។

នៅក្នុងការស្ទង់មតិថ្មីៗនេះ បង្ហាញថា អត្រានៃការគាំទ្រចំពោះលោក Suga បានធ្លាក់មកនៅក្រោម 30%។ អគ្គលេខាធិការបក្ស LDP លោក Toshihiro Nikai បានថ្លែងថា លោក Suga ពិតជាបានសម្រេចចិត្តមិនឈរឈ្មោះជាបេក្ខភាពប្រធានបក្សនោះទេ។

ការដែលលោក Suga វ័យ 72 ឆ្នាំ ត្រូវបានបោះឆ្នោតជ្រើសតាំងជានាយករដ្ឋមន្ត្រីកាលពីឆ្នាំ 2020 គឺជាលទ្ធផលនៃការប្រឹងប្រែងរយៈពេលវែងរបស់លោក នៅក្នុងឆាកនយោបាយ។ លោក Suga បានជាប់ឆ្នោតជាសមាជិកនៃក្រុមប្រឹក្សាភិបាលទីក្រុង Yokohama កាលពីឆ្នាំ 1987 ក្រោយមកក៏បានក្លាយជាតំណាងរាស្ត្រនៅសភា កាលពីឆ្នាំ 1996។ មុនពេលត្រូវបានជ្រើសតាំងជានាយករដ្ឋមន្ត្រីជំនួសលោក Abe លោក Suga កាន់កាប់តំណែងប្រធានទីស្ដីការគណរដ្ឋមន្ត្រី នៅក្នុងរដ្ឋាភិបាលរបស់ អតីតនាយករដ្ឋមន្ត្រី Abe៕

September 3, 2021

Al-Qaeda ចូលដៃជាមួយ តាលីបង់ ក្នុងការប្រយុទ្ធតទល់នឹងកងទ័ពចុងក្រោយរបស់រដ្ឋាភិបាលចាស់ នៅជ្រលងភ្នំ Panjshir

ក្រុមភេរវករ al-Qaeda ត្រូវបានចោទថា បានចូលរួមសកម្មភាពប្រយុទ្ធរបស់ តាលីបង់ ដើម្បីកម្ទេចក្រុមយោធាដែលនៅសេសសល់របស់រដ្ឋាភិបាលចាស់ ដែលបច្ចុប្បន្នត្រូវបានដាក់ឈ្មោះថា រណសិរ្សតស៊ូជាតិ អាហ្វហ្គានីស្ថាន (NRFA)។

កងកម្លាំងប្រឆាំង តាលីបង់ នៅជ្រលងភ្នំ Panjshir

NRFA បានអះអាងថា ក្រុមប្រដាប់អាវុធ al-Qaeda បង្ហាញខ្លួនក្នុងការប្រយុទ្ធកាលពីថ្ងៃទី 2 កញ្ញា របស់ តាលីបង់ ដែលបានវាយប្រហារតំបន់ជ្រលងភ្នំ Panjshir ដែលនៅមិនឆ្ងាយប៉ុន្មានពីរដ្ឋធានីកាប៊ុល ក្នុងការប្រឹងប្រែងដើម្បីដណ្ដើមកាន់កាប់តំបន់នេះពីកងកម្លាំង NRFA។

Ameer Akmal មេបញ្ជាការមួយរូបនៃកងទ័ពរណសិរ្សប្រឆាំង តាលីបង់ នៅ Panjshir

NRFA គឺជាកងកម្លាំងចម្រុះ ដែលមានការចូលរួមរបស់កងជីវពល Andarab, កងកម្លាំងប្រចាំតំបន់ Panjshir និងទាហានរដ្ឋាភិបាលចាស់។ Fahim Dashti អ្នកនាំពាក្យរបស់ NRFA ឱ្យដឹងថា តាលីបង់ បានបើកការវាយប្រហារច្រើនលើកនៅ Khawak ដោយឆ្លងកាត់តាមជ្រលងភ្នំ Andarab នៃទីក្រុង Baghlan។

Dashti បន្ថែមថា ទាហានតាលីបង់ យ៉ាងតិច 640 នាក់ ត្រូវបានបណ្ដេញពីសមរភូមិ ក្នុងរយៈពេលប៉ុន្មានថ្ងៃនៃការប្រយុទ្ធគ្នា និងបានបញ្ជាក់ថា NRFA បានកាច់បំបាក់កម្លាំង តាលីបង់ នៅតំបន់ Khawak។

ចំណែកអ្នកនាំពាក្យរបស់ តាលីបង់ Zabihullah Mujahid កាលពីថ្ងៃទី 2 កញ្ញា បានឱ្យដឹងថា ទាហានរបស់ខ្លួនបានវាយសម្រុកចូលទីតាំងចុងក្រោយរបស់កងកម្លាំងរដ្ឋាភិបាលចាស់ បន្ទាប់ពីកិច្ចចរចាសន្តិភាព បានទទួលបរាជ័យ។

តាលីបង់ បានចោទថា NRFA បានបើកការវាយប្រហារមុន ធ្វើឱ្យពួកគេសម្រេចចិត្តតបត។ ក្រុមមន្ត្រី តាលីបង់ និយាយថា ក្រោយការប្រយុទ្ធពីរថ្ងៃ ពួកគេដណ្ដើមបានតំបន់មួយចំនួនពី NRFA។

អ្នកស្រុកបានឱ្យដឹងថា ការប្រយុទ្ធគ្នាបានចាប់ផ្ដើមពីយប់ថ្ងៃទី 1 កញ្ញា។ ពលរដ្ឋសាមញ្ញ ភាគច្រើនបានរត់គេចខ្លួនពីសង្គ្រាម។

ជ្រលងភ្នំ Panjshir ជាទីតាំងចុងក្រោយរបស់កងទ័ពប្រឆាំង តាលីបង់

Ahmad Massoud ដែលជាកូនប្រុសច្បងរបស់ Ahmad Shad Massoud អតីតមេបញ្ជាការកងកម្លាំងចម្រុះប្រឆាំង តាលីបង់ ទសវត្សរ៍ 1990 កំពុងដឹកនាំការប្រយុទ្ធតតាំងនៅជ្រលងភ្នំ Panjshir។ មេបញ្ជាការនេះ មិនមានបទពិសោធន៍ក្នុងការធ្វើសង្គ្រាម ប៉ុន្តែ ទទួលបានការគាំទ្រពីក្រុមអតីតមេបញ្ជាការកងទ័ព អាហ្វហ្គានីស្ថាន។ បណ្ដាកំពូលភ្នំដែលព័ទ្ធជុំវិញជ្រលងភ្នំ Panjshir គឺឧបសគ្គធំដែលរារាំងរាល់កម្លាំងទាំងឡាយណាដែលចង់វាយដណ្ដើមកាន់កាប់តំបន់នេះ។

ពណ៌លឿង គឺជាទីតាំងឈរជើង របស់កងទ័ពប្រឆាំង តាលីបង់

ក្រុមអ្នកសង្កេតការណ៍យល់ថា សង្គ្រាមនេះនឹងធ្វើឱ្យខាតផលប្រយោជន៍ទាំងសងខាង ហើយពួកគេគួរតែត្រលប់មករកតុចរចាឱ្យបានលឿន។ Ishaq Gailani មេដឹកនាំចលនាសាមគ្គីជាតិ អាហ្វហ្គានីស្ថាន បានអំពាវនាវឱ្យ តាលីបង់ បន្ធូរដៃ និងអូសបន្លាយឱកាសសម្រាប់ការចរចា ហើយចៀសវាងការសម្រេចចិត្តលឿនពេក ដែលអាចនាំឱ្យកើតមានសង្គ្រាម៕

September 3, 2021

ជាង 40 នាក់ បានស្លាប់ដោយសារព្យុះ Ida នៅ សហរដ្ឋអាមេរិក

សហរដ្ឋអាមេរិក៖ យ៉ាងហោចណាស់មានមនុស្សចំនួន 45 នាក់ បានបាត់បង់ជីវិត នៅពេលព្យុះ Ida បោកបក់ទៅលើឆ្នេរខាងកើតរបស់ អាមេរិក បង្កឱ្យមានភ្លៀងធ្លាក់ខ្លាំងមិនធ្លាប់ជួបប្រទះពីមុនមក ធ្វើឱ្យតំបន់ជាច្រើនត្រូវលិចលង់។

អភិបាលរដ្ឋ New Jersey លោក Phil Murphy កាលពីថ្ងៃទី 2 កញ្ញា បានឱ្យដឹងថា រដ្ឋនេះបានរកឃើញអ្នកស្លាប់ដោយសារព្យុះ Ida ចំនួន 23 នាក់។ ចំណែកប៉ូលិសរបស់ New York បានរាយការណ៍ថា មនុស្សយ៉ាងតិច 12 នាក់ នៅក្នុងទីក្រុងនេះ បានស្លាប់ ក្នុងនោះមានម្នាក់ត្រូវជាប់ក្នុងរថយន្ត និង 11 នាក់ ជាប់ក្នុងបន្ទប់ក្រោមដី។

មជ្ឈមណ្ឌលជាតិទប់ទល់ព្យុះ បានព្រមានអំពីលទ្ធភាពដែលព្យុះបោកបក់ខ្លាំង និងគំរាមកំហែងដល់អាយុជីវិត ចាប់ពីថ្ងៃទី 31 សីហា ប៉ុន្តែតំបន់ជាច្រើនត្រូវរងការវាយប្រហារដោយនឹកស្មានមិនដល់។ ផ្លូវល្បឿនលឿនជាច្រើនខ្សែត្រូវលិចក្នុងជំនន់ទឹកភ្លៀង ខណៈតំបន់ដែលមានផ្លូវរថភ្លើងក្រោមដីក៏ត្រូវទឹកហូរចូល ធ្វើឱ្យរថភ្លើងយ៉ាងតិច 17 ខ្សែ ត្រូវជាប់គាំង និងត្រូវផ្អាកដំណើរការបណ្ដោះអាសន្ន។

ព្យុះ Ida ដែលបានបោកបក់ចូល សហរដ្ឋអាមេរិក ក្នុងរដ្ឋ Louisiana កាលពីថ្ងៃទី 29 សីហា គឺជាព្យុះខ្លាំងលំដាប់ទី 5 ដែលធ្លាប់បានបោកបក់ចូលប្រទេសនេះ បណ្ដាលឱ្យមនុស្ស 1 លាននាក់ ត្រូវដាច់ចរន្តអគ្គិសនី ហើយស្ថានភាពនេះអាចអូសបន្លាយពេលច្រើនសប្ដាហ៍ទៀត៕

September 3, 2021

តំណាងរាស្ត្រហ្វីលីពីន បដិសេធឈរឈ្មោះជាបេក្ខភាពប្រធានាធិបតី តែសុំឈរឈ្មោះជាអនុប្រធានាធិបតី របស់កូនស្រីលោក Duterte

ហ្វីលីពីន៖ កូនស្រីរបស់ប្រធានាធិបតី Rodrigo Duterte បានឱ្យដឹងថា អ្នកនយោបាយមួយចំនួន រួមទាំងជំនួយការផ្ទាល់របស់ឪពុកខ្លួន ក៏ចង់ក្លាយជាបេក្ខភាពអនុប្រធានាធិបតីរបស់លោកស្រីផងដែរ។

នៅលើទំព័រ Facebook របស់ខ្លួន Sara Duterte-Carpio ដែលជាកូនស្រីរបស់លោក Duterte និងជាអភិបាលក្រុង Davao បានឱ្យដឹងថា តំណាងរាស្ត្រ Sherwin Gatchalian និង Christoper “Bong” Go បាន «ដាក់សំណើសុំឈរឈ្មោះជាបេក្ខភាពអនុប្រធានាធិបតី» រួមជាមួយនឹងលោកស្រី នៅក្នុងការបោះឆ្នោតឆ្នាំក្រោយ។

មិនដឹងថា លោក Christoper “Bong” Go បានដាក់សំណើនេះនៅពេលណា ប៉ុន្តែ Duterte-Carpio បានបង្ហោះសារខាងលើប៉ុន្មានថ្ងៃប៉ុណ្ណោះ បន្ទាប់ពីលោក Go បានបដិសេធឈរឈ្មោះជាបេក្ខភាពប្រធានាធិបតីសម្រាប់បក្សកាន់អំណាចបច្ចុប្បន្ន។

Deterte-Carpio បន្ថែមថា បណ្ដាបេក្ខភាពដែលមានសក្ដានុពលដទៃទៀត រួមមាន អតីតរដ្ឋមន្ត្រីការពារជាតិ Gilbeert Teodoro និងកូនប្រុសរបស់អតីតប្រធានាធិបតី Ferdinand Marcos ផងដែរ។

Duterte-Carpio វ័យ 43 ឆ្នាំ កំពុងនាំមុខគេនៅក្នុងការស្ទង់មតិស្ដីអំពីបេក្ខភាពប្រធានាធិបតី ប៉ុន្តែលោកស្រីមិនទាន់បង្ហើបឱ្យដឹងអំពីគម្រោងនយោបាយនាពេលអនាគត បើទោះជាកាលកំណត់នៃការដាក់ពាក្យគឺនៅក្នុងខែតុលា។

ប្រធានាធិបតី Duterte វ័យ 76 ឆ្នាំ មិនអាចបន្តឈរឈ្មោះជាបេក្ខភាពប្រធានាធិបតីទៀតបាន ដោយសារតែច្បាប់រដ្ឋធម្មនុញ្ញ ប៉ុន្តែ គូប្រជែងរបស់លោក ជឿថា លោក Duterte នៅមានឥទ្ធិពល បើសិនជាសម្ព័ន្ធមិត្តរបស់លោក ត្រូវបានបោះឆ្នោតជាប្រធានាធិបតី។ លោក Duterte ធ្លាប់បានប្រកាសថា លោកនឹងឈរឈ្មោះជាបេក្ខភាពអនុប្រធានាធិបតី បើសិនជាកូនស្រីរបស់លោក មិនឈរឈ្មោះជាបេក្ខភាពប្រធានាធិបតី នៅអាណត្តិក្រោយ។

លោក Duterte នៅតែទទួលបានការគាំទ្រច្រើន បើទោះជាយុទ្ធនាការប្រយុទ្ធប្រឆាំងនឹងគ្រឿងញៀនរបស់លោក បានសម្លាប់មនុស្សរាប់ពាន់នាក់ក៏ដោយ។ ប៉ុន្តែ រដ្ឋាភិបាលរបស់លោក បច្ចុប្បន្ន ប្រឈមមុខនឹងការរិះគន់ច្រើន ទាក់ទិននឹងវិធានការលើវិបត្តិ COVID-19 នៅពេល ហ្វីលីពីន ទទួលរងការរាតត្បាតយ៉ាងធ្ងន់ធ្ងរបំផុតនៅអ៊ីស៊ី៕

September 2, 2021

WHO សម្ពោធមជ្ឈមណ្ឌលស៊ើបការណ៍ជំងឺរាតត្បាត ដើម្បីទប់ទល់នឹងវីរុសអនាគត

អង្គការសុខភាពពិភពលោក (WHO) បានបើកសម្ពោធមជ្ឈមណ្ឌលស៊ើបការណ៍ស្ដីពីរោគរាតត្បាតនៅរដ្ឋធានី ប៊ែរឡាំង ប្រទេសអាល្លឺម៉ង់ ក្នុងបំណងជួយព្យាករបានឆាប់រហ័សអំពីមហារោគរាតត្បាតនាពេលអនាគត។

ប្រធានអង្គការសុខភាពពិភពលោក លោក Tedros Adhanom Ghebreyesus និងនាយករដ្ឋមន្ត្រីអាល្លឺម៉ង់ Angela Merkel បានចូលរួមពិធីសម្ពោធមជ្ឈមណ្ឌលស៊ើបការណ៍រោគរាតត្បាត នៅរដ្ឋធានី ប៊ែរឡាំង កាលពីថ្ងៃទី 1 កញ្ញា។

មជ្ឈមណ្ឌលខាងលើនេះគឺជាកន្លែងប្រមូលផ្ដុំអ្នកវិទ្យាសាស្ត្រ និងជាទីសម្រាប់ធ្វើការគូសវាសគោលនយោបាយសកល ត្រូវបានបង្កើតឡើងដើម្បីវិភាគទិន្នន័យបានលឿន ក្នុងបំណងព្យាករ ទប់ស្កាត់ រកឃើញ ត្រៀម និងទប់ទល់នឹងរាល់ហានិភ័យនៃការផ្ទុះឆ្លងរាលដាលវីរុស នៅទូទាំងពិភពលោក។

លោក Tedros និយាយថា «វីរុសឆ្លងរាលដាលលឿន ប៉ុន្តែ ទិន្នន័យអាចបញ្ជូនបានលឿនជាងវីរុស។ ជាមួយនឹងព័ត៌មានសមស្រប បណ្ដាប្រទេស និងសហគមន៍ នឹងអាចទប់ទល់នឹងហានិភ័យថ្មីដែលទើបបានកើតឡើង និងសង្គ្រោះមនុស្សបានទាន់ពេល»។

មេដឹកនាំមជ្ឈមណ្ឌលនេះគឺលោក Chikwe Ihekweazu ប្រធានមជ្ឈមណ្ឌលគ្រប់គ្រងជំងឺឆ្លងរបស់ប្រទេស នីហ្សេរីយ៉ា។ ក្នុងរយៈពេល 3 ឆ្នាំដំបូង មជ្ឈមណ្ឌលស៊ើបការណ៍នេះនឹងត្រូវបានរដ្ឋាភិបាលអាល្លឺម៉ង់ ឧបត្ថម្ភមួយផ្នែកដែលមានតម្លៃប្រមាណ 100 លានដុល្លារអាមេរិក។ ទីស្នាក់ការនៃមជ្ឈមណ្ឌលនេះ បច្ចុប្បន្នស្ថិតនៅក្នុងរដ្ឋធានីប៊ែរឡាំង។

នាយករដ្ឋមន្ត្រី Merkel សង្ឃឹមថា មជ្ឈមណ្ឌលថ្មីនេះនឹងជួយពិភពលោក «ត្រៀមខ្លួនបានល្អជាងមុន សម្រាប់ទប់ទល់នឹងជំងឺរាតត្បាតនាពេលអនាគត»៕

September 2, 2021

អ្នកបកប្រែដែលធ្លាប់ជួយសង្គ្រោះ Biden ស្នើសុំជំនួយពី អាមេរិក ខណៈកំពុងលាក់ខ្លួននៅ អាហ្វហ្គានីស្ថាន

កាលពី 13 ឆ្នាំមុន អ្នកបកប្រែជនជាតិ អាហ្វហ្គានីស្ថាន Mohammed បានជួយដល់ការសង្គ្រោះលោក Joe Biden នៅឯជ្រលងភ្នំដាច់ស្រយាលមួយ ពេលនេះ Mohammed បានអំពាវនាវសុំជំនួយ និងកំពុងរង់ចាំជំនួយពីប្រធានាធិបតី សហរដ្ឋអាមេរិក។

«សូមគោរពលោកប្រធានាធិបតី សូមមេត្តាជួយដល់ខ្ញុំ និងក្រុមគ្រួសារខ្ញុំផង» Mohammed អ្នកស្នើសុំមិនបញ្ចេញឈ្មោះពេញ ពេលកំពុងលាក់ខ្លួន បាននិយាយប្រាប់ Wall Street Journal ដូច្នេះ ខណៈជនជាតិអាមេរិក ចុងក្រោយបានចាកចេញពី កាប៊ុល កាលពីថ្ងៃទី 30 សីហា។ លោកបន្តថា «សូមកុំបំភ្លេចខ្ញុំចោលនៅទីនេះ»។

Mohammed រួមនឹងភរិយា និងកូន 4 នាក់ កំពុងលាក់ខ្លួនពី តាលីបង់ ក្រោយពីបានប្រឹងប្រែងជាច្រើនឆ្នាំដើម្បីចាកចេញពី អាហ្វហ្គានីស្ថាន ប៉ុន្តែ មិនបានសម្រេច ដោយសារតែបញ្ហាលិខិតស្នាម។ ពួកគេស្ថិតក្នុងចំណោមសម្ព័ន្ធមិត្តជនជាតិអាហ្វហ្គានីស្ថាន រាប់មិនអស់ ដែលត្រូវបានបោះបង់ចោល នៅពេល សហរដ្ឋអាមេរិក បញ្ចប់យុទ្ធនាការដកទ័ព។

Jen Psaki ជំនួយការផ្នែកសារព័ត៌មានរបស់សេតវិមាន កាលពីថ្ងៃទី 31 សីហា បានសម្ដែងការដឹងគុណចំពោះអ្នកបកប្រែរូបនេះ ក្រោយបានស្ដាប់ការអានលិខិតរបស់ Mohammed ដែលផ្ញើមកកាន់ប្រធានាធិបតី។ Jen Psaki បានថ្លែងថា សហរដ្ឋអាមេរិក នឹងនាំយកសម្ព័ន្ធមិត្តជនជាតិអាហ្វហ្គានីស្ថាន ទាំងអស់ ចេញពីប្រទេសនេះ។

កាលពីឆ្នាំ 2008 ក្នុងវ័យ 36 ឆ្នាំ Mohammed គឺជាអ្នកបកប្រែ ឱ្យកងទ័ព អាមេរិក នៅពេលឧទ្ធម្ភាគចក្រ Black Hawk ពីរគ្រឿង របស់ អាមេរិក ត្រូវចុះចតជាបន្ទាន់នៅឯប្រទេស អាហ្វហ្គានីស្ថាន ដោយសារតែព្យុះព្រឹល។ នៅលើឧទ្ធម្ភាគចក្រ មានតំណាងរាស្ត្របីនាក់ រួមមាន លោក Joe Biden, John Kerry និង Chuck Hagel។

ឧទ្ធម្ភាគចក្រដឹកលោក Joe Biden ដែលជាប់គាំងក្នុងព្យុះព្រឹលនៅ អាហ្វហ្គានីស្ថាន កាលពីឆ្នាំ 2008

ក្រុមហោះហើរ បានហៅទូរស័ព្ទបន្ទាន់ដើម្បីសុំជំនួយ។ នៅឯមូលដ្ឋានទ័ព Bagram ដែលជាបន្ទាយធំបំផុតរបស់ អាមេរិក នៅ អាហ្វហ្គានីស្ថាន Mohammed បានលោតឡើងរថយន្ត Humvee ជាមួយនឹងកងកម្លាំងប្រតិកម្មរហ័សពីកងទ័ពជាតិ Arizona ដែលកំពុងធ្វើការជាមួយអង្គភាពឆត្រយោងលេខ 82 ធ្វើដំណើរអស់ជាច្រើនម៉ោងដើម្បីទៅកាន់កំពូលភ្នំដែលនៅក្បែរនោះ បំណងជួយសង្គ្រោះក្រុមអ្នកជួបគ្រោះថ្នាក់។ នេះបើតាម Brian Genthe ដែលកាលណោះគឺជាព្រឹន្ទបាលទោ។ លោក Brian Genthe បាននាំ Mohammed ទៅជាមួយផងដែរ។

Matthew Springmeyer ដែលកាលណោះជាមេបញ្ជាការក្នុងប្រតិបត្តិការសង្គ្រោះក្រុមតំណាងរាស្ត្រខាងលើ និយាយថា ក្រុមតំណាងរាស្ត្រ ត្រូវបានបញ្ជូនទៅមូលដ្ឋានទ័ព អាមេរិក ដោយសុវត្ថិភាព។

Mohammed បានចំណាយពេលវេលាភាគច្រើនរបស់លោក នៅក្នុងជ្រលងភ្នំដែលមិនគួរឱ្យចង់រស់នៅមួយកន្លែង ជាទីដែលទាហានទាំងឡាយនិយាយថា លោក រួមនឹងពួកគេបានប្រយុទ្ធតតាំងជាមួយសត្រូវជាង 100 លើក។ ទាហាន អាមេរិក បានជឿជាក់លើ Mohammed រហូតដល់ថ្នាក់ប្រគល់អាវុធដល់គាត់ដើម្បីការពារខ្លួន។ Genthe និយាយដូច្នេះ។

វរសេនីទោ Andrew R. Till បានសរសេរកាលពីខែមិថុនា ដើម្បីជួយគាំទ្រដល់ការស្នើសុំទិដ្ឋាកាពិសេស សម្រាប់ លោក Mohammed ថា៖ «ការបម្រើអស់ពីចិត្តរបស់គាត់ ចំពោះទាហានយើងគឺជាប្រភេទនៃការបម្រើកងទ័ពដែលខ្ញុំចង់ឃើញនៅលើពលរដ្ឋអាមេរិក»។

សំណើសុំទិដ្ឋការបស់ Mohammed មិនត្រូវបានអនុម័តនោះទេ ដោយសារតែក្រុមហ៊ុនម៉ៅការយោធាបានធ្វើឱ្យបាត់ឯកសារសំខាន់មួយចំនួន។ ក្នុងពេល អាមេរិក ជម្លៀសមនុស្សចេញពី អាហ្វហ្គានីស្ថាន Mohammed ក៏បានទៅកាន់ព្រលានយន្តហោះ ប៉ុន្តែ ទាហាននៅទីនោះ អនុញ្ញាតឱ្យលោកចូលតែម្នាក់ឯង ចំណែកប្រពន្ធកូន មិនអាចចូលបាន។ Mohammed ក៏សម្រេចចិត្តត្រលប់ទៅផ្ទះដើម្បីលាក់ខ្លួនបណ្ដោះអាសន្ន បន្ទាប់ពី អាមេរិក បានដកទ័ពអស់ពី អាហ្វហ្គានីស្ថាន៕

September 1, 2021

យន្តហោះរាប់សិបគ្រឿង ត្រូវបានបំផ្លាញ មុនពេល អាមេរិក ដកទ័ពចុងក្រោយចេញពី អាហ្វហ្គានីស្ថាន

យន្តហោះ និងឧទ្ធម្ភាគចក្ររាប់សិបគ្រឿង ស្ថិតនៅពាសពេញព្រលានយន្តហោះក្រុងកាប៊ុល បន្ទាប់ពី អាមេរិក ដកទ័ព ខណៈ តាលីបង់ ចូលទៅគ្រប់គ្រង។

ឧត្ដមសេនី Kenneth McKenzie មេបញ្ជាការកងទ័ពអាមេរិក បានឱ្យដឹងថា យន្តហោះ C-17 ដែលបានហោះចេញពីព្រលានយន្តហោះអន្តរជាតិ Hamid Karzai ជាលើកចុងក្រោយ នៅវេលាម៉ោង 11 និង 59 នាទី ថ្ងៃទី 30 សីហា ជាសញ្ញានៃការបញ្ចប់វត្តមានយោធារបស់អាមេរិក នៅ អាហ្វហ្គានីស្ថាន។

មុនពេលដកទ័ព កងកម្លាំងរបស់ អាមេរិក បានបំផ្លាញ ឬបិទប្រព័ន្ធដំណើរការទាំងអស់របស់យន្តហោះចំនួន 73 គ្រឿងរបស់ខ្លួន ដែលស្ថិតនៅក្នុងព្រលានយន្តហោះ Hamid Karzai។

ខាងក្រោមនេះ គឺជាបណ្ដាយន្តហោះរបស់ សហរដ្ឋអាមេរិក នៅឯព្រលានយន្តហោះអន្តរជាតិ Hamid Karzai ដែលត្រូវបានកងទ័ព អាមេរិក បំផ្លាញ ឬបិទប្រព័ន្ធដំណើរការទាំងស្រុង៖

September 1, 2021

តាលីបង់ អមការពារពលរដ្ឋអាមេរិក ទៅកាន់ព្រលានយន្តហោះ តាមកិច្ចព្រមព្រៀងសម្ងាត់

តាលីបង់ បញ្ជូនក្រុមប្រដាប់អាវុធទៅអមការពារពលរដ្ឋអាមេរិក ឆ្ពោះទៅកាន់ព្រលានយន្តហោះក្រុងកាប៊ុល ទៅតាមកិច្ចព្រមព្រៀងសម្ងាត់រវាងតាលីបង់ និងកងទ័ពអាមេរិក។

មន្ត្រីពីររូបរបស់ សហរដ្ឋអាមេរិក កាលពីថ្ងៃទី 31 សីហា បានឱ្យដឹងថា ក្នុងយុទ្ធនាការជម្លៀសមនុស្សពី អាហ្វហ្គានីស្ថាន នាពេលកន្លង ពលរដ្ឋអាមេរិក ត្រូវបានប្រកាសឱ្យដឹងអំពីទីតាំងប្រមូលផ្ដុំគ្នានៅក្បែរព្រលានយន្តហោះអន្តរជាតិ Hamid Karzai នៅរដ្ឋធានីកាប៊ុល បន្ទាប់មក ក្រុមប្រដាប់អាវុធតាលីបង់ ធ្វើការត្រួតពិនិត្យលិខិតស្នាម និងជូនដំណើរពួកគេទៅកាន់ច្រកចូលព្រលានយន្តហោះ ជាកន្លែងដែលកងទ័ពអាមេរិកស្នាក់នៅ។

ក្រុមមន្ត្រី អាមេរិក បញ្ជាក់ថា ក្នុងដំណើរការនៃការជម្លៀស ក្រុមតាលីបង់ បានសហការ និងបើកផ្លូវសុវត្ថិភាពដល់ពលរដ្ឋអាមេរិក។ មន្ត្រី អាមេរិក ម្នាក់ និយាយថា ភារកិច្ចអមការពាររបស់ តាលីបង់ ត្រូវបានធ្វើឡើងច្រើនលើកក្នុងមួយថ្ងៃ។ ទីតាំងប្រមូលផ្ដុំគ្នាសំខាន់មួយដែលត្រូវបាន តាលីបង់ និង អាមេរិក ប្រើប្រាស់ នោះគឺអគារមួយខ្នងនៃក្រសួងមហាផ្ទៃ អាហ្វហ្គានីស្ថាន ដែលស្ថិតនៅមិនឆ្ងាយប៉ុន្មានពីព្រលានយន្តហោះ។ «កិច្ចព្រមព្រៀងនេះ មានប្រសិទ្ធភាពណាស់» នេះបើតាមមន្ត្រីរបស់ សហរដ្ឋអាមេរិក។

សហរដ្ឋអាមេរិក ក៏បានបើកច្រកសម្ងាត់មួយនៅព្រលានយន្តហោះ Hamid Karzai និង បង្កើតមជ្ឈមណ្ឌលផ្ដល់ជំនួយតាមទូរស័ព្ទ ដើម្បីណែនាំផ្លូវសុវត្ថិភាពដល់ពលរដ្ឋអាមេរិក ចូលមកកាន់ព្រលានយន្តហោះ។

សូមរំលឹកថា យុទ្ធនាការជម្លៀសពលរដ្ឋ ក៏ដូចជាការដកទ័ពរបស់ សហរដ្ឋអាមេរិក និងសម្ព័ន្ធមិត្ត បានបញ្ចប់កាលពីថ្ងៃទី 31 សីហា។ ទាហានដែលបោះជំហានចាកចេញពី អាហ្វហ្គានីស្ថាន ក្រោយគេ គឺ ឧត្តមសេនីយ៍ទោ Chris Donahue មេបញ្ជាការកងពលតូចឆត្រយោងលេខ 82។

September 1, 2021

Category: អន្តរជាតិ