អន្តរជាតិ - La Reine Media

នាយករដ្ឋមន្ត្រីជាស្ត្រីភេទដំបូងបង្អស់នៅ ប្រទេសអ៊ុយអែត លាលែងពីតំណែង ក្រោយពីកាន់អំណាចបានប៉ុន្មានម៉ោងប៉ុណ្ណោះ

យោងតាមសារព័ត៌មាននៅ អឺរ៉ុប នាយករដ្ឋមន្ត្រីជាស្ត្រីភេទដំបូងបង្អស់របស់ ប្រទេសស៊ុយអែត លោកស្រី Magdalena Andersson ដែលទើបតែត្រូវបានសភាជ្រើសតាំងមុននេះប៉ុន្មានម៉ោងក្នុងថ្ងៃទី 24 វិច្ឆិកា បានប្រកាសថា សម្រេចចិត្តលាលែងពីតំណែង ដោយសារតែការមន្ទិលអំពីភាពស្របច្បាប់។

សារព័ត៌មានអាល្លឺម៉ង់ ដកស្រង់សម្ដីរបស់លោកស្រី Andersson ឱ្យដឹងថា លោកស្រីបានប្រកាសនៅឯ Stockholm កាលពីថ្ងៃទី 24 វិច្ឆិកា ថា លោកស្រីបានស្នើឱ្យប្រធានសភា Andreas Norlen បញ្ចប់តំណែងរបស់លោកស្រី ប៉ុន្តែ លោកស្រីនៅតែមានបំណងត្រលប់មកកាន់អំណាចនៅក្នុងរដ្ឋាភិបាលនៃប្រទេសអឺរ៉ុបមួយនេះ។

ប្រធានសភា Norlen បានយល់ព្រមតាមសំណើរបស់លោកស្រី Andersson និងបានឱ្យដឹងថា នឹងទាក់ទងទៅកាន់ក្រុមមេដឹកនាំបក្សដើម្បីពិភាក្សាអំពីបញ្ហានេះ ហើយថានឹងប្រកាសអំពីជំហានបន្ទាប់ក្នុងថ្ងៃទី 25 វិច្ឆិកា។

លោកស្រី Andersson បានមានប្រសាសន៍ថា លោកស្រីមិនចង់ដឹកនាំរដ្ឋាភិបាលមួយដែលត្រូវបានគេសង្ស័យអំពីភាពស្របច្បប់។ ទន្ទឹមនឹងនេះ លោកស្រីក៏បានបញ្ជាក់ថា បក្សបៃតង នឹងនៅតែគាំទ្រលោកស្រីឱ្យធ្វើជានាយករដ្ឋមន្ត្រី។

មុននេះ បក្សបៃតង បានសម្រេចដកខ្លួនពីរដ្ឋាភិបាលចម្រុះ បន្ទាប់ពីសភាបានអនុម័តសំណើថវិការបស់ក្រុមប្រឆាំង។ សហប្រធានបក្សបៃតង Per Bolund ឱ្យដឹងថា នេះគឺជាលើកដំបូងដែលសភាបានអនុម័តលើសំណើថវិកាដែលត្រូវបានចរចាជាមួយបក្សនិយមជ្រុល ដែលនេះចង់សំដៅលើបក្សប្រជាធិបតេយ្យស៊ុយអែត។

ថ្ងៃទី 24 ដទៃ សភាបានជ្រើសតាំងលោកស្រី Andersson ជានាយរដ្ឋមន្ត្រី ជំនួសលោក Stefan Lofven ដែលបានលាលែងពីតំណែងជាផ្លូវការកាលពីដើមខែនេះ ក្រោយកាន់អំណាចបាន 7 ឆ្នាំ។ នៅ ប្រទេសស៊ុយអែត ជាធម្មតា មេដឹកនាំរដ្ឋាភិបាលចម្រុះនឹងលាលែងពីតំណែង បន្ទាប់ពីបក្សមួយបានដកខ្លួនពីសម្ព័ន្ធភាព៕

November 25, 2021

ស៊ុយអែត មាននាយករដ្ឋមន្ត្រីជាស្ត្រីដំបូងបង្អស់របស់ខ្លួន

សភាប្រទេសស៊ុយអែត ទើបតែបានអនុម័តជ្រើសតាំងរដ្ឋមន្ត្រីក្រសួងហិរញ្ញវត្ថុ លោកស្រី Magdalena Andersson ឱ្យធ្វើជានាយករដ្ឋមន្ត្រីរបស់ប្រទេសនេះ។

ក្នុងការបោះឆ្នោតនៅសភារបស់ ប្រទេសស៊ុយអែត ដែលមាន 349 អាសនៈ កាលពីម្សិលមិញ (24 វិច្ឆិកា) មាន 117 សំឡេងគាំទ្រលោកស្រី Andersson, 174 សំឡេងប្រឆាំង ខណៈ 57 សំឡេងអនុបវាទ និង អវត្តមាន 1 សំឡេង។

យោងតាមច្បាប់រដ្ឋធម្មនុញ្ញរបស់ ស៊ុយអែត បេក្ខភាពនាយករដ្ឋមន្ត្រីនៅតែអាចត្រូវបានជ្រើសតាំង និងដឹកនាំប្រទេស ឱ្យតែសំឡេងភាគច្រើននៅសភា (តិចបំផុត 175 សំឡេង) មិនជំទាស់។

ការជ្រើសតាំងលោកស្រី Andersson វ័យ 54 ឆ្នាំ ឱ្យធ្វើជានាយករដ្ឋមន្ត្រីនេះគឺជារបត់ថ្មីដ៏សំខាន់សម្រាប់ ស៊ុយអែត ដែលជាប្រទេសមួយត្រូវបានគេវាយតម្លៃខ្ពស់ផ្នែកសមភាពយេនឌ័រ ប៉ុន្តែ មិនទាន់មានស្ត្រីណាម្នាក់ កាន់តំណែងនាយករដ្ឋមន្ត្រី។

November 25, 2021

(វីដេអូ)-ទស្សនាប្រព័ន្ធខាងក្នុងនៃស្ថានីយវារីអគ្គិសនីលេខ 4 របស់គម្រោង Baihetan

ប្រទេសចិន កាលពីថ្ងៃទី 19 វិច្ឆិកា 2021 បានដាក់ឱ្យប្រើប្រាស់ស្ថានីយលេខ 4 ដែលមានកម្លាំងឡើងដល់ 1 លានគីឡូវ៉ាត់ នៅក្នុងរោងចក្រវារីអគ្គិសនី Baihetan ដែលស្ថិតនៅភាគនិរតីប្រទេស។

ស្ថានីយលេខ 4 របស់រោងចក្រវារីអគ្គិសនី Baihetan ត្រូវបានដាក់ឱ្យដំណើរការជាផ្លូវការកាលពីថ្ងៃទី 19 វិច្ឆិកា 2021 ជាស្ថានីយដែលមានស្លាបចក្រប្រើកម្លាំងទឹកទី 100 នៅលើកំណាត់នៃខ្សែទឹកគោលរបស់ទន្លេ Yangtze ។

គម្រោង Baihetan ត្រូវបានរចនាឡើងជាមួយនឹងស្ថានីយវារីអគ្គិសនីចំនួន 16 ក្រុម ដែលត្រូវបានអភិវឌ្ឍដោយប្រទេសចិន។ ដោយស្ថានីយនីមួយៗអាចផលិតអគ្គិសនីបានដល់ 1 លានគីឡូវ៉ាត់ នេះគឺជាប្រភេទស្ថានីយវារីអគ្គិសនីធំជាងគេបង្អស់ក្នុងពិភពលោក។

រាប់ចាប់តាំងពីស្ថានីយដំបូងត្រូវបានដាក់ឱ្យដំណើរការកាលពីថ្ងៃទី 28 មិថុនា 2021 គេឃើញថា ស្ថានីយនានាបានដំណើរការយ៉ាងរលូន បង្កើតបានបរិមាណអគ្គិសនីលើសពី 10 ពាន់លានគីឡូវ៉ាត់/ម៉ោង។

គម្រោង Baihetan ស្ថិតក្នុងក្រុមដែលមានរោងចក្រវារីអគ្គិសនីចំនួន 6 នៅលើកំណាត់គោលនៃទន្លៃ Yangtze ដែលមានគម្រោងវារីអគ្គិសនី Three Gorges Dam។

កម្លាំងរបស់រោងចក្រចំនួន 6 នេះ ផលិតបានថាមពលអគ្គិសនី 71,695 គីឡូវ៉ាត់/ម៉ោង ស្មើនឹង 19.4% ធៀបនឹងកម្លាំងផលិតនៃវារីអគ្គិសនីសរុបទូទាំងប្រទេស។

នៅពេលបញ្ចប់ការស្ថាបនា Baihetan នឹងក្លាយជារោងចក្រវារីអគ្គិសនីធំជាងគេលំដាប់ទីពីរក្នុងពិភពលោក បន្ទាប់ពីវារីអគ្គិសនី Three Gorges ក្នុងខេត្ត Hubei ប្រទេសចិន៕

November 24, 2021

ប្រទេសម៉ាឡេស៊ី កាត់បន្ថយរយៈពេលធ្វើចត្តាឡីស័ក សម្រាប់អ្នកធ្វើដំណើរផ្នែកថែទាំសុខភាព

យោងតាមអនុសាសន៍របស់នាយករដ្ឋមន្ត្រីនៃប្រទេសម៉ាឡេស៊ី នាថ្ងៃទី ១៥ ខែតុលា ឆ្នាំ ២០២១ ស្តីពីការកែសម្រួលលក្ខខណ្ឌធ្វើដំណើរ ការអនុវត្តវិធានការសុខាភិបាល និងការធ្វើចត្តាឡីស័កសម្រាប់ អ្នកដំណើរចូលប្រទេសម៉ាឡេស៊ី។ សម្រាប់អ្នកដំណើរ ដែលបានចាក់វ៉ាក់សាំងការពារជំងឺកូវីដ-១៩ គ្រប់ចំនួនដូស ហើយធ្វើដំណើរមកប្រទេសម៉ាឡេស៊ីក្នុងគោលបំណងព្យាបាល និងថែទាំសុខភាព ការធ្វើចត្តាឡីស័កត្រូវកាត់បន្ថយរយៈពេលមកត្រឹម ៧ ថ្ងៃប៉ុណ្ណោះ ដែលច្បាប់នេះមានប្រសិទ្ធភាពនិងអនុវត្តចាប់ពីថ្ងៃទី ១៨ ខែតុលា ឆ្នាំ ២០២១ តទៅ។

អ្នកដំណើរដែលបានចាក់វ៉ាក់សាំងការពារជំងឺកូវីដ-១៩ គ្រប់ចំនួនដូស តម្រូវឱ្យធ្វើតេស្តដោយម៉ាស៊ីន PCR នៅថ្ងៃទី១ និងថ្ងៃទី ៥ នៃរយៈពេលធ្វើចត្តាឡីស័ក។ ចំពោះអ្នកដំណើរដែលមិនទាន់បានចាក់វ៉ាក់សាំង ឬចាក់វ៉ាក់សាំងមិនទាន់គ្រប់ចំនួនដូស នឹងត្រូវធ្វើចត្តាឡីស័ករយៈពេល ១០ ថ្ងៃ និងតម្រូវឱ្យធ្វើតេស្តរកមេរោគកូវីដ- ១៩ ដោយម៉ាស៊ីន PCR នៅថ្ងៃទី១ និងថ្ងៃទី៨ នៃរយៈពេលធ្វើចត្តាឡីស័ក។ សម្រាប់អ្នកដំណើរដែលស្វែងរកសេវាកម្មផ្សេងៗដូចជាការបង្កកំណើតក្រៅស្បូន (IVF) ព្យាបាលសុខភាពមាត់ធ្មេញ និងភ្នែក ជាដើម អាចធ្វើចត្តាឡីស័កនៅក្នុងសណ្ឋាគារ និងតម្រូវឱ្យមានការអនុញ្ញាតពីសំណាក់ក្រុមគ្រូពេទ្យដែលកំពុងព្យាបាល។ ទាំងអស់នេះគឺដើម្បីធានាបាននូវសុវត្ថិភាពរបស់អ្នកដំណើរក៏ដូចជាអ្នកជំងឺ និងប្រជាជាតិទាំងមូលក្នុងបរិបទនេះផងដែរ។

លោកវេជ្ជបណ្ឌិត Mohd Daud Mohd Arif ដែលជានាយកប្រតិបត្តិនៃក្រុមប្រឹក្សាទេសចរណ៍ថែទាំសុខភាពម៉ាឡេស៊ី (MHTC) បានមានប្រសាសន៍ថា “ប្រទេសម៉ាឡេស៊ីបានត្រៀមរួចជាស្រេច ក្នុងការផ្ដល់សេវាកម្មផ្នែកថែទាំសុខភាព ដែលធានានូវសុវត្ថិភាព និងជាទីទុកចិត្តបំផុត”។

លោកបានបន្តទៀតថា “ទេសចរណ៍សុខភាពម៉ាឡេស៊ី (MHTC) ពួកយើងផ្ដោតសំខាន់ទៅលើសុវត្ថិភាពរបស់អ្នកជំងឺ និងសុខុមាលភាពក្នុងសហគមន៍ជាចំបង តាមរយៈការពង្រឹងនូវកិច្ចសហការណ៍ដ៏រឹងមាំរវាងបណ្តាស្ថាប័នរដ្ឋ និងក្រុមហ៊ុនឯកជនផ្សេងៗគឺចាំបាច់បំផុត។

ចំពោះវិធានការសុខាភិបាលថ្មី ដែលអ្នកដំណើរចូលប្រទេសម៉ាឡេស៊ី ត្រូវអនុវត្តតាំងពីមុនការធ្វើដំណើរ កំឡុងពេលព្យាបាល ថែទាំសុខភាព និងបញ្ចប់ការព្យាបាលមានដូចជា៖

១-កំណត់ថ្ងៃណាត់ពិគ្រោះនិងព្យាបាល ជាមួយមន្ទីរពេទ្យឯកជនដែលជាដៃគូរបស់ MHTC ហើយសុំលិខិតបញ្ជាក់ពីពេទ្យ

២-ផ្ញើឯកសារទៅកាន់មន្ទីរពេទ្យដែលអ្នកបានជ្រើសរើស និងដាក់ពាក្យស្នើសុំចូលប្រទេសម៉ាឡេស៊ី ដើម្បីព្យាបាលជំងឺ

៣- MHTCនឹងដាក់ពាក្យស្នើសុំទៅកាន់មន្ទីរពេទ្យដែលអ្នកបានជ្រើសរើស

៤-នៅពេលពាក្យស្នើសុំបានជោគជ័យ ខាងមន្ទីរពេទ្យនឹងផ្ញើជូនអ្នកនូវលិខិតអនុញ្ញាត ដែលចេញដោយ MHTC

៥- ដាក់ស្នើសុំទិដ្ឋាកា Visa (បើចាំបាច់) អ្នកគួរតែរៀបចំឯកសារចាំបាច់នានាទុកជាមុន ដើម្បីត្រៀមសម្រាប់ការធ្វើដំណើរតាមយន្តហោះ។

៦-បីថ្ងៃ មុនកាលបរិច្ឆេទមកដល់ប្រទេសម៉ាឡេស៊ី អ្នកធ្វើដំណើរទាំងអស់ តម្រូវឱ្យធ្វើតេស្តរកមេរោគកូវីដ-១៩ លើកទី១ ដោយម៉ាស៊ីន PCR នៅតាមមជ្ឈមណ្ឌលដែលទទួលស្គាល់ដោយ MHTC ។

អ្នកធ្វើដំណើរផ្នែកថែទាំសុខភាពអាចស្វែងរកមន្ទីរពេទ្យដែលជាដៃគូ ទេសចរណ៍សុខភាពម៉ាឡេស៊ី (MHTC) មានដូចជា មន្ទីរពេទ្យ Pantai Kuala Lumpur មជ្ឈមណ្ឌលសុខភាព Ara Damansara មជ្ឈមណ្ឌលសុខភាព Subang Jaya មជ្ឈមណ្ឌលសុខភាព Sunway និងមន្ទីរពេទ្យ Island ជាដើម។

ប្រទេសម៉ាឡេស៊ីជាទិសដៅជាទីពេញចិត្តសម្រាប់អ្នកធ្វើដំណើរផ្នែកថែទាំសុខភាពនៅជុំវិញពិភពលោក ដោយបានប្រមូលផ្តុំអ្នកធ្វើដំណើរផ្នែកថែទាំសុខភាពសរុបចំនួន ១,២២០,០០០ នាក់ ក្នុងឆ្នាំ ២០១៩ និងតិចបំផុត ៦៤៣, ០០០នាក់ក្នុងឆ្នាំ២០១។

ប្រទេសម៉ាឡេស៊ីបានក្លាយជាទិសដៅដ៏ពេញនិយមកាន់តែខ្លាំងឡើង សម្រាប់អ្នកធ្វើដំណើរពីប្រទេសកម្ពុជាដើម្បីស្វែងរកការព្យាបាល និងថែទាំសុខភាព ដោយសារវប្បធម៌ស្រដៀងគ្នា បូករួមទាំងគុណភាព សេវាកម្មដ៏ល្អ ព្រមទាំងតម្លៃសមរម្យ។

ប័ណ្ណសរសើរនិងពានរង្វាន់ដែលទទួលបាន :

International Medical Travel Journal – Medical Travel Awards (2015-2020)
Asia Pacific Healthcare & Medical Tourism Awards (2017 – 2020)
World’s Best Hospitals for Medical Tourists by the Medical Travel Quality Alliance (2013, 2014, 2017-2019)

សម្រាប់ពត៌មានលម្អិត សូមចូលទៅកាន់ www.malaysiahealthcare.org/

November 24, 2021

កម្លាំងការពារដែនអាកាសរបស់ ស៊ីរី វាយស្ទាក់ហ្វូងគ្រាប់រ៉ុក្កែត ដែលបាញ់ប្រហារពីយន្តហោះរបស់ អ៊ីស្រាអែល

កងកម្លាំងការពារដែនអាកាសរបស់ ប្រទេសស៊ីរី ស្កាត់ចាប់បានរ៉ុក្កែត ជាច្រើនគ្រាប់ដែលបានបាញ់ចេញពីយន្តហោះចម្បាំងរបស់កងទ័ព អ៊ីស្រាអែល ប៉ុន្តែ គ្រាប់រ៉ុក្កែតមួយចំនួនបានទម្លុះប្រព័ន្ធការពារ និងចំគោលដៅនៅ ហម (Homs)។

ទូរទស្សន៍ជាតិស៊ីរី SANA បានប្រកាសថា ព្រឹកថ្ងៃទី 24 វិច្ឆិកា នេះ កងកម្លាំងការពារដែនអាកាសរបស់ប្រទេសស៊ីរី បានវាយស្កាត់ការវាយប្រហារដោយរ៉ុក្កែត របស់ក្រុមយន្តហោះចម្បាំងនៃ ប្រទេសអ៊ីស្រាអែល ដែលបាញ់សំដៅលើតំបន់នានានៅក្នុងទីក្រុង ហម ភាគកណ្ដាលរបស់ ស៊ីរី។

ការវាយប្រហារលើកនេះរបស់ អ៊ីស្រាអែល បានសម្លាប់ពលរដ្ឋស៊ីវិលរបស់ ស៊ីរី ចំនួន 2 នាក់ និងម្នាក់រងរបួស ខណៈទាហានរបស់ ស៊ីរី ចំនួន 4 នាក់ក៏ត្រូវរងរបួស។ ក្រុមអ្នកយកព័ត៌មានបានឱ្យដឹងថា សំឡេងគ្រាប់កាំភ្លើងលាន់ឡើងនៅក្នុងតំបន់ Al-Mahatta នៅទីក្រុង ហម។ នេះបើតាមការឱ្យដឹងពីប្រភពព័ត៌មានក្នុងជួរកងទ័ពរបស់ ស៊ីរី។

(ខាងលើគឺជាទិដ្ឋភាពរ៉ុក្កែតរបស់ ស៊ីរី ឆ្លើយតបនឹងការវាយប្រហារពីរ៉ុក្កែតរបស់ អ៊ីស្រាអែល កាលពីខែកក្កដា 2020)

មកដល់បច្ចុប្បន្ន ក្រសួងការពារជាតិនៃ ប្រទេសអ៊ីស្រាអែល មិនទាន់មានការអធិប្បាយអ្វីទាក់ទងនឹងព័ត៌មានខាងលើនៅឡើយ។

អ៊ីស្រាអែល តែងតែវាយប្រហារលើតំបន់នានារបស់ ស៊ីរី ក្នុងនោះរួមមានទាំងរដ្ឋធានីដាម៉ាស (Damascus) ផងដែរ។ គោលដៅនៃការវាយប្រហាររបស់ អ៊ីស្រាអែល គឺកងជីវពលដែលស្និទ្ធនឹង អ៊ីរ៉ង់ និងក្រុម ហេសបូឡា របស់ ប្រទេសលីបង់ ក៏ប៉ុន្តែ ពេលខ្លះ កងទ័ពរបស់ ស៊ីរី ក៏ត្រូវរងការវាយប្រហារ។ សកម្មភាពយោធារបស់ អ៊ីស្រាអែល នេះ គឺដើម្បីទប់ស្កាត់កងជីវពលដែលស្និទ្ធនឹង អ៊ីរ៉ង់ លាក់ខ្លួននៅក្នុងប្រទេសជិតខាងមួយនេះ។

ហេសបូឡា និងកងជីវពលស្និទ្ធនឹង អ៊ីរ៉ង់ គឺជាសម្ព័ន្ធមិត្តរបស់កងទ័ពរដ្ឋាភិបាលស៊ីរី នៅក្នុងការប្រយុទ្ធប្រឆាំងក្រុមឧទ្ទាមអ៊ីស្លាម។ ប៉ុន្តែ អ៊ីស្រាអែល បានចោទ ហេសបូឡា ថា កំពុងប្រើប្រាស់មូលដ្ឋាននៅ ស៊ីរី ជាឈ្នាន់ដើម្បីវាយប្រហារលើតំបន់ខ្ពង់រាប Golan ដែលកំពុងគ្រប់គ្រងដោយទីក្រុង ហ្ស៊េរុយសាឡិម៕

November 24, 2021

ផ្ទុះយ៉ាងធំមួយក្នុងរោងចក្រផលិត និងឃ្លាំងផ្ទុករ៉ុក្កែតចំនួន 500 គ្រាប់ នៅ ប្រទេសស៊ែប៊ី

កាលពីថ្ងៃទី 23 វិច្ឆិកា ក្រសួងមហាផ្ទៃរបស់ ប្រទេសស៊ែប៊ី បានបញ្ជាក់ថា មានករណីផ្ទុះជាច្រើននៅក្នុងរោងចក្រផលិតរ៉ុក្កែត ឯកជនមួយ នៅជាយភាគខាងត្បូងនៃរដ្ឋធានី Belgrade បណ្ដាលឱ្យមនុស្សយ៉ាងតិច 2 នាក់បាត់បង់ជីវិត និង 16 នាក់រងរបួស។

ក្រសួងខាងលើបានឱ្យដឹងថា ហេតុការណ៍ផ្ទុះនេះកើតឡើងនៅវេលាម៉ោងប្រហែល 14 (ម៉ោង 20 នៅ កម្ពុជា) ក្នុងទីតាំងឃ្លាំងដែលមានផ្ទុករ៉ុក្កែត 500 គ្រាប់ ហើយក្នុង 1 គ្រាប់ទម្ងន់ 30 គីឡូក្រាម។ យោងតាមទូរទស្សន៍ ស៊ែប៊ី (RTS) ក្នុងរោងចក្រនេះមានបុគ្គលិកប្រហែល 40 នាក់ កំពុងធ្វើការ ក្នុងគ្រាដែលហេតុការណ៍កើតឡើង។

មនុស្សចំនួន 5 នាក់ ត្រូវបានរកឃើញ និងសង្គ្រោះពីតំបន់គ្រោះថ្នាក់។ ក្រុមអ្នកជួយសង្គ្រោះកំពុងញាប់ដៃ ញាប់ជើង ស្វែងរកជនរងគ្រោះជាបន្តទៀត។ នេះបើតាម Milos Majstorovic មេបញ្ជាការក្រុមពន្លត់អគ្គិភ័យនៅ Belgrade។

បច្ចុប្បន្ន សមត្ថកិច្ចកំពុងបើកការស្រាវជ្រាវដើម្បីស្វែងរកមូលហេតុដែលនាំឱ្យមានហេតុការណ៍ផ្ទុះរោងចក្រផលិតរ៉ុក្កែតនេះ៕

November 24, 2021

អតីតប្រធានាធិបតីកូរ៉េខាងត្បូង Chun Doo-hwan ទទួលមរណភាព

អតីតប្រធានាធិបតីកូរ៉េខាងត្បូង លោក Chun Doo-hwan ដែលបានដឹកនាំប្រទេសមួយរូប បន្ទាប់ពីរដ្ឋប្រហារយោធាកាលពីឆ្នាំ 1979 បានទទួលមរណភាពក្នុងវ័យ 90 ឆ្នាំ។

លោក Chun Doo-hwan បានទទួលមរណភាពដោយជំងឺឆ្អឹង នៅវេលាម៉ោង 8 និង 40 នាទី (ម៉ោង 6 និង 40 នាទី នៅ ភ្នំពេញ) ព្រឹកនេះ នៅឯគេហដ្ឋានផ្ទាល់ខ្លួន ក្នុងតំបន់ Seodaemun-gu នៃ រដ្ឋធានីសេអ៊ូល។

លោក Chun Doo-hwan គឺជាប្រធានាធិបតីទី 5 របស់ កូរ៉េខាងត្បូង ដែលកាន់អំណាចចន្លោះឆ្នាំ 1980-1988 បន្ទាប់ពីបានដឹកនាំរដ្ឋប្រហារយោធាកាលពីឆ្នាំ 1979 បណ្ដាលឱ្យប្រធានាធិបតី Park Chung-hee ត្រូវបានគេធ្វើឃាត។

អតីតប្រធានាធិបតីរូបនេះ កើតនៅក្នុងទីរួមស្រុកដ៏ក្រីក្រ Yulgok-myeonm ក្នុងសម័យអាណានិគមនិយមជប៉ុន។ លោកបានចូលបម្រើការក្នុងជួរកងទ័ពតាំងពីនៅរៀនវិទ្យាល័យ រហូតដល់បានឡើងជាមេបញ្ជាការកាលពីឆ្នាំ 1979។

លោកធ្លាប់បានចេញបញ្ជាឱ្យកងទ័ពបង្ក្រាបលើហ្វូងបាតុករគាំទ្រប្រជាធិបតេយ្យកាលពីឆ្នាំ 1980 នៅ Gwangju។

ឆ្នាំ 1995 លោកត្រូវបានចោទប្រកាន់ពីបទបះបោរ ក្បត់ជាតិ និងត្រូវបានចាប់ខ្លួន ក្រោយពីមិនព្រមចូលសវនាការ និងគេចខ្លួនទៅស្រុកកំណើត។ ក្នុងសវនាការក្រោយមក អតីតប្រធានាធិបតី Chun បានប្រកាសថា រដ្ឋប្រហារយោធាដែលលោកបានធ្វើឡើងគឺជារឿងចាំបាច់ដើម្បីការពារទឹកដីពីវិបត្តិនយោបាយ។

ឆ្នាំ 1996 លោក Chun ត្រូវបានកាត់ទោសប្រហារជីវិត ក្នុងគ្រាដែលសម្ព័ន្ធមិត្តរបស់លោក គឺ អតីតប្រធានាធិបតី Roh Tae-woo ក៏ត្រូវបានកាត់ទោសដាក់ពន្ធនាគាររាប់សិបឆ្នាំ។ ប៉ុន្តែ តុលាការកំពូល បានសម្រាលទោស ដោយសារតែលោកធ្លាប់បានជួយឱ្យសេដ្ឋកិច្ចរីកចម្រើន និងប្រគល់អំណាចដោយសន្តិវិធីដល់អ្នកដឹកនាំជំនាន់ក្រោយ នាឆ្នាំ 1988។

លោក Chun Doo-hwan និងលោក Roh Tae-woo សុទ្ធតែទទួលបានការលើកលែងទោសពីអតីតប្រធានាធិបតី Kim Young-sam កាលពីឆ្នាំ 1997។ ឆ្នាំ 2020 លោក Chun ត្រូវបានកាត់ទោសឱ្យជាប់ពន្ធនាគារ (ក្រៅឃុំ) 8 ខែ ដោយសារតែបានបរិហារកេរ្តិ៍លើសកម្មជនប្រជាធិបតេយ្យមួយរូបដែលបានស្លាប់ទៅហើយ៕

November 23, 2021

អាជ្ញាធរចិន គូស «បន្ទាត់ក្រហម» សម្រាប់ក្រុមហ៊ុនរបស់ ចិនតៃវ៉ាន់ ដែលចង់រកស៊ីនៅ ចិនដីគោក

អាជ្ញាធរចិនដីគោក តម្រូវឱ្យក្រុមហ៊ុនតៃវ៉ាន់ ដែលរកស៊ីនៅលើទឹកដីរបស់ ចិនដីគោក ត្រូវគូស «បន្ទាត់ខណ្ឌចែក» ជាមួយនឹងក្រុមអ្នកគាំទ្រឯករាជ្យរបស់ កោះតៃវ៉ាន់ បើសិនជាចង់រកប្រាក់នៅ ប្រទេសចិន។

ទីភ្នាក់ងារសារព័ត៌មានចិន Xinhua កាលពីថ្ងៃទី 22 វិច្ឆិកា កន្លងទៅ បានចេញផ្សាយថា អាជ្ញាធរអនុវត្តច្បាប់របស់ ប្រទេសចិន បានដាក់ទណ្ឌកម្មលើក្រុមហ៊ុនតៃវ៉ាន់ Far Eastern Group ដែលរកស៊ីក្នុងវិស័យជាច្រើនដូចជា សណ្ឋាគារ និង គីមីប្រេង ជាដើម ក្រោមបទចោទទាក់ទិននឹងបញ្ហាពន្ធដារ សុវត្ថិភាពលើបញ្ហាផ្ទុះឆេះ។ ការស៊ើបអង្កេតកំពុងត្រូវបានធ្វើបន្ត។

ក្នុងការប្រកាសចុងក្រោយនៃថ្ងៃដដែលដើម្បីឆ្លើយតបនឹងសំនួរដែលសួរថា តើចំណាត់ការនេះអាចជាប់ទាក់ទងនឹងសកម្មភាពរបស់រដ្ឋាភិបាល សំដៅលើកងកម្លាំងដែល «ព្យាយាមគាំទ្រឯករាជ្យរបស់តៃវ៉ាន់» ដែរ ឬទេ ការិយាល័យទទួលបន្ទុកបញ្ហាកោះតៃវ៉ាន់ របស់ ប្រទេសចិន មិនបានអធិប្បាយផ្ទាល់ ដោយគ្រាន់តែលើកឡើងជាថ្មីនូវព័ត៌មានដែលបានចុះផ្សាយនៅលើទំព័រ Xinhua។

ប៉ុន្តែ ការិយាល័យខាងលើបានបង្កត់ធ្ងន់ថា ក្រុមអ្នកគាំទ្រឯករាជ្យរបស់ កោះតៃវ៉ាន់ «គំរាមកំហែងដល់សន្តិភាព ស្ថិរភាព និងបង្កការខូចខាតផលប្រយោជន៍របស់ប្រជាជាតិចិន»។ ចិន ទទួលស្វគមន៍បណ្ដាក្រុមហ៊ុនតៃវ៉ាន់ ប៉ុន្តែ មិនអនុញ្ញាតឱ្យអ្នកគាំទ្រឯករាជ្យរបស់ តៃវ៉ាន់ មករកប្រាក់នៅ ប្រទេសចិន។

ចិនដីគោក តែងតែចាត់ទុក កោះតៃវ៉ាន់ ជាផ្នែកមួយនៃទឹកដីរបស់ខ្លួន ដែលរង់ចាំតែការបម្រួបបង្រួមប៉ុណ្ណោះ ហើយថានឹងប្រើកម្លាំងបាយ បើសិនជាចាំបាច់៕

November 23, 2021

Pfizer និយាយថា វ៉ាក់សាំងរបស់ខ្លួនមានប្រសិទ្ធភាព 100% ចំពោះក្មេងជំទង់ ក្រោយការចាក់ដូសទីពីរបាន 4 ខែ

ក្រុមហ៊ុន Pfizer បានប្រកាសឱ្យដឹងថា វ៉ាក់សាំងបង្ការជំងឺ COVID-19 របស់ពួកគេ ធានាប្រសិទ្ធភាព 100% នៅលើក្មេងអាយុចាប់ពី 12 ឆ្នាំ ដល់ 15 ឆ្នាំ បន្ទាប់ពីការចាក់ដូសទីពីរបាន 4 ខែ ដែលនេះគឺជាលទ្ធផលនៃការពិសោធលើមនុស្សជាង 2,000 នាក់។

កាលពីម្សិលមិញ (22 វិច្ឆិកា 2021) Pfizer បានបញ្ចេញទិន្នន័យស្ដីពីការពិសោធដែលប្រមូលបានពីអ្នកស្ម័គ្រចិត្តចំនួន 2,228 នាក់ បង្ហាញថា វ៉ាក់សាំងរបស់ក្រុមហ៊ុនពុំបានបង្កផលប៉ះពាល់គួរឱ្យព្រួយបារម្ភណាមួយទេ នៅលើក្រុមអ្នកស្ម័គ្រចិត្តដែលត្រូវបានតាមដានយ៉ាងតិច 6 ខែ បន្ទាប់ពីបានចាក់ដូសទីពីរ។

ក្នុងចំណោមក្មេងជំទង់អាយុពី 12 ឆ្នាំ ដល់ 15 ឆ្នាំ រាប់ពាន់នាក់ដែលបានចូលរួមការពិសោធ មាន 30 ករណីឆ្លង COVID-19 ដែលមានរោគសញ្ញា ប៉ុន្តែ ពួកគេសុទ្ធតែជាអ្នកប្រើប្រាស់ថ្នាំបញ្ឆោត (placebo)។ Pfizer យល់ថា ប្រការនេះមានន័យថា វ៉ាក់សាំងមានប្រសិទ្ធភាព 100% នៅលើមនុស្សគ្រប់ភេទ គ្រប់ជាតិសាសន៍ គ្រប់កម្រិតនៃភាពធាត់និងមានជំងឺប្រចាំកាយ។

ការព្រួយបារម្ភតែមួយគត់ចំពោះក្មេងដែលមានវ័យចាប់ពី 12 ដល់ 15 ឆ្នាំ នោះគឺហានិភ័យនៃបញ្ហារលាកសាច់ដុំបេះដូងនៅក្មេងប្រុសបន្ទាប់ពីបានចាក់វ៉ាក់សាំង។ ក៏ប៉ុន្តែ ទិន្នន័យបានបង្ហាញថា នេះគឺជាបញ្ហាកម្របំផុត ហើយអត្ថប្រយោជន៍នៃការចាក់វ៉ាក់សាំងធំធេងជាងហានិភ័យ។ វីរុស COVID-19 ក៏បង្កឱ្យមានបញ្ហារលាកសាច់ដុំបេះដូងក្នុងអត្រាខ្ពស់ជាង និងធ្ងន់ធ្ងរជាង។

នាយកប្រតិបត្តិរបស់ Pfizer លោក Albert Bourla បានអះអាងថា លទ្ធផលនៃការពិសោធខាងលើនឹងជួយឱ្យវ៉ាក់សាំង Pfizer ទទួលបានការអនុញ្ញាតឱ្យប្រើប្រាស់ពេញលេញនៅ សហរដ្ឋអាម៉េរិក និងនៅទូទាំងសកលលោក។ បច្ចុប្បន្ន វ៉ាក់សាំង Pfizer ទើបតែទទួលបានការអនុញ្ញាតឱ្យប្រើប្រាស់ពេញលេញសម្រាប់មនុស្សអាយុចាប់ពី 16 ឆ្នាំឡើងប៉ុណ្ណោះ៕

November 23, 2021

លទ្ធផលនៃកិច្ចប្រជុំកំពូលពិសេសអាស៊ាន-ចិន៖ ប្រធានាធិបតីចិន ស៊ី ជីនពីង ដាក់សំណើ 5 ចំណុច ដើម្បីពង្រឹងទំនាក់ទំនងអាស៊ាន-ចិន

កិច្ចប្រជុំកំពូលពិសេសអាស៊ាន-ចិន ដើម្បីរំលឹកខួបអនុស្សាវរីយ៍ លើកទី 30 នៃទំនាក់ទំនងដៃគូសន្ទនាអាស៊ាន-ចិន ត្រូវបានធ្វើឡើងនៅថ្ងៃទី 22 វិច្ឆិកា 2021 តាមរយៈប្រព័ន្ធវីដេអូ។

នៅក្នុងកិច្ចប្រជុំនេះ ប្រធានាធិបតីចិន ស៊ី ជីនពីង បានដាក់សំណើ 5 ចំណុច ដើម្បីពង្រឹងទំនាក់ទំនងអាស៊ាន-ចិន ក្នុងនោះមានដូចជា ការកសាងផ្ទះដែលប្រកបដោយសន្តិភាពជាមួយគ្នា ឬ ការកសាងផ្ទះដ៏ស្រស់ស្អាតជាមួយគ្នា។ល។

នៅក្នុងកិច្ចប្រជុំនេះ សម្ដេចតេជោ ហ៊ុន សែន ក៏បានថ្លែងអំណរគុណដល់ប្រទេសចិន ដែលបានចូលរួមចំណែកក្នុងការប្រយុទ្ធប្រឆាំងនឹងជំងឺ COVID-19 និងជំរុញកំណើនសេដ្ឋកិច្ច-សង្គមនៅ កម្ពុជា ផងដែរ។

ព័ត៌មានលម្អិត សូមអានសេចក្ដីប្រកាសព័ត៌មានខាងក្រោម៖

November 22, 2021

Category: អន្តរជាតិ