អន្តរជាតិ - La Reine Media

អ៊ុយក្រែន ប្រកាសថា បានចាប់ខ្លួនអ្នកមានដែលស្និទ្ធនឹង រុស្ស៊ី

អង្គភាពសន្តិសុខអ៊ុយក្រែន កាលពីថ្ងៃទី ១២ មេសា ឱ្យដឹងថា បានចាប់ខ្លួន Viktor Medvedchuk ដែលជាអ្នកមានម្នាក់ស្និទ្ធនឹង រុស្ស៊ី នៅក្នុងយុទ្ធនាការពិសេសដែលពួកគេអធិប្បាយថាជា «មហាល្បឿន»។

មុននោះ ប្រធានាធិបតីអ៊ុយក្រែន វ៉ូឡូឌីមៀ ហ្សេឡែនស្គី បានបង្ហោះរូបថតមួយសន្លឹកបង្ហាញថា Medvedchuk ត្រូវបានដាក់ខ្នោះដៃជាមួយនឹងទឹកមុខប្រកបដោយភាពហត់នឿយ។

«យុទ្ធនាការពិសេសមួយត្រូវបានធ្វើឡើងដោយអង្គភាពសន្តិសុខអ៊ុយក្រែន។ ធ្វើបានល្អ!» លោក ហ្សេឡែនស្គី បង្ហោះសារនៅលើ Telegram ដូច្នេះ។ បន្ទាប់មក លោកក៏បានស្នើឱ្យមានការដោះដូរ Medvedchuk ជាមួយនឹងចំណាប់ខ្មាំងសង្គ្រាមអ៊ុយក្រែន ដែលត្រូវបាន រុស្ស៊ី ចាប់ខ្លួន។

លោក Medvedchuk គឺជាអ្នកជំនួញ និងជាមេដឹកនាំបក្សប្រឆាំង ដើម្បីជីវិត របស់អ៊ុយក្រែន ត្រូវបានគេជឿថា បានក្លាយជាអ្នកមានក៏ដោយសារប្រភពរ៉ែប្រេងរបស់ រុស្ស៊ី នៅតំបន់ គ្រីមៀជាមួយនឹងទំនាក់ទំនងជិតស្និទ្ធនឹង វិមានក្រឹមឡាំង។ ទស្សនាវដ្ដី Forbes គណនាឃើញថា លោក Medvedchuk មានទ្រព្យប្រហែល ៦២០ លានដុល្លារអាម៉េរិក។

បក្សរបស់ Medvedchuk មានការគាំទ្រចំពោះ ទីក្រុងមូស្គូ មុនពេលលោកត្រូវបានចាប់ខ្លួនពីបទក្បត់ជាតិកាលពីខែឧសភា ២០២១។ លោកត្រូវបានឃុំខ្លួនក្នុងផ្ទះ មុនពេលរត់គេចខ្លួនកាលពីខែកុម្ភៈ ២០២២ ក្រោយពី រុស្ស៊ី បើកយុទ្ធនាការយោធាពិសេសនៅ អ៊ុយក្រែន បានប៉ុន្មានថ្ងៃប៉ុណ្ណោះ។

April 13, 2022

(វីដេអូ)-គ្រឿងចក្រលើគោកដែលមានទំហំធំជាងគេបង្អស់ក្នុងពិភពលោក

(អាល្លឺម៉ង់)-គ្រឿងចក្រកាយយករ៉ែ Bagger ២៩៣ ទម្ងន់រហូតដល់ ១៤,០០០ តោន ប៉ុន្តែ អាចបន្សល់ «ដានជើង» មិនជ្រៅជាងស្នាមជើងរបស់មនុស្សនៅលើដីឡើយ។

គ្រឿងចក្រដ៏ធំមហិមាមួយគ្រឿងបង្ហាញខ្លួននៅភាគខាងលិចនៃ ប្រទេសអាល្លឺម៉ង់ មានកម្ពស់ប្រហែលវិមាននាឡិកា Big Ben នៅទីក្រុងឡុងដ៍។ គ្រឿងចក្រនេះ អាចកាយ និងកិនដីរាប់សែនតោន/ថ្ងៃ។

វាមិនមែនជាការស្រមៃ ឬវិទ្យាសាស្ត្របែបប្រឌិត ប៉ុន្តែ វាគឺជា Bagger ២៩៣ ដែលជាម៉ាស៊ីន អេស្កាវ៉ាទ័រ (bucket-wheel excavator/BWE) ខ្នាតយក្សមួយប្រភេទដែលធំជាងគេបង្អស់ក្នុងពិភពលោក។

bagger-293 ខ្ពស់ជាងរូបសំណាកព្រះនាងសេរីភាព (Statue of Liberty) ទៅទៀត។

Bagger ២៩៣ គឺជាគ្រឿងចក្រកាយដី BWE។ វាគឺជាគ្រឿងចក្រលើគោកមួយដែលធំជាងគេបំផុតក្នុងពិភពលោក។ ដូចទៅនឹងទីក្រុងតូចៗជាច្រើនដែលបំពាក់ធ្មេញរណារមូល ហើយ Bagger ២៩៣ គឺជាទីក្រុងធំបំផុតមួយនៅក្នុងចំណោមនោះ។ នេះបើតាម Steve Remilli អ្នកគ្រប់គ្រងគម្រោងរបស់ វិទ្យាស្ថានស្រាវជ្រាវនិងផលិត McMaster។

Doug Morrison ដែលជាប្រធាន និងជានាយកប្រតិបត្តិរបស់មជ្ឈមណ្ឌលសម្រាប់ឧត្តមភាពក្នុងការច្នៃប្រឌិតថ្មីនៃការជីកយករ៉ែ (Center for excellence in mining innovation) បានឱ្យដឹងថា Bagger ២៩៣ ត្រូវបានទទួលស្គាល់ដោយស្ថាប័នកំណត់ត្រាពិភពលោក Guinness ថាជាគ្រឿងចក្រលើគោកដែលធំបំផុតនៅលើផែនដី។

ត្រូវបានផលិតដោយក្រុមហ៊ុនរបស់ អាល្លឺម៉ង់ Takraft គ្រឿងចក្រនេះមានទម្ងន់ជាង ១៤,០០០ តោន ប៉ុន្តែ បន្សល់ដានមិនជ្រៅជាងស្នាមជើងរបស់មនុស្ស នៅលើដីដែលវាបានឆ្លងកាត់ ហើយវាគឺជាកំពូលគ្រឿងចក្រដែលទាញយករ៉ែធ្យូងខ្ចី ជាការងារដែលមិនដូចគ្រឿងចក្រដទៃ។

បណ្ឌិតផ្នែកបច្ចេកទេសជីវសាស្ត្រនៃសាកលវិទ្យាល័យ McMaster លោក Thomas Adams ឱ្យដឹងថា Bagger ២៩៣ គឺជាសត្វចម្លែក អាចទាញយក និងផ្លាស់ទីរ៉ែជាង ២០០,០០០ តោន ជារៀងរាល់ថ្ងៃ ដែលប្រហែលនឹង ២,៥០០ គីឡូក្រាម/វិនាទី។ BWE គឺជាគ្រឿងចក្រសំខាន់បំផុត ដើម្បីរក្សាដំណើរការរបស់បណ្ដារោងចក្រប្រើធ្យូងថ្ម។ មិនមានវា បណ្ដាប្រទេសអាចធ្លាក់ទៅក្នុងសភាពងងឹត។

ធ្យូងខ្ចី លីកនីត (lignite coal) ក៏ត្រូវបានគេហៅថា ធ្យូងប្រផេះ ដែលជាប្រភេទធ្យូងថ្មត្រូវបានប្រើប្រាស់នៅក្នុងរោងចក្រឧស្សហកម្មនានា។ ធ្យូងប្រភេទនេះតែងស្ថិតនៅជ្រៅក្រោមដី និងថ្ម ដូច្នេះមានតែគ្រឿងចក្រដូច Bagger ២៩៣ ប៉ុណ្ណោះ ទើបអាចទាញយកវាបាន៕

April 12, 2022

តំណាងរាស្ត្រជាង ១០០ រូប លាលែងពីតំណែង ដើម្បីប្រឆាំងនឹងនាយករដ្ឋមន្ត្រីថ្មីរបស់ ប៉ាគីស្ថាន

តំណាងរាស្ត្រជាង ១០០ រូប របស់ ប្រទេសប៉ាគីស្ថាន បានលាលែងពីតំណែងជាបន្តបន្ទាប់ ក្នុងបំណងគាំទ្រចំពោះ អតីតនាយករដ្ឋមន្ត្រី Imran Khan ក្រោយពីនាយករដ្ឋមន្ត្រីថ្មី Shehbaz Sharif ចូលកាន់អំណាច។

សភាប៉ាគីស្ថាន កាលពីថ្ងៃទី ១១ មេសា បានបោះឆ្នោតជ្រើសរើសលោក Shehbaz Sharif ឱ្យធ្វើជានាយករដ្ឋមន្ត្រី ជំនួសលោក Imran Khan ដែលត្រូវបានទម្លាក់ពីតំណែងមុននោះ។

លោក Shehbaz Sharif ទទួលបានសំឡេងគាំទ្រពីសំណាក់តំណាងរាស្ត្រ ១៧៤/៣៤២ នាក់។ លោក Sharif នឹងបង្កើតរដ្ឋាភិបាលថ្មី ដែលនឹងចប់អាណត្តិនៅក្នុងខែសីហា ២០២៣ នៅពេលការបោះឆ្នោតសកលត្រូវបានធ្វើឡើង។

នាយករដ្ឋមន្ត្រីប៉ាគីស្ថាន លោក Imran Khan ដែលត្រូវបានទម្លាក់ពីតំណែងនាពេលថ្មីៗនេះ

លោក Shehbaz Sharif (៧១ ឆ្នាំ) គឺជាប្រធានបក្សប្រឆាំង PML-N និងជាប្អូនប្រុសរបស់លោក Nawaz Sharif ដែលធ្លាប់កាន់តំណែងនាយករដ្ឋមន្ត្រីប៉ាគីស្ថាន បាន ៣ លើក។ លោក Shehbaz Sharif ធ្លាប់បានកាន់តំណែងជាអភិបាលខេត្ត Punjab ជាស្រុកកំណើតរបស់ត្រកូល Sharif ជាច្រើនលើក។

ខុសពីបងប្រុសរបស់ខ្លួន លោក Shehbaz Sharif មានទំនាក់ទំនងជិតស្និទ្ធជាមួយកងទ័ព ដែលជាអ្នកគ្រប់គ្រងគោលនយោបាយការពារជាតិ និងការបរទេស នៅប្រទេសដែលមានអាវុធនុយក្លេអែរមួយនេះ។

កាលពីនៅជាអភិបាលខេត្ត Punjab លោក Shehbaz Sharif ល្បីឈ្មោះខ្លាំង ទាក់ទងនឹងរបៀបដឹកនាំផ្ទាល់ និង «អាចធ្វើបាន» គ្រប់កិច្ចការ។ លោកធ្លាប់សហការយ៉ាងជិតស្និទ្ធជាមួយភាគីចិន នៅក្នុងបណ្ដាគម្រោងដែលវិនិយោគដោយ ទីក្រុងប៉េកាំង។

April 12, 2022

រុស្ស៊ី និយាយថា យុទ្ធនាការយោធានៅ អ៊ុយក្រែន គឺដើម្បីបញ្ចប់សណ្ដាប់ធ្នាប់ពិភពលោករបស់ អាម៉េរិក

រដ្ឋមន្ត្រីការបរទេសរុស្ស៊ី Sergey Lavrov ថ្មីៗនេះបាននិយាយថា យុទ្ធនាការយោធារបស់ រុស្ស៊ី នៅ អ៊ុយក្រែន នេះ គឺជាការចាំបាច់ដើម្បីបញ្ចប់សណ្ដាប់ធ្នាប់ពិភពលោកដែលគ្រប់គ្រងដោយ សហរដ្ឋអាម៉េរិក បន្ទាប់ពី ទីក្រុងវ៉ាស៊ីងតោន បង្ហើបឱ្យដឹងអំពីគោលដៅរបស់ខ្លួនក្នុងការជួយដល់ កងទ័ពអ៊ុយក្រែន ទប់ទល់នឹង កងទ័ពរុស្ស៊ី។

«យុទ្ធនាការយោធាពិសេសរបស់យើង ចាំបាច់ត្រូវតែកើតឡើងដើម្បីបញ្ចប់ស្ថានការណ៍ដែល ណាតូ (NATO) ពង្រីកខ្លួន និងបំណងដែលមិនមានការខ្មាសអៀនរបស់ អាម៉េរិក និងសម្ព័ន្ធមិត្តលោកខាងលិច ដែលចង់ឆ្ពោះទៅកាន់ការគ្រប់គ្រងវេទិកាអន្តរជាតិ» លោក Lavrov ប្រាប់ទូរទស្សន៍ Rossiya 24 កាលពីថ្ងៃទី ១១ មេសា។

រដ្ឋមន្ត្រីការបរទេសរុស្ស៊ី យល់ថា ស្ថានការណ៍គ្រប់គ្រងនេះត្រូវបានកសាងឡើងដោយការបំពានច្បាប់អន្តរជាតិ និងមាត្រាច្បាប់មួយចំនួនផ្សេងទៀត។

លោក Lavrov បញ្ជាក់ថា រុស្ស៊ី ស្ថិតក្នុងចំណោមប្រទេសដែលមិនយល់ស្របចំពោះបំណងរបស់ ទីក្រុងវ៉ាស៊ីងតោន ហើយថា នឹងមិនអនុញ្ញាតឱ្យបណ្ដាប្រទេសលោកខាងលិច ទាត់ចោលការព្រួយបារម្ភផ្នែកសន្តិសុខស្របច្បាប់របស់ រុស្ស៊ី ជាដាច់ខាត។

ការលើកឡើងរបស់ រដ្ឋមន្ត្រីការបរទេសរុស្ស៊ី ខាងលើ ត្រូវបានធ្វើឡើងមួយថ្ងៃក្រោយពី ទីប្រឹក្សាសន្តិសុខជាតិអាម៉េរិក Jake Sullivan ឱ្យដឹងថា ទីក្រុងវ៉ាស៊ីងតោន កំពុងប្រឹងប្រែងឆ្លើយតបនឹងតម្រូវការសព្វាវុធពីសំណាក់ ទីក្រុងកៀវ ដើម្បីជួយដល់កងទ័ពរបស់ អ៊ុយក្រែន ទប់ទល់នឹង កងទ័ពរបស់ រុស្ស៊ី និងដើម្បីឆ្លើយតបទៅនឹងគោលដៅរបស់ អាម៉េរិក ដែលសំដៅលើ ទីក្រុងមូស្គូ។

April 12, 2022

ចិន បកស្រាយពីមូលហេតុដែលបញ្ជូនក្រុមយន្តហោះដឹកទំនិញយោធាទៅកាន់អឺរ៉ុប

មន្ត្រីរដ្ឋាភិបាល របស់ ចិន និយាយថា «បណ្ដាយន្តហោះកំពុងដឹកទំនិញផ្នែកយោធាធម្មតា» នៅពេលនិយាយដល់រឿងក្រុមយន្តហោះបន្តកន្ទុយគ្នា ហោះទៅកាន់ ប្រទេសស៊ែប៊ី (Serbia)។

«ប្រទេសចិន បានប្រមូលយន្តហោះដឹកទំនិញដើម្បីជញ្ជូនសម្ភារៈយោធាធម្មតាក្នុងរយៈពេលប៉ុន្មានថ្ងៃកន្លង ដើម្បីអនុវត្តផែនការសហការទ្វេភាគី។ សកម្មភាពនេះមិនមែនសំដៅលើភាគីទី ៣ និងមិនជាប់ទាក់ទងទៅនឹងស្ថានការណ៍បច្ចុប្បន្នឡើយ» អ្នកនាំពាក្យរបស់ ក្រសួងការបរទេសចិន Zhao Lijian បកស្រាយប្រាប់អ្នកយកព័ត៌មានកាលពីម្សិលមិញដូច្នេះ។

មន្ត្រីចិន មិនបានទទួលស្គាល់ ហើយក៏មិនបានបដិសេធនោះដែរ ចំពោះព័ត៌មានដែលថា ប្រទេសនេះកំពុងប្រគល់ប្រព័ន្ធការពារដែនអាកាស FK-៣ ឱ្យ ស៊ែប៊ី។

កាសែត Global Times របស់ទីភ្នាក់ងារសារព័ត៌មាន People’s Daily ដែលជាអង្គភាពនាំពាក្យរបស់បក្សកុម្មុយនិស្តចិន មុននោះបានឱ្យដឹងថា បណ្ដាយន្តហោះ Y-២០ កំពុងដឹកជញ្ជូនប្រព័ន្ធ FK-៣ ទៅកាន់ ស៊ែប៊ី។

FK-៣ គឺជាកំណែនាំចេញនៃប្រព័ន្ធការពារដែនអាកាសរយៈចម្ងាយឆ្ងាយ HQ-២២ ដែលផលិតដោយ ប្រទេសចិន។ ប្រព័ន្ធនីមួយៗមានយានបាញ់គ្រាប់មីស៊ីលចំនួន ៣ គ្រឿង, រ៉ាដា ១ គ្រឿង, ទីបញ្ជាការ ១ រួមនឹងយានជំនួយផ្នែកបច្ចេកទេសជាច្រើនទៀត។

ក្រុមអ្នកជំនាញផ្នែកយោធាចិន ឱ្យដឹងថា ប្រទេសស៊ែប៊ី បានបញ្ជាទិញប្រព័ន្ធ FK-៣ ចំនួន ៣ ឈុត ហើយត្រូវការយន្តហោះដឹកទំនិញ Y-២០ ចំនួន ១២ គ្រឿង ទើបអាចដឹកអស់សព្វាវុធនេះ។

ប្រធានាធិបតី Aleksandar Vucic របស់ ប្រទេសស៊ែប៊ី កាលពីសប្ដាហ៍កន្លងប្រកាសថា នឹងបង្ហាញ «មោទកភាពថ្មីបំផុត» របស់កងទ័ពប្រទេសនេះ នៅថ្ងៃទី ១២ ឬ ១៣ មេសា។ លោកនិយាយថា ប្រទេសចិន និង ស៊ែប៊ី បានឯកភាពគ្នាក្នុងការទិញដូរប្រព័ន្ធការពារដែនអាកាស FK-៣ តាំងពីឆ្នាំ ២០១៩ ប៉ុន្តែ មិនបានបញ្ជាក់ថា សព្វាវុធទាំងនេះបានមកដល់ ស៊ែប៊ី ហើយ ឬនៅ៕

April 12, 2022

មីស៊ីលល្បឿនលឿនជាងសំឡេង ១២ ដង របស់ រុស្ស៊ី វាយប្រហារទីបញ្ជាការរបស់ អ៊ុយក្រែន

កងទ័ពរុស្ស៊ី បានវាយប្រហារទៅលើទីបញ្ជាការនៃអង្គភាពយោធាមួយក្នុងតំបន់ភាគខាងកើត Donbass ដោយប្រើប្រាស់មីស៊ីលល្បឿនលឿនជាងសំឡេង ១២ ដង Kinzhal។

«ប្រព័ន្ធមីស៊ីល Kinzhal បានកម្ទេចទីបញ្ជាការក្រោមដីដែលត្រូវបានការពារយ៉ាងរឹងមាំ នៃអង្គភាពយោធាមួយរបស់ អ៊ុយក្រែន នៅក្បែរភូមិ Chasov Yar ក្នុងតំបន់ Donbass កាលពីល្ងាចថ្ងៃទី ១១ មេសា» អ្នកនាំពាក្យរបស់ក្រសួងការពារជាតិរុស្ស៊ី Igor Konashenkov ឱ្យដឹងដូច្នេះ។

នេះគឺជាលើកទី ៣ ហើយ ដែល កងទ័ពរុស្ស៊ី ប្រើប្រាស់មីស៊ីលល្បឿនលឿនជាងសំឡេង ១២ ដង Kinzhal នៅក្នុងសង្គ្រាមឈ្លានពានរបស់ខ្លួននៅ អ៊ុយក្រែន។

Igor Konashenkov ក៏បានប្រាប់ថា មីស៊ីលដែលបំពាក់ប្រព័ន្ធនាំផ្លូវ បាញ់ពីយន្តហោះរបស់ រុស្ស៊ី ក៏បានបំផ្លាញទម្រកាំជ្រួចផ្លោង Tochk-U មួយកន្លែង និងទម្រកាំជ្រួចហ្វូងមានប្រព័ន្ធនាំផ្លូវដែលលាក់ក្រោមដីចំនួន ២ នៅតំបន់ Selidovo ភាគខាងកើត Donetsk។ មូលដ្ឋានរបស់ក្រុម Right Sector ក្បែរតំបន់ Novogrodovka ខេត្ត Donetsk ក៏ត្រូវបានវាយប្រហារពីអាកាស។

ក្រសួងការពារជាតិរបស់ អ៊ុយក្រែន មិនទាន់មានប្រតិកម្មអ្វីទៅនឹងព័ត៌មានខាងលើនៅឡើយ។

April 12, 2022

ធ្លាក់យន្តហោះធុនតូចមួយគ្រឿងនៅ ប្រទេសបារាំង បណ្ដាលឱ្យមនុស្សច្រើននាក់ត្រូវស្លាប់

សារព័ត៌មានបារាំង កាលពីថ្ងៃទី ១០ មេសា បានរាយការណ៍ថា យន្តហោះធុនស្រាល ១ គ្រឿង បានធ្លាក់នៅក្បែរព្រលានយន្តហោះ Saint-Brieuc ក្នុងតំបន់ Brittany ភាគពាយព្យនៃ ប្រទេសបារាំង បណ្ដាលឱ្យមនុស្សចំនួន ៣ នាក់ ត្រូវបាត់បង់ជីវិត។

យោងតាមអង្គភាពគ្រប់គ្រងអគ្គិភ័យក្នុងតំបន់ ជនរងគ្រោះដែលបានស្លាប់ក្នុងហេតុការណ៍នេះ រួមមាន អ្នកបើកបរម្នាក់ដែលមានអាយុ ៦២ ឆ្នាំ និងភ្ញៀវ ២ នាក់ ដែលមានអាយុប្រហែល ២០ ឆ្នាំ។

ចំណែកព័ត៌មានពី France Bleu ឱ្យដឹងថា អ្នកបើកបរបានរកវិធីចុះចតបន្ទាន់បន្ទាប់ពីបានហោះឡើងភ្លាម ប៉ុន្តែមិនបានសម្រេច ហើយយន្តហោះក៏ធ្លាក់ក្នុងតំបន់ព្រៃ ក្បែរអាកាសយានដ្ឋាន Saint-Brieuc។

សមត្ថកិច្ចក្នុងតំបន់ខាងលើ បានបើកការស៊ើបអង្កេតដើម្បីរកមូលហេតុដែលនាំឱ្យកើតមានឧបទ្ទវហេតុនេះ។

April 11, 2022

ក្រុមតាវិទូរកឃើញកាឡាក់ស៊ី នៅឆ្ងាយបំផុត និង «ផលិត» ព្រះអាទិត្យបានជាង ១០០ ដួង ជារៀងរាល់ឆ្នាំ

កាឡាក់ស៊ី HD១ អាចមានប្រហោងខ្មៅមួយដែលមានម៉ាសធ្ងន់ជាង ១០០ លានដង ធៀបនឹងព្រះអាទិត្យរបស់មនុស្ស ឬបណ្ដាផ្កាយចំណាស់បំផុតក្នុងចក្រវាល។

នេះអាចជាកាឡាក់ស៊ីដែលស្ថិតនៅចម្ងាយប្រហែល ១៣.៥ ពាន់លានឆ្នាំពន្លឺពីផែនដី ពោលគឺឆ្ងាយជាង ១០០ លានឆ្នាំពន្លឺ បើធៀបនឹងកាឡាក់ស៊ី GN-z១១ ដែលកំពុងកាន់កាប់ឯតទគ្គកម្មបច្ចុប្បន្ន។ ការរកឃើញខាងលើនេះត្រូវបានចុះផ្សាយលើទស្សនាវដ្ដី Astrophysical Journal កាលពីថ្ងៃទី ៧ មេសា។

HD១ ដែលមានសភាពភ្លឺខ្លាំងក្រោមពន្លឺពណ៌អ៊ុលត្រាវីយូឡេ (UV) បង្ហាញថា ដំណើរការនៃថាមពលប្រព្រឹត្តទៅក្នុងកម្រិតខ្ពស់ នៅក្នុងកាឡាក់ស៊ីនេះ។ នៅពេលធ្វើការសិក្សាស៊ីជម្រៅ ក្រុមតារាវិទូរកឃើញថា HD១ បង្កើតបានផ្កាយរហូតដល់ជាង ១០០ ដួង/ឆ្នាំ លឿនជាង ១០ ដង ធៀបនឹងបណ្ដាកាឡាក់ស៊ីបង្កើតផ្កាយរហ័ស (Starburst Galaxy) នានា។

ក្រុមអ្នកវិទ្យាសាស្ត្របានលើកជាសម្មតិកម្មចំនួន ២ ដើម្បីបកស្រាយអំពីថាមពលមហាសាលដែលបញ្ចេញពី HD។ ទីមួយ កាឡាក់ស៊ីនេះអាចមានប្រហោងខ្មៅដែលមានម៉ាសធ្ងន់ជាងព្រះអាទិត្យ ១០០ លានដង នៅចំកណ្ដាល។ បើដូច្នេះមែន នេះនឹងជាប្រហោងខ្មៅវ័យចំណាស់បំផុតជាមួយនឹងទំហំប៉ុននេះ។ ទីពីរ HD១ អាចមានផ្កាយមួយចំនួនដែលកកើតឡើងមុនគេបង្អស់ក្នុងចក្រវាល។

ក្រុមតារាវិទូខាងលើ បានរកឃើញ HD១ នៅពេលសង្កេតរយៈពេល ១,២០០ ម៉ោង ដោយប្រើកែវយឹត Subaru នៅ Hawaii, VISTA នៅ ស៊ីលី, Infrared នៅ អង់គ្លេស និងតេឡេស្កុបអវកាស Spitzer ដែលបច្ចុប្បន្នបានចូលនិវត្តន៍របស់ ណាសា ហើយក្រោយមកក៏កំណត់បានរយៈចម្ងាយដោយប្រើប្រាស់កែវយឹត ALMA នៅ ស៊ីលី។ ក្រុមអ្នកវិទ្យាសាស្ត្រនឹងបន្តតាមដាន HD១ ដោយប្រើប្រាស់កែវយឹតអវកាស James Webb នាពេលដ៏ខ្លីខាងមុខ ដើម្បីបញ្ជាក់បន្ថែមចំពោះការគណនារបស់ពួកគេ៕

April 9, 2022

សហភាពអឺរ៉ុប ពន្លឿនដំណើរការពិនិត្យលទ្ធភាពទទួលយក អ៊ុយក្រែន ជាសមាជិក

សហភាពអឺរ៉ុប (EU) បានប្រគល់ឱ្យ អ៊ុយក្រែន នូវកម្រងសំណួរសម្រាប់កិច្ចពិភាក្សានានាស្ដីពីការចូលរួមរបស់ អ៊ុយក្រែន នៅក្នុងអង្គការនេះ ដែលនេះគឺជាដំណាក់កាលសំខាន់សម្រាប់ការពិនិត្យលទ្ធភាពបញ្ចូល អ៊ុយក្រែន ទៅក្នុងសហភាព។

ប្រធានគណៈកម្មការអឺរ៉ុប Ursula von der Leyen បានប្រគល់សំបុត្រមួយច្បាប់ឱ្យ ប្រធានាធិបតីអ៊ុយក្រែន លោក ហ្សេឡែនស្គី នៅក្នុងជំនួបនា រដ្ឋធានីកៀវ កាលពីថ្ងៃទី ៨ មេសា។ លោកស្រីឱ្យដឹងថា ក្នុងសំបុត្រនោះមាន «កម្រងសំណួរដែលជាមូលដ្ឋានសម្រាប់កិច្ចពិភាក្សាក្នុងប៉ុន្មានសប្ដាហ៍ខាងមុខ» ស្ដីពីការទទួលយក អ៊ុយក្រែន របស់ EU។

«នោះគឺជាទីចាប់ផ្ដើមឆ្ពោះទៅកាន់ អឺរ៉ុប និង EU របស់អ្នក» លោកស្រី von der Leyen ថ្លែងដូច្នេះ និងបង្ហាញអំពីក្ដីសង្ឃឹមដែលថា អាចសហការជិតស្និទ្ធជាមួយ ប្រធានាធិបតីអ៊ុយក្រែន ដើម្បីសម្រេចបាននូវកម្រងសំណួរក្នុងប៉ុន្មានសប្ដាហ៍ទៀត។ ប្រធានាធិបតី ហ្សេឡែនស្គី សើច និងប្រាប់ថា អ៊ុយក្រែន អាចសម្រេចបាននូវកម្រងសំណួរនេះក្នុងរយៈពេល ១ សប្ដាហ៍។

មេដឹកនាំ EU ក៏បានរំលឹកអំពីទណ្ឌកម្មសំដៅលើ រុស្ស៊ី ផងដែរ។ លោកស្រីថា «រុស្ស៊ី នឹងធ្លាក់ទៅក្នុងវិបត្តិសេដ្ឋកិច្ច ហិរញ្ញវត្ថុ និងបច្ចេកវិទ្យា ខណៈដែល អ៊ុយក្រែន កំពុងឆ្ពោះទៅកាន់អនាគតនៅ អឺរ៉ុប។ នោះគឺជាអ្វីដែលខ្ញុំមើលឃើញ»។

ប្រធាន EU រួមនឹងមន្ត្រីទទួលបន្ទុកគោលនយោបាយកិច្ចការបរទេសរបស់ EU លោក Josep Borrell បានធ្វើទស្សនកិច្ច ប្រទេសអ៊ុយក្រែន កាលពីថ្ងៃទី ៨ មេសា ជាដំណើរទស្សនកិច្ចជាន់ខ្ពស់លើកទីពីររបស់មន្ត្រី EU ទៅកាន់ប្រទេសនេះ ចាប់តាំងពី រុស្ស៊ី បើកការឈ្លានពានលើ អ៊ុយក្រែន កាលពីថ្ងៃទី ២៤ កុម្ភៈ៕

April 9, 2022

សង្គ្រាមនៅ អ៊ុយក្រែន ថ្ងៃទី ៤៤៖ ចំណតរថភ្លើងត្រូវគ្រាប់រ៉ុក្កែត ធ្វើឱ្យមនុស្សរាប់សិបនាក់ត្រូវស្លាប់

អាជ្ញាធរអ៊ុយក្រែន ប្រកាសថា ចំណតរថភ្លើង Kramatorsk បានរងគ្រាប់រ៉ុក្កែត បណ្ដាលឱ្យមានមនុស្សស្លាប់ ៥០ នាក់ ប៉ុន្តែ រុស្ស៊ី ប្រកាសថា មិនមែនជាអំពើរបស់ខ្លួន។

ប្រធានាធិបតីអ៊ុយក្រែន លោក ហ្សេឡែនស្គី កាលពីថ្ងៃទី ៨ មេសា បានចោទថា កងកម្លាំងរុស្ស៊ី បានបាញ់កាំជ្រួចផ្លោង Tochka-U ចំនួន ២ គ្រាប់ សំដៅលើចំណតរថភ្លើង Kramatorsk នៅទីក្រុង Kramatorsk របស់ខេត្ត Donetsk ភាគខាងកើតនៃ ប្រទេសអ៊ុយក្រែន។

ក្រុមមន្ត្រីក្នុងតំបន់ខាងលើឱ្យដឹងថា មនុស្ស ៥០ នាក់បានស្លាប់ និងអ្នករងរបួសច្រើនរហូតដល់ថ្នាក់ធ្វើឱ្យបណ្ដាមន្ទីរពេទ្យក្នុងតំបន់ អស់គ្រែទំនេរ បន្ទាប់ពីរងការវាយប្រហារពីកាំជ្រួចផ្លោងនោះ។

ក៏ប៉ុន្តែ វិមានក្រឹមឡាំង បានច្រានចោលការចោទប្រកាន់ពី អ៊ុយក្រែន ដោយថា កងទ័ពរុស្ស៊ី ពុំមានផែនការធ្វើសង្គ្រាមណាមួយនៅ Kramatorsk ក្នុងថ្ងៃទី ៨ មេសា។ ចំណែកក្រសួងការពារជាតិរុស្ស៊ី ក៏បានប្រកាសដូចគ្នានេះដែរ។

ឧត្តមស្នងការនៃអង្គការសហប្រជាជាតិទទួលបន្ទុកជនភៀសខ្លួន (UNHCR) ឱ្យដឹងថា មនុស្សជាង ៤.៨៣ លាននាក់ បានចាកចេញពី ប្រទេសអ៊ុយក្រែន ក្នុងពេលសង្គ្រាមផ្ទុះឡើង។ មនុស្សជាច្រើនបានចូលទៅកាន់ទឹកដីប្រទេសក្បែរខាង មុននឹងទៅកាន់បណ្ដាប្រទេសផ្សេងទៀតនៅ អឺរ៉ុប។

ក្នុងចំណោមជនភៀសខ្លួនខាងលើ មានជិត ២.៥៤ លាននាក់ បានទៅកាន់ ប្រទេសប៉ូឡូញ, ជាង ៦៧១ ពាន់នាក់ទៅកាន់ រូម៉ានី, ជាង ៤០០ ពាន់នាក់ ទៅកាន់ ហុងគ្រី និងជាង ៤០០ ពាន់នាក់ ទៅកាន់ ម៉ុលដាវី។ ក្រៅពីនេះ ក៏មានជាង ៣៧៣ ពាន់នាក់ បានទៅកាន់ ប្រទេសរុស្ស៊ី។

April 9, 2022

Category: អន្តរជាតិ