អន្តរជាតិ - La Reine Media

បាតុភូត ឡា នីណា (La Nina) ដែលបង្កភ្លៀង និងព្យុះច្រើនជាងធម្មតា អាចអូសបន្លាយដល់ឆ្នាំ ២០២៣

វដ្ដអាកាសធាតុ ឡា នីណា ដែលកំពុងជះឥទ្ធិពលដល់សីតុណ្ហភាពសកល និងធ្វើឱ្យអាកាសធាតុមិនល្អកើតឡើងញឹកញាប់ជាងមុន នឹងអូសបន្លាយច្រើនខែទៀត ឬអាចមានរហូតដល់ឆ្នាំ ២០២៣។

ខាងលើនេះគឺជាការព្រមានរបស់ អង្គការឧតុនិយមពិភពលោក របស់ អង្ការសហប្រជាជាតិ (WMO) ដែលត្រូវបានលើកឡើងកាលពីថ្ងៃទី ១០ មិថុនា។

ឡា នីណា (La Nina) គឺជាបាតុភូតផ្ទៃសមុទ្រនៅចំកណ្ដាល និងភាគខាងកើតខ្សែអេក្វាទ័រ នៅតំបន់ប៉ាស៊ីហ្វិក ចុះត្រជាក់ជាងធម្មតា ដែលកើតឡើងក្រោយរយៈពី ២ ទៅ ៧ ឆ្នាំ។ ឡា នីណា តែងចាប់ផ្ដើមកើតមានឡើងពីខែមីនា ដល់ខែមិថុនា ជារៀងរាល់ឆ្នាំ ប៉ុន្តែ ដំណាក់កាលដែលវាបង្កផលប៉ះពាល់ធ្ងន់ធ្ងរបំផុតគឺនៅចុងឆ្នាំ រហូតដល់ខែកុម្ភៈឆ្នាំបន្ទាប់។ នៅ អាស៊ីអាគ្នេយ៍ បាតុភូតនេះតែងធ្វើឱ្យមានភ្លៀងធ្លាក់លើសពីកម្រិតមធ្យម និងទឹកជំនន់។

WMO បានឱ្យដឹងថា បាតុភូត ឡា នីណា មានលទ្ធភាពប្រមាណ ៧០% ក្នុងការអូសបន្លាយពេលរហូតដល់ខែសីហាខាងមុខ។ ការព្យាករមួយចំនួនថែមទាំងបានបង្ហាញថា ឡា នីណា អាចកើតមានរហូតដល់ឆ្នាំ ២០២។

បើសិនជាបាតុភូតនេះកើតឡើងដូចការព្យាករខាងលើមែន នោះវានឹងក្លាយជាវដ្ដ ឡា នីណា ដែលអូសបន្លាយពេល ៣ ឆ្នាំជាបន្តបន្ទាប់លើកទី ៣ នៅ អឌ្ឍគោលខាងជើង ដែលបានកត់ត្រាតាំងពីឆ្នាំ ១៩៥០។

បាតុភូត ឡា នីណា មានឥទ្ធិពលទ្រង់ទ្រាយធំដល់អាកាសធាតុនៅទូទាំងពិភពលោក បង្កជាឥទ្ធិពលផ្ទុយពី អែល នីណូ ( EI Nino) ដែលជាបាតុភូតផ្ទៃសមុទ្រឡើងក្ដៅជាងធម្មតា ប៉ះពាល់ដល់សីតុណ្ហភាពសកល៕

June 13, 2022

យន្តហោះ ៣ គ្រឿង ធ្លាក់ជាបន្តបន្ទាប់ ទ័ពជើងទឹកអាម៉េរិក ប្រកាសផ្អាកសកម្មភាពហោះហើរ

ទ័ពជើងទឹករបស់ សហរដ្ឋអាម៉េរិក ប្រកាសផ្អាកបេសកកម្មហោះហើរមិនចាំបាច់ដើម្បីត្រួតពិនិត្យ បន្ទាប់ពីយន្តហោះ ៣ គ្រឿងបានធ្លាក់ជាបន្តបន្ទាប់ បណ្ដាលឱ្យទាហាន ៦ នាក់បាត់បង់ជីវិត ក្នុងអំឡុងពេលតែមួយសប្ដាហ៍ប៉ុណ្ណោះ។

«គ្រោះថ្នាក់នានាដែលទាក់ទងនឹងយន្តហោះរបស់ទ័ពជើងទឹក និងកងម៉ារីន នាពេលថ្មីៗនេះ ធ្វើឱ្យបញ្ជាការដ្ឋានទ័ពអាកាសនៃកងទ័ពជើងទឹក ត្រូវប្រកាសផ្អាកសកម្មភាពហោះហើរនៅគ្រប់អង្គភាពក្នុងថ្ងៃទី ១៣ មិថុនា។ ប្រការនេះអនុញ្ញាតឱ្យមានការត្រួតពិនិត្យវាយតម្លៃហានិភ័យ ក៏ដូចជាបង្កើនការហ្វឹកហាត់ក្នុងការបង្ការកំហុសឆ្គង» ទ័ពជើងទឹកអាម៉េរិក បានប្រកាសដូច្នេះកាលពីថ្ងៃទី ១១ មិថុនា។

ការសម្រេចរបស់ ទ័ពជើងទឹកអាម៉េរិក ខាងលើ ត្រូវបានធ្វើឡើងបន្ទាប់ពីករណីមានគ្រោះថ្នាក់ធ្លាក់យន្តហោះចំនួន ៣ លើក នៅក្នុងអំឡុងពេលតែមួយសប្ដាហ៍។

កាលពីថ្ងៃទី ៣ មិថុនា អ្នកបើកបរយន្តហោះម្នាក់ បានស្លាប់នៅក្នុងករណីធ្លាក់យន្តហោះចម្បាំងពហុមុខងារ F/A-១៨E Super Hornet នៅឯសមុទ្រខ្សាច់ Mojave ក្នុងរដ្ឋ California។ ៥ ថ្ងៃក្រោយមក ឧទ្ធម្ភាគចក្រ MV-២២B ១ គ្រឿងរបស់ កងម៉ារីកអាម៉េរិក ក៏បានធ្លាក់នៅឯ Glamis រដ្ឋ California បណ្ដាលឱ្យទាហាន ៥ នាក់បាត់បង់ជីវិត។

ថ្ងៃទី ៩ មិថុនា ឧទ្ធម្ភាគចក្រ MH-៦០S ១ គ្រឿងរបស់ ទ័ពជើងទឹកអាម៉េរិក ក៏បានធ្លាក់នៅក្បែរមូលដ្ឋាន El Centro។ សមាជិកក្រុមហោះហើរដែលមានគ្នា ៤ នាក់ បានរួចពីការស្លាប់ ក្នុងនោះមានម្នាក់រងរបួស៕

June 13, 2022

(វីដេអូ)-រដ្ឋមន្ត្រីក្រសួងការពារជាតិហ្វ៊ីលីពីន ដួលសន្លប់នៅក្នុងព្រឹត្តិការណ៍នៃទិវាបុណ្យឯករាជ្យ

រដ្ឋមន្ត្រីក្រសួងការពារជាតិ Lorenzana ដួលសន្លប់ក្នុងព្រឹត្តិការណ៍នៃទិវាឯករាជ្យរបស់ ប្រទេសហ្វ៊ីលីពីន ប៉ុន្តែ មានការបញ្ជាក់ថា សុខភាពបានប្រសើរឡើងវិញហើយ។

វីដេអូ និងរូបភាពដែលត្រូវបានចែករំលែកលើបណ្ដាញសង្គមបានបង្ហាញថា រដ្ឋមន្ត្រីក្រសួងការពារជាតិហ្វ៊ីលីពីន Delfin Lorenzana ទំនងជាបាត់បង់ស្មារតី និងដួលទៅលើដីនៅក្នុងព្រឹត្តិការណ៍ទិវាឯករាជ្យ នៅឯឧទ្យាន Rizal ក្នុង រដ្ឋធានីម៉ានីល កាលពីព្រឹកថ្ងៃទី ១២ មិថុនា។

អ្នកនាំពាក្យនៃក្រសួងការពារជាតិហ្វ៊ីលីពីន Arsenio Andolong បានបញ្ជាក់ថា លោក Lorenzana បានដួលសន្លប់នៅក្នុងព្រឹត្តិការណ៍ខាងលើ ប៉ុន្តែ ថា ស្ថានភាពសុខភាពបានប្រសើរឡើងវិញហើយ និងត្រូវបន្តសម្រាកយកកម្លាំង។

រដ្ឋមន្ត្រីក្រសួងការពារជាតិ Lorenzana អាយុ ៧៣ ឆ្នាំ ក៏បានប្រកាសនៅលើទំព័រ Facebook ថា លោកបានប្រសើរឡើងវិញ និងត្រូវការសម្រាកយកកម្លាំង ដោយលទ្ធផលនៃការពិនិត្យសុខភាពមុននោះបង្ហាញថា សុខភាពរបស់លោកនៅតែធម្មតា។ «កិច្ចប្រជុំជាបន្តបន្ទាប់មួយចំនួនស្ដីពីសន្តិសុខអន្តរជាតិកាលពីពេលថ្មីៗនេះ ប្រហែលជាបានប៉ះពាល់ដល់សុខភាពរបស់ខ្ញុំ។ សីតុណ្ហភាពព្រឹកនេះក៏ក្ដៅខ្លាំង» លោក Lorenzana បានសរសេរដូច្នេះ អមជាមួយនឹងរូបថតញញឹមនៅលើគ្រែក្នុងមន្ទីរពេទ្យ។

រដ្ឋមន្ត្រីក្រសួងការពារជាតិ Lorenzana បានត្រលប់មកពី សិង្ហបុរី កាលពីព្រឹកថ្ងៃទី ១២ មិថុនា បន្ទាប់ពីបានចូលរួមព្រឹត្តិការណ៍សន្ទនា Shagri-La លើកទី ១៩ និងមានជំនួបជាមួយក្រុមមេដឹកនាំបរទេសដែលជាសមភាគីរបស់លោក។

June 13, 2022

អាម៉េរិក ដកហូតវិធានការធ្វើតេស្តកូវីដ-១៩ ចំពោះភ្ញៀវបរទេស

មន្ត្រីជាន់ខ្ពស់អាម៉េរិក មួយរូប កាលពីថ្ងៃទី ១០ មិថុនា បានឱ្យដឹងថា សហរដ្ឋអាម៉េរិក នឹងលែងធ្វើតេស្តកូវីដ-១៩ ចំពោះអ្នកដំណើរពីបរទេស ចាប់ពីថ្ងៃទី ១២ មិថុនាតទៅ។

មន្ត្រីខាងលើបញ្ជាក់ថា មជ្ឈមណ្ឌលគ្រប់គ្រង និងទប់ស្កាត់ជំងឺឆ្លងអាម៉េរិក ដាក់ចេញនូវគោលការណ៍ខាងលើ គឺយោងទៅលើមូលដ្ឋានវិទ្យាសាស្ត្រ និងទិន្នន័យដែលបង្ហាញថា ការធ្វើតេស្តនៅពេលនេះ លែងចាំបាច់ទៀតហើយ។

ការកំណត់នេះក៏ត្រូវបានលើកឡើងបន្ទាប់ពី សហរដ្ឋអាម៉េរិក សម្រេចបានលទ្ធផលល្អប្រសើរនៅក្នុងការទប់ស្កាត់ជំងឺកូវីដ-១៩ ខណៈដែលមានវ៉ាក់សាំងគ្រប់គ្រាន់ និងមានវិធីព្យាបាលប្រកបដោយប្រសិទ្ធភាព នេះបើតាមមន្ត្រីខាងលើ។

ឥរិយាបថរបស់ សហរដ្ឋអាម៉េរិក នេះ គឺជាសញ្ញាមួយបង្ហាញថា ប្រទេសនេះបានឈានចូលដល់ដំណាក់កាលថ្មីនៃការប្រយុទ្ធប្រឆាំងនឹងកូវីដ-១៩ នៅពេលវិធានការមួយចំនួនដែលអនុវត្តក្នុងអំឡុងការរាតត្បាតរបស់ កូវីដ-១៩ ដែលត្រូវបានចាត់ទុកថាជាវិបត្តិមួយដែលនោះ កំពុងត្រូវបានលុបចោលជាបណ្ដើរ។

June 11, 2022

រុស្ស៊ី ធ្វើសមយុទ្ធយោធានៅសមុទ្របាល់ទិក ទន្ទឹមគ្នានឹង ណាតូ

ក្រសួងការពារជាតិរុស្ស៊ី កាលពីថ្ងៃទី ១០ មិថុនា បានប្រកាសថា បណ្ដានាវាចម្បាំងរបស់ប្រទេសនេះ កំពុងតែធ្វើសមយុទ្ធនៅ សមុទ្របាល់ទិក ស្របពេល ណាតូ ក៏កំពុងធ្វើសមយុទ្ធនៅតំបន់នេះ។

យោងតាម ក្រសួងការពារជាតិរុស្ស៊ី នាវាចម្បាំងលើផ្ទៃទឹក នាវាដឹកជញ្ជូនប្រហែល ៦០ គ្រឿង និងយន្តហោះចម្បាំង ឧទ្ធម្ភាគចក្រចំនួនប្រហែល ៤៥ គ្រឿង រួមនឹង ទាហានរុស្ស៊ី ប្រមាណ ១០,០០០ នាក់ ចូលរួមធ្វើសមយុទ្ធលើកនេះ។ សមយុទ្ធរបស់ កងទ័ពរុស្ស៊ី ផ្ដោតសំខាន់ទៅលើការតាមរកគោលដៅនាវារបស់សត្រូវ បង្កើនសមត្ថភាពការពារដែនអាកាស ប្រឆាំងនាវាចម្បាំង និងប្រឆាំងនាវាមុជទឹក។

កងកម្លាំងជើងគោករបស់ រុស្ស៊ី ក៏ត្រូវបានបញ្ជូនទៅកាន់បណ្ដាទីតាំងដែលបានកំណត់ នៅក្នុងតំបន់ Kaliningrad និងប្រើប្រាស់កាំភ្លើងធំវាយប្រហារគោលដៅ។ សមយុទ្ធរបស់ រុស្ស៊ី នេះ នឹងត្រូវធ្វើឡើងរហូតដល់ថ្ងៃទី ១៩ មិថុនា។

សមយុទ្ធយោធារបស់ រុស្ស៊ី នៅ សមុទ្របាល់ទិក ត្រូវបានធ្វើឡើងចំពេលដែល ១៤ ប្រទេសរបស់ សម្ព័ន្ធមិត្តណាតូ និងដៃគូសហការ ហ្វាំងឡង់ និង ស៊ុយអែត កំពុងចូលរួមសមយុទ្ធយោធានៅក្នុងតំបន់នេះ ចាប់ពីថ្ងៃទី ៥ ដល់ ១៧ មិថុនា ដោយមានការចូលរួមពីនាវាជាង ៤៥ គ្រឿង យន្តហោះ ៧៥ គ្រឿង និងទាហានប្រមាណ ៧,៥០០ នាក់។

June 11, 2022

អ៊ុយក្រែន ដាក់ពង្រាយមីស៊ីលប្រឆាំងនាវាចម្បាំង ផលិតដោយ សហរដ្ឋអាម៉េរិក

រដ្ឋមន្ត្រីក្រសួងការពារជាតិអ៊ុយក្រែន Alexey Reznikov កាលពីម្សិលមិញបានប្រកាសថា កងកម្លាំងប្រដាប់អាវុធរបស់ប្រទេសនេះបានដាក់ពង្រាយមីស៊ីលប្រឆាំងនាវាចម្បាំង Harpoon ដែលផលិតដោយ សហរដ្ឋអាម៉េរិក។

ទីភ្នាក់ងារសារព័ត៌មាន RT បានឱ្យដឹងថា មុននោះ ប្រទេសដាណឺម៉ាក បានប្រកាសថា បានបញ្ជូនអាវុធខាងលើទៅឱ្យ ទីក្រុងកៀវ កាលពីខែឧសភាកន្លងទៅ។ យោងតាមលោក Alexey Reznikov សមត្ថភាពនៃការការពារឆ្នេរសមុទ្ររបស់ អ៊ុយក្រែន បានកើនឡើងមួយកម្រិតទៀតដោយសារប្រព័ន្ធ Harpoon ដ៏មានប្រសិទ្ធភាព។ ប្រព័ន្ធទាំងនេះ បូករួមនឹងមីស៊ីល Neptune ដែលផលិតដោយ អ៊ុយក្រែន បានបង្ខំឱ្យ «ក្រុមនាវាចម្បាំងរបស់សត្រូវ រក្សាគម្លាតដើម្បីជៀសវាងការទទួលលទ្ធផលអាក្រក់ដូចទៅនឹងកំពូលនាវាចម្បាំង Moskva នៃក្រុមនាវាចម្បាំងសមុទ្រខ្មៅរបស់ រុស្ស៊ី»។

គួររំលឹកថា កាលពីពាក់កណ្ដាលខែមេសាកន្លងទៅ អ៊ុយក្រែន ប្រកាសថា នាវាល្បាតសមុទ្រ Moskva របស់ រុស្ស៊ី ត្រូវបានកងកម្លាំងរបស់ អ៊ុយក្រែន បាញ់ពន្លិចដោយប្រើប្រាស់មីស៊ីល Neptune។ ប៉ុន្តែ ភាគីខាង រុស្ស៊ី អះអាងថា នាវាចម្បាំងរបស់ខ្លួនត្រូវលិចដោយសារមានអគ្គិភ័យ និងខ្យល់ព្យុះ។

លោក Alexey Reznikov ធ្លាប់បានវាយតម្លៃខ្ពស់ចំពោះការរួមផ្សំរវាងមីស៊ីល Harpoon និង Neptune ដោយយល់ថា ពួកវានឹងគាំទ្រដល់ អ៊ុយក្រែន ក្នុងការ «រំដោះ និងជួយឱ្យ សមុទ្រខ្មៅ មានសុវត្ថិភាពឡើងវិញ»។

មីស៊ីល Harpoon ដែលអភិវឌ្ឍដោយក្រុមហ៊ុន McDonnell Douglas អាចបាញ់ចេញពីទម្រច្រើនប្រភេទ។ ដាណឺម៉ាក កំពុងប្រើប្រាស់មីស៊ីល RGM-៨៤L-4 Harpoon Block II អាចបាញ់បានរយៈចម្ងាយ ១៣០ គីឡូម៉ែត្រ។ ចំណែក Neptune វិញគឺជាកំណែថ្មីនៃ មីស៊ីល Kh-៣៥ របស់ អ៊ុយក្រែន ដែលមានតាំងពីសម័យ សូវៀត និងអាចបាញ់បានរយៈចម្ងាយ ២៨០ គីឡូម៉ែត្រ៕

June 10, 2022

ប្រទេសចិន ជំទាស់ដាច់ខាត រឿងដែល អាម៉េរិក លក់អាវុធឱ្យ កោះតៃវ៉ាន់

អ្នកនាំពាក្យនៃ ក្រសួងការបរទេសចិន Zhao Lijian បានឱ្យដឹងថា ប្រទេសចិន ប្ដេជ្ញាប្រឆាំងនឹងការដែល សហរដ្ឋអាម៉េរិក លក់អាវុធឱ្យ កោះតៃវ៉ាន់ និងបន្តចាត់វិធានការខ្លាំងក្លាដើម្បីការពារអធិបតេយ្យ បូរណភាពទឹកដី និងផលប្រយោជន៍ជាតិ។

យោងតាមអ្នកនាំពាក្យរបស់ ក្រសួងការបរទេសចិន Zhao Lijian ការដែល អាម៉េរិក លក់អាវុធឱ្យ កោះតៃវ៉ាន់ បានរំលោភលើគោលការណ៍ «ប្រទេសចិនតែមួយ» និងសេចក្ដីប្រកាសរួមចំនួន ៣ រវាង ចិន-អាម៉េរិក បង្កការខាតបង់ធ្ងន់ធ្ងរដល់អធិបតេយ្យភាព ប្រយោជន៍របស់ ប្រទេសចិន និងទំនាក់ទំនងចិន-អាម៉េរិក ក៏ដូចជាសន្តិភាព និងស្ថិរភាពនៅ ច្រកសមុទ្រតៃវ៉ាន់។

លោក Zhao Lijian បានស្នើឱ្យ សហរដ្ឋអាម៉េរិក លុបចោលគម្រោងលក់អាវុធខាងលើ ក៏ដូចជាបញ្ឈប់ទំនាក់ទំនងយោធារវាង អាម៉េរិក និង កោះតៃវ៉ាន់។ ប្រទេសចិន នឹងបន្តចាត់វិធានការខ្លាំងក្លាដើម្បីការពារអធិបតេយ្យភាព និងផលប្រយោជន៍របស់ខ្លួន។

ចំណែកអ្នកនាំពាក្យរបស់ ក្រសួងការពារជាតិចិន លោក Tan Kefei យល់ថា តៃវ៉ាន់ គឺជាផ្នែកមួយនៃទឹកដីដែលមិនអាចកាត់ផ្ដាច់បានរបស់ ប្រទេសចិន។ ការដែល អាម៉េរិក លក់អាវុធ និងផ្ដល់ជំនួយបច្ចេកទេសដល់ កោះតៃវ៉ាន់ គឺជាសកម្មភាពគ្រោះថ្នាក់ធ្ងន់ធ្ងរចំពោះសន្តិភាព និងស្ថិរភាពរបស់ច្រកសមុទ្រនេះ និងបានអំពាវឱ្យបញ្ឈប់ទង្វើបែបនេះ។

ប្រតិកម្មរបស់អ្នកនាំពាក្យរបស់ ក្រសួងការបរទេសចិន និង ក្រសួងការពារជាតិចិន ខាងលើ ត្រូវបានលើកឡើងបន្ទាប់ពីមានព័ត៌មានថា សហរដ្ឋអាម៉េរិក បានអនុម័តលក់គ្រឿងបន្លាស់សម្រាប់ជួសជុលនាវាចម្បាំង និងផ្ដល់ជំនួយផ្នែកបច្ចេកទេស ដែលមានតម្លៃ ១២០ លានដុល្លារអាម៉េរិក ដល់ កោះតៃវ៉ាន់៕

June 10, 2022

មនុស្សជាង ៤០ នាក់បានស្លាប់នៅក្នុងករណីបាក់ស្រុតអណ្ដូងរ៉ែត្បូងពេជ្រនៅ កុងហ្គោ

អាជ្ញាធរមូលដ្ឋានរបស់ ប្រទេសកុងហ្គោ បានបញ្ជាក់ថា មនុស្សជាង ៤០ នាក់បានស្លាប់នៅក្នុងករណីបាក់ស្រុតអណ្ដូងរ៉ែត្បូងពេជ្រនៅភាគកណ្ដាលប្រទេសនេះកាលពីថ្ងៃទី ៧ មិថុនា។

ប្រធានមន្ទីរមហាផ្ទៃនៃខេត្ត Kasai បានថ្លែងថា ករណីបាក់អណ្ដូងរ៉ែពេជ្រនៅក្នុងទីរួមស្រុក Samba ដែលដំបូងឡើងមានការបញ្ជាក់ថា មានមនុស្សជាង ៤០ នាក់បាត់បង់ជីវិតនោះ ពេលនេះបានរកឃើញសាកសពចំនួន ៦ នាក់ហើយ។

បច្ចុប្បន្ន ក្រុមមន្ត្រីមានសមត្ថកិច្ចក្នុងតំបន់កំពុងតែញាប់ដៃញាប់ជើងក្នុងការជួយសង្គ្រោះ។ ជនរងគ្រោះស្ទើរតែទាំងអស់គឺជាកម្មករជីករកត្បូងដោយដៃ ដែលធ្វើការក្នុងអណ្ដូងក្រោមដី។

June 10, 2022

ប្រធានាធិបតីប្រទេសអ៊ុយក្រែន ចុះហត្ថលេខា «ដាក់ទណ្ឌកម្ម» ប្រឆាំងនឹង ប្រធានាធិបតីរុស្ស៊ី

លោក ហ្សេឡែនស្គី បានចុះហត្ថលេខាលើបទបញ្ជាដាក់ទណ្ឌកម្ម ក្នុងនោះមានទាំងការបង្កកទ្រព្យសម្បត្តិ និងហាមចេញចូលចំពោះលោក ពូទីន និងក្រុមមន្ត្រីរុស្ស៊ី ជាច្រើននាក់ទៀត។

យោងតាមប្រកាសរបស់ ការិយាល័យប្រធានាធិបតីអ៊ុយក្រែន កាលពីថ្ងៃទី ៩ មិថុនា ក្រៅពី ប្រធានាធិបតីរុស្ស៊ី លោក ពូទីន ទណ្ឌកម្មរបស់ អ៊ុយក្រែន ក៏នឹងត្រូវបានធ្វើឡើងចំពោះអ្នកនាំពាក្យរបស់ វិមានក្រឹមឡាំង នាយករដ្ឋមន្ត្រីរុស្ស៊ី រដ្ឋមន្ត្រីការបរទេសរុស្ស៊ី និង រដ្ឋមន្ត្រីការពារជាតិរុស្ស៊ី ផងដែរ។

វិធានការដាក់ទណ្ឌកម្មដែលត្រូវបានដាក់ចេញនៅក្នុងខែទី ៤ នៃយុទ្ធនាការយោធារបស់ រុស្ស៊ី នៅ អ៊ុយក្រែន នេះ ទំនងជាមិនមានឥទ្ធិពលជាក់ស្ដែងចំពោះក្រុមមន្ត្រីកំពូលៗរបស់ រុស្ស៊ី ឡើយ។

«រុស្ស៊ី ហាក់បានដាក់គោលដៅធ្វើសង្គ្រាមនៅ អ៊ុយក្រែន រហូតដល់ទីបញ្ចប់ ដូច្នេះត្រូវតែដាក់ទណ្ឌកម្មបន្ថែម» រដ្ឋមន្ត្រីការបរទេសអ៊ុយក្រែន Dmytro Kuleba និយាយដូច្នេះកាលពីថ្ងៃទី ៨ មិថុនា។

June 10, 2022

បាញ់រះនៅឯរោងចក្រអាម៉េរិក បណ្ដាលឱ្យច្រើននាក់បាត់បង់ជីវិត

មនុស្សយ៉ាងតិច ៣ នាក់បានស្លាប់ និង ២ នាក់រងរបួសនៅពេលជនសង្ស័យជាខ្មាន់កាំភ្លើងម្នាក់បានបាញ់រះនៅក្នុងរោងចក្រមួយក្នុងរដ្ឋ Maryland ហើយក្រោយមកក៏បានប្រយុទ្ធជាមួយសមត្ថកិច្ច។

ហេតុការណ៍បាញ់រះនេះបានកើតឡើងកាលពីវេលាម៉ោងប្រហែល ១៤កន្លះ ថ្ងៃទី ៩ មិថុនា (ម៉ោង ១កន្លះ ថ្ងៃទី ១០ មិថុនា នៅ ភ្នំពេញ) នៅឯរោងចក្រផលិតឧបករណ៍បេតុង Columbia Machine ក្នុងទីរួមស្រុក Smithsburg នៃស្រុកវ៉ាស៊ីងតោន។

ការិយាល័យប៉ូលិសស្រុកវ៉ាស៊ីងតោន ឱ្យដឹងថា ក្នុងករណីផ្ទុះអាវុធនេះមានមនុស្ស ៤ នាក់ត្រូវគ្រាប់កាំភ្លើងនៅក្នុងរោងចក្រ ក្នុងនោះមាន ៣ នាក់បានស្លាប់ និងម្នាក់រងរបួសធ្ងន់។ ជនសង្ស័យបានចាកចេញពីកន្លែងកើតហេតុ ប៉ុន្តែត្រូវប៉ូលិសដេញតាម។

ប្រកាសរបស់ការិយាល័យប៉ូលិសខាងលើបានឱ្យដឹងថា «ការប្រយុទ្ធគ្នារវាងក្រុមប៉ូលិស និងជនសង្ស័យ បានបណ្ដាលឱ្យមានករណីរងរបួសទាំងសងខាង និងត្រូវបានបញ្ជូនទៅកាន់មន្ទីរពេទ្យ»។

ប៉ូលិស Carly Hose និយាយថា ជនសង្ស័យជាមនុស្សប្រុស ប៉ុន្តែមិនទាន់បង្ហាញព័ត៌មានលម្អិតជាងនេះ។ រថយន្តរបស់ជនសង្ស័យត្រូវបានរកឃើញនៅកន្លែងមួយដែលមានចម្ងាយច្រើនគីឡូម៉ែត្រពីកន្លែងកើតហេតុ។

នាយកដ្ឋានគ្រប់គ្រងគ្រឿងស្រវឹង ថ្នាំជក់ កាំភ្លើង និងគ្រឿងផ្ទុះ របស់រដ្ឋ Maryland និង ការិយាល័យសហព័ន្ធស៊ើបអង្កេត (FBI) ឱ្យដឹងថា កម្លាំងពិសេសរបស់ពួកគេកំពុងប្រឹងប្រែងជួយដល់ការិយាល័យប៉ូលិសដើម្បីស៊ើបអង្កេតលើករណីបាញ់ប្រហារនេះ។

នេះគឺជាករណីបាញ់រះលើកទី ២៥៤ នៅ សហរដ្ឋអាម៉េរិក ក្នុងឆ្នាំ ២០២២ ដែលតួលេខនេះជិតស្មើនឹងករណីបាញ់រះសរុបក្នុងឆ្នាំ ២០២១ នេះបើតាមអង្គការកត់ត្រាករណីហិង្សាពាក់ព័ន្ធនឹងកាំភ្លើង។

កាលពីខែឧសភាកន្លងទៅ មានករណីផ្ទុះអាវុធមួយនៅឯសាលាបឋមសិក្សាមួយក្នុងទីក្រុង Uvalde រដ្ឋ Texas បានបណ្ដាលឱ្យសិស្ស និងគ្រូបង្រៀនចំនួន ១៩ នាក់បាត់បង់ជីវិត។ ជនសង្ស័យ Salvador Ramos ត្រូវបានប៉ូលិសបាញ់សម្លាប់នៅនឹងកន្លែងកើតហេតុ៕

June 10, 2022

Category: អន្តរជាតិ