សឿន សំណាង - La Reine Media

អ្នកលេង TikTok អាជីព រកបានប្រាក់ច្រើនជាង CEO របស់បណ្ដាក្រុមហ៊ុនធំៗមួយចំនួននៅ សហរដ្ឋអាម៉េរិក ទៅទៀត

តារា TikTok ជាច្រើន កំពុងសប្បាយចិត្ត ព្រោះតែរកបានប្រាក់ច្រើននៅក្នុងឆ្នាំ ២០២១ ក្នុងនោះ មានតារាមួយចំនួនរកបានប្រាក់ពី TikTok ច្រើនជាង CEO កំពូលៗមួយចំនួននៅ សហរដ្ឋអាម៉េរិក ទៀតផង។

Charli D’ Amelio ដែលបានចាប់ផ្ដើមបង្ហោះវីដេអូរាំរែករបស់ខ្លួន លើបណ្ដាញសង្គម TikTok តាំងពីឆ្នាំ ២០១៩ រកបានប្រាក់ ១៧.៥ លានដុល្លារអាម៉េរិក កាលពីឆ្នាំ ២០២១ នេះបើតាម Forbes។ ថ្មីៗនេះ នាងមានវត្តមាននៅក្នុងចំណោម TikToker ដែលរកបានចំណូលខ្ពស់បំផុតក្នុងឆ្នាំ ២០២។ ដោយមានអ្នកតាមដានជាង ១៣៣ លាននាក់នៅលើ TikTok នាង D’ Amelio រកបានប្រាក់យ៉ាងច្រើនពីតួនាទីជាអ្នកតំណាងឱ្យក្រុមហ៊ុនលក់សម្លៀកបំពាក់ ផ្សព្វផ្សាយផលិតផល និងបណ្ដាខ្លឹមសារផ្សេងៗនៅលើ TikTok។

និយាយអំពីប្រាក់បៀវត្សរ៍មធ្យមភាគរបស់ CEO នៃបណ្ដាក្រុមហ៊ុននៅក្នុង S&P 500 (សន្ទស្សន៍នៃបណ្ដាក្រុមហ៊ុនធំៗទាំង ៥០០ នៅក្នុងផ្សារហ៊ុន សហរដ្ឋអាម៉េរិក) គឺ ១៣.៤ លានដុល្លារ ក្នុងឆ្នាំ ២០២០ (ទិន្នន័យសម្រាប់ឆ្នាំ ២០២១ មិនទាន់ត្រូវបានចេញផ្សាយ) នេះបើតាមការវិភាគរបស់ Wall Street Journal (WSJ)។

ប្រាក់ចំណូលរបស់ D’ Amelio ខ្ពស់ជាងឆ្ងាយ ធៀបនឹង CEO របស់ក្រុមហ៊ុនធំៗមួយចំនួន ដូចជា CEO Darren Woods នៃក្រុមហ៊ុន Exxon Mobil (១៥.៦ លានដុល្លារ ក្នុងឆ្នាំ ២០២០), Kevin Johnson នៃក្រុមហ៊ុន Starbucks (១៤.៧ លានដុល្លារ), Ed Bastian នៃក្រុមហ៊ុន Delta Air Lines (ជាង ១៣ លានដុល្លារ), និង Chris Kempczinski នៃក្រុមហ៊ុន McDonald’s (១០.៨ លានដុល្លារ)។

Charli D’Amelio (ឆ្វេង) និង Dixie D’Amelio

Dixie D’ Amelio ដែលជាបងស្រីរបស់ Charli D’ Amelio មានអ្នកតាមដានប្រហែល ៦០ លាននាក់នៅលើ TikTok។ ប៉ុន្តែ នាងនៅតែជាអ្នកដែលរកបានប្រាក់ច្រើនជាងគេលំដាប់ទី ២ លើបណ្ដាញសង្គមនេះ ដោយរកបាន ១០ លានដុល្លារ។ តួលេខនេះប្រហាក់ប្រហែលនឹងប្រាក់បៀវត្សរ៍របស់ Gary Kelly ដែលជា CEO របស់ Southwest Airlines។

ក៏ប៉ុន្តែ នៅមាន CEO មួយចំនួនរបស់បណ្ដាក្រុមហ៊ុនក្នុងសន្ទស្សន៍ S&P 500 ដែលរកបានប្រាក់ច្រើនជាងនេះ។ Robert Kotick នៃក្រុមហ៊ុនហ្គេម Activision-Blizzard រកបានជិត ១៥៥ លានដុល្លារក្នុងឆ្នាំ ២០២០, Tim Cook របស់ Apple រកបានជិត ៩៩ លានដុល្លារ។

ប្រាក់ដែលបណ្ដា TikToker រកបាន បានកើនឡើងខ្ពស់ក្នុងឆ្នាំ ២០២។ យោងតាម Forbes អ្នកលេង TikTok ៧ នាក់ ក្នុងចំណោមអ្នកលេងអាជីពដែលរកបានប្រាក់ច្រើនជាងគេលើបណ្ដាញសង្គមនេះ រកបានសរុប ៥៥.៥ លានដុល្លារ កាលពីឆ្នាំទៅ កើន ២០០% ធៀបនឹងឆ្នាំ ២០២០។

ក្រុមហ៊ុន TikTok បានឱ្យដឹងថា កាលពីឆ្នាំ ២០២១ បណ្ដាញសង្គមនេះ មានអ្នកប្រើប្រាស់ប្រចាំខែ ឡើងដល់ជាង ១,០០០ លាននាក់។

ទោះជាយ៉ាងណាក៏ដោយ បណ្ដារូបភាពអវិជ្ជមាននៅលើបណ្ដាញសង្គមនេះ អាចប៉ះពាល់ដល់ផ្លូវចិត្តរបស់ក្មេងជំទង់មួយចំនួន។ សារព័ត៌មាន WSJ ថ្មីៗនេះបានធ្វើការស៊ើបអង្កេតមួយ និងបានរកឃើញថា បណ្ដាញសង្គម TikTok អាចទាក់ទាញមនុស្សគ្រប់គ្នា និងអាចជំរុញឱ្យក្មេងជាអនីតិជន ចូលទៅដល់ខ្លឹមសារដែលទាក់ទងនឹងផ្លូវភេទ និងគ្រឿងញៀន៕

January 14, 2022

(វីដេអូ)-SpaceX បាញ់បង្ហោះរ៉ុក្កែតម្ដង នាំយកផ្កាយរណប ១០៥ គ្រឿង ហោះទៅកាន់គន្លងគោចរ

ក្រុមហ៊ុន SpaceX កាលពីថ្ងៃទី ១៣ មករា បានបាញ់បង្ហោះដោយជោគជ័យនូវផ្កាយរណបពាណិជ្ជកម្មយ៉ាងច្រើនទៅកាន់តារាវិថី ដែលនេះគឺជាបេសកកម្មអវកាសទីពីររបស់ក្រុមហ៊ុននេះ នៅក្នុងខែមករា ២០២២។

រ៉ុក្កែត Falcon 9 របស់ SpaceX ដែលនាំយកផ្កាយរណបសរុប ១០៥ គ្រឿង ទៅកាន់ទីអវកាសនេះ ត្រូវបានបាញ់បង្ហោះឡើងពីប្រព័ន្ធបាញ់បង្ហោះលេខ ៤០ នៅឯមូលដ្ឋានទ័ពអាកាស Cape Canaveral ក្នុងរដ្ឋ Florida សហរដ្ឋអាម៉េរិក កាលពីម៉ោង ២២ និង ២៥ នាទី នាយប់ថ្ងៃទី ១៣ មករា (ម៉ោងនៅ កម្ពុជា)។

ក្រោយពេលហោះឡើងបាន ៩ នាទី កំណាត់រ៉ុក្កែតរុញច្រានទី១ បានផ្ដាច់ខ្លួន និងចុះចតលើទីលានចុះចតមួយនៅ Cape Canaveral ដែលមានចម្ងាយតែប៉ុន្មានគីឡូម៉ែត្របណ្ណោះ ពីទីតាំងបាញ់បង្ហោះ ដែលនេះគឺជាលើកទី ១០២ ហើយ ដែលរ៉ុក្កែតរបស់ SpaceX ចុះចតបានជោគជ័យ។

នៅក្នុងចំណោមផ្កាយរណបនៃជើងហោះហើរខាងលើនេះ មានផ្កាយរណបមួយចំនួនដែលមានទម្ងន់ធ្ងន់ជាងគេ មានដូចជា ផ្កាយរណបរបស់ ប្រទេសអ៊ុយក្រែន Ukraine Sich 2-1 ទម្ងន់ ១៧០ គីឡូក្រាម, ផ្កាយរណប ២ គូ របស់ក្រុមហ៊ុនហ្វាំងឡង់ ICEYE (៨៥ គីឡូក្រាម) និងក្រុមហ៊ុនអាម៉េរិក Capella Space (១០០ គីឡូក្រាម)៕

January 14, 2022

កម្ពុជា ជាប់ចំណាត់ថ្នាក់ទី៤ ស្ដីពីនិស្សិតវេជ្ជសាស្ត្រចុះធ្វើកម្មសិក្សាច្រើននៅ ប្រទេសបារាំង

ការអះអាងដែលថា កម្ពុជា ជាប់ចំណាត់ថ្នាក់ទី៤ ស្ដីពីនិស្សិតវេជ្ជសាស្ត្រចុះកម្មសិក្សាច្រើននៅ ប្រទេសបារាំង នេះ ត្រូវបាន ឯកអគ្គរដ្ឋទូតបារាំងប្រចាំកម្ពុជា លោក ហ្សាក់ ប៉ឺឡេ លើកឡើងនៅឯស្ថានទូតបារាំង ប្រចាំ កម្ពុជា ក្នុងពិធីចុះហត្ថលេខាលើសេចក្ដីប្រកាសគោលបំណងនៃកិច្ចសហប្រតិបត្តិការ រវាងស្ថានទូតបារាំង និងសាកលវិទ្យាល័យវិទ្យាសាស្ត្រសុខាភិបាលកម្ពុជា។

ក្នុងពិធីចុះហត្ថលេខាកាលពីថ្ងៃទី ១៣ មករា ២០២២ នេះ មានវត្តមានរបស់ ឯកអគ្គរដ្ឋទូតបារាំងប្រចាំកម្ពុជា លោក ហ្សាក់ ប៉ឺឡេ លោកសាស្ត្រាចារ្យ សាផុន វឌ្ឍនៈ ទីប្រឹក្សានៃក្រសួងសុខាភិបាល និងជាសាកលវិទ្យាធិការ នៃសាកលវិទ្យាល័យវិទ្យាសាស្ត្រសុខាភិបាលកម្ពុជា និង លោកសាស្ត្រាចារ្យ វេជ្ជបណ្ឌិត ឈាង រ៉ា អគ្គនាយកមន្ទីរពេទ្យកាល់ម៉ែត រួមនឹងវត្តមានភ្ញៀវជាតិ អន្តរជាតិ រួមទាំងនិស្សិតស.វ.ស ដែលបានទទួលអាហារូបករណ៍ថ្នាក់វេជ្ជបណ្ឌិតឯកទេស DFMS/DFMSA ទើបត្រលប់មកពីធ្វើកម្មសិក្សានៅប្រទេសបារាំង ផងដែរ។

លោក ហ្សាក់ ប៉ឺឡេ បានឱ្យដឹងថា កិច្ចសហប្រតិបត្តិការនេះនឹងជួយលើកកម្ពស់ភាពជាដៃគូរបស់ បារាំង ជាមួយនឹង សាកលវិទ្យាល័យវិទ្យាសាស្ត្រសុខាភិបាលកម្ពុជា សម្រាប់ការបណ្ដុះបណ្ដាល ការសិក្សាស្រាវជ្រាវ ការផ្លាស់ប្ដូរសាស្ត្រាចារ្យ អ្នកស្រាវជ្រាវ និងនិស្សិត។ល។

លោកសាស្ត្រាចារ្យ សាផុន វឌ្ឍនៈ បានថ្លែងអំណរគុណដល់ភាគីបារាំង ក្រោមការគាំទ្រពេញទំហឹងពីស្ថានទូតបារាំងប្រចាំកម្ពុជា ដែលបានសហការយ៉ាងល្អជាមួយសាកលវិទ្យាល័យវិទ្យាសាស្ត្រសុខាភិបាលកម្ពុជា ដែលទទួលបានសមិទ្ធិផលល្អប្រសើរ។

គួររំព្ញកជូនថា ចាប់ពីឆ្នាំ ១៩៩៦ មកដល់ឆ្នាំ ២០២០ និស្សិតវេជ្ជសាស្ត្រស.វ.ស (ផ្នែកវេជ្ជសាស្ត្រទូទៅ និងឯកទេស) សរុបចំនួន ៩០៣ នាក់របស់ កម្ពុជា បានបន្តការសិក្សា ឬធ្វើកម្មសិក្សានៅប្រទេសបារាំង។ ដោយឡែក ឆ្នាំ ២០២១ និស្សិតស.វ.ស ចំនួន ៥៨ នាក់ នឹងចុះកម្មសិក្សានៅ តាម ២១ មន្ទីរពេទ្យនៃគ្រឹះស្ថានបណ្តុះបណ្តាលល្បីៗនៅ ប្រទេសបារាំង៕

January 14, 2022

ស្ត្រីជាភរិយា «មានសហាយ» ត្រូវតុលារពិន័យ វាយ ១០០ រំពាត់ ខណៈបុរសជាប់សង្ស័យ ទទួលតែប៉ុន្មានរំពាត់ប៉ុណ្ណោះ

(ឥណ្ឌូណេស៊ី)-ស្ត្រីម្នាក់នៅក្នុងខេត្ត Aceh ត្រូវទទួលទណ្ឌកម្មចំនួន ១០០ រំពាត់ ដោយសារតែល្មើសនឹងច្បាប់ឯកព័ន្ធភាពរបស់សាសនាអ៊ីស្លាម គ្រាដែលបុរសដែលត្រូវគេសង្ស័យថាជាសហាយរបស់នាង ត្រូវបានដាក់ពិន័យត្រឹមតែ ១៥ រំពាត់។

Ivan Najjar Alavi មេដឹកនាំនៃអង្គភាពស៊ើបអង្កេតរបស់ស្ថាប័នរដ្ឋអាជ្ញាក្នុងតំបន់ Aceh ខាងកើត កាលពីថ្ងៃទី ១៣ មករា បានឱ្យដឹងថា ស្ត្រីម្នាក់ដែលមានស្វាមីរួចហើយ នៅមូលដ្ឋាន ត្រូវបានដាក់ទណ្ឌកម្មនៅទីសាធារណៈ ចំនួន ១០០ រំពាត់ បន្ទាប់ពីបានសារភាពកំហុស។

ចំណែកបុគ្គលដែលត្រូវបានសង្ស័យថាជាសហាយរបស់នាង ដែលជាប្រធានស្ថាប័ននេសាទនៅមូលដ្ឋាន និងជាអ្នកដែលមានភរិយារួចហើយ ត្រូវទទួលការពិន័យត្រឹមតែ ១៥ រំពាត់ ដោយសារតែបុគ្គលនេះបដិសេធការចោទប្រកាន់។ Ivan Najjar Alavi បញ្ជាក់ថា ចៅក្រមពិតជាមាន «ការពិបាក» ក្នុងការកាត់ទោសបុរសនេះ។

«ក្នុងសវនាការ បុរសនេះមិនបានសារភាពអ្វីទាំងអស់ ហើយបានបដិសេធរាល់ការចោទប្រកាន់។ ដូច្នេះ ចៅក្រមមិនអាចបង្ហាញថា បុរសនេះមានកំហុស ឬអត់» Ivan Najjar Alavi បានប្រាប់ក្រុមអ្នកយកព័ត៌មានដូច្នេះ។

ជំនួសឱ្យ «បទល្មើសមានសហាយ» បុរសនេះត្រូវបានពិន័យពីបទ «បង្ហាញមនោសញ្ចេតនាជាមួយស្ត្រីដែលមិនមែនជាភរិយា»។ ដំបូងឡើយ បុរសជាប់ចោទត្រូវបានកាត់ទោស វាយ ៣០ រំពាត់ ប៉ុន្តែ ជននេះតវ៉ាបានជោគជ័យ និងត្រូវបន្ថយមកនៅត្រឹម ១៥ រំពាត់។

ជនរំលោភច្បាប់ទាំងពីរខាងលើ ត្រូវបានអ្នកស្រុកចាប់បាត់ភ័ស្ដុតាងជាលើកដំបូងនៅក្នុងចំការដូងប្រេងមួយកន្លែងកាលពីឆ្នាំ ២០១៨។

Aceh គឺជាតំបន់តែមួយគត់របស់ ឥណ្ឌូណេស៊ី ដែលជាប្រទេសមានប្រជាជនភាគច្រើនកាន់សាសនាអ៊ីស្លាម អនុវត្តច្បាប់ Sharia អនុញ្ញាតឱ្យមានការដាក់ទណ្ឌកម្មដោយការវាយនឹងរំពាត់ជាសាធារណៈ ចំពោះស្ត្រីដែលល្មើស «ច្បាប់ក្បត់ប្ដី លេងល្បែងស៊ីសង ផឹកស្រា និងមានទំនាក់ទំនងផ្លូវភេទជាមួយមនុស្សភេទដូចគ្នា»៕

January 14, 2022

កូវីដ-១៩ នៅ កម្ពុជា៖ រកឃើញអ្នកឆ្លងថ្មី ១០ នាក់ទៀត ក្នុងអំឡុង ២៤ ម៉ោង នៃថ្ងៃទី ១៣ មករា

អ្នកវិជ្ជមានថ្មីទាំងអស់ចំនួន ១០ នាក់នេះ សុទ្ធតែផ្ទុកវីរុសប្រភេទ អូមីក្រុង។ ក្នុងថ្ងៃទី ១៣ មករា ក្រៅពីករណីវិជ្ជមានថ្មី កម្ពុជា ក៏មានអ្នកជាសះស្បើយចំនួន ១៥ នាក់ថែមទៀត និងពុំមានអ្នកណាម្នាក់ ស្លាប់ដោយសារកូវីដ-១៩ នោះទេ។

January 14, 2022

ប្រើប្រាស់ផ្ទាំងសូឡា ស្រោចទឹកឱ្យដើមឈើរាប់សិបលានដើម នៅលើសមុទ្រខ្សាច់ចល័តធំជាងគេទីពីរក្នុងពិភពលោក

ប្រទេសចិន កំពុងដំឡើងរោងចក្រអគ្គិសនីដែលបានមកពីថាមពលព្រះអាទិត្យ រាប់សិបកន្លែង ដើម្បីផ្គត់ផ្គង់អគ្គិសនីសម្រាប់ការបូមទឹកស្រោចដើមឈើដែលដាំតាម «បណ្ដោយជាយផ្លូវបៃតង» ឆ្លងកាត់សមុទ្រខ្សាច់នៅ ស៊ីជាំង។

តាមផែនការ គម្រោងដំឡើងរោងចក្រថាមពលព្រះអាទិត្យចំនួន ៨៦ កន្លែង នៅតាមបណ្ដោយផ្លូវលើសមុទ្រខ្សាច់ត្រង់ចំណុចបាតខ្ទះ តាមរីម (Tarim) ដែលស្ថិតក្នុងតំបន់ស្វយ័ត ស៊ីនជាំង ភាគពាយព្យនៃ ប្រទេសចិន នឹងត្រូវបានអនុវត្តរួចរាល់ជាស្ថាពរនៅខែមីនា ឆ្នាំ ២០២២ នេះ។

ផ្លូវប្រវែងសរុប ៥៥៦ គីឡូម៉ែត្រនេះ ឆ្លងកាត់សមុទ្រខ្សាច់ Taklamakan ដែលជាសមុទ្រខ្សាច់ចល័តធំជាងគេលំដាប់ទីពីរក្នុងពិភពលោក។ «តំបន់បណ្ដោយជាយផ្លូវបៃតង» មានប្រវែង ៤៣៦ គីឡូម៉ែត្រ និងទទឹងជាង ៧០ ម៉ែត្រ ត្រូវបានដាំដើមឈើប្រមាណ ២០ លានដើម។ តំបន់នេះ បានជួយការពារផ្លូវនេះពីការលុកចូលរបស់ខ្សាច់។

រោងចក្រថាមពលព្រះអាទិត្យថ្មីចំនួន ៨៦ ទីតាំងនេះ នឹងផ្គត់ផ្គង់អគ្គិសនីស្អាតសម្រាប់ការបូមទឹកពីក្រោមដី ដើម្បីស្រោចដើមឈើ។ យោងតាមការគណនា រោងចក្រថាមពលព្រះអាទិត្យនេះ នឹងជួយកាត់បន្ថយការប្រើប្រាស់ប្រេងម៉ាស៊ូត រហូតដល់ជាង ១,០០០ តោន និងឧស្ម័ន CO2 ប្រហែល ៣,៤១០ តោន ជារៀងរាល់ឆ្នាំ៕

January 14, 2022

(វីដេអូ)-ប្រព័ន្ធកំភ្លើងយន្តស្វ័យប្រវត្តរបស់ អាម៉េរិក ជះគ្រាប់សំដៅរ៉ុក្កែត ដើម្បីការពារស្ថានទូត

(អ៊ីរ៉ាក់)-ប្រព័ន្ធការពារដែនអាកាស C-RAM បានបាចគ្រាប់រាប់មិនអស់ទៅលើអាកាសរបស់ ទីក្រុងបាកដាដ (Baghdad) កម្ទិចរ៉ុក្កែតដែលកំពុងសំដៅមកកាន់ ស្ថានទូតអាម៉េរិក ប៉ុន្តែ រ៉ុក្កែតមួយគ្រាប់ទំនងជាបានទម្លុះខែលការពារនេះ។

ក្រុមមន្ត្រីការពារជាតិអ៊ីរ៉ាក់ កាលពីថ្ងៃទី ១៣ មករា ឱ្យដឹងថា ស្ថានទូតសហរដ្ឋអាម៉េរិក ប្រចាំ រដ្ឋធានីបាកដាដ ត្រូវរងការវាយប្រហារដោយរ៉ុក្កែត យ៉ាងតិច ៣ គ្រាប់ ប៉ុន្តែ យ៉ាងហោចណាស់មានរ៉ុក្កែត ២ គ្រាប់ត្រូវបានកម្ទេចដោយប្រព័ន្ធ C-RAM របស់ស្ថានទូត។

វីដេអូនៅលើបណ្ដាញសង្គមបានបង្ហាញថា ប្រព័ន្ធ C-RAM បានជះគ្រាប់យ៉ាងវែង ទៅលើអាកាសនៃ រដ្ឋធានីរបស់ អ៊ីរ៉ាក់ ដើម្បីស្កាត់គ្រាប់រ៉ុក្កែត ប៉ុន្តែ ការផ្ទុះដ៏ធំមួយនៅតែបានកើតឡើងនៅលើដី។

https://www.youtube.com/watch?v=GoWTvSseyCY

កងទ័ព អ៊ីរ៉ាក់ ឱ្យដឹងថា រ៉ុក្កែតមួយគ្រាប់បានធ្លាក់ចំសាលារៀនមួយកន្លែងនៅ បាកដាដ បណ្ដាលឱ្យស្ត្រីម្នាក់ និងក្មេងម្នាក់រងរបួស ប៉ុន្តែ មិនបានបញ្ជាក់ថា អ្នកទាំងពីរគឺជាជនរងគ្រោះនៅសាលាដែលត្រូវគ្រាប់រ៉ុក្កែត ឬយ៉ាងណានោះទេ។

ថ្មីនេះ បណ្ដាមូលដ្ឋានរបស់ សហរដ្ឋអាម៉េរិក នៅ អ៊ីរ៉ាក់ ក្នុងនោះមានស្ថានទូតជាដើម បានក្លាយជាគោលដៅនៃការវាយប្រហារដោយគ្រាប់រ៉ុក្កែត និងយន្តហោះគ្មានមនុស្សបើក (UAV)។ សហរដ្ឋអាម៉េរិក បានចោទប្រកាន់ថា កងជីវពលអ៊ីរ៉ាក់ ដែលគាំទ្រដោយអាជ្ញាធរអ៊ីរ៉ាក់ គឺជាអ្នកនៅពីក្រោយករណីវាយប្រហារនានាមកលើមូលដ្ឋានរបស់ អាម៉េរិក នៅ អ៊ីរ៉ាក់៕

January 14, 2022

វីដេអូស្ដែងៗ បង្ហាញពីក្រុមជួញដូរគ្រឿងញៀនដ៏ធំនៅ ម៉ិកស៊ិក ប្រើយន្តហោះគ្មានមនុស្សបើក កម្ទេចមូលដ្ឋានរបស់សត្រូវ

សារព័ត៌មានម៉ិកស៊ិក បានបង្ហោះវីដេអូមួយចំនួន ដែលបង្ហាញអំពីយន្តហោះគ្មានមនុស្សបើកមួយគ្រឿងរបស់ក្រុមជួញដូរគ្រឿងញៀនដ៏ធំមួយនៅ ម៉ិកស៊ិក ទម្លាក់គ្រាប់បែកកម្ទេចជម្រករបស់គូសត្រូវ។

យោងតាមទូរទស្សន៍ RT (រុស្ស៊ី) វីដេអូនេះ ទំនងជាត្រូវបានថតពីយន្តហោះគ្មានមនុស្សបើករបស់ក្រុមជួញដូរគ្រឿងញៀនម៉ិកស៊ិក នៅពេលកំពុងទម្លាក់គ្រាប់បែកទៅលើតង់ជម្រកនានានៅក្នុងព្រៃជ្រៅ។ ចំណែកសារព័ត៌មាន El Pais របស់ អេស្ប៉ាញ វិញ បានរាយការណ៍ថា យន្តហោះក្នុងវីដេអូនេះ ត្រូវបានគ្រប់គ្រងដោយក្រុមជួញដូរគ្រឿងញៀន Jalisco New Generation Cartel (CJNG)។

ក្រោយការទម្លាក់គ្រាប់បែបបានប៉ុន្មានវិនាទី មនុស្សម្នាក្នុងមូលដ្ឋាននេះ ក៏នាំគ្នារត់ប្រសាចរៀងៗខ្លួន។ ចំណែកយន្តហោះដែលនៅពីលើ បន្តទម្លាក់គ្រាប់បែកជាច្រើនគ្រាប់ថែមទៀត។

សារព័ត៌មានដទៃទៀត យល់ថា ក្រុមសង្គមងងឹតខាងលើ ថែមទាំងវាយប្រហារសំដៅប្រជាជនដែលរស់នៅក្នុងតំបន់ ជាអ្នកដែលបាន និងកំពុងរារាំងសកម្មភាពទន្ទ្រានយកដីព្រៃធ្វើជាមូលដ្ឋានរបស់ក្រុមល្មើសច្បាប់ទៀតផង។ យ៉ាងហោចណាស់មានមនុស្សម្នាក់ត្រូវរងរបួសនៅក្នុងហេតុការណ៍ទម្លាក់គ្រាប់បែក។

កាលពីខែធ្នូ ២០២១ អង្គភាពប្រឆាំងគ្រឿងញៀនរបស់ សហរដ្ឋអាម៉េរិក បានឱ្យដឹងថា CJNG គឺជាក្រុមជួញដូរគ្រឿងញៀនដែលប្រើប្រាស់អំពើហិង្សា និងគួរឱ្យញញើតបំផុត នៅ ម៉ិកស៊ិក។ អង្គភាពនេះ ឱ្យដឹងថា «ការកម្ទេច CJNG គឺជាអាទិភាពខ្ពស់មួយ» របស់ពួកគេ ហើយថា នឹងជូនរង្វាន់ ១០,០០០,០០០ ដុល្លារ ដល់អ្នកទាំងឡាយណាដែលផ្ដល់ព័ត៌មានស្ដីពីក្រុមជួញដូរគ្រឿងញៀននេះ។

https://www.youtube.com/watch?v=F6mxy7hwRMk

ចាប់តាំងពីខែធ្នូ ២០២១ ស្ថានភាពអំពើហិង្សាមិនត្រូវបានគ្រប់គ្រង បានបង្ខំឱ្យប្រជាជនជិតពាក់កណ្ដាល ក្នុងនោះមានទាំងក្រុមប៉ូលិសផងដែរ នៅតំបន់ក្រុង Chinicuila ត្រូវរត់ចោលស្រុក ក្នុងចំណោមនោះ មានអ្នកខ្លះបានភៀសខ្លួនទៅកាន់រដ្ឋ Colima នេះបើតាមទូរទស្សន៍ Imagen របស់ ម៉ិកស៊ិក។ ក្រុមមនុស្សជាច្រើនផ្សេងទៀត បានឆ្លងដែនពី ម៉ិកស៊ិក ទៅកាន់ សហរដ្ឋអាម៉េរិក ដើម្បីគេចពីអំពើហិង្សា៕

January 14, 2022

អង្គការ WHO អនុញ្ញាតឱ្យប្រើប្រាស់វិធីសាស្ត្រថ្មីចំនួន ២ ទៀត សម្រាប់ការព្យាបាលអ្នកជំងឺកូវីដ-១៩

ថ្ងៃទី ១៤ មករា នេះ អង្គការសុខភាពពិភពលោក (WHO) បានអនុម័តវិធីសាស្ត្រថ្មីចំនួន ២ សម្រាប់ការព្យាបាលអ្នកជំងឺកូវីដ-១៩ ដែលនេះគឺជាការបន្ថែម «អាវុធ» សំខាន់ ទន្ទឹមនឹងវ៉ាក់សាំងដែលកំពុងមាន នៅក្នុងការទប់ស្កាត់ហានិភ័យជំងឺវិវត្តទៅជាធ្ងន់ធ្ងរ និងស្លាប់ ចំពោះអ្នកជំងឺកូវីដ-១។

វិធីសាស្ត្រថ្មីទាំង ២ នេះ រួមមាន ការប្រើប្រាស់ថ្នាំព្យាបាលជំងឺរលាកសន្លាក់ ដែលមានសមាសធាតុ baricitinib និងការប្រើប្រាស់អង្គបដិប្រាណសំយោគ Sotrovimab។

នៅក្នុងអនុសាសន៍របស់ WHO ដែលបានចុះផ្សាយលើទស្សនវដ្ដីវេជ្ជសាស្ត្ររបស់អង់គ្លេស BMJ ក្រុមអ្នកជំនាញរបស់ WHO បានលើកឡើងយ៉ាងច្បាស់ថា សមាសធាតុ baricitinib ដែលប្រើរួមជាមួយនឹង corticosteroid មានសមត្ថភាពជួយបង្កើនអត្រានៃការរស់ និងបន្ថយហានិភ័យត្រូវប្រើម៉ាស៊ីនជំនួយដង្ហើមចំពោះអ្នកជំងឺកូវីដ-១៩ ដែលមានអាការធ្ងន់ធ្ងរ។

ទន្ទឹមនឹងនេះ WHO ក៏បានណែនាំឱ្យប្រើអង្គបដិប្រាណ Sotrovimab សម្រាប់ អ្នកវិជ្ជមាននឹងកូវីដ-១៩ ដែលមានរោគសញ្ញាស្រាល ប៉ុន្តែមានហានិភ័យត្រូវចូលពេទ្យខ្ពស់បំផុត មានដូចជា មនុស្សចាស់ អ្នកមានប្រព័ន្ធភាពស៊ាំខ្សោយ ឬអ្នកដែលមានជំងឺរ៉ាំរ៉ៃ ដូចជា ជំងឺទឹកនោមផ្អែមជាដើម។

មុននោះ កាលពីខែកក្កដា ២០២១ WHO ក៏បានអនុម័តឱ្យប្រើប្រាស់ថ្នាំព្យាបាលបញ្ហារលាកសន្លាក់ដែលមានសមាសធាតុ tocilizumab និង sarilumab បូកជាមួយនឹង corticosteroid ដើម្បីទប់ស្កាត់ហានិភ័យប្រព័ន្ធភាពស៊ាំរបស់អ្នកជំងឺកូវីដ-១៩ ប្រតិកម្មជ្រុលនៅចំពោះមុខ SARS-CoV-2។ កាលពីខែកញ្ញា ២០២១ WHO ក៏បានបន្តអនុម័តឱ្យប្រើប្រាស់វិធីព្យាបាលអ្នកជំងឺកូវីដ-១៩ ដោយអង្គបដិប្រាណសំយោគ Regeneron ផងដែរ។

January 14, 2022

ឡាវ បង្កើនការផលិតថ្នាំព្យាបាលជំងឺកូវីដ-១៩ Molnupiravir

យោងតាមប្រភពព័ត៌មានពី រដ្ឋធានី វៀងចន្ទន៍ ប្រទេសឡាវ នឹងជំរុញការផលិតថ្នាំ Molnupiravir (ឈ្មោះពាណិជ្ជកម្មនៅ ឡាវ គឺ Molacovir) ដើម្បីព្យាបាលអ្នកជំងឺកូវីដ-១៩ ដែលមានអាការស្រាល នៅចំពោះមុខតម្រូវការកាន់តែខ្ពស់របស់ប្រទេសនេះ។

ប្រធានរោងចក្រផលិតឱសថលេខ៣ របស់ ឡាវ វេជ្ជបណ្ឌិត Lahounh Chanthabout ឱ្យដឹងថា តួលេខអ្នកជំងឺកូវីដ-១៩ ដែលត្រូវការព្យាបាល បានកើនឡើងខ្ពស់ក្នុងមួយរយៈពេលចុងក្រោយនេះ។ រោងចក្រនេះបានចាប់ផ្ដើមផលិតថ្នាំ Molacovir តាំងពីខែធ្នូ ២០២១ ហើយមកដល់បច្ចុប្បន្ន បរិមាណថ្នាំដែលរោងចក្រនេះបានផលិត អាចព្យាបាលអ្នកជំងឺកូវីដ-១៩ ប្រហែល ១,០០០ នាក់។ បរិមាណនេះមិនទាន់គ្រប់គ្រាន់តាមតម្រូវការក្នុងស្រុកនៅឡើយ ដូច្នេះ រោងចក្រនឹងបង្កើនការផលិតរបស់ខ្លួន។

សម្រាប់អ្នកជំងឺកូវីដ-១៩ ម្នាក់ ត្រូវការព្យាបាលមួយជាដោយលេបថ្នាំ Molacovir ចំនួន ៤០ គ្រាប់ ហើយ ៤០ គ្រាប់ដែលត្រូវលេបក្នុងរយៈពេល ៥ ថ្ងៃនេះ មានតម្លៃ ៤០០.០០០ គីប ប្រហែល ៣៥.៧ ដុល្លារអាម៉េរិក។

បច្ចុប្បន្ន ដើម្បីប្រើប្រាស់ថ្នាំ Molacovir អ្នកជំងឺត្រូវតែមានអាយុលើសពី ១៨ ឆ្នាំ មានរោគសញ្ញាស្រាល ឬមធ្យម នៃជំងឺកូវីដ-១៩ និងកំពុងស្ថិតក្នុងដំណាក់កាលដំបូងនៃជំងឺ ពិសេសគឺមិនត្រូវមានរោគសញ្ញារលាកសួត ឬខ្វះអុកស៊ីសែន៕

January 13, 2022

Author: សឿន សំណាង