សឿន សំណាង - La Reine Media

អគ្គមេបញ្ជាការកងទ័ពរបស់ ប្រទេសស៊ីលី លាលែងពីតំណែង

ប្រភពព័ត៌មានពី អាម៉េរិកឡាទីន បានឱ្យដឹងថា អគ្គមេបញ្ជាការកងទ័ព របស់ ប្រទេសស៊ីលី ឧត្ដមសេនីយ៍ Richardo Martinez កាលពីថ្ងៃទី ២ មីនា បានប្រកាសលាលែងពីតំណែង។

ការសម្រេចចិត្តរបស់ លោក Richardo Martinez ត្រូវបានធ្វើឡើងតែប៉ុន្មានម៉ោងប៉ុណ្ណោះ បន្ទាប់ពីត្រូវបានសួរចម្លើយអំពីកំហុសទាក់ទិននឹងអំពើពុករលួយក្នុងជួរកងទ័ព នៃ ប្រទេសស៊ីលី។

ឧត្ដមសេនីយ៍ Richardo Martinez ឱ្យដឹងថា បានដាក់លិខិតលាលែងពីតំណែង ជូនប្រធានាធិបតីស៊ីលី រួចហើយ ប៉ុន្តែ លោកអះអាងថា លោកពុំមានកំហុស ហើយតែងតែគោរពច្បាប់។

បើសិនមិនបានលាលែងពីតំណែង ឧត្ដមសេនីយ៍ Martinez នឹងក្លាយជាអគ្គមេបញ្ជាការកងទ័ពដំបូងគេរបស់ ស៊ីលី ដែលត្រូវបានស៊ើបអង្កេតរឿងពុករលួយ៕

March 3, 2022

នាវាទេសចរណ៍តម្លៃ ៦០០ លានដុល្លារ របស់ មហាសេដ្ឋីរុស្ស៊ី ត្រូវប្រទេសលោកខាងលិច រឹបអូស

នាវាមួយគ្រឿងដែលស្ថិតក្នុងចំណោមនាវាទេសចរណ៍ធំជាងគេក្នុងពិភពលោក របស់ មហាសេដ្ឋីរុស្ស៊ី Alisher Usmanov ត្រូវបានអាជ្ញាធរអាល្លឺម៉ង់ រឹបអូសកាលពីថ្ងៃទី ២ មីនា ដែលនេះគឺជាករណីរឹបអូសនាវាទេសចរណ៍ដំបូង ក្រោយពី អឺរ៉ុប និង អាម៉េរិក ដាក់ទណ្ឌកម្មលើក្រុមមហាសេដ្ឋីរុស្ស៊ី។

យោងតាម Yahoonews នាវាទេសចរណ៍ Dilbar មានប្រវែង ១៥៦ ម៉ែត្រ ត្រូវបានសាងសង់ដោយឡែកទៅតាមការបញ្ជាទិញរបស់មហាសេដ្ឋី Alisher Usmanov។ អ្នកមានរូបនេះបានទិញនាវាទេសចរណ៍កាលពីឆ្នាំ ២០១៦ ក្នុងតម្លៃ ៦០០ លានដុល្លារអាម៉េរិក។ មានពេលខ្លះ នេះគឺជានាវាទេសចរណ៍ធំជាងគេបង្អស់ក្នុងពិភពលោក បើគិតទៅតាមសមត្ថភាពផ្ទុក។ ចាប់ពីខែតុលា ២០២១ នាវា Dilbar បានស្ថិតនៅឯ Hamburg ប្រទេសអាល្លឺម៉ង់ ដើម្បីជួសជុល។

មហាសេដ្ឋី Alisher Usmanov កំពុងប្រឈមមុខនឹងទណ្ឌកម្មរបស់លោកខាងលិច។ លោក Usmanov មានទ្រព្យតម្លៃរាប់ពាន់លានដុល្លារ នៅក្នុងក្រុងហ៊ុន Metalloinvest, ក្រុមហ៊ុនទូរស័ព្ទ MegaFon, ក្រុមហ៊ុនអេឡិចត្រូនិក Xiaomi ក៏ដូចជាអចលនទ្រព្យជាច្រើននៅពាសពេញ ទឹកដីអឺរ៉ុប។ Forbes បានឱ្យដឹងថា លោក Usmanov ក៏ជាអ្នកវិនិយោគដំបូងមួយរូបរបស់ Facebook។

មហាសេដ្ឋី Alisher Usmanov (ស្ដាំ) និងលោក ពូទីន

ក្នុងថ្ងៃទី ២ មីនាដដែល ក្លឹបបាល់ទាត់ Everton F.C នៃលិគកំពូលអង់គ្លេស បានកាត់ផ្ដាច់កិច្ចព្រមព្រៀងជាមួយក្រុមហ៊ុន ៣ ផ្សេងទៀត របស់លោក Usmanov។

កាលពីសប្ដាហ៍កន្លង មហាសេដ្ឋីរុស្ស៊ី Roman Abramovich ក៏បានប្រគល់សិទ្ធិគ្រប់គ្រងក្រុមបាល់ទាត់ Chelsea ទៅឱ្យមូលនិធិមនុស្សធម៌ មុនពេល អង់គ្លេស អនុវត្តការដាក់ទណ្ឌកម្ម។ មហាសេដ្ឋីរូបនេះក៏កំពុងស្វែងរកវិធីដើម្បីលក់ក្លឹបបាល់ទាត់នេះ។

សេតវិមាន បានព្រមានថា «យើងនឹងបញ្ជូនកម្លាំងពិសេសឆ្លងមហាសមុទ្រអាត្លង់ទិក ដើម្បីកំណត់ទីតាំង ស្វែងរក និងបង្កកទ្រព្យសម្បត្តិរបស់បណ្ដាក្រុមហ៊ុន និងមហាសេដ្ឋីរុស្ស៊ី ដែលជាប់ក្នុងបញ្ជីទណ្ឌកម្ម»។

ទណ្ឌកម្មខាងលើត្រូវបានធ្វើឡើងបន្ទាប់ពី រុស្ស៊ី បានចូលឈ្លានពានទឹកដីរបស់ អ៊ុយក្រែន ក្រោមលេសថា ដើម្បីការពារសន្តិសុខប្រទេសជាតិ និងការពារប្រជាជនដែលនិយាយ ភាសារុស្ស៊ី នៅតំបន់ភាគខាងកើតរបស់ អ៊ុយក្រែន៕

March 3, 2022

អាម៉េរិក បញ្ជូន មីស៊ីលការពារដែនអាកាស រាប់រយដើម ទៅឱ្យ អ៊ុយក្រែន

សហរដ្ឋអាម៉េរិក ទំនងជាបានបញ្ជូន មីស៊ីលការពារដែនអាកាស Stinger រាប់រយដើម ទៅឱ្យ អ៊ុយក្រែន ក្នុងអំឡុងប៉ុន្មានថ្ងៃកន្លងទៅនេះ ខណៈដែលប្រទេសជាច្រើននៅ អឺរ៉ុប យល់ព្រមផ្ដល់ជំនួយជាអាវុធ តាមសំណើរបស់ អ៊ុយក្រែន។

សារព័ត៌មាន NBC របស់ អាម៉េរិក ឱ្យដឹងថា សហរដ្ឋអាម៉េរិក ជាលើកដំបូងបានប្រគល់ មីស៊ីលប្រឆាំងអាកាស Stinger ឱ្យ អ៊ុយក្រែន ក្នុងសប្ដាហ៍នេះ ក្នុងនោះមានជាង ២០០ ដើម ត្រូវបានប្រគល់រួចហើយកាលពីថ្ងៃទី ២៨ កុម្ភៈ។

ដើមឆ្នាំនេះ សហរដ្ឋអាម៉េរិក បានបើកភ្លើងខៀវឱ្យបណ្ដាប្រទេសនៅ តំបន់បាល់ទិក រួមមាន ឡេតូនី, លីទុយអានី និង អេស្តូនី បញ្ជូនអាវុធដែលផលិតដោយ អាម៉េរិក ទៅកាន់ អ៊ុយក្រែន ក្នុងនោះមានទាំង មីស៊ីលការពារដែនអាកាស Stinger ផងដែរ។ ប៉ុន្តែ មកដល់ពេលនេះ រដ្ឋាភិបាលអាម៉េរិក នៅតែរក្សាការផ្គត់ផ្គង់ មីស៊ីល Stinger រួមនឹងអាវុធផ្សេងៗជាច្រើនទៀត ដោយផ្ទាល់ដល់ អ៊ុយក្រែន។

ក្នុងរយៈពេលប៉ុន្មានខែមកនេះ តំណាងរាស្ត្រច្រើនរូបរបស់ អាម៉េរិក បានអំពាវនាវឱ្យរដ្ឋាភិបាល បញ្ជូន មីស៊ីល Stinger ទៅកាន់ ប្រទេសអ៊ុយក្រែន។ អ៊ុយក្រែន ក៏បានស្នើ អាម៉េរិក ជាច្រើនលើក ឱ្យផ្ដល់ជំនួយជាអាវុធដល់ប្រទេសនេះ។

បច្ចុប្បន្ន សហរដ្ឋអាម៉េរិក, កាណាដា និងប្រទេសជាង ១០ ទៀតនៅ អឺរ៉ុប បានយល់ព្រមតាមសំណើរបស់ អ៊ុយក្រែន ស្ដីពីការផ្ដល់ជំនួយជាអាវុធដល់ ទីក្រុងកៀវ។

March 3, 2022

ទីក្រុងធំដំបូងគេរបស់ អ៊ុយក្រែន ធ្លាក់ទៅក្នុងដៃកងទ័ពបរទេសឈ្លានពាន

អភិបាលក្រុង Kherson បានឱ្យដឹងថា «កងកម្លាំងរុស្ស៊ី បានសម្រុកចូលសាលាក្រុង» ដែលនេះគឺជាសញ្ញាណបង្ហាញថា ទីក្រុងធំដំបូងគេរបស់ អ៊ុយក្រែន បានធ្លាក់ទៅក្នុងដៃរបស់ កងទ័ពរុស្ស៊ី។

លោក Igor Kolykhayev ដែលជាអភិបាលក្រុង Kherson បានប្រាប់ NY Times ថា ទាហានរុស្ស៊ី ប្រហែល ១០ នាក់ ក្នុងនោះមានមេបញ្ជាការម្នាក់ បានសម្រុកចូលអគារសាលាក្រុង កាលពីថ្ងៃទី ២ មីនា។ ក្រុមនេះបានប្រាប់លោកថា ពួកគេនឹងបង្កើតរដ្ឋាភិបាលថ្មីមួយ ដែលដូចទៅនឹងរដ្ឋាភិបាលផ្ដាច់ខ្លួនទាំងពីរនៅភាគខាងកើតប្រទេសអ៊ុយក្រែន។

«ខ្ញុំមិនបានសន្យាអ្វីជាមួយពួកគេ។ ខ្ញុំក៏មិនមានអ្វីដើម្បីសន្យា។ ខ្ញុំគ្រាន់តែយកចិត្តទុកដាក់លើជីវភាពសាមញ្ញនៅទីក្រុងរបស់យើង។ ខ្ញុំគ្រាន់តែស្នើឱ្យពួកគេកុំបាញ់សម្លាប់ប្រជាជន» លោក Kolykhayev ក្រោយមក ក៏បានបង្ហោះសារនេះនៅលើ Facebook។

អភិបាលក្រុង Kherson ឱ្យដឹងថា បច្ចុប្បន្ន កងទ័ពអ៊ុយក្រែន មិនមានវត្តមាននៅក្នុងទីក្រុងនេះ ហើយប្រជាជនត្រូវធ្វើតាមក្រុមប្រដាប់អាវុធ ដែលនេះបង្ហាញថា ទីក្រុង Kherson បច្ចុប្បន្ន ស្ថិតក្រោមការគ្រប់គ្រងរបស់ កងទ័ពរុស្ស៊ី។

Kherson គឺជាទីក្រុងយុទ្ធសាស្ត្រនៅច្រកចេញទៅ សមុទ្រខ្មៅ របស់ អ៊ុយក្រែន។ ដណ្ដើមបាន Kherson កងទ័ពរុស្ស៊ី នឹងមានឈ្នាន់សម្រាប់ឆ្ពោះទៅទិសខាងលិចដើម្បីវាយប្រហារលើ Odessa ដែលជាទីក្រុងមានតម្លៃផ្នែកយុទ្ធសាស្ត្រខ្ពស់ជាង។

March 3, 2022

មហាសន្និបាតអង្គការសហប្រជាជាតិ ស្នើឱ្យ រុស្ស៊ី ដកទ័ពចេញពី អ៊ុយក្រែន ជាបន្ទាន់

ភាគច្រើននៃសមាជិកមហាសន្និបាតអង្គការសហប្រជាជាតិ កាលពីថ្ងៃទី ២ មីនា បានបោះឆ្នោតថ្កោលទោសអំពើឈ្លានពានរបស់ រុស្ស៊ី នៅ អ៊ុយក្រែន និងស្នើឱ្យដកកងទ័ពចេញពីប្រទេសនេះដោយគ្មានលក្ខខណ្ឌ។

កិច្ចប្រជុំបន្ទាន់កាលពីថ្ងៃទី ២ មីនា ដែលត្រូវបានកោះដោយក្រុមប្រឹក្សាសន្តិសុខនៃអង្គការសហប្រជាជាតិ ត្រូវបានធ្វើឡើងនៅទីក្រុង New York សហរដ្ឋអាម៉េរិក។

១៤១ ក្នុងចំណោមសមាជិក ១៩៣ រូប នៃ មហាសន្និបាតអង្គការសហប្រជាជាតិ បានបោះឆ្នោតគាំទ្រសេចក្ដីសម្រេចថ្កោលទោសយុទ្ធនាការយោធារបស់ រុស្ស៊ី នៅ អ៊ុយក្រែន។ សមាជិក ៥ រូប បានបោះឆ្នោតប្រឆាំង និង ៣៥ រូប បោះឆ្នោតអនុបវាទ ក្នុងនោះមាន ចិន ដែលជាសមាជិកអចិន្ត្រៃយ៍របស់ ក្រុមប្រឹក្សាសន្តិសុខ។ រុស្ស៊ី, ស៊ីរី និង បេសឡារូស ស្ថិតក្នុងក្រុម ៥ ប្រទេសដែលបានបោះឆ្នោតប្រឆាំង។

ក្រៅពីការថ្កោលទោសលើ រុស្ស៊ី សេចក្ដីសម្រេចរបស់អង្គការសហប្រជាជាតិ ក៏បានស្នើឱ្យ រុស្ស៊ី ដងកងទ័ពទាំងអស់ចេញពីទឹកដីរបស់ អ៊ុយក្រែន ដែលអន្តរជាតិបានទទួលស្គាល់ផ្លូវការ ជាបន្ទាន់ និងដោយគ្មានលក្ខខណ្ឌ៕

March 3, 2022

ទណ្ឌកម្មបច្ចុប្បន្នដែលបស្ចិមលោកដាក់លើ រុស្ស៊ី មានតម្លៃប៉ុន្មានដុល្លារ?

ក្រោយពីបានចាប់ផ្ដើមចូលឈ្លានពានលើ ប្រទេសអ៊ុយក្រែន ទណ្ឌកម្មយ៉ាងមហិមា ដែលត្រូវបានគេយល់ថា មិនធ្លាប់មានពីមុនមក ត្រូវបានលោកខាងលិច ដាក់លើ ប្រទេសរុស្ស៊ី។

ទណ្ឌកម្មរបស់ បស្ចិមលោក បច្ចុប្បន្នកំពុងរុញច្រានសេដ្ឋកិច្ចរបស់ រុស្ស៊ី ធ្លាក់ទៅក្នុងវិបត្តិ។ ក្រុមអ្នកវិភាគវាយតម្លៃថា ពុំធ្លាប់មានឡើងដែលសេដ្ឋកិច្ចមួយដ៏ធំសម្បើម និងមានសារសំខាន់នៅទូទាំងពិភពលោកដូច រុស្ស៊ី បែរក្លាយទៅជាគោលដៅនៃការដាក់ទណ្ឌកម្មធ្ងន់ធ្ងរដូច្នេះ។

ក្រុមមន្ត្រីនៃបណ្ដាប្រទេសលោកខាងលិច ពន្យល់ថា យុទ្ធសាស្ត្ររបស់ពួកគេគឺជាសង្គ្រាមសេដ្ឋកិច្ច ដើម្បីពិន័យលើ ប្រធានាធិបតីរុស្ស៊ី វ្លាឌីមៀ ពូនទីន និងដាក់ ប្រទេសរុស្ស៊ី ឱ្យនៅឯកា បើទោះជាអាចត្រូវចំណាយពេលច្រើនឆ្នាំដើម្បីបំបែក «ស្រទាប់ការពារ» របស់ «បន្ទាយសេដ្ឋកិច្ច» ដែល រុស្ស៊ី បានបង្កើតឡើង។

រដ្ឋមន្ត្រីក្រសួងហិរញ្ញវត្ថុបារាំង Bruno Le Maire កាលពីថ្ងៃទី ១ មីនា បានឱ្យដឹងថា ជាសរុប បណ្ដាទណ្ឌកម្មដែលបានដាក់ចេញ កំពុងបង្កកទ្រព្យសម្បត្តិរបស់ រុស្ស៊ី ជិត ១ លានលានដុល្លារអាម៉េរិក (១ ទ្រីលានដុល្លារ)។

ប៉ុន្តែ គោលដៅនៃការដាក់ទណ្ឌកម្មរបស់លោកខាងលិច ទំនងជាជួបឧបសគ្គច្រើន។ បច្ចុប្បន្ន អឺរ៉ុប ទិញឧស្ម័នធម្មជាតិ ៤០% និង ប្រេង ២០% ពី ប្រទេសរុស្ស៊ី។ ដូច្នេះ ការអាក់ខានណាមួយក៏នឹងធ្វើឱ្យឥន្ធនៈទូទាំងសកលលោកឡើងថ្លៃខ្ពស់បន្ថែមទៀត។

យ៉ាងនេះក្ដី Oliver Allen ប្រធានផ្នែកសេដ្ឋកិច្ចប្រចាំ Capital Economics បានឱ្យដឹងថា «បើសិន រុស្ស៊ី នៅតែរក្សាទិសដៅដូចបច្ចុប្បន្ន ទណ្ឌកម្មសព្វថ្ងៃអាចគ្រាន់តែជាចំណុចចាប់ផ្ដើមប៉ុណ្ណោះនៅក្នុងយន្តការនៃការកាត់ផ្ដាច់តំណភ្ជាប់ផ្នែកហិរញ្ញវត្ថុ និងសេដ្ឋកិច្ចរបស់ រុស្ស៊ី ជាមួយពិភពលោក»។

វិធានការខាងលើអាចធ្វើឱ្យ GDP របស់ រុស្ស៊ី ថយចុះ ៦% នេះបើតាម Oxford Economics។ ចំណែកមន្ត្រីជាន់ខ្ពស់របស់ អាម៉េរិក មួយរូបថ្លែងថា៖ «និយាយឱ្យសាមញ្ញ យុទ្ធសាស្ត្ររបស់យើងគឺ ធានាថា សេដ្ឋកិច្ចរបស់ រុស្ស៊ី ត្រូវបានអូសទម្លាក់ចុះ បើសិនជា ប្រធានាធិបតី ពូទីន នៅតែបន្តសកម្មភាពដូចបច្ចុប្បន្ននៅ អ៊ុយក្រែន»៕

March 2, 2022

សមាជិកណាខ្លះរបស់អង្គការណាតូ (NATO) ដែលមានអាវុធនុយក្លេអែរ?

ណាតូ (NATO-North Atlantic Treaty Organization) គឺជាសម្ព័ន្ធមិត្តអន្តរជាតិ ដែលមានប្រទេសចំនួន ៣០ ជាសមាជិក មកពី ទ្វីបអឺរ៉ុប, អាម៉េរិកខាងជើង និង អាស៊ី។

ណាតូ ត្រូវបានបង្កើតឡើងនៅពេលចុះហត្ថលេខាលើសន្ធិសញ្ញាអាត្លង់ទិកខាងជើង កាលពីថ្ងៃទី ៤ មេសា ឆ្នាំ ១៩៤៩។ មាត្រាទី ៥ របស់សន្ធិសញ្ញានេះចែងថា បើសិនជាការវាយប្រហារប្រដាប់អាវុធកើតឡើង ប្រឆាំងនឹងសមាជិកណាមួយរបស់ ណាតូ នោះវានឹងត្រូវបានចាត់ទុកថា ជាការវាយប្រហារប្រឆាំងនឹងសមាជិកទាំងអស់ ហើយសមាជិកទាំងអស់នឹងជួយដល់សមាជិកដែលត្រូវបានវាយប្រហារ តាមរយៈកម្លាំងប្រដាប់អាវុធ បើសិនជាចាំបាច់។

ក្នុងចំណោម ៣០ ប្រទេស ដែលជាសមាជិករបស់ ណាតូ មាន ២៧ ប្រទេសនៅ អឺរ៉ុប, ២ នៅ អាម៉េរិកខាងជើង និង ១ នៅ អាស៊ី។ សមាជិកទាំងអស់សុទ្ធតែមានកងទ័ព លើកលែងតែ អ៊ីស្លង់ ដែលមានតែកម្លាំងការពារឆ្នេរ និងអង្គភាពតូចមួយ។ សមាជិកចំនួន ៣ របស់ ណាតូ មានអាវុធនុយក្លេអែរ គឺ បារាំង, អង់គ្លេស និង សហរដ្ឋអាម៉េរិក។

ដំបូងឡើយ ណាតូ មាន ១២ ប្រទេសជាសហស្ថាបនិក។ សមាជិកថ្មីចំនួន ៣ ត្រូវបានបញ្ចូលចាប់ពីឆ្នាំ ១៩៥២ ដល់ ១៩៥៥ និងសមាជិកថ្មី ១ ទៀត ដាក់បញ្ចូលក្នុងឆ្នាំ ១៩៨២។ ក្រោយពីសង្គ្រាមត្រជាក់បានបញ្ចប់ ណាតូ ក៏បានបន្ថែមសមាជិកថ្មីចំនួន ១៤ ទៀត រាប់ចាប់ពីឆ្នាំ ១៩៩៩ ដល់ ២០២០។

សមាជិកចំនួន ៣០ ប្រទេស របស់ ណាតូ រួមមាន បែលហ្សិក, កាណាដា, ដាណឺម៉ាក, បារាំង, អ៊ីស្លង់, អ៊ីតាលី, លុចសំបួ, ហូឡង់ (Netherlands ឬ Holland), ន័រវែស, ព័រទុយហ្គាល, អង់គ្លេស, សហរដ្ឋអាម៉េរិក, ក្រិក, តួកគី, អាល្លឺម៉ង់, អេស្ប៉ាញ, ឆែក, ហុងគ្រី, ប៉ូឡូញ, ប៊ុលហ្គារី, អេស្តូនី, ឡេតូនី, លីទុយអានី, រូម៉ានី, ស្លូវ៉ាគី, អាល់បានី, ក្រូអាស៊ី, ម៉ុងតេណេហ្គ្រោ និង ម៉ាសេដ្វានខាងជើង។

បច្ចុប្បន្ន មេដឹកនាំ (អគ្គលេខាធិការ) នៃអង្គការណាតូ គឺលោក Jens Stoltenberg អាយុ ៦២ ឆ្នាំ ជាជនជាតិន័រវែស។

March 2, 2022

(វីដេអូ)-គម្រោងសាងសង់រោងចក្រផលិតអគ្គិសនីដើរដោយថាមពលនុយក្លេអែរ ធំជាងគេបង្អស់ក្នុងពិភពលោក

ប្រទេសចិន កំពុងសាងសង់រោងចក្រអគ្គិសនីដើរដោយថាមពលនុយក្លេអែរ ខ្នាតយក្សមួយ នៅក្នុងខេត្ត Jiangsu ដែលមានសមត្ថភាពផលិតអគ្គិសនីស្អាតបាន ៧០ ពាន់លានគីឡូវ៉ាតម៉ោង/ឆ្នាំ។

គម្រោងរោងចក្រអគ្គិសនីដើរដោយថាមពលនុយក្លេអែរ Tianwan ស្ថិតក្នុងទីក្រុង Lianyungang របស់ខេត្ត Jiangsu ប្រទេសចិន ត្រូវបានចាប់ផ្ដើមសាងសង់ប្រព័ន្ធម៉ូទ័រផលិតអគ្គិសនីថ្មី (ប្រព័ន្ធទី ៨) កាលពីថ្ងៃទី ២៥ កុម្ភៈ។

ប្រព័ន្ធម៉ូទ័រផលិតអគ្គិសនីទី ៨ នេះ អាចផលិតបាន ១.២៦៥ លានគីឡូវ៉ាត់ ហើយគ្រោងនឹងដាក់ឱ្យដំណើរការពាណិជ្ជកម្មចាប់ពីឆ្នាំ ២០២៧។

បន្ទាប់ពីសាងសង់រួចរាល់ គម្រោងថ្មីនេះនឹងជួយបង្កើនថាមពលអគ្គិសនីរបស់រោងចក្រ Tianwan ឡើងដល់ជាង ៩ លានគីឡូវ៉ាត ហើយនឹងផលិតអគ្គិសនីស្អាតបានរហូតដល់ ៧០ ពាន់លានគីឡូវ៉ាត/ម៉ោងរៀងរាល់ឆ្នាំ អាចផ្គត់ផ្គង់ដល់គ្រួសារចំនួន ១០០ លានគ្រួសារ ក្នុងរយៈពេល ៣ ខែ។ ប្រការនេះស្មើនឹងការកាត់បន្ថយឧស្ម័នពុលកាបូន ១៥ លានតោន។

ក្រោយពីបញ្ចប់ការសាងសង់ជាស្ថាពរ Tianwan នឹងក្លាយជារោងចក្រផលិតអគ្គិសនីពីថាមពលនុយក្លេអែរ ធំជាងគេបង្អស់ក្នុងពិភពលោក ស្ដីពីបរិមាណនៃការផលិត។

ទន្ទឹមនឹងនេះ Tianwan ក៏ដំណើរការដោយសុវត្ថិភាព និងឆ្លាតវៃជាងមុន ហើយវាក៏ត្រូវបាន ចិន ចាត់ទុកថាជាភ័ស្ដុតាងបង្ហាញអំពីអ្វីដែលជាការសន្យាក្នុងការកាត់បន្ថយកាបូនរបស់ ប្រទេសចិន ផងដែរ។

March 2, 2022

បាតុភូត «បង្គោលពន្លឺ» រាប់សិប ដែលចាក់ឡើងត្រង់ទៅលើមេឃ ក្នុងរាត្រីត្រជាក់ខ្លាំង

(កាណាដា)-បាតុភូតបង្គោលពន្លឺកម្រឃើញ បានបង្ហាញខ្លួននៅភាគខាងជើងនៃខេត្ត Manitoba ក្នុងពេលអាកាសធាតុចុះត្រជាក់ខ្លាំង និងមិនមានខ្យល់។

Mark Matwick ដែលជាបុគ្គលិកនៅស្ថានីយប្ដូរចរន្តអគ្គិសនី Keewatinohk ក្បែរទីរួមស្រុក Gillam ភាគខាងជើងខេត្ត Manitoba របស់ កាណាដា ថតបានរូបភាពនៃបាតុភូតបង្គោលពន្លឺរាប់សិបដែលកំពុងចាក់ឡើងត្រង់ទៅលើមេឃ។ នេះបើតាមសារព័ត៌មាន Newsweek ចេញផ្សាយកាលពីថ្ងៃទី ២៨ កុម្ភៈ។

ក្រុមហ៊ុនថាមពល Manitoba Hydro ដែលជាស្ថាប័នគ្រប់គ្រងស្ថានីយ Keewatinohk បានឱ្យដឹងថា បាតុភូតចម្លែកនេះត្រូវបានហៅថា បង្គោលពន្លឺ។ នេះគឺជាបាតុភូតកម្រជួប ប៉ុន្តែ ជួនកាលកើតមានឡើងនៅភាគខាងជើង Manitoba ជាទីដែលអាកាសធាតុតែងតែចុះត្រជាក់ខ្លាំង សមស្របសម្រាប់បង្គោលពន្លឺបង្ហាញខ្លួន។

បង្គោលពន្លឺនេះគឺជាលទ្ធផលដែលកើតឡើងដោយសារគ្រាប់ល្អិតនៃទឹកកកក្នុងបរិយាកាស ធ្វើសកម្មភាពដូចទៅនឹងកញ្ចក់ឆ្លុះ ហើយចាំងប្លាតពន្លឺដែលចេញពីប្រភពនៅខាងក្រោម ក្នុងលក្ខខណ្ឌបរិយាកាសពេលយប់ចុះត្រជាក់ខ្លាំង និងមិនមានខ្យល់។

March 2, 2022

ស្ថានភាពខ្ទេចខ្ទីនៃបណ្ដាទីក្រុងរបស់ អ៊ុយក្រែន ដែលរងការវាយប្រហារពី មីស៊ីល របស់ រុស្ស៊ី

ទីក្រុង Kharkov, Mariupol និង Bucha រងការវាយប្រហារពីអាកាសយ៉ាងធ្ងន់ធ្ងរ បណ្ដាលឱ្យផ្ទះសំបែង និងរថយន្តយោធាត្រូវខ្ទិចខ្ទី ខណៈប្រជាជនស៊ីវិលជាច្រើនបានបាត់បង់ជីវិត នៅក្នុងថ្ងៃទី ៦ នៃសង្គ្រាមដែលបញ្ឆេះឡើងដោយ រុស្ស៊ី នៅលើទឹកដីរបស់ អ៊ុយក្រែន។

កម្លាំងសង្គ្រោះរបស់ អ៊ុយក្រែន នាំយកសាកសពជនរងគ្រោះម្នាក់ចេញពីសាលាក្រុង បន្ទាប់ពី រុស្ស៊ី បានបន្តក់គ្រាប់ប្លោងលើ Kharkov កាលពីថ្ងៃទី ១ មីនា។ មនុស្សយ៉ាងតិច ១១ នាក់ បានស្លាប់ និង ២០ នាក់ រងរបួស ក្នុងការវាយប្រហារនេះ។

ទិដ្ឋភាពខ្ទិចខ្ទាំនៅខាងមុខអគាររដ្ឋបាលរបស់ទីក្រុង Kharkov ក្រោយការប្រយុទ្ធគ្នាកាលពីម្សិលមិញ។ គិតមកដល់យប់ថ្ងៃទី ១ មីនា Kharkov ដែលជាទីក្រុងធំជាងគេលំដាប់ទី ២ របស់ អ៊ុយក្រែន នៅតែត្រូវរងការវាយប្រហារយ៉ាងខ្លាំងក្លា ពី កងទ័ពរុស្ស៊ី។

បុគ្គលិកសុខាភិបាល បញ្ជូនអ្នករងរបួសដោយសារគ្រាប់ប្លោង ចូលទៅក្នុងមន្ទីរពេទ្យបណ្ដោះអាសន្ន នៅ Mariupol កាលពីម្សិលមិញ។ ការប្រយុទ្ធគ្នារវាង កងទ័ពអ៊ុយក្រែន និង កងទ័ពរុស្ស៊ី នៅទីក្រុង Mariupol បានបណ្ដាលឱ្យមនុស្សជាច្រើនរងរបួសធ្ងន់ ខណៈដែលសង្គ្រាមនៅ អ៊ុយក្រែន បានឈានចូលដល់ថ្ងៃទី ។

សាកសពរបស់ជនរងគ្រោះម្នាក់ដែលបានត្រូវគ្រាប់មីស៊ីល នៅក្នុងតំបន់ប្រជុំជន ត្រូវបានគេដាក់ក្នុងមន្ទីរពេទ្យបណ្ដោះអាសន្ន Mariupol។

កងទ័ពស្ម័គ្រចិត្តម្នាក់របស់ អ៊ុយក្រែន ឈរក្បែរយានយោធារបស់ រុស្ស៊ី ដែលត្រូវបានកម្ទេចនៅ Bucha ក្បែរ រដ្ឋធានីកៀវ។

អភិបាលក្រុង Okhtyrka បានឱ្យដឹងថា ទាហាអ៊ុយក្រែន ជាង ៧០ នាក់ បានស្លាប់ នៅពេល រុស្ស៊ី បាញ់មីស៊ីលសំដៅមូលដ្ឋានទ័ពនៅទីនេះ។

បច្ចុប្បន្ន កងទ័ពរុស្ស៊ី ដណ្ដើមបានទីក្រុង Berdyansk និង ទីក្រុង Enerhodar ដែលស្ថិតក្នុងភាគអាគ្នេយ៍របស់ អ៊ុយក្រែន ក៏ដូចជាតំបន់ជុំវិញរោងចក្រថាមពលនុយក្លេអែរ Zaporizhzhya។

ទាហានអ៊ុយក្រែន សម្រាក និងហូបអាហារយកកម្លាំង បន្ទាប់ពីបានប្រយុទ្ធតទល់នឹង ទាហានរុស្ស៊ី នៅភាគខាងជើងនៃ រដ្ឋធានីកៀវ កាលពីម្សិលមិញ។

ប្រជាជនអ៊ុយក្រែន បើកបររថយន្តទៅកាន់ព្រំដែនជាមួយ ប៉ូឡូញ ដែលស្ថិតនៅក្បែរតំបន់ Cernivtsi កាលពីថ្ងៃទី ១ មីនា។

March 2, 2022

Author: សឿន សំណាង