Julian Assange ដែលជាស្ថាបនិករបស់ទំព័រ WikiLeaks ដែលបានបញ្ចេញឯកសារសម្ងាត់រាប់សែនច្បាប់របស់រដ្ឋាភិបាលអាម៉េរិក ថ្ងៃនេះ រៀបការជាមួយ Stella Moris នៅក្នុងពន្ធនាគារ Belmarsh ភាគអាគ្នេយ៍របស់ ក្រុងឡុងដ៍ ចក្រភពអង់គ្លេស។
«យើងសប្បាយរីករាយណាស់ បើទោះស្ថានភាពចង្អៀតចង្អល់ខ្លាំង» កូនក្រមុំ Moris និយាយដូច្នេះ និងបន្តថា «ភ្ញៀវកិត្តិយសដែលត្រូវបានអញ្ជើញ និងគ្រប់គ្នាដែលបានឃើញ ត្រូវចាកចេញភ្លាមៗ ក្រោយពីពិធីរៀបការបានបញ្ចប់»។
ភ្ញៀវតែ ៤ នាក់ប៉ុណ្ណោះ ដែលត្រូវបានអនុញ្ញាតឱ្យចូលរួមពិធីរៀបការនេះ។ ក្រៅពីនេះ មន្ត្រី ២ រូប និងឆ្មាំពន្ធនាគារ ២ រូប ក៏នឹងមានវត្តមាននៅក្នុងពិធីនេះ។
នាង Moris រៀបរាប់ថា Assange ទន្ទឹងរង់ចាំពិធីរៀបការនេះណាស់ ក្រោយរយៈពេលជាច្រើនខែដែលពួកគេបានស្នើសុំរៀបការក្នុងពន្ធនាគារ។
Moris បានជួប Assange កាលពីឆ្នាំ ២០១១ ដែលកាលណោះនាងមានវ័យ ២៨ ឆ្នាំ និងកំពុងធ្វើជាមេធាវី ចំណែក Assange មានអាយុ ៤០ ឆ្នាំ កំពុងជ្រកកោនក្នុងស្ថានទូត អេក្វាទ័រ នៅ ទីក្រុងឡុងដ៍។ ពួកគេមានកូនប្រុស ២ នាក់ ដែលសុទ្ធតែមានសញ្ជាតិអង់គ្លេស។
លោក Julian Assange ស្ថាបនិករបស់ទំព័រ WikiLeaks ក្រុមអ្នកគាំទ្ររបស់ Assange គ្រោងនឹងប្រារព្ធពិធីជួបជុំគ្នាមួយនៅខាងក្រៅពន្ធនាគារនៅក្នុងថ្ងៃនេះ ដើម្បីអប់អរមង្គលការ។
WikiLeaks កាលពីឆ្នាំ ២០១០ បានបង្កការភ្ញាក់ផ្អើលយ៉ាងខ្លាំងនៅទូទាំងសកលលោក នៅពេលប្រកាសបង្ហាញឯកសារសម្ងាត់រាប់ពាន់ច្បាប់របស់ សេតវិមាន ដែលនិយាយអំពីសកម្មភាពយោធារបស់ អាម៉េរិក នៅ អ៊ីរ៉ាក់ និង អាហ្វហ្គានីស្ថាន។ ឆ្នាំដដែល WikiLeaks ក៏បានបញ្ចេញឯកសារជាង ២៥០,០០០ ច្បាប់ របស់ ក្រសួងការបរទេសអាម៉េរិក ដែលមានផ្ទុកនូវការវាយតម្លៃដ៏សំខាន់ចំពោះបណ្ដារដ្ឋាភិបាល និងនយោបាយរបស់ប្រទេសដទៃ។
ក្រុមមន្ត្រីអាម៉េរិក និងលោកខាងលិច ចាត់ទុក Assange ថាជា «សត្រូវដ៏គ្រោះថ្នាក់សម្រាប់ប្រទេសជាតិ» ដោយយល់ថា សកម្មភាពរបស់ Assange បានគំរាមកំហែងដល់អាយុជីវិតរបស់មន្ត្រីស៊ើបការណ៍សម្ងាត់ទាំងឡាយដែលមានឈ្មោះនៅក្នុងឯកសារបែកធ្លាយនោះ។
ប៉ុន្តែ ក្រុមអ្នកគាំទ្ររបស់ Assange បានចាត់ទុកថា ស្ថាបនិករបស់ WikiLeaks គឺជាជនរងគ្រោះរបស់ អាម៉េរិក ដែលបានបកអាក្រាតនូវសកម្មភាពខុសឆ្គងរបស់រដ្ឋាភិបាលប្រទេសនេះក្នុងសង្គ្រាមនៅ អាហ្វហ្គានីស្ថាន និង អ៊ីរ៉ាក់។
អ្នកស្រី Stella Moris និងកូនៗ Assange អាយុ ៥១ ឆ្នាំ បានជ្រកកោនក្នុងស្ថានទូត អាក្វាទ័រ នៅ ក្រុងឡុងដ៍ អស់រយៈពេល ៥ ឆ្នាំ មុននឹងត្រូវបាន អាជ្ញាធរអង់គ្លេស ចាប់ខ្លួនកាលពីឆ្នាំ ២០១៩ ដោយមានការយល់ព្រមពីមន្ត្រីរបស់ ប្រទេសអេក្វាទ័រ និងឃុំខ្លួននៅពន្ធនាគារ Belmarsh ក្នុងរយៈពេល ១២ ខែ។ គាត់ត្រូវបានគេឃុំខ្លួនបន្តនៅទីនេះ បន្ទាប់ពីមានអន្តរាគមន៍ពី សហរដ្ឋអាម៉េរិក។
កាលពីខែធ្នូ ២០២១ តុលាការកំពូលអង់គ្លេស បានអនុញ្ញាតឱ្យធ្វើបត្យាប័ន នាំខ្លួន Assange ទៅកាត់ទោសនៅ សហរដ្ឋអាម៉េរិក ព្រោះរំលោភច្បាប់ប្រឆាំងចារកម្ម និងវាយប្រហារលើប្រព័ន្ធកុំព្យូទ័ររបស់រដ្ឋាភិបាល។ Moris ប្រកាសថា នឹងជំទាស់ការសម្រេចនេះនាពេលដ៏ខ្លីខាងមុខ៕
